Bilong Wanem Yumi Mas Tingim Lotu?

LONG olgeta kantri long graun i gat sampela man ol i tingim lotu. Tasol i gat planti man i tok, ol i no tingim lotu liklik. Tasol olsem wanem? Bipo tu ol i no tingim lotu?

Pasin bilong ol man, em olsem: Sapos ol i tingim ol samting bilong skin tasol, ol i no inap i stap amamas tru. Ol i mas tingim tu ol samting bilong spirit. Sapos long olgeta de ol i wok long kisim ol samting bilong skin tasol, na kisim amamas wan wan taim, ol i no inap i stap belgut tru. Ol man i no olsem ol animal; ol i laik save, ‘Yumi stap bilong mekim wanem?’ ‘Yumi bilong i stap liklik taim na amamas long planti gutpela samting, tasol kisim planti hevi tu, na em tasol?’ Ating yu tu yu save tingim ol kain askim olsem, a?

Tasol planti milion manmeri i stap long nau ol i bin i go bikpela namel long ol manmeri i no givim bel tumas long lotu. Ating as bilong dispela, em papamama, o ol tisa, o ol wanlain bilong ol, o gavman, ol i daunim lotu.

Skalabrino em wanpela yangpela man bilong Albenia. Em i tok, taim gavman Komyunis i bosim ples, ol i lainim ol man olsem i no gat God. Ol man i mas was gut, long wanem, sapos ol i toktok tasol long lotu, ol inap i go kalabus. Tasol long yia 1991, taim Skalabrino i ranawe pinis na i stap long Swiselan, sampela i laik lainim em long Baibel na em i orait long dispela. Wanem samting i kirapim em long orait long dispela?

Taim em i stap yet long Albenia, em i harim tok olsem i gat wanpela buk ol i kolim Baibel, tasol em i no save liklik long en. Olsem na pastaim ating i no olsem em i gat laik long save long Baibel na em i kirap lainim tok bilong en, nogat. Ol i tokim em, sapos em i stadi long Baibel bai em i kisim save long laik bilong God long ol man na dispela graun, tasol em i tingting long lain gut long tok ples bilong kantri. Tasol kwiktaim em i pilim tru olsem ol tok em i lainim i helpim em tru long ol samting bilong spirit. Bel bilong em i amamas tru long taim em i kisim save long tok promis bilong God long kamapim nupela taim, na ol manmeri inap i stap oltaim long bel isi na kisim olgeta samting ol i mas kisim bilong i stap laip. Em i amamas moa yet taim em i save, em wantaim famili bilong em inap i stap long dispela nupela taim. Em i no inap pasim maus; em i telefon long famili bilong em long Albenia na tokim ol long ol dispela gutpela tok.

Aleksei em wanpela man i stap long Rasia na em tu i kirap nogut long bikpela senis inap kamap long man i kisim stretpela save long Baibel. Em i gat planti hevi na em i pilim olsem i no gat as bilong i stap bilong em, olsem na em i tingting long kilim i dai skin bilong em yet. Tasol pastaim em i go long Finlan bilong lukim wanpela poroman. Em i kalap long tren na long rot em i toktok wantaim sampela pasindia na kamapim ol hevi bilong em. Wanpela pasindia em i wanpela Witnes Bilong Jehova na em i laik kirapim Aleksei long stadi long Baibel, long wanem, Baibel i makim rot bilong stretim olkain hevi olsem. Tasol Aleksei i no bilip tumas long dispela tok. Long rot i kam bek, em i bungim narapela Witnes i tokim em, bipo em tu i gat kain hevi olsem, tasol Baibel i helpim em long winim ol dispela hevi. Dispela Witnes tu i laik kirapim em long stadi long Baibel. Taim em i kamap pinis long haus, telefon i krai; em narapela poroman bilong em na em i stadi wantaim ol Witnes na em i amamas tru. Nau Aleksei i tingting olsem Baibel inap helpim em, tasol em i save, sampela man i mas lainim em. Olsem na em i orait long stadi wantaim ol Witnes, na em i kirap long i go long ol miting bilong ol. I no longtaim na em i save olsem wanem ol man i bihainim gut ol tok bilong Baibel ol i stap amamas tru, maski ol i gat ol hevi olsem ol narapela man.

Krais Jisas i save long pasin bilong ol man na em i tok: “Ol manmeri i no inap kisim laip long kaikai tasol.” (Matyu 4:⁠4) Na em i tok: “Ol manmeri i save, ol i stap rabis tru long ol samting bilong God, em ol i ken amamas.” (Matyu 5:⁠3) Ol i ken amamas, long wanem, ol i save ol i sot long ol samting bilong spirit, na ol i wok long kisim, na God i mekim gut long ol. Tasol sapos yumi go insait long wanpela misin o wan wan taim yumi go long lotu, dispela i no rot bilong inapim yumi long ol samting bilong spirit. Ol lotu i gat planti bilaspasin ol inap kirapim bel bilong man, tasol i no helpim man long save long rot bilong stretim ol hevi bilong em, a? Na sapos wanpela lotu i lainim ol man long sampela gutpela lo, tasol em i no helpim ol long save long as bilong i stap bilong ol, dispela kain lotu i no inap helpim yu tru long ol samting bilong spirit, a? Na bikpela samting yu mas tingim em olsem: Sapos yu bihainim kain lotu olsem, dispela bai helpim yu long i stap gutpela long ai bilong God, o nogat? Sapos nogat, bai yu no inap i stap amamas na belgut tru.

Olsem na planti man i no kisim yet samting ol i wok long painim.

[Piksa long pes 3]

Sapos yu insait long wanpela misin, yu ting bai yu kisim tru ol samting bilong God?

[Piksa long pes 4]

Planti ol i kisim save olsem, taim ol i lain long Baibel, nau i stap bilong ol i gat as bilong en