I Mas i Gat Pait o Olsem Wanem?

LONG olgeta taim ol nius na redio samting i save stori long ol pait i save kamap. Ating ol stori na piksa bilong ol dispela pait nogut i save bagarapim tru bel bilong yu, a? Tasol ating dispela i save kirapim tingting bilong yu na yu ting, bilong wanem ol lain i mas mekim wok long ol gan na bom samting bilong stretim ol kros bilong ol? Ating ol man i no inap lain long i stap isi na i no pait moa, a?

I olsem ol i hatwok moa yet long painim rot bilong pinisim ol pait, winim hatwok bilong pinisim sik AIDS. Long taim bilong yumi ol bikpela kantri i bin redim ol samting bilong pait na ol i salim planti milion man i go long pait, na planti handet biktaun i bagarap olgeta. Na i olsem ol dispela pait i no ken pinis. Planti kantri i gat bikpela bisnis tru long wokim ol samting bilong pait na salim long ol narapela kantri na ol lain i save birua long gavman, na ol ami na ol dispela lain bai wok yet long bagarapim ol man long pait.

Nau ol i wokim ol samting nogut tru bilong pait na i bagarapim planti man moa. Long Namba Wan Pait bipo, i gat 65 milion soldia i pait, na winim 30 milion i bin dai o kisim hap bagarap long pait. Orait 30 yia samting bihain, tupela bom atom tasol i bin bagarapim 150,000 Japan em ol i no soldia. Bihain long Namba 2 Pait, planti pait i bin kamap namel long ol lain insait long wanpela kantri, tasol planti manmeri nating i bagarap long pait, winim ol soldia.

Yumi kirap nogut, long wanem, ol dispela pait nogut i kamap insait long taim ol gavman i wok strong long tambuim pait olsem rot bilong stretim ol kros namel long ol kantri. Taim ol bikpela kantri i mekim dai kros, nau ol i ting nupela taim na bel isi bai kamap long graun, tasol dispela pasin wanbel i no kamap. Bilong wanem?

Tru i Mas i Gat Pait?

Sampela saveman ol i tok, i mas i gat pait bilong skelim ol man​—⁠ol man i gat strong bai ol i stap laip. Wanpela saveman bilong ol samting bilong pait, em Friedrich von Bernhardi, em i bihainim dispela tingting na long 1914 em i tok, ‘pait i save helpim ol man long sindaun bilong ol na ol narapela samting tu.’ Ol dispela lain i ting pait em i gutpela bilong pinisim ol man o ol lain i no gat strong na bai ol strongpela man tasol i stap.

Tasol dispela kain tok i no inap mekim gut bel bilong ol meri na pikinini em man bilong ol o papa i bin dai long pait, a? Ol man i mekim dispela kain tok ol i laik haitim ol samting nogut tru i kamap long ol pait bilong nau. Masin-gan na bom i save bagarapim ol strongpela man wantaim man i no gat strong.

Adolf Hitler i bin tingting long kamapim wanpela strongpela lain tru long rot bilong pait na daunim ol narapela lain. Long buk bilong em (Mein Kampf) em i tok: ‘Ol lain man i bin kamap strong long rot bilong pait, tasol taim ol i stap isi na i no gat pait, ol i bagarap. Ol strongpela lain i mas bosim ol lain i no gat strong, na i no ken i stap namel long ol.’ Tasol wok bilong Hitler i no bin helpim ol lain man long kamap strong​—⁠em i bagarapim planti milion manmeri na bagarapim planti kantri.

Tasol sapos pait i no wanpela samting i mas kamap, orait wanem dispela strong i wok long kirapim ol lain man long pait na bagarapim ol narapela lain, olsem “wok bisnis bilong ol haiden”?a Orait, nau yumi ken skelim sampela samting i save pasim rot bilong ol man ol i wok strong long pinisim ol pait na kamapim pasin sekan.

As Bilong Ol Pait

Litimapim kantri. Planti taim ol lain politik na ol bikpela kepten bilong ami ol i save kirapim ol man long litimapim kantri bilong ol. Em wanpela bikpela as bilong kirapim pait. Planti pait i bin kamap bilong “helpim kantri” o helpim “nem bilong kantri.” Taim man i gat strongpela tingting long litimapim kantri bilong em, em bai painim rot bilong tok, i stret ol i mas kirapim pait​—⁠em bilong bagarapim ol samting bilong pait ol birua i holim na ol i no inap mekim wok long en bilong bagarapim kantri bilong em.

Narapela lain i bel nogut long narapela lain. Dispela pasin i as bilong planti pait i bin kamap, olsem ol bikpela pait nogut i kamap long hap bipo ol i kolim Yugoslavia, na Laibiria, na Somalia long nau.

Ol kantri i resis long kisim bikpela mani na planti samting bilong pait. Taim Namba Wan Pait i no kamap yet, long skin i olsem gutaim i stap. Tasol ol kantri long Yurop i wok long bungim ol samting bilong pait wantaim bikpela lain ami. Jemani na Briten i resis wantaim long wokim ol traipela sip bilong pait. Ol strongpela kantri i bilip olsem pait em i rot bilong kisim strong bilong bosim ol narapela lain na ol bai kisim bikpela mani samting long en. Dispela tingting i mekim na bihain ol i go insait long pait.

Pait bilong lotu. Ol man i bruk long ol narapela narapela lain na lotu, na dispela i bin kamapim pasin birua na pait. Ol pait i kamap long Lebanon na Noten Aialan, na pait i kamap namel long India na Pakistan, em lotu i as bilong en​—⁠narapela lotu i birua long narapela lotu.

Wanpela man yumi no inap lukim, em i kirapim bel bilong ol man long pait. Baibel i tokaut olsem Satan, em “god bilong dispela graun,” em i wok strong tru long nau. (2 Korin 4:⁠4) Em i belhat nogut tru na “em i gat sotpela taim tasol,” olsem na em i wok long kirapim ol pasin na ol pait tu i kamapim ol bikpela hevi moa yet long graun.​—⁠KTH 12:⁠12.

I hatwok tru long pinisim ol dispela as bilong pait. Inap 2,000 yia bipo Pleto i bin tok, “ol man i dai pinis ol tasol i no inap lukim moa ol pait.” Tasol yu ting tok bilong em i tru na yumi mas ting olsem pait i no ken pinis long graun? O yu ting i gat as na yumi ken bilip olsem bihain bai i no gat pait moa long graun?

[Ol Futnot]

[Piksa Kredit Lain long pes 2]

Cover: John Singer Sargent’s painting Gassed (detail), Imperial War Museum, London

[Piksa Kredit Lain long pes 3]

Instituto Municipal de Historia, Barcelona