Ripot Long Wok Bilong Kingdom
God i Save Mekim Wankain Pasin Long Olgeta
WINIM 1,900 yia bipo, aposel Pita i autim tok long kepten bilong ami, em Kornilius, na em i tok: “Tru tumas, nau mi save, God i save mekim wankain pasin long olgeta manmeri, maski ol i bilong wanem lain. Long olgeta lain em i save laikim ol manmeri i aninit long em na i mekim stretpela pasin.” (Aposel 10:34, 35) Kornilius yet i pret long God na stap aninit long em. Em i bilipim tok bilong Pita, na em i kamap Kristen.
Olsem tasol long nau—God i save laikim olgeta lain manmeri. Tingim dispela stori i kam long Jemani:
“Long teritori bilong kongrigesen bilong mipela i gat bikpela banis ami bilong ol Rasia. Long yia 1989, taim ol i rausim Banis Bilong Belin, ol elda i wok long painim sampela long kongrigesen, em ol i save long tok Rasia. Mipela sampela i save, na mipela i go autim tok long ol dispela ami na mipela i kisim bikpela amamas. Nau mi laik stori long wanpela bilong ol planti gutpela samting i bin kamap.
“Mi bin wok wantaim wanpela pablisa i no baptais (nau em i baptais pinis) na mitupela i go toktok wantaim bos bilong ami. Em i harim tok, na em i laik bai mipela i autim tok long ol soldia. Em i tok, ol i mas save long God na long Baibel tu, olsem na mipela i makim taim bilong go bek na toktok wantaim ol.
“Mipela tokim wanpela sista i save gut long tok Rasia long i kam wantaim mipela na tanim tok. Long haus bung long banis ami, mipela i putim ol buk na nius bilong mipela long wanpela tebol, na mipela i toktok wantaim 68 soldia na bekim ol askim bilong ol. Bihain ol i kisim 35 buk na klostu 100 magasin. Taim mipela i lusim haus i go, mipela i lukim sampela i bung na toktok long ol buk.
“Mipela i tok, bai mipela i go bek gen long Julai 4, 1992. Mipela i kamap long dua bilong banis klostu long 11 klok moningtaim, na soldia i was i stap em i tok, ol i wetim mipela. Wanpela kepten i kisim mipela i go long haus bung, na mipela harim olsem meri i lukautim haus buk na em i bin kisim sampela buk long mipela, em i bin putim ol toksave nabaut insait long banis ami bilong tokaut long de mipela bai kam. Tripela brata i mekim sotpela tok na stori long wok bilong mipela long olgeta hap, na i gat wanem as na yumi ken bilip tru long Baibel. Bihain ol soldia i mekim sampela askim, na mipela i opim Baibel na bekim. Wanpela askim em olsem: Ol Witnes Bilong Jehova i ting olsem wanem long wok long ami, na i gat sampela ol i soldia o nogat? Pablisa i no baptais yet na em i bin go wantaim mi long pastaim, em i stori long em i bin stap long ami bilong Is Jemani inap 25 yia, na bihain em i kamap kepten long ami bilong balus. Em i stori long em i bin kisim save long God na long Baibel na nau em i laik kamap wanpela Witnes Bilong Jehova. Ol soldia i pilim tru ol tok ol i harim. Kwiktaim tru, insait long 7-pela minit tasol, ol i kisim olgeta buk na nius mipela bin karim i kam, na planti ol i laik kisim Baibel. Mipela inap baim 7-pela Baibel tok Rasia long wanpela stua buk, na ol soldia i amamas long kisim. Mipela i amamas long mipela inap givim kaikai bilong spirit long ol dispela man i laik tru long save long ol tok bilong Baibel. Mipela i laik bai ol i bihainim ol dispela tok.”
Tru tumas, God i laikim olgeta lain manmeri. Long rot bilong Baibel, em i helpim ol gutpela man long save long em na Pikinini bilong em, Krais Jisas. Planti man bilong kain kain lain ol i wok long kisim dispela save.—Jon 17:3.