Ol i Wok Long Painim Lotu i Tru

SAMPELA manmeri, taim ol i liklik yet ol i laik save, ol i stap bilong mekim wanem. Ating ol i bin i go long lotu taim ol i yangpela, tasol lotu i no bekim askim bilong ol, na ol pasin bilong lotu i no helpim ol long save long rot bilong stretim ol hevi bilong ol.

Ating ol i tok, ol i bihainim yet lotu bilong papamama, tasol ol i go long lotu wan wan taim tasol. Wanpela bisop bilong Sios Bilong Inglan i tok, bilip bilong ol i no bosim tru wokabaut bilong ol. Ol i no givim bel tru long lotu. Sampela ol i les long pasin giaman bilong ol misin na ol i lusim lotu olgeta. Tasol ol i wok yet long painim save long as bilong i stap bilong ol.

Bilong Wanem Sampela i No Bilip Tumas?

Planti man i save, ol misin i gat ol lain bilong helpim ol man i no gat ples slip, na bilong givim kaikai long ol taranguman, na kamapim ol bung bilong mekim ol pasin tumbuna. Tasol klostu olgeta de, ol nius i stori long ol pait nogut, em ol misin i gat nem Kristen na ol narapela lotu i as bilong en. Yumi no ken kirap nogut sapos ol man i no bilip tumas na ol i ting, ol dispela lotu i no lotu i tru, a?

Planti man i go long lotu long taim ol i liklik na bipo ol i ting haus bilong ol misin bilong lukautim ol pikinini i no gat papamama, ol i gutpela samting. Tasol nau bel bilong ol i bagarap stret taim ol i harim tok long pasin sem nogut ol pris bilong lukautim ol dispela pikinini i bin mekim long ol. Pastaim ol man i ting, wan wan pris tasol i gat asua long dispela. Tasol nau ol i kirap long ting olsem, misin yet i gat asua.

Bipo sampela olsem Eugenia, ol i givim bel tru long lotu. Taim Eugenia i stap yangpela long Ajentina em i bin i go planti taim bilong lotuim piksa bilong Virgo Bilong Itati. Em i kamap sister Katolik na em i stap 14 yia long wanpela haus sister. Bihain em i lusim na em i insait long wanpela lain bilong lotu ol i save mekim wok politik tu, na ol i kirapim ol man long mekim pait bilong helpim ol man i stap rabis. Ol samting i painim em na ol samting em i lukim, dispela i mekim na em i no bilip moa long God. Em i no wok long painim wanpela lotu em inap bilip long en​—⁠em i wok long painim rot bilong helpim ol rabisman na bai ol man i no ken daunim ol moa​—⁠na em i laik bai em i gat wanpela gutpela pren em i ken bilip tru long em.

Na sampela ol i lukim ol samting ol misin i mekim na ol i klia long ol. Long yia 1991, wanpela nius (Sputnik) i kamapim tingting bilong wanpela man i no bilip long God. Man i tok: “Mi lukim olsem lotu haiden na lotu Kristen i wankain tasol.” Em i stori long em i bin lukim ol pris i pasim klos i gat bilas gol na ol i karim bokis i gat bodi bilong man i dai pinis na ol i bin putim marasin long en na i drai, na ol i wokabaut long rot long biktaun Mosko. Em skin bilong “wanpela santu Kristen bilong misin Otodoks” ol i kisim long haus tumbuna na karim i go putim long haus lotu. Man hia i tok, taim em i lukim dispela samting, em i tingim ol pris bilong Isip bilong bipo na ol daiman bilong ol em ol man i bin putim marasin long ol na karamapim ol bambai ol i no sting. Na em i tingim tu bilip bilong ol dispela pris long Mosko, em ol i bilip long “God Triwan Kristen,” na ol Isip tu i bin lotuim god triwan, em Osiris na Aisis na Horas.

Na dispela man i stori tu long lo Kristen bilong laikim tru ol narapela, olsem ‘God i as bilong pasin bilong laikim ol arapela’ na ‘yu mas laikim ol narapela man olsem yu laikim yu yet.’ Ol Isip bilong bipo ol i no gat kain gutpela lo olsem. Na em i tok, ‘Dispela pasin bilong laikim tru ol narapela i no kamap strong long graun, na long ol hap ol i kolim Kristen tu, nogat.’ Na bihain em i stori long ol samting nogut i bin kamap, long wanem, ol misin i strong long insait long ol wok politik. Em i pilim olsem ol misin i no inap helpim em long kisim samting em i wok long painim.

Tru, sampela ol i painim pinis gutpela bekim bilong ol askim bilong ol​—⁠tasol ol misin i no bin helpim ol.

Em i Kisim Save Long Samting Tru i Painim Man i Dai Pinis

Wanpela meri i stap long Balgeria, nem bilong em Magdalena, nau em i gat 37 krismas. Long yia 1991, tambu papa bilong em i dai na em i bel hevi. Planti taim em i tingting olsem: ‘Wanem samting tru i painim man i dai pinis? Nau tambu papa i stap we?’ Meri i go long lotu, na em i beten long wanpela piksa bilong lotu long haus, tasol em i no kisim save long bekim bilong ol askim bilong em.

Bihain wanpela man i stap klostu em i telefon na singautim em i kam long haus bilong em, long wanem, wanpela yangpela man i kam lukim em na em i save stadi wantaim ol Witnes Bilong Jehova. Magdalena i harim dispela yangpela man i stori long Kingdom bilong God na long laik bilong God long kamapim Paradais long graun, na ol man inap i stap amamas oltaim long en. Wanpela buk i stap long tebol, nem bilong en Yu Inap i Stap Oltaim Long Paradais Long Graun. Yangpela man i opim buk na soim tok bilong Baibel long Saveman 9:5 long Magdalena. Dispela ves i tok: “Ol man i dai pinis . . . ol i no inap save long wanpela samting.” Long apinun, Magdalena i kaunim sampela tok moa bilong dispela buk. Em i kisim save olsem ol man i dai pinis ol i no i stap laip yet long wanpela hap, olsem long heven o long bikpaia. Nogat. Ol i dai tru na ol i no inap save long wanpela samting; i olsem ol i slip. Em i amamas long bihainim yangpela man i go long wanpela miting bilong ol Witnes, na taim miting i pinis, em i orait long ol i lainim em long Baibel. Long miting em i lukim ol i beten long Jehova, olsem na em i kirap long beten long Jehova na askim em long helpim em long lusim wanpela pasin kranki i pas strong long bel bilong em. Jehova i helpim em na em i save, em i painim pinis lotu i tru.

Nau i Gat As Bilong i Stap Bilong Ol

Papamama bilong André long Beljam ol i strongpela Katolik, na em i bin mekim wok olsem helpim bilong pris. Tasol long dispela taim em i lukim sampela samting long misin i no stret na em i no bilip strong moa long misin. Em i holim nating nem Katolik.

Inap 15 yia em i pilai soka olsem wok mani bilong em. Wanpela taim tim i go pilai long Itali, na misin i singautim ol i go lukim pop. Tasol dispela i no strongim André long spirit, na em i no amamas long lukim ol bilas gol samting long haus bilong pop. Bilip bilong em long misin i bagarap moa yet. Em i no i stap amamas, long wanem, em i marit tupela taim na marit i bagarap. Na em i save tingting planti long ol hevi bilong graun. Long yia 1989, em i raitim tok long wanpela liklik buk, olsem: ‘Wanem as bilong ol longlong samting i kamap long nau?’ Lotu bilong em i no helpim em long save long bekim bilong dispela askim.

Long yia 1990, André i kisim wok long Aislan bilong lainim ol man long pilai soka. Wanpela misineri bilong ol Witnes Bilong Jehova, em Iiris, i bungim em. Em i kisim sampela buk na singautim Iiris i kam lukim em gen. Iiris i kam bek wantaim man bilong em, Kjell. Taim André i gat taim na tupela inap sindaun na toktok wantaim em, ol i save em i laik tru long save long Baibel. Meri bilong em, Ásta, em tu i laik save. Long belo bek, André i malolo long wok inap 3-pela aua, na em wantaim meri bilong em i tok, ol i laik stadi long Baibel long dispela 3-pela aua. André i tok: “Maski long malolo; taim mi stadi long Baibel, dispela i givim strong long mi.” Isi isi ol i kisim save long Baibel na long bekim bilong ol askim bilong ol, na bilip bilong ol long Jehova na Kingdom bilong em i wok long kamap strong. Ol i kirap long bilip tru long ol gutpela tok promis bilong God long kamapim gutaim long nupela taim, na bai i no gat moa “ol longlong samting i kamap long nau.” Nau tupela i autim nupela bilip bilong ol long ol narapela.

Magdalena, na André, na Ásta, ol i bilip tru olsem ol i painim pinis lotu i tru. Eugenia tu, pastaim em i laik stretim ol hevi long rot bilong wok politik, tasol bihain em i kisim save long ol Witnes Bilong Jehova na em i save, em i painim pinis lotu i tru. Tasol wanem samting i makim lotu i tru? Kaunim stori i kamap bihain long dispela.

[Piksa long pes 7]

Ol Witnes Bilong Jehova i wok long lainim 5 milion manmeri long Baibel na helpim ol long kisim gutpela bekim bilong ol askim bilong ol