Famili i Stap Wanbel na Mekim Wok Bilong Jehova

Em stori bilong Antonio Santoleri

Papa bilong mi i gat 17 krismas taim em i lusim Itali long yia 1919. Em i kam long Brasil bilong painim gutpela sindaun. Bihain em i gat wanpela bisnis long katim gras bilong ol man long wanpela liklik taun insait long provins bilong Sau Paulo.

WANPELA TAIM long 1938, taim mi gat 7-pela krismas, papa i kisim wanpela Baibel Brasileira long wanpela man i kam long stua bilong em. Tupela yia bihain, bikpela sik i painim mama na skin bilong em i bagarap i go inap long taim em i dai. Sik i painim papa tu, olsem na mipela olgeta​—⁠mama, papa, susa bilong mi Ana, na mi​—⁠mipela i go sindaun wantaim sampela wanblut long biktaun Sau Paulo.

Taim mi skul long Sau Paulo, mi givim bel tru long kaunim buk, na mi save laik tru long kaunim ol buk i stori long ol samting i bin kamap bipo. Sampela buk mi bin kaunim ol i stori liklik long Baibel, na mi tingting tru long dispela. Long haus buk mi bin kisim wanpela buk i gat ol stori nating long en, na sampela taim em i kolim Bikpela Tok Long Maunten [em wanpela bikpela tok Jisas i bin mekim long maunten]. Em nau, long dispela taim mi tingting pinis long mi mas kisim wanpela Baibel na bai mi yet mi ken kaunim dispela bikpela tok bilong em. Mi wok long painim dispela Baibel em papa i bin kisim inap planti yia i go pinis, na bihain mi painim insait long wanpela bikpela bokis bilong pulimapim ol samting long en. Em i bin i stap insait long dispela bokis inap 7-pela yia.

Famili bilong mi ol i bilong lotu Katolik, olsem na ol i no bin kirapim mi long kaunim Baibel. Orait nau mi yet mi lain long painim ol sapta na ves bilong Baibel. Mi amamas tru long kaunim ol tok bilong Baibel. Mi no kaunim dispela Bikpela Tok Long Maunten tasol, nogat; mi kaunim buk Matyu olgeta na sampela buk moa bilong Baibel. Samting i kirapim tru tingting bilong mi, em mi pilim tru olsem ol tok bilong Jisas na ol mirakel em i bin wokim, ol i tru.

Mi lukim olsem ol bilip bilong lotu Katolik i narapela kain tru long ol tok mi kaunim long Baibel. Mi kirap i go lotu long Misin Presbitirian, na Ana i bihainim mi. Tasol long bel bilong mi, mi pilim olsem mi sot yet. Planti yia mi bin wok strong long painim God. (Aposel 17:27) Wanpela taim long nait ol sta i lait gut na mi tingting i stap, na nau mi tingting, ‘I gat wanem as na mi stap? Yumi stap bilong mekim wanem?’ Mi painim wanpela hap insait long banis bilong mipela na mi wanpela tasol i stap na mi brukim skru na beten olsem: ‘Bikpela God, yu husat? Olsem wanem mi inap kisim save long yu?’ I no longtaim na mi kisim bekim bilong ol dispela askim.

Mi Lainim Tok i Tru Bilong Baibel

Wanpela taim long 1949, wanpela yangpela meri i kamap long papa taim papa i lusim bas. Meri hia i soim nius Wastaua na Kirap! long papa. Papa i kisim sabskripsen bilong Wastaua na em i askim meri long kam lukim em long haus bilong mipela, na em i tok em i gat tupela pikinini ol i save lotu long Misin Presbitirian. Taim meri i kam lukim mipela, em i lusim buk Children wantaim Ana na em i kirapim Baibel-stadi wantaim Ana. Bihain mi sindaun long stadi bilong tupela.

Long Novemba 1950 mipela i go long wanpela kibung bilong ol Witnes Bilong Jehova​—⁠em namba wan taim bilong mipela. Long dispela kibung ol i kamapim nupela buk “Let God Be True,” na mipela i mekim stadi bilong mipela long dispela buk. I no longtaim na mipela i pilim olsem mipela i painim pinis tok i tru, na long Epril 1951 mitupela i kisim baptais bilong makim olsem mitupela i dediket pinis long Jehova. Sampela yia bihain papa i dediket long God na em i stap gut long God i go inap long taim em i dai long 1982.

Mi Amamas Long Mekim Wok Bilong God Long Olgeta De

Long Janueri 1954, taim mi gat 22 krismas tasol, ol i singautim mi i go wok long brens-ofis bilong ol Witnes Bilong Jehova, ol i kolim Betel. Taim mi kamap, mi kirap nogut long lukim wanpela yangpela man, nem bilong em Richard Mucha, krismas bilong em i winim bilong mi inap tupela yia tasol, na em i wasman bilong brens. Long 1955 ol i sot long sampela wasman sekit, na ol i singautim mi wantaim 4-pela brata moa long mekim dispela wok.

Ples wok bilong mi, em provins bilong Riu Grandi du Sul. Taim mi kirap mekim wok long dispela hap, i gat 8-pela kongrigesen tasol bilong ol Witnes Bilong Jehova, tasol insait long 18 mun moa, tupela nupela kongrigesen i kamap, na 20 grup i stap longwe long ol kongrigesen. Long dispela hap long nau, i gat 15 sekit bilong ol Witnes Bilong Jehova, na olgeta wan wan sekit i gat olsem 20 kongrigesen long en! Long pinis bilong 1956, ol i toksave olsem ol i bin brukim sekit bilong mi i kamap 4-pela sekit, na bai i gat 4-pela wasman sekit i lukautim. Ol i tokim mi long go bek long Betel na kisim wanpela nupela wok.

Mi kirap nogut na mi amamas tru taim mi kisim wok olsem wasman distrik long hap bilong not long Brasil, em wok bilong raun na helpim sampela sekit. Long dispela taim bipo, i gat 12,000 Witnes Bilong Jehova i autim tok long Brasil, na dispela kantri i gat tupela distrik. Richard Wuttke i mekim wok long hap bilong saut, na mi long hap bilong not. Long Betel mipela i lain long wokim masin projekta bilong kamapim ol piksa wokabaut ol Witnes Bilong Jehova i wokim, em The New World Society in Action na The Happiness of the New World Society.

Long dispela taim bipo, i hatwok long raun na mekim wok bilong mipela. I no gat wanpela Witnes i gat ka, olsem na mi mas raun long kanu, dingi, wilka em bulmakau i pulim, hos, trak, na wanpela taim mi raun long balus. Mi amamas tru long flai antap long bikbus bilong Amason na pundaun long Santarim, em wanpela biktaun i stap namel long Belim long maus bilong wara Amason na Manaus, em nambawan biktaun bilong Provins Amasonas. Long dispela taim bipo ol wasman distrik i no gat planti kibung sekit bilong go long en, olsem na mi lusim bikpela hap taim bilong mi long kamapim ol piksa wokabaut bilong Sosaiti. Long ol bikpela taun, i gat planti handet ol i bung na lukim ol dispela piksa.

Mi tingim tru hap bilong Amason, i stap long hap not bilong Brasil. Taim mi mekim wok long dispela hap long Epril 1957, wara Amason na ol hanwara bilong en i tait. Mi kamapim wanpela piksa wokabaut insait long bus, na mi pasim laplap namel long tupela diwai bilong sutim piksa long en. Paua bilong wokim masin projekta, mipela i kisim long mota bilong wanpela dingi em i anka long wanpela wara klostu. Dispela em i namba wan taim planti manmeri bilong dispela hap ol i bin lukim wanpela piksa wokabaut.

Bihain liklik mi go wok gen long Betel, na long yia antap, long 1958, mi go lukim wanpela bikpela kibung, em “Laik Bilong God” Kibung Intenesenel Bilong Ol Witnes Bilong Jehova, long Biktaun Nu Yok. Ol manmeri bilong 123 kantri ol i kam, na i gat 253,922 ol i sindaun long Yanki Stediam na Polo Graun long laspela de bilong dispela kibung i gat 8-pela de bilong en.

Senis i Kamap Long i Stap Bilong Mi

Taim mi go bek long Betel, i no longtaim na mi bungim Clara Berndt, na long Mas 1959, mitupela i marit. Mipela i kisim wok sekit long provins bilong Bahia, na mipela i wok long dispela hap inap wanpela yia samting. Mitupela Clara i tingim yet gutpela pasin bilong ol brata long dispela hap, olsem amamas, na pasin daun, na pasin bilong kisim ol man na mekim gut long ol, na ol i save wok strong, na narapela i laikim tru narapela. Ol i stap rabis long ol samting bilong skin, tasol ol i kamapim planti gutpela kaikai bilong Kingdom. Bihain Sosaiti i salim mitupela i go long Provins Sau Paulo. Long dispela hap long 1960, meri bilong mi i gat bel, na mitupela i mas lusim wok bilong autim tok long olgeta de.

Mitupela i go sindaun long wanpela hap bilong provins Santa Katarina, em ples meri bilong mi i bin kamap long en. Pikinini man bilong mipela, em Gerson, em i namba wan bilong 5-pela pikinini bilong mipela. Bihain long em i gat Gilson, em i kamap long 1962, na Talita long 1965, na Tárcio long 1969, na Janice long 1974. Mipela tenkyu long Jehova na ol gutpela tok em i givim long yumi, long wanem, taim mitupela i wok long mekim bikpela long ol pikinini, mitupela inap ‘stretim gut ol na skulim ol long tok bilong Bikpela.’​—⁠Efesus 6:⁠4.

Mipela i save tingim olgeta wan wan pikinini bilong mipela i olsem gutpela samting tru mipela i kisim. Man bilong raitim Song i kamapim stret tingting i stap long bel bilong mipela, em i tok: “God i mekim gut long yumi na givim yumi ol pikinini olsem presen.” (Song 127:⁠3) Tru, i gat sampela hevi i kamap, tasol mipela i lukautim gut ol pikinini wankain olsem mipela bai mekim long ol narapela “presen” mipela i kisim long Jehova, na oltaim mipela i tingim ol tok bilong Jehova long Baibel. Mipela i kisim planti blesing long dispela wok. Mipela i amamas nogut tru taim olgeta wan wan pikinini, long laik bilong ol yet, ol i tokaut olsem ol i laik kisim baptais bilong makim olsem ol i dediket pinis long Jehova.​—⁠Saveman 12:⁠1.

Rot Ol Pikinini i Laik Bihainim

Gerson i lain long kompyuta, na taim em i pinisim kos bilong em, em i tok em i laik mekim wok long Betel. Mitupela i amamas tru long dispela. Em i tingting pinis long mekim wok bilong God long olgeta de, na em i no laik kisim wanpela wok bilong skin. Tasol pastaim Gerson i gat hatwok long lain long i stap long Betel. Taim em i stap inap 4-pela mun tasol long Betel, mitupela i go lukim em, na taim mipela i laik lusim em, mipela lukim pes bilong em na i olsem em i bel hevi. Mi lukluk long spai-glas bilong ka na mi lukim em i lukluk i stap long mipela i go inap long taim mipela i kamap long namba wan rot baut. Aiwara i pulap long ai bilong mi na mi mas pasim ka long arere bilong rot na wet pastaim, na bihain mi kirap draiv gen i go long hap bilong mipela, em i longwe inap 700 kilomita.

Bihain Gerson i amamas long mekim wok long Betel. Em i stap klostu 6-pela yia na em i maritim Heidi Besser, na tupela i mekim wok long Betel inap tupela yia moa na nau Heidi i gat bel, olsem na tupela i mas lusim Betel. Pikinini meri bilong tupela, em Cintia, nau em i gat 6-pela krismas na em i save raun wantaim tupela long mekim ol wok bilong Kingdom.

Taim mipela i go lukim Gerson long Betel long namba wan taim, i no longtaim na Gilson i tok em tu i laik i go wok long Betel. Nau tasol em i bin pinisim namba wan yia bilong em long lain long ol lo na wok bilong ol bisnis. Em i tingting olsem taim em i wok long Betel inap wanpela yia pinis, em bai kirap mekim gen kos bilong dispela wok. Tasol em i senisim tingting bilong em na em i stap long wok bilong em long Betel. Long 1988 em i maritim Vivian Gonçalves, em wanpela painia, olsem em i save mekim wok bilong autim tok long olgeta de. Tupela i wok yet long Betel.

Amamas bilong mitupela i go yet taim namba 3 pikinini, em Talita, i tingting pinis long go insait long wok painia long 1986, taim em i pinisim kos bilong em long wokim piksa bilong haus. Tripela yia bihain ol i singautim em tu i go wok long Betel. Long 1991 em i maritim José Cozzi, em i bin mekim wok long Betel inap 10-pela yia pinis. Tupela i wok yet long Betel.

Mitupela meri bilong mi i kisim amamas gen taim Tárcio​—⁠em i kamap bihain long Talita​—⁠em i mekim wankain tok olsem mipela i bin harim 3-pela taim pinis, olsem: “Papa, mi laik i go wok long Betel.” Em i wokim pepa bilong go long Betel, na ol i orait long en, na long 1991 em tu i kirap mekim wok long Betel, na em i mekim dispela wok inap long 1995. Mitupela i amamas long em i bin mekim wok bilong Kingdom bilong Jehova long dispela rot inap 3-pela yia samting, na em i mekim long taim em i yangpela yet na em i gat strong.

Laspela pikinini, em Janice, em i tingting pinis long mekim wok bilong Jehova na em i kisim baptais taim em i gat 13 krismas. Taim em i skul yet em i mekim wok painia haptaim inap wanpela yia. Orait long Septemba 1, 1993, em i kirap mekim wok painia oltaim long kongrigesen bilong mipela hia long biktaun Gaspar.

Rot Bilong Kamapim Gutpela Wok

Wanem samting inap helpim famili long i stap wanbel long lotuim Jehova? Mi ting olsem i no gat wanpela lista stret bilong ol lo inap stretim olgeta hevi insait long famili. Jehova i bin putim ol tok bilong em long Baibel bilong ol papamama Kristen i ken bihainim, olsem na ol gutpela samting i bin kamap long wok bilong mipela long mekim bikpela long ol pikinini, em Jehova yet i mas kisim biknem long dispela. Mipela i wok tasol long bihainim ol tok bilong em bilong soim rot long mipela. (Sindaun 22:⁠6) Olgeta pikinini bilong mipela i bin kisim pasin Latin long mi, olsem pasin bilong bel sori, na ol i kisim pasin bilong ol Jemani long mama bilong ol, olsem em i no larim bel i kirapim em nating long mekim ol samting. Tasol bikpela samting tru ol i kisim long mitupela, em pasin bilong tingim ol samting bilong spirit.

Ol wok bilong Kingdom i insait long olgeta samting long sindaun bilong famili bilong mipela. Tru, sampela taim mipela i bin hatwok liklik long putim ol samting bilong Kingdom i go pas long ol narapela samting. Olsem: Sampela taim mipela i gat hatwok long mekim famili-stadi long Baibel long olgeta taim, tasol mipela i no les long traim mekim olsem. Taim olgeta pikinini wan wan i kamap nupela, kirap long dispela taim yet mipela i save kisim ol i go long ol miting na ol kibung tu. Taim wanpela i gat sik, o narapela bikpela hevi samting i kamap, long dispela taim tasol mipela i no go long miting. Na taim ol pikinini i liklik yet, ol i save go wantaim mipela long mekim wok Kristen bilong autim tok.

Taim ol pikinini i gat 10-pela krismas, ol i kirap mekim ol tok insait long Skul Bilong Wok Autim Tok. Mitupela i helpim ol long redim tok bilong ol, na kirapim olgeta wan wan long wokim bun bilong tok tasol na no ken raitim olgeta hap tok na kaunim tasol. Bihain olgeta wan wan i redim tok bilong ol yet. Na taim ol i gat 10 i go inap 12-pela krismas, olgeta wan wan i kirap autim tok long olgeta wik. Dispela kain i stap bilong ol, ol i save long dispela tasol na ol i no save long narapela kain.

Meri bilong mi Clara em i bin mekim bikpela wok tru long mekim bikpela long ol pikinini bilong mipela. Long olgeta nait, taim ol i liklik yet​—⁠em dispela taim tingting bilong pikinini i save kisim kwik ol samting em i lainim​—⁠Clara i save kaunim wanpela stori bilong Baibel long ol na em i beten wantaim olgeta wan wan. Em i skulim ol long buk From Paradise Lost to Paradise Regained, na Harim Tok Bilong Bikpela Tisa, na Baibel Stori Buk Bilong Mi.a Na taim ol Witnes Bilong Jehova i kirap wokim ol kaset bilong harim na bilong lukim long video, mipela i mekim wok long ol dispela samting tu.

Ol samting i bin painim mitupela papamama Kristen, dispela i kamapim klia olsem yumi mas tingim na helpim pikinini long olgeta wan wan de. Yumi mas laikim ol tumas, na tingim olgeta wan wan, na lusim bikpela hap taim long ol​—⁠dispela em ol samting pikinini i mas kisim. Mitupela i ting em i wok bilong mipela papamama long mekim ol dispela wok inap tru long save bilong mipela; na tu, mitupela i bin kisim bikpela amamas moa long mekim dispela wok bilong mipela.

Tru tumas, em i gutpela samting tru long papamama taim ol i lukim truim bilong Song 127:​3-5 i kamap long ol, em i tok: “God i mekim gut long yumi na givim yumi ol pikinini olsem presen. Ol i gutpela blesing tru yumi kisim long God. Ol pikinini man bilong yangpela man i olsem ol spia i stap long han bilong wanpela soldia. Man i gat planti pikinini man em i ken amamas.” Mipela famili i stap wanbel na mekim wok bilong Jehova na dispela i givim bikpela amamas long mipela!

[Futnot]

[Piksa long pes 26]

Antonio Santoleri wantaim famili bilong em