Amamas Long Daun Long Ol Man i Holim Wok Bos
“Yupela i save bihainim tru dispela tok.”—ROM 6:17.
“SPIRIT i wok i stap insait long bel bilong ol man i sakim tok” em i kamap ples klia tru long nau. Em pasin bilong bikhet, na Satan i as bilong en, em i “hetman i bosim strong bilong win.” Dispela “win” em dispela bikpela tingting bilong ol man long bihainim laik bilong ol yet na ol i bikhet na sakim tok, na dispela tingting i bosim bikpela hap lain bilong graun long nau. Dispela i wanpela as na i gat bikpela hevi long wok bilong bosim ol man.—Efesus 2:2, NW.
2 Pasin bikhet i olsem win nogut i pulap long graun, tasol ol wokboi bilong Jehova i dediket long em ol i no save larim dispela win i bagarapim ol long ol samting bilong spirit. Ol i save, “God i belhat long ol man bilong sakim tok bilong em.” Aposel Pol i tok: “Yupela i no ken poroman wantaim ol dispela kain man.” (Efesus 5:6, 7) Ol Kristen tru i wok long “larim Spirit bilong God i pulap long [ol].” Ol i kisim “gutpela tingting na save i kam long God,” na dispela i helpim ol long “bihainim klinpela tingting,” na “stap wanbel wantaim ol arapela,” na “isi long ol,” na “harim tok bilong ol.”—Efesus 5:17, 18; Jems 3:17.
Amamas Long Daun Long Wok King Bilong Jehova
3 Sapos i stret wanpela man i holim wok bos, bai yumi amamas long daun long em. Ol samting i kamap pinis i soim yumi ol man i bin sakim wok bos bilong Jehova na dispela i no bin helpim ol long i stap amamas. Dispela pasin i no bin helpim Adam na Iv long i stap amamas, o man i bin kirapim tupela long bikhet, em Satan. (Stat 3:16-19) Satan i no inap go moa long heven, na em i “belhat nogut tru,” long wanem, em i gat sotpela taim tasol bilong i stap. (KTH 12:12) Olgeta long heven na long graun i mas daun long stretpela wok King bilong Jehova bambai ol i ken i stap bel isi na amamas.—Song 103:19-22.
4 Jehova i gat ol gutpela pasin i wok wantaim, olsem na em i no laik bai yumi bihainim nating tok bilong em. Em i gat bikpela strong tru, tasol em i no hatpela bos. Em i God bilong pasin sori, na em i laik bai ol man na ol ensel i givim bel tru long em, na long laik bilong ol yet ol i bihainim tok bilong em. Em i laik bai ol i tingting gut na ol i gat strongpela laik long i stap daun long em, long wanem, i stret em i stap bos na em i mekim stret wok bos. Em i laik ol i bihainim tok bilong em oltaim oltaim, long wanem, ol i save tru, i no gat narapela rot bilong helpim ol tru. Jehova i laik olgeta man long heven na graun ol i mas i gat tingting wankain olsem man bilong raitim Song, em i tok: “Lo bilong Bikpela em i stret olgeta, na i save givim nupela laip long yumi. Tok bilong Bikpela em i samting yumi inap bilip tru long en. . . . Bikpela i save skulim yumi long gutpela tok tumas. Dispela tok i save mekim bel bilong yumi i amamas. . . . Bikpela i save tokim yumi long olgeta pasin yumi mas mekim, na dispela tok i tru na stret olgeta.” (Song 19:7-9) Sapos yumi laik i stap long nupela taim, yumi mas bilip tru olsem i stret Jehova i stap King na em i mekim stret wok bos.
Amamas Long Daun Long King Bilong Yumi
5 Krais Jisas em i gutpela piksa tru long pasin bilong daun long Papa. Baibel i tok: “Em i daunim em yet na i bihainim tok bilong God, i go inap long em i dai.” Na Pol i tok: “Long dispela as tasol God i litimapim Jisas na mekim em i stap antap tru. Na God i givim em wanpela nem i gutpela tru na i winim olgeta arapela nem. Em i givim dispela nem long Jisas, bai olgeta ensel na olgeta man na ol arapela . . . aninit long graun ol i ken brukim skru long ai bilong Jisas na i stap aninit long em. Na olgeta bilong ol i ken tokaut olsem, ‘Jisas Krais em i Bikpela.’ Na long dispela pasin ol bai i givim biknem long God Papa.” (Filipai 2:8-11) Yumi amamas long brukim skru long ai bilong Hetman bilong yumi, em King Krais Jisas.—Matyu 23:10.
6 Jehova i tok profet long Krais, em Hetman bilong yumi, olsem: “Mi bin mekim em i kamap bikman na em i bin bosim ol [lain] manmeri.” (Aisaia 55:4) Long graun Jisas i bin autim tok, na taim em i dai na kirap bek pinis em i go long heven na em i wok long bosim wok autim tok. Em i kamapim klia olsem em i man bilong “autim stret olgeta tok bilong God” long ol man bilong olgeta lain. (KTH 3:14; Matyu 28:18-20) Planti man moa bilong olgeta lain ol i insait long ‘bikpela lain’ long nau. Ol i stap aninit long wok hetman bilong Krais na ol bai abrusim bagarap long taim bilong “bikpela hevi.” (KTH 7:9, 14) Tasol wok hetman bilong Jisas i no pinis long dispela taim. Em bai i “stap king” inap 1,000 yia. Long ol man i bihainim tok, em bai mekim tru ol samting ol nem bilong em i makim, em i “Man bilong givim gutpela tingting tru,” na “God i gat bikpela strong,” na “Papa bilong i stap oltaim oltaim,” na “King bilong kamapim gutpela sindaun na bel isi.”—Aisaia 9:6, 7; KTH 20:6.
7 Pikinini Sipsip, Krais Jisas, bai bringim ol stretpela man i go long “ol hul i gat . . . wara bilong givim laip.” Sapos yumi laik kisim dispela wara, yumi mas kirap hariap na mekim ol samting i makim olsem yumi amamas long daun long em olsem King bilong yumi. (KTH 7:17; 22:1, 2; lukim tu Song 2:12.) Jisas i tok: “Man i kisim lo bilong mi na i bihainim gut, dispela man em i laikim mi tru. Na man i laikim mi, Papa bilong mi bai i laikim em. Na mi tu bai mi laikim em.” (Jon 14:15, 21) Yu laik bai Jisas wantaim Papa bilong em i laikim yu? Orait yu mas daun long wok bos bilong tupela.
Ol Wasman i Amamas Long Bihainim Tok
8 “Sios em i stap aninit long Krais.” Na dispela Wasman bilong lain Kristen em i givim sampela man olsem “ol presen” bilong helpim ol kongrigesen long “kamap strong na i stap gut.” (Efesus 4:8, 11, 12; 5:24) Ol dispela hetman bilong kongrigesen i mas “lukautim gut ol manmeri bilong God” i stap olsem sipsip long han bilong ol. Ol i no ken “i stap olsem ol bikman na daunim” ol sipsip; ol i mas “mekim gutpela pasin tasol, bai ol [sipsip] i ken lukim na bihainim.” (1 Pita 5:1-3) Ol i sipsip bilong Jehova, na Jisas em i “gutpela wasman” bilong ol. (Jon 10:14) Jehova na Jisas i putim ol long han bilong ol wasman bilong ol kongrigesen. I stret ol sipsip i mas amamas long bihainim tok bilong ol wasman, olsem na ol wasman yet i mas makim gutpela pasin na amamas long bihainim tok.—Aposel 20:28.
9 Long taim bilong ol aposel, ol wasman God i makim long spirit holi ol i stap olsem “long han sut” bilong Krais; dispela i makim olsem ol i daun long em, em i Het bilong lain Kristen. (KTH 1:16, 20; 2:1) Olsem tasol long nau, ol wasman bilong ol kongrigesen bilong ol Witnes Bilong Jehova ol i mas daun long Krais na “stap aninit long strongpela han bilong God.” (1 Pita 5:6) Taim ol i gat wok long harim kot, ol i mas beten olsem Solomon long taim em i stap gut long Jehova: “Mi laik bai yu givim mi gutpela tingting na save, bai mi inap bosim gut ol dispela manmeri bilong yu, na bai mi inap save wanem pasin i gutpela na wanem pasin i nogut.” (1 King 3:9) Elda i gat laik long bihainim tru tok, em bai wok long kisim save long tingting bilong Jehova na Krais Jisas, na bai tok ol elda i pasim long graun em i klostu wankain olsem God i pasim long heven.—Matyu 18:18-20.
10 Ol wasman bilong raun na ol elda bilong kongrigesen bai wok long bihainim pasin Krais i mekim long ol sipsip. Em i no olsem ol Farisi; em i no putim planti lo i hatwok long bihainim. (Matyu 23:2-11) Em i tokim ol man i kain olsem sipsip: “Yupela ol man i save hatwok tru na i karim ol bikpela hevi, yupela olgeta kam long mi na bai mi givim malolo long yupela. Yupela kisim save long mi na aninit long tok bilong mi, . . . samting mi givim yupela bilong karim, em i no hevi.” (Matyu 11:28-30) Tru, olgeta Kristen i mas ‘karim hevi bilong ol yet,’ tasol ol elda i mas tingim pasin bilong Krais na helpim ol brata long save, ol wok Kristen ol i mas mekim “i isi long karim” na “i no hevi,” na ol i ken amamas long mekim.—Galesia 6:5.
Daun Long God
11 Sapos yumi laik bai God i bosim yumi, yumi mas daun long em. Yumi mas save, em i stap het, olsem lo bilong 1 Korin 11:3 i makim. Tasol i no dispela tasol. Man inap mekim olsem em i daun long God, tasol em i no stap aninit tru long God. Olsem wanem long dispela? Olsem: I gat gavman ol manmeri i vot long en, na man inap tok em i laikim dispela kain gavman, na ating em i vot long en, na mekim wok bilong en. Tasol sapos em i sakim pasin na lo bilong dispela gavman, em i tok nating olsem em i laikim, a? Na olsem tasol, bilong daun tru long God, yumi mas bihainim ol pasin bilong em. Ol lo bilong Jehova i mas bosim olgeta samting yumi mekim. Na yumi mas bihainim pasin bilong Pikinini bilong em, long wanem, God i givim strong long em bilong bosim olgeta samting.
12 Yu mas save, Jehova i laik bai yumi amamas long daun long em, long wanem, yumi laikim em tru. Em yet i as bilong pasin bilong laikim ol narapela, na em i bihainim dispela pasin na bosim olgeta samting long heven na long graun. (1 Jon 4:8) Krais Jisas em i “wankain tru olsem God yet.” (Hibru 1:3) Em i tok, ol disaipel tru bilong em i mas laikim tru ol wanlotu bilong ol. (Jon 15:17) Olsem na sapos yumi larim God i bosim yumi, yumi mas daun long em na yumi mas laikim tru ol narapela. I olsem: Pasin bilong laikim tru ol narapela em i as bilong wok bos bilong God.
13 Elda inap ting, i gat kain kain lo ol brata i mas bihainim, na bai ol i daun tru long God. Sampela elda i bin kisim sampela tok bilong lain ‘gutpela wokboi’ na putim olsem lo ol brata i mas bihainim. (Matyu 24:45) Olsem: Lain ‘gutpela wokboi’ i bin tok, bilong helpim ol brata long save gut long ol narapela long kongrigesen, gutpela sapos ol i no sindaun long wanpela hap tasol long Haus Kingdom. Ol i laik givim tingting long ol brata; i no olsem wanpela lo. Tasol sampela elda i laik mekim i kamap olsem lo, na ol i ting sapos ol brata i no bihainim dispela lo, ol i no daun tru long God. Tasol ating i gat planti gutpela as na sampela brata sista i laik sindaun long wanpela hap tasol long olgeta taim. Sapos elda i no mekim pasin sori na tingim dispela, ating em yet i no daun tru long God. Yumi mas givim bel “long God na long ol man” na mekim olgeta samting long dispela pasin.—1 Korin 16:14.
Amamas Long Mekim Wok
14 Sapos yumi daun long Jehova, bai yumi amamas long mekim wok bilong em. Jehova em i “as bilong pasin tru bilong amamas.” (1 Timoti 1:11) Em i laik bai ol wokboi bilong em i amamas na mekim wok bilong em. Ol man i strong long yumi mas bihainim ol liklik liklik lo, ol i ken tingim wanpela lo ol Israel i mas “bihainim gut,” olsem: “Yupela i mas amamas long ol gutpela samting yupela i bin hatwok long kamapim.” (Lo 12:1, 18) Wanem wanem wok bilong Jehova yumi mekim, yumi mas amamas na yumi mekim; yumi no ken pilim olsem i givim hevi long yumi. Ol elda inap helpim ol brata long amamas long wok ol inap mekim. Tasol sapos ol elda i no was gut, ol inap mekim ol brata i bel hevi. Olsem: Sapos ol i skelim pasin bilong ol brata na litimapim nem bilong ol brata i lusim planti aua long autim tok na ol i winim mak bilong kongrigesen, bai i olsem ol i daunim ol narapela i no winim dispela mak. Maski i gat as tru na ol dispela brata i mekim liklik wok tasol, yu ting ol bai pilim olsem wanem? Ating bai ol i pilim olsem ol i gat asua, na bai ol i no amamas.
15 Sampela i lapun o ol i gat sik samting na ol inap autim tok liklik tasol, tasol ol i mekim bikpela hatwok, winim sampela ol i lusim planti aua long autim tok, long wanem, ol i yangpela na ol i gat strongpela skin. Ol elda i mas tingim dispela na ol i no ken kotim ol. Papa i givim namba long Jisas “bilong kotim ol manmeri na skelim pasin bilong ol.” (Jon 5:27) Jisas i no kotim rabismeri i givim liklik mani tasol, a? Em i pilim tru bikpela ofa meri i mekim. Dispela tupela liklik mani em “olgeta mani bilong en.” Maski em inap givim liklik tasol, ofa bilong em i makim olsem em i givim bel tru long Jehova! (Mak 12:41-44) Ol elda tu i mas pilim ofa bilong ol brata i no inap mekim bikpela wok, tasol ol i givim olgeta samting ol inap givim. Maski ol inap mekim liklik wok tasol, ating ol i givim bel moa yet long Jehova, winim sampela!
16 Tasol nogut sampela i mekim dispela tok i kamap olsem nupela lo na ol i tambuim ol brata long stori long ol aua samting bilong kongrigesen! Ol elda i mas skelim gut dispela samting—ol i mas kirapim ol brata long wok strong, tasol ol i mas helpim ol long amamas long wok ol inap mekim. (Galesia 6:4) Long tok piksa bilong Jisas long ol wokboi i kisim mani, bikman “i tingim pasin na strong bilong ol wokboi wan wan, na em i tilim mani long ol.” (Matyu 25:14, 15) Ol elda tu i mas tingim pasin na strong bilong olgeta wan wan brata sista i autim tok bilong Kingdom. Bilong mekim olsem ol i mas bihainim gutpela tingting. Ating ol i mas kirapim sampela long wok strong moa. Ating ol dispela brata sista bai amamas sapos ol elda inap givim save long ol long stretim gut ol wok bilong ol. Tasol sapos ol elda inap helpim ol long mekim wok inap tru long strong bilong ol na amamas long mekim, dispela amamas bai kirapim ol long mekim bikpela wok moa taim ol inap.—Nehemia 8:10; Song 59:16; Jeremaia 20:9.
Bel Isi Bilong Ol Man i Amamas Long i Stap Daun
17 I stret Jehova i stap king na ol man i amamas long daun long em bai ol i stap bel isi. Man bilong raitim Song, em i beten long Jehova, olsem: “Ol manmeri i laikim tumas lo bilong yu, ol i stap gut tru, na i no gat wanpela samting inap mekim ol i pundaun.” (Song 119:165) Taim yumi bihainim lo bilong God, yumi helpim yumi yet. Jehova i tokim ol Israel: “Oltaim mi save skulim yupela na soim yupela long ol stretpela pasin yupela i mas bihainim na bai yupela i stap gut. Sapos yupela i bin harim tok bilong mi, orait nau yupela inap i stap gut na oltaim laip bilong yupela bai i pulap long amamas . . . Na stretpela pasin bilong yupela bai i kamap strong oltaim.”—Aisaia 48:17, 18.
18 Ofa bilong Krais i mekim na yumi kamap wanbel wantaim God. (2 Korin 5:18, 19) Sapos yumi bilip long blut bilong Krais bilong baim bek yumi, na yumi wok strong long sakim ol laik nogut na bihainim laik bilong God, bel bilong yumi bai i no gat tok moa. (1 Jon 3:19-23) Sapos yumi bilip olsem na mekim gutpela pasin tu, yumi inap kamap stretpela man long ai bilong God, na wet long abrusim bagarap long taim bilong “bikpela hevi,” na i stap oltaim long nupela taim God bai kamapim. (KTH 7:14-17; Jon 3:36; Jems 2:22, 23) Yumi inap kisim ol dispela gutpela samting sapos yumi ‘bin harim tok bilong God.’
19 Tru tumas, Jehova em i Nambawan Bikpela King bilong heven na graun na yumi mas daun long em bambai yumi inap i stap amamas long nau, na wet long kisim laip oltaim long Paradais long graun long bihain. Yumi mas i gat tingting wankain olsem Devit, em i tok: “Yu [Jehova, NW] gat olgeta strong na pawa. Yu gat biknem, na yu stap antap tru. Yu nambawan olgeta. Long wanem, olgeta samting i stap long heven na graun i bilong yu tasol. Na yu stap bikpela king bilong olgeta samting. . . . Mipela i tenkyu long yu, na litimapim biknem bilong yu.”—1 Stori 29:11, 13.
Sampela Tok Bilong Tingim
◻ Jehova i laik bai wanem samting i kirapim ol wokboi bilong em long daun long em na bihainim tok bilong em?
◻ Jisas i bihainim tok na em i kisim wanem gutpela pe? Ol samting yumi mekim i mas kamapim klia wanem samting?
◻ Olgeta wasman i mas bihainim wanem pasin Jisas i mekim long ol sipsip?
◻ Yumi mas mekim wanem na bai yumi makim olsem God i bosim yumi?
◻ Yumi amamas long daun long ol man i gat wok long bosim yumi, na yumi kisim wanem ol blesing?
[Askim Bilong Stadi]
1, 2. (a) Wanem kain ‘spirit’ i pulap long graun long nau? Husat i as bilong en? Dispela ‘spirit’ i kirapim ol man long mekim wanem? (b) Ol wokboi bilong Jehova i mekim wanem na ol i stap narapela kain?
3. Wanem samting i mekim na bai yumi amamas long daun long man i holim wok bos? Ol samting i kamap pinis i givim wanem save long yumi?
4. (a) Jehova i laik bai wanem samting i kirapim ol wokboi bilong em long daun long em na bihainim tok bilong em? (b) Yumi mas save tru long wanem samting? Man bilong raitim Song i kamapim dispela tingting olsem wanem?
5. Jisas i bihainim tok na em i kisim wanem gutpela pe? Yumi amamas long tokaut long wanem samting?
6. Olsem wanem Jisas i bin autim tok bilong God long ol lain manmeri na em i stap hetman bilong ol? Olsem wanem na wok hetman bilong em i no pinis long taim bilong “bikpela hevi”?
7. Sapos yumi laik bai Krais Jisas i bringim yumi i go long “ol hul i gat . . . wara bilong givim laip” yumi mas kirap hariap na mekim wanem? Yumi mas mekim wanem na bai Jisas na Jehova i laikim yumi?
8, 9. (a) Krais i givim wanem samting bilong helpim kongrigesen long kamap strong? Ol dispela man i mas makim wanem gutpela pasin ol sipsip i ken bihainim? (b) Kamapim Tok Hait i tok wanem na i makim olsem ol wasman Kristen i daun long Krais? Taim ol i harim kot, ol i mas mekim wanem na bai ol inap “bihainim tru” tok bilong God?
10. Olgeta wasman i mas wok long bihainim wanem pasin Jisas i mekim long ol sipsip?
11. (a) Olsem wanem man inap tingim God i stap het, tasol em i no daun tru long God? Stori long dispela. (b) Man i daun tru long God em i mekim wanem?
12, 13. (a) Yumi mas daun long God na mekim wanem samting moa, na bai yumi daun tru long em? (b) Bilong daun long God, i gat planti liklik liklik lo yumi mas bihainim o olsem wanem? Stori long dispela.
14, 15. (a) Elda inap mekim wanem na bai sampela brata sista i no amamas moa long mekim wok bilong Jehova? Sapos em i mekim olsem, olsem wanem em i no daun long God? (b) Olsem wanem yumi save, Jisas i no tingim mak bilong wok yumi mekim, em i laik bai yumi givim bel na yumi mekim? (c) Ol elda i mas tingim wanem samting?
16. (a) Bilong wanem ol elda i mas tingting gut taim ol i stori long ol aua samting bilong kongrigesen? (b) Wanem gutpela rot bilong helpim ol brata long mekim bikpela wok moa?
17, 18. (a) Sapos yumi amamas long daun long Jehova, olsem wanem dispela inap helpim yumi long i stap bel isi na bihainim stretpela pasin? (b) Sapos yumi bihainim tru ol tok bilong God, yumi inap kisim wanem ol samting?
19. Yumi mas mekim wanem bambai yumi inap i stap amamas long nau na kisim laip oltaim long bihain? Devit i tok wanem na em i kamapim tingting tru i stap long bel bilong yumi?
[Piksa long pes 24]
Ol elda i helpim ol brata long amamas long mekim ol wok ol inap mekim
[Piksa long pes 26]
Jehova i save amamas long ol manmeri i bihainim tru tok bilong em