Ol Sumatin Bilong Gileat i Kisim ‘Bikpela Amamas Moa Long Givim Samting’
LONG Sande, Mas 6, 1994, wanpela bung i kamap bilong makim namba 96 klas bilong Wastaua Baibel Skul Bilong Gileat i winim skul. Lain bilong Betel long nambawan ofis bilong ol Witnes Bilong Jehova na sampela manmeri ol i bin singautim ol, ol i kam long dispela bung. Siaman bilong program em Karl F. Klein, na klostu 20 yia pinis em i insait long Lain Bilong Bosim Ol Witnes Bilong Jehova. Bilong kirapim bung em i tokim ol 46 sumatin: “Jisas i tok, amamas bilong man i givim samting long ol narapela man em i winim amamas bilong man i kisim samting bilong em yet. Na long wok misineri tu—sapos yu givim planti samting, bai yu kisim bikpela amamas moa.”—Aposel 20:35.
Ol Tok Bilong Strongim Ol
Bihain long dispela, Leon Weaver i toktok long “Taim Man i Sanap Strong, Dispela i Givim Biknem Long Jehova.” Ol hevi i save painim yumi olgeta. (2 Korin 6:3-5) Brata Weaver i tok, “Taim hevi i painim yumi, bai yumi ting yumi inap winim dispela hevi long strong bilong yumi yet.” Tasol em i tokim ol sumatin, “Maski wanem hevi i painim yu, Jehova i tingim. Em i no ken larim wanpela traim i painim yu, i winim strong bilong yu.”—1 Korin 10:13.
Nau Lyman Swingle bilong Lain Bilong Bosim Ol Witnes em i mekim tok, “Laikim Tru Wok Bilong Yu.” I no planti taim ol Israel i bin makim wanem hap ol i laik sindaun long en o wanem wok ol bai mekim. Ol hetman i tilim hap graun i go long olgeta wan wan lain, na ol i makim wok bilong lain Livai—ol yet i no makim. Nau tu i wankain—planti manmeri i save mekim wok bilong Jehova oltaim, olsem ol misineri na lain bilong Betel, ol yet i no makim wanem hap ol bai sindaun long en na wanem wok ol bai mekim. Tasol olsem wanem sapos wanpela i tingting planti long wok em i kisim o ples em i mas go long en? Brata Swingle i tok: “Yu mas lukluk i go long Jisas, em i as bilong bilip bilong yumi, na tingim gut pasin bilong em. Sapos yu mekim olsem, bai yu no inap les na lusim wok.”—Hibru 12:2, 3.
Leonard Pearson i mekim tok, “Ai i Mas Lukim Klia Ol Samting.” Em i tok: “Maski yu gat gutpela kamera tru na i gat ol naispela samting tru bilong kisim piksa bilong en, sapos ai bilong kamera i no klia, bai piksa i no inap kamap gut.” Yumi ken tingim kamera i gat strongpela lens na em inap makim wanpela bikpela hap na kisim piksa bilong en. Orait ai, olsem tingting bilong yumi, i mas olsem—long tingting yumi mas lukim wok bilong autim tok ol i mekim long olgeta hap, olsem wanpela bikpela piksa yumi lukim. Brata Pearson i tok, “Sapos misineri i tingting long em yet tasol, olsem em i lukim wanpela samting tasol long piksa na em i no lukim narapela samting, em i no inap i stap amamas long ples wok bilong em. Ol man i putim tingting i go long Jehova na wok em i givim long ol, wok bilong ol bai kamap gutpela.”
John E. Barr, em tu i bilong Lain Bilong Bosim Ol Witnes, em i mekim tok, “I Gat Planti Samting Yumi Mas Tenkyu Long En.” Em i tokim ol sumatin, “No ken lusim pasin bilong tenkyu long Jehova. Dispela bai helpim yu moa yet long i stap bel gut, maski wanem hap yu mas autim tok long en.” Oltaim Devit i tenkyu long Jehova na dispela i kirapim em long tok: “Mi kisim olgeta gutpela samting long yu tasol. Tru tumas, ol dispela samting i gutpela tru!” (Song 16:6) Na Brata Barr i tok, “Yu gat wanpela gutpela samting tru—yu inap pilim tru olsem yu stap klostu long Jehova long olgeta de. Na em i no ken tekewe dispela gutpela samting sapos oltaim bel bilong yu i pilim tru na yu tenkyu long dispela.”
Jack Redford, wanpela tisa bilong Skul Gileat, em i mekim tok, “Bai Yu Mekim Wanem Kain Wok Long Maus Bilong Yu?” Sapos yumi no tingting gut na yumi toktok, dispela inap bagarapim tru man! (Sindaun 18:21) Olsem wanem yumi ken bosim maus? Brata Redford i tok, “Pastaim yu mas skulim tingting bilong yu, long wanem, maus i save kamapim ol samting i stap long tingting na bel.” (Matyu 12:34-37) Jisas i stap gutpela piksa tru—em i bin mekim wok long maus bilong em long litimapim nem bilong Jehova. Brata Redford i tokim klas, “Long nau i gat bikpela hangre bilong harim ol tok bilong Jehova. Yu save long ol dispela tok. Jehova i ‘skulim yu pinis long gutpela pasin bilong toktok.’ Tingting na bel bilong yu i dediket olgeta long Jehova, olsem na oltaim yu mas larim tingting na bel i bosim maus bilong yu.”—Aisaia 50:4.
Beten i bikpela samting, olsem narapela tok i kamapim, em “Yu Save Wokabaut Olsem Jehova i Stap Wantaim Yu?” Ulysses Glass i tok, “Sapos papa i wok strong tru long lukautim famili long kaikai samting, tasol em i no toktok wantaim ol o mekim gut long ol, famili bai ting em i mekim ol dispela wok, long wanem, em wok bilong em, na i no olsem em i laikim tru ol. Na yumi tu—ating yumi wok strong long mekim wok bilong God, tasol sapos yumi no beten, i olsem yumi dediket long wanpela wok na yumi no dediket long gutpela Papa i stap long heven.”
Theodore Jaracz i mekim tok, “Bilong Wanem Planti Tausen Man i Kam Bung Wantaim Lain Bilong God?” Long olgeta yia planti tausen manmeri ol i kam insait long oganaisesen bilong Jehova. (Sekaraia 8:23) Wanem samting i kamapim klia olsem ol Witnes Bilong Jehova ol i lain bilong God? Namba wan, em ol i bilip tru olsem olgeta tok bilong Baibel em i Tok Bilong God. (2 Timoti 3:16) Namba tu, ol i no insait liklik long ol samting bilong politik. (Jon 17:16) Namba 3, ol i kamapim nem bilong God long ol man. (Jon 17:26) Namba 4, ol i laikim tru ol man na ol i redi long lusim laip bilong ol long helpim ol. (Jon 13:35; 15:13) Olsem na yumi inap tru long ‘tokaut long gutpela pasin bilong em’ na ‘tokaut long em i bin singautim yumi long lusim tudak na em i bringim yumi i kam insait long gutpela lait bilong em.’—1 Pita 2:9.
Bihain long ol dispela tok, olgeta 46 sumatin i kisim pepa bilong makim ol i winim skul. Ol bai go long 16 kantri.
Program Bilong Belo Bek
Long belo bek Donald Krebs bilong Komiti Bilong Betel i mekim sotpela Stadi Wastaua. Nau ol sumatin i mekim wanpela pilai, nem bilong en “Gutpela na Stretpela Tingting i Olsem Wanpela Meri i Sanap Long Ol Rot na i Singaut Long Ol Manmeri.” (Sindaun 1:20) Dispela pilai i kamapim ol gutpela ekspiriens ol i bin kisim taim ol i autim tok long rot na stua samting. Tru tumas, Jehova i save mekim gut long ol man i strongim bel na autim tok long kain kain taim na ples. Wanpela sumatin i tok, “Mi laik tingim mipela i olsem naip i stap long han bilong ol ensel i wok long kisim ol kaikai long gaden. Sapos mipela i gat save long mekim wok, olsem naip i gat bikpela sap, ol ensel inap mekim bikpela wok moa long rot bilong mipela.” (Lukim Kamapim Tok Hait 14:6.) Na ol i kamapim piksa slait bilong ol ples olsem Bolivia, Malta, Taiwan, em 3-pela bilong ol dispela kantri em ol nupela misineri bilong dispela klas bai go long en.
Nau ol i singautim Wallace na Jane Liverance i kam long pletfom na toktok wantaim tupela. Ol i stap misineri inap 17 yia. Long Oktoba 1993 Sosaiti i singautim tupela long wok long Wastaua Fam, na nau Brata Liverance em i wanpela tisa bilong Skul Gileat.
Nau ol sumatin i mekim wanpela pilai i gat 4-pela hap bilong en, em “Litimapim Nem Bilong Ol Manmeri i Bin Mekim Gutpela Wok na Ol i Go Lapun.” Taim ol man i go lapun, ol i pret, nogut ol i no inap wok moa na ol narapela i lusim ol. (Song 71:9) Dispela gutpela pilai i kamapim klia ol samting olgeta long kongrigesen i ken mekim bilong helpim ol lapun i bin i stap gut long wok bilong Jehova.
Bilong pinisim bung ol i mekim singsing na beten, na ol dispela 6,220 manmeri i bung long Haus Kibung Bilong Jesi Siti na ol narapela haus bung, ol i pilim olsem dispela program i bin strongim ol. Yumi tingim ol dispela nupela misineri long beten bilong yumi. Yumi laik bai ol i wok yet long kisim bikpela amamas bilong man i givim samting long narapela man.
[Blok long pes 26]
Ol Samting Bilong Ol Sumatin
Hamas kantri ol i kam long en: 9
Hamas kantri ol bai go long en: 16
Hamas sumatin: 46
Krismas bilong ol, averes: 33.85
Hamas yia long tok i tru, averes: 16.6
Hamas yia long wok painia, averes: 12.2
[Blok long pes 27]
Ol i Tingim Malta
LONG Malta ol misin i gat nem Kristen ol i bin pasim rot bilong ol man long harim tok i tru bilong Baibel inap planti yia. Ol laspela misineri i bin go long Malta em Frederick Smedley na Peter Bridle, tupela i bin stap long namba 8 klas long 1947. Tasol ol i stap liklik taim tasol na ol polis i holim ol na gavman i rausim ol long Malta. Yiabuk bilong ol Witnes Bilong Jehova bilong 1948 i tok: “Dispela tupela misineri i bin lusim planti aua long sanap long kot na sanap long ai bilong ol bikman bilong gavman, wankain olsem ol aua ol i bin lusim long autim tok. As bilong en, em Misin Katolik i mekim pasin birua long ol. Ol pris i save tok, Malta i bilong ol Katolik, na olgeta narapela lotu i mas raus.” Orait, 45 yia i go pinis, na nau 4-pela misineri bilong namba 96 klas bilong Skul Gileat ol bai go long Malta.
[Piksa long pes 26]
Namba 96 Klas Bilong Wastaua Baibel Skul Bilong Gileat
Nem bilong ol brata sista i stap daunbilo. Namba wan lain i sanap paslain, na namba 6 lain i sanap baksait tru. Taim yu kaunim nem bilong ol na lukim pes bilong ol, kirap long han kais na i go long han sut.
(1) Ehlers, P.; Giese, M.; Sellman, S.; Zusperregui, J.; Rowe, S.; Jackson, K.; Scott, T. (2) Liehr, T.; Garcia, I.; Garcia, J.; Fernández, A.; Davidson, L.; Liidemann, P.; Gibson, L.; Juárez, C. (3) Fouts, C.; Pastrana, G.; Claeson, D.; Fernández, L.; Walls, M.; Dressen, M.; Pastrana, F.; Burks, J. (4) Burks, D.; Scott, S.; Jackson, M.; Mauray, H.; Juárez, L.; Zusperregui, A.; Brorsson, C.; Rowe, C. (5) Sellman, K.; Liidemann, P.; Davidson, C.; Mauray, S.; Walls, D.; Dressen, D.; Schaafsma, G.; Liehr, S. (6) Claeson, T.; Gibson, T.; Giese, C.; Ehlers, D.; Fouts, R.; Schaafsma, S.; Brorsson, L.