‘Han Bilong Jehova’ i Stiaim Mi
EM STORI BILONG LAWRENCE THOMPSON
WANPELA nait long 1946 mi wantaim papa i sindaun long ka na lukluk long ol gutpela lait i gat kala kala ol i kamap long skai. Mipela i stori long ol bikpela wok bilong Jehova, em i bikpela Man tru, na mipela i olsem samting nating tasol. Na mipela i stori long taim gavman i bin tambuim wok bilong ol Witnes Bilong Jehova long Kanada. Papa i tokim mi, Jehova i bin strongim na stiaim lain bilong em long ol dispela yia i gat tambu long wok bilong ol.
LONG dispela taim mi gat 13 krismas tasol, tasol mi save tok bilong papa i stret. Papa i laik bai mi pilim tru olsem i gat bikpela wok i stap yet bilong autim tok, na i no gat bikpela hap taim moa bilong mekim. Em i kamapim tok bilong Namba 11:23 na em i tok, han bilong Jehova i no sot. Tasol sapos yumi no bilip strong long em, bai em i no helpim yumi tumas. Mitupela papa i bin toktok gut wantaim, na mi no inap lusim tingting long ol dispela tok.
Taim mi yangpela mi bin stadi long ol buk samting bilong Sosaiti Was Taua, olsem wanpela buk (Salvation) ol i bin wokim long 1939, na dispela tu i bin stiaim gut wokabaut bilong mi. Mi tingim yet wanpela tok piksa buk i mekim, olsem: ‘Ol pasindia i pulap long wanpela tren na tren i spit i go, inap 160 kilomita long olgeta wan wan aua. Tren i mas ran long wanpela bris bilong brukim wara . . . Tupela man i sindaun long baksait bilong tren . . . ol i lukim wanpela hap bilong bris long hap i go em i paia na ol hap bilong bris i wok long pundaun insait long wara. Tupela i save, bikpela bagarap bai kamap. Ol i mas mekim kwik wanpela samting. Olsem wanem? Draiva inap pasim tren hariap na bai ol pasindia i ken abrusim bagarap?’
Laspela tok bilong buk i kamapim insait bilong dispela tok piksa, olsem: “Long nau wanpela bikpela bagarap tru i laik painim olgeta lain bilong graun. Lain bilong God i wok long givim toksave bilong God long ol olsem bikpela bagarap bilong Armagedon i klostu pinis. . . . Taim ol i kisim pinis dispela toksave, olgeta wan wan i harim pinis ol i mas tingim wanem rot ol i laik bihainim.”
Tok piksa bilong tren i spit i go, na bris i paia, na i no gat bikpela hap taim bilong mekim wok autim tok, ol dispela samting i pas strong long tingting bilong mi.
Autim Tok Long Bipo
Mi kirap autim tok long yia 1938, taim mi gat 5-pela krismas. Henry na Alice Tweed em tupela painia (ol i autim tok long olgeta de), na ol i save kisim mi i go wantaim ol na mipela i autim tok olsem 10-pela i go inap 12-pela aua long ol wan wan de. Mi bin amamas tru long lusim planti aua long mekim wok bilong Jehova. Olsem na taim papamama i orait long mi ken kamap pablisa long yia antap na putim ripot bilong dispela wok, mi amamas moa yet.
Long dispela taim bipo mipela save pasim long skin ol strongpela pepa i gat rait long en i kamapim rong bilong ol lotu giaman na i tokaut long Kingdom bilong God, na mipela i save wokabaut i go i kam long rot na ol man i lukim. Na mipela karim pikap na putim long lata bilong ol haus na kamapim ol tok bilong Baibel. Mipela kamapim ol tok bilong J. F. Rutherford, em presiden bilong Sosaiti Was Taua bipo. Mi bin harim planti taim, na sampela tok mi inap kolim nating long maus. Mi tingim yet tok bilong em: “Lotu em i samting bilong kalabusim man na em i giaman tasol!”
Kanada i Tambuim Dispela Wok
Long taim bilong Namba 2 Pait, ol i tambuim wok bilong ol Witnes Bilong Jehova long Kanada, olsem ol Natsi i bin mekim long Jemani na sampela hap moa. Maski mipela i holim Baibel tasol, mipela i mekim yet dispela wok God i bin givim long mipela, olsem Baibel i makim. (Matyu 28:19, 20; Aposel 5:29) Ol polis i save kam long taim mipela i miting na ol i kam long haus bilong mipela na holim mipela. Tasol mipela i lain long karim dispela hevi. Na mipela i lain tu long sanap long kot na bekim tok long jas.
Mi na brata bilong mi Jim i bin lain gut long pasin bilong raun long ka na tromoi ol liklik buk i go long lata na veranda bilong ol haus. Na sampela taim mipela hait na helpim ol brata i laik brukim boda na go long ol kibung long Amerika.
Mipela bin sindaun long Pot Ata, long Onterio, long wanpela hap graun inap olsem wanpela hekta, na bus i banisim dispela graun. Mipela i gat wanpela bulmakau na pikinini bulmakau, na sampela pik na kakaruk—em gutpela hap bilong wok hait na helpim ol yangpela i save autim tok bilong Kingdom, em ol polis i wok long painim ol bilong kalabusim ol.
Long nait ol ka na trak i save karim ol yangpela Kristen i kam insait long banis na karim ol i go. Mipela lukautim na haitim ol dispela yangpela, na bihain mipela salim ol i go. Papamama wantaim ol narapela ol i givim bel tru long mekim wok bilong God, na dispela i kirapim mi long givim bel long Jehova na mekim wok bilong em.
Long Ogas 1941 mi dediket long Jehova na mi kisim baptais long liklik raunwara insait long bus. Mi wantaim sampela moa i bin bung long biknait samting long wanpela liklik haus, na wanpela lam i lait. Ating polis i save liklik long dispela, long wanem, ol i raun long dispela hap na sutim strongpela lait i go long dispela raunwara, tasol ol i no painim mipela.
Wok Painia
Long 1951 mi pinisim haiskul na mi go long wanpela hap i longwe olsem 1,600 kilomita, bilong mekim wok painia long Kobek, Onterio. Kongrigesen i liklik tasol na mi no gat poroman bilong wok wantaim mi. Tasol mi tingim olsem han bilong Jehova i no sot, na mi baim wanpela rum na mi yet mi kukim kaikai bilong mi. Long yia antap ol i singautim mi i go wok long brens-ofis bilong Sosaiti Was Taua long Toronto. Long dispela hap mi kisim save long planti samting i helpim mi long mekim gut wok bilong Kingdom long bihain.
Inap wanpela yia bihain mi maritim Lucy Trudeau, na long 1954 mipela go mekim wok painia long Levis, Kwibek. Em taim bilong bikpela kol tru. Ol man i mekim nogut long mipela, na ol polis tu i givim hevi long mipela, na mipela i hatwok tu long lainim tok ples Frans. Tasol han bilong Jehova i no sot, olsem na maski dispela em i taim nogut, mipela i kisim planti blesing olsem:
Sosaiti i tokim mipela long skelim gut tupela sip bilong kisim ol brata i go long ol bikpela kibung long Yurop long 1955. Ol kampani bilong ol dispela sip i amamas long Sosaiti i laik kisim sip bilong ol, olsem na sampela taim ol i singautim mipela i go kaikai—i olsem mipela i kisim liklik malolo long ol hevi i save painim mipela long autim tok long Kwibek long dispela taim bipo.
Long 1955 Sosaiti i makim mi bilong mekim wok wasman bilong raun, na mipela i raun na lukim ol kongrigesen i stap long ol longwe hap bilong not long Onterio long ples kol nogut tru. Long yia antap mipela go long Skul Gileat bilong Sosaiti Wastaua long Amerika, na bihain ol i salim mipela i go mekim wok misineri long Brasil long Saut Amerika.
Mipela i givim bel tru long mekim wok misineri long dispela nupela hap. I no longtaim na mipela inap autim tok na lainim ol man long Baibel long tok ples Potyugal. Long 1957 mi kisim wok gen long raun na lukim ol kongrigesen. Bipo mipela i stap long ples kol, tasol nau mipela i stap long ples hat. Wesan i hat, na mipela mas rausim long su bilong mipela, na mipela save katim sampela suga na kisim wara bilong en bilong strongim bek skin bilong mipela. Tasol sampela gutpela samting tu i painim mipela.
Long taun Regente Feijo mi toktok wantaim nambawan bilong polis na em i putim tok long ol i mas pasim olgeta stua, na olgeta man bilong taun i mas bung long ples bung. Mi sanap aninit long wanpela diwai i gat ol bikpela lip na ol plaua na mi givim wanpela tok bilong Baibel long ol man. Long nau i gat wanpela kongrigesen bilong ol Witnes long dispela hap.
Ol Pikinini i Go Bikpela Long Brasil
Long 1958 Lucy i kisim bel na mipela i go sindaun long taun Juis de Fora na mipela mekim wok painia salim. Insait long tupela yia mipela i kisim tupela pikinini meri, em Susan na Kim. Tupela i helpim tru wok bilong mipela long autim tok. Taim mipela subim liklik wilka bilong ol long rot, ol manmeri i save kam ausait bilong lukim tupela. Tasol long Resife ol i sot long ol man bilong autim tok bilong Kingdom, olsem na mipela i go sindaun long dispela ples i hat nogut tru.
Long 1961 mi kisim wok bilong stretim rot bilong ol Witnes i laik kisim balus na go long bikpela kibung long Sau Paulo, na mi tu mi go long dispela gutpela kibung. Balus i go antap na 20 minit samting bihain balus i sut i go daun na i tromoi ol pasindia i go nabaut insait long balus. Planti samting insait long balus i bagarap, na ol sia i bruk nabaut na bagarap. Sampela pasindia i kisim bagarap long skin bilong ol na blut i kapsait. Tasol gutpela tru pailot inap stretim gen balus, na bihain balus i pundaun gut long ples balus. I no gat wanpela bilong mipela i kisim bikpela bagarap tumas, olsem na mipela i kisim narapela balus na go long Sau Paulo. Mipela i mekim gutpela kibung tru, tasol mi no laik raun moa long balus!
Orait, taim mi kam bek mi kisim narapela wok gen. Mi mas lukautim wanpela kibung bai kamap insait tru long bus long Teresina, long Provins Piaui. Tasol mi mas kisim balus bilong i go long dispela hap. Mi pret, tasol mi orait long mekim dispela wok—mi save, han bilong Jehova i no sot.
Long 1962 taim mipela i stap long Resife, Lucy i karim pikinini man, nem bilong em Greg. Nau mi mas lukautim famili bilong mi, olsem na mi mas lusim wok painia, tasol mi inap helpim gut kongrigesen. Ol pikinini i laik tru long i go autim tok wantaim mitupela, long wanem, mipela i mekim long pasin i gutpela long ol. Kirap long taim ol i gat 3-pela krismas, olgeta wan wan inap mekim liklik tok bilong Baibel long ol haus. Mipela i no save lusim wanpela miting o wok bilong autim tok. Sapos wanpela long famili i gat sik, orait wanpela bai stap na lukautim em, tasol ol narapela i save go long miting o long autim tok.
Long olgeta taim mipela i save bung na toktok long ol wok bilong ol pikinini long skul, na ol i tingting long mekim wanem long bihain, na mipela i stiaim ol na bai ol i ken tingting long mekim wok insait long oganaisesen bilong Jehova. Mipela was gut, nogut ol samting olsem televisen i mekim na ol i no strong moa long ol samting bilong spirit. Mipela i no gat televisen i go inap long taim ol pikinini i gat 16 krismas samting. Na mipela i no givim planti samting bilong skin long ol, maski mipela i gat mani bilong baim. Olsem: Mipela baim wanpela wilwil tasol, em bilong 3-pela pikinini.
Mipela i mekim ol samting wantaim, olsem pilai basketbal, na waswas long wara, na raun long sampela hap taim mipela i go long ol kibung Kristen o go lukim ol haus Betel long sampela kantri. Long kain taim olsem mitupela Lucy inap toktok gut wantaim ol pikinini na bai mipela i ken save long tingting bilong ol. Insait long ol dispela yia mipela kisim bikpela amamas na mipela i tenkyu tru long Jehova!
Mipela i stap tenpela yia pinis long ples hat na Lucy i kisim sik long dispela. Olsem na mipela lusim dispela hap na mipela i go sindaun long hap bilong saut long Kuritiba, long Provins Parana, em i ples kol liklik.
Mipela Go Bek Long Kanada
Mipela stap 20 yia pinis long Brasil na long 1977 mipela go bek long Kanada bilong lukautim papa bilong mi em i gat sik. Mipela lukim pasin bilong dispela hap i narapela kain tru long Brasil. Tasol ol wok bilong spirit i wankain, long wanem, mipela wok yet long autim tok na bung wantaim ol gutpela brata Kristen long ol miting.
Long Kanada tupela pikinini meri bilong mipela i kirap mekim wok painia. Mipela olgeta i helpim dispela wok. Sampela i wok haptaim long wok mani na ol i putim sampela mani bilong baim kaikai na paua samting na bilong lukautim 3-pela ka, em bilong i go long ol ples mipela i mas autim tok long en, em ol i stap longwe longwe. Long olgeta wik, taim mipela mekim pinis famili stadi, mipela i bin toktok long ol samting mipela olgeta wan wan i laik mekim long bihain. Na dispela i helpim tru mipela.
Pikinini man, em Greg, em tu i laik mekim wok painia. Taim em i gat 5-pela krismas tasol, em i gat laik long wok long wanpela brens-ofis bilong Sosaiti, ol i kolim Betel. Em i no lusim dispela laik, na taim em i pinisim haiskul em i askim mitupela mama: “Yupela ting i gutpela sapos mi wokim pepa bilong kisim wok long Betel?”
Mipela bel hevi tru long em bai lusim mipela, tasol mipela i tok: “Taim yu wok long Betel, bai yu pilim tru olsem han bilong Jehova i stiaim yu, long wanem, yu stap long nambawan ples tru bilong oganaisesen bilong Jehova.” Tupela mun bihain Greg i go wok long Betel long Kanada. Em i go long 1980 na em i stap yet.
Long 1980 mitupela Lucy i stap olsem long taim mipela i marit nupela. Susan i marit pinis na em wantaim man bilong em i wok painia, na Kim wantaim Greg i wok long Betel, na mitupela tasol i stap. Bai mipela mekim wanem nau? Orait, long 1981 Sosaiti i singautim mipela long mekim wok sekit long hap em ol manmeri i save mekim tok ples Potyugal. Em i wanpela bikpela hap long Kanada, inap olsem 2,000 kilomita. Mipela mekim yet dispela wok.
Bihain Kim i marit na em i go long Skul Gileat, na nau em wantaim man bilong em i mekim wok sekit long Brasil. Susan wantaim man bilong em i stap yet long Kanada na ol i gat tupela pikinini, na man bilong Susan i mekim wok painia. Tru, nau mipela famili i no stap moa wantaim, long wanem, mipela i mekim wok bilong Jehova. Tasol mipela i pas gut wantaim long tingting na ol samting bilong spirit.
Mitupela Lucy i tingting long amamas bihain bai mipela i kisim wantaim ol pikinini bilong mipela taim graun i kamap klinpela gen. (2 Pita 3:13) Truim bilong dispela askim long Namba 11:23 i painim mipela, olsem em i bin painim Moses. Jehova i tok: “Ating strong bilong mi i no inap, a? . . . Bai yu save dispela samting mi bin tok long en, em bai i kamap o nogat.” Tru tumas, i no gat wanpela samting inap pasim Jehova long mekim gut long ol man i givim bel long mekim wok bilong em.
[Piksa long pes 25]
Wantaim meri bilong mi, Lucy