Ol i Kamapim Pasin Nogut

BAIBEL i tokaut olsem ol spirit nogut i save stiaim sampela wok bilong ol man, na nau yumi ken save long as bilong ol pasin nogut i save kamap. Wanpela nius (International Herald Tribune) i stori long bikpela pait long hap bilong Bolkan na i tok: ‘Wanpela lain bilong Yurop i kisim save olsem ol [soldia] i bin reipim 20,000 meri na yangpela meri​—⁠em bilong pretim na daunim ol na bagarapim bel bilong ol na bai ol i lusim ples bilong ol.’

Wanpela stori i kamap long nius (Time) i laik kamapim as bilong dispela pasin nogut, na i tok: ‘Sampela taim ol yangpela man insait long pait i save reipim meri na bai ol bikman o ofisa bilong ol i ken laikim ol. Taim ol i reipim meri, dispela i makim olsem ol i laik kamapim strongpela pasin bilong lain ami bilong ol. Taim yangpela man i orait long mekim ol pasin nogut tru, i olsem em i daunim maus bilong bel na bai em i ken pas olgeta long ol lo na wok bilong dispela lain​—⁠i olsem dispela pasin nogut i strongim promis bilong em long i stap gut long dispela wok.’

Tasol bilong wanem “ol lo na wok bilong dispela lain” i nogut moa yet? Klostu olgeta wan wan man i laik i stap gut wantaim ol narapela man, a? Orait, long taim bilong pait, bilong wanem ol man i save reipim ol meri na mekim nogut tru long ol man na kilim ol i dai? Wanpela bikpela as bilong en, em ol spirit nogut i wok long kirapim ol long mekim olsem.

Sapos yumi save long wok bilong ol spirit nogut, dispela bai helpim yumi long stretim wanpela tingting ol i kolim “hevi bilong ol tisa bilong misin.” Yumi mas skelim tripela samting olsem: (1) God i gat olgeta strong; (2) God i gat pasin sori na gutpela pasin; (3) ol samting nogut tru i save kamap. Sampela i ting, tupela bilong dispela tripela tok i ken stret wantaim, tasol tripela, nogat. Baibel inap tokim yumi stret long dispela, na em i tok ol spirit nogut ol i save kirapim ol man long mekim ol pasin nogut tru.

Namba Wan Ensel i Bikhet

Baibel i tok, God yet em i wanpela spirit. (Jon 4:24) Bihain em i wokim planti milion milion spirit moa, em ol pikinini bilong em. Long driman wanpela wokman bilong God, em Daniel, em i lukim wan handet milion ensel. Olgeta spirit o ensel God i bin wokim, ol i gutpela ensel na ol i bihainim laik bilong em.​—⁠Daniel 7:10; Hibru 1:⁠7.

Bihain, taim God i “wokim na strongim as bilong dispela graun” ol ensel “i amamas na singaut.” (Jop 38:​4-7) Tasol bihain wanpela ensel i kisim laik nogut​—⁠em i laik bai ol man i lotuim em, maski i stret ol i mas lotuim Man bilong wokim olgeta samting. Taim dispela ensel i bikhet long God em i kamap Satan (olsem birua), na man bilong bagarapim gutnem bilong man.​—⁠Lukim Esekiel 28:​13-15.

Long maus bilong wanpela snek long Iden, Satan i kirapim namba wan meri Iv long sakim tok bilong God na kaikai pikinini bilong wanpela diwai long gaden em God i bin tambuim. Bihain man bilong Iv i bikhet long God na em tu i kaikai. Em nau, namba wan man na meri i bihainim Satan long mekim pasin bikhet long God.​—⁠Stat 2:17; 3:​1-6.

Ol dispela samting i bin kamap long Iden i skulim yumi long pasin bilong bihainim tok. Tasol i no dispela samting tasol yumi mas tingim. I gat tupela bikpela tok Satan i bin kamapim long dispela taim. Namba wan i olsem: Satan i skelim pasin bilong Jehova long bosim ol man​—⁠em i mekim long stretpela pasin na em i tingim ol man o nogat? I olsem Satan i tok, sapos ol man yet i bosim sindaun bilong ol, ating ol bai mekim gutpela wok, winim God. Na namba 2 i olsem: Sapos ol man i bihainim tok bilong God na em i no helpim ol long ol samting bilong skin, ol i no ken i stap gut long em.a

Sapos yumi save gut long ol samting i bin kamap long Iden, na yumi save long ol gutpela pasin bilong Jehova, bai yumi save long ol tok bilong stretim “hevi bilong ol tisa bilong misin,” olsem God i gat bikpela strong na em i gat pasin sori, tasol ol samting nogut tru i save kamap. Tru, Jehova i gat olgeta strong na em i as tru bilong sori, tasol em i gat gutpela tingting na pasin i stret. Em i save mekim gutpela wok long dispela 4-pela pasin bilong em. Olsem na maski em i gat strong, em i no bagarapim dispela 3-pela bikhetman wantu tasol. Tru, sapos em i bin mekim olsem, dispela i stret, tasol i no pasin bilong gutpela tingting o pasin sori. Na em i no lusim rong bilong ol na lusim tingting long en, nogat. Ating sampela bai ting, sapos em i bin mekim olsem, dispela em i pasin sori. Tasol em i no pasin bilong gutpela tingting, na i no stret tu.

I mas i gat bikpela hap taim bilong stretim dispela tok Satan i bin kamapim. Na i mas i gat bikpela hap taim bambai ol man i ken kamapim klia olsem ol yet inap bosim gut sindaun bilong ol o nogat. God i larim 3-pela bikhetman i stap na bai ol man inap mekim wok bilong God na stap gut long em, maski wanem hevi i painim ol, na dispela bai kamapim long ples klia olsem tok bilong Satan i giaman.b

Jehova i bin tok klia long Adam tupela Iv, sapos ol i kaikai pikinini bilong diwai tambu, bai ol i dai. Na tru tumas, tupela i dai, maski Satan i tokim Iv em i no ken dai. Na Satan tu i kot pinis na God i makim em bilong i dai, tasol nau em i wok yet long paulim ol man. Baibel i tok klia: “Dispela graun olgeta em i stap aninit long strong bilong Satan.”​—⁠1 Jon 5:⁠19; Stat 2:​16, 17; 3:4; 5:⁠5.

Sampela Ensel Moa i Bikhet

Taim ol dispela samting i kamap pinis long Iden, i no longtaim tumas na sampela ensel moa i bikhet long wok king bilong Jehova. Baibel i tok: “Bihain planti manmeri i kamap pinis long graun, na ol i gat ol pikinini meri. Ol pikinini man bilong God i lukim ol dispela meri i naispela tumas. Na ol i kisim ol meri long laik bilong ol yet na maritim ol.” Em nau, ol dispela ensel i “no laik i stap gut long dispela wok God i bin givim ol, na ol i lusim ples bilong ol [long heven]” na ol i kam daun long graun na tanim i kamap man, na ol i kisim amamas long mekim maritpasin wantaim ol meri.​—⁠Stat 6:​1, 2; Jut 6.

Na long Stat 6:4 Baibel i stori moa olsem: “Long dispela taim na long taim bihain tu i bin i gat ol traipela man i stap long graun. Ol dispela man i pikinini bilong ol meri i bin slip wantaim ol pikinini man bilong God. Ol i strongpela man tru . . . na ol i gat biknem.” Ol dispela pikinini em ol ensel i bin kamapim, ol i “strongpela man tru,” na ol i man bilong pait na bagarapim man.

Ol lain i bin kamap bihain ol i gat stori bilong ol dispela samting i bin kamap. Olsem: Wanpela olpela rait bilong ol Babilon i gat 4 tausen yia bilong en i stori long Gilgames, em strongpela man tru bilong pait, na em i kain olsem wanpela god; em i ‘man bilong mekim pasin pamuk wantaim ol yangpela meri.’ Na ol Grik i gat wanpela stori long Hekulis, em i strongpela man tru. Mama bilong em, em Alkmini, em meri bilong graun, na papa em god Sus. Hekulis i kamap longlong na i kilim i dai meri pikinini bilong em, na bihain em i raun na bagarapim ol man. Tru, taim ol lain i kolim dispela stori long ol pikinini, na ol pikinini i kolim gen long ol pikinini bilong ol, i go i go olsem, ol dispela stori i save paul, tasol ol i olsem wankain long tok bilong Baibel i stori long ol strongpela man tru, em ol pikinini bilong ol ensel i bin bikhet long God.

Ol dispela ensel nogut na ol pikinini man bilong ol, ol i mekim na pasin bilong pait i pulap tru long graun. Olsem na Jehova i kamapim bikpela tait wara bilong bagarapim ol man bilong graun. Ol dispela strongpela man i bagarap wantaim olgeta narapela manmeri i bin givim baksait long God; Noa wantaim lain bilong em tasol ol i abrusim bagarap na i stap laip.​—⁠Stat 6:11; 7:⁠23.

Tasol ol ensel nogut i no bagarap. Ol i tanim i kamap spirit gen na i go bek long ples spirit. Tasol ol i bin bikhet long God, olsem na em i no larim ol i go bek insait long famili bilong God, em ol stretpela ensel; na God i no larim ol i tanim i kamap man gen olsem ol i bin mekim long taim bilong Noa. Tasol ol i wok yet long paulim ol man i stap aninit long “strong bilong hetman bilong ol spirit nogut,” em Satan.​—⁠Matyu 9:34; 2 Pita 2:4; Jut 6.

Birua Bilong Ol Man

Long olgeta taim Satan wantaim ol spirit nogut ol i man bilong bagarapim ol man na ol narapela samting tu. Long kain kain rot Satan i bin kisim olgeta lain bulmakau sipsip samting i go, na em i kilim i dai klostu olgeta wokboi bilong Jop. Bihain Satan i kirapim “wanpela bikpela win” bilong bagarapim haus em tenpela pikinini bilong Jop i stap long en, na olgeta i dai. Orait nau Satan i mekim na “ol strongpela sua i kamap long olgeta hap bilong bodi bilong Jop.”​—⁠Jop 1:​7-19; 2:​3, 7.

Ol spirit nogut tu i gat wankain pasin bilong mekim nogut long man. Long taim bilong Jisas ol i bin mekim na man i kamap mauspas o aipas. Ol i bin kirapim wanpela man long katkatim skin bilong em long ston. Ol i tromoi wanpela manki long graun na “mekim em i guria nogut tru.”​—⁠Luk 9:42; Matyu 9:​32, 33; 12:22; Mak 5:5.

Long nau tu, ol samting i kamap i makim klia olsem ol spirit nogut i wok yet long mekim nogut long ol man. Ol i givim sik long sampela. Na ol i mekim na sampela i no inap slip, o ol i givim driman nogut long ol o mekim pasin sem long ol. Na ol i mekim na sampela man i kamap longlong o ol i kilim i dai man o kilim i dai ol yet.

God Bai Larim Ol i Stap?

God i no ken larim Satan wantaim ol spirit nogut i stap oltaim. I gat gutpela as na Jehova i bin larim ol i stap inap long nau, tasol nau taim bilong ol i sot. Long taim bilong yumi wanpela bikpela samting i kamap na i pasim rot bilong ol long mekim sampela samting. Long hap bilong Kamapim Tok Hait Baibel i tok: “Bikpela pait i kirap long heven. Maikel [em Krais Jisas taim em i kirap bek] wantaim ol ensel bilong en ol i pait long dispela traipela snek [Satan]. Na snek wantaim ol ensel bilong en ol i bekim pait long ol, tasol ol i no gat strong bilong winim pait. . . . Na ol ensel bilong God i tromoi dispela snek i go daun . . . ol i kolim em Satan . . . Ol i tromoi em i go daun long graun, na ol i tromoi ol ensel bilong en i go daun wantaim em.”​—⁠KTH 12:​7-9.

Na Baibel i tok moa: “Olsem na . . . yupela olgeta lain i stap long heven, yupela i ken amamas.” Ol gutpela ensel i ken amamas, long wanem, Satan wantaim ol spirit nogut i no stap moa long heven. Tasol olsem wanem long ol man bilong graun? Baibel i tok: “Yu graun, na yu solwara, yupela lukaut. Bikpela hevi i laik kamap long yupela. Satan i go daun pinis long yupela, na em i belhat nogut tru. Em i save, em i gat sotpela taim tasol bilong i stap.”​—⁠KTH 12:⁠12.

Satan wantaim lain bilong em ol i save taim bilong ol i sot, olsem na ol i belhat na i laik kamapim bikpela hevi moa long graun. Long taim bilong yumi, tupela bikpela pait bilong olgeta hap i kamap pinis, na planti pait moa i kamap bihain long Namba 2 Pait, winim 150. Long nau yumi save harim kain kain tok i makim ol samting nogut i kamap long nau, olsem “mekim pait long rot bilong ol binatang nogut bilong bagarapim man,” na “Bikpela Bagarap,” na “graun bilong kilim i dai ol man,” na “ol kem bilong reipim ol meri,” na “man bilong bagarapim ol narapela narapela man,” na “dispela bom” (olsem bom atom). Na ol nius i stori planti long ol drak, na bagarapim man, na tromoi bom long ol man, na ol man i gat sik longlong na ol i kaikai skin bilong man, na kilim i dai planti man, na bikpela hangre, na givim bikpela pen long man.

Tasol gutpela tru, ol dispela samting i no ken stap longtaim. Liklik taim God bai kirap na pasim Satan wantaim ol spirit nogut bilong em. Aposel Jon i stori long samting em i lukim long piksa em God i givim long em, olsem: “Wanpela ensel i lusim heven na i kam daun. . . . Em i holim ki bilong hul i no gat as. Na em i holim bikpela sen tu. Em i holimpas dispela bikpela snek, . . . em Satan, . . . na ensel i pasim em long sen na em bai i stap olsem inap long 1,000 yia. Na ensel i tromoi em i go daun long hul i no gat as, na i pasim dua bilong dispela hul na i lokim strong. Olsem na Satan bai i no inap giamanim moa ol manmeri.”​—⁠KTH 20:​1-3.

Bihain ol bai opim dua bilong hul na Satan wantaim ol spirit nogut bai “lusim kalabus” inap liklik taim, na bihain long en ol bai bagarap inap oltaim oltaim. (KTH 20:​3, 10) Gutpela taim tru bai kamap! Satan wantaim ol spirit nogut bai pinis olgeta, na Jehova “bai i stap het tru bilong olgeta samting.” Na olgeta manmeri bai “sindaun gutpela tumas na amamas i stap.”​—⁠1 Korin 15:28; Song 37:⁠11.

[Ol Futnot]

[Piksa long pes 7]

Yu ting ol man tasol i gat asua long ol dispela samting, o wanpela man nogut yumi no inap lukim, em tu i gat asua long dispela?

[Kredit Lain]

Oil wells burning in Kuwait, 1991: Chamussy/Sipa Press

[Piksa long pes 7]

Taim ol spirit nogut i no inap mekim nogut moa long ol man, bai gutpela taim tru i kamap!