Yu Tingim Yet?

Olsem wanem? Yu bin tingim gut tok bilong ol nupela Wastaua? Sapos olsem bai yu amamas long tingim bek ol dispela tok hia:

▫ Wanem bikpela samting i makim olsem ol man i narapela kain long ol animal?

Wanpela bikpela samting i makim olsem ol man i narapela kain long ol animal em wok bilong kru. God i putim hap save long kru bilong ol animal na dispela i bosim ol samting ol i mekim. Tasol ol man i narapela kain. God i wokim ol man bai ol yet inap tingim wanem samting ol i laik mekim. (Sindaun 30⁠:​24-28)​—⁠4/15, pes 5.

▫ Wanem samting i makim olsem singsing em i bikpela samting long ol Israel taim ol i mekim lotu long tempel?

Musik na singsing i bikpela samting long lotu bilong ol, i no bilong skulim ol long ol bikpela tok bilong Lo, tasol bilong kirapim ol long givim bel long lotuim Jehova. Ol i redi gut na lain gut bilong mekim dispela hap wok lotu. (1 Stori 23⁠:​4, 5; 25⁠:⁠7)​—⁠5/1, pes 10, 11.

▫ Taim pikinini i liklik yet papamama i mas mekim wanem bilong helpim em?

Taim pikinini i nupela yet, papamama i mas tingim em oltaim. Aposel Pol i tok: “Taim yu bin i stap liklik pikinini yet, yu stat long kisim save long ol buk i gat tok bilong God. Dispela ol buk ol inap long givim gutpela tingting long yu, na . . . bai God i kisim bek yu.” (2 Timoti 3⁠:15) Olsem na yumi save, taim Timoti i liklik yet mama i bin lukautim em long ol samting bilong spirit tu.​—⁠5/15, pes 11.

▫ Wanem 4-pela samting i makim olsem Baibel i kamapim tok God i laik givim long olgeta man?

(1) Olgeta inap kisim. Klostu olgeta manmeri (98 pesen) inap kisim Baibel long wanpela tok ples ol i save long en. (2) Stori i stret. Ol samting Baibel i stori long en i bin kamap tru bipo​—⁠i no stori nating bilong ol tumbuna. (3) Helpim ol man. Ol lo na tok bilong Baibel i makim stretpela pasin man i mas bihainim na sapos em i bihainim gut, bai em i stap gutpela. (4) Tok profet. Baibel i tokaut stret long ol samting bai kamap bihain na kolim olgeta wan wan samting bai kamap.​—⁠6/1, pes 8, 9.

▫ Man i save long lotu i tru em i gat wanem wok?

Taim yumi painim pinis lotu i tru, yumi mas mekim dispela i kamap namba wan samting long laip bilong yumi. Em i mas bosim olgeta samting yumi mekim. (Song 119⁠:105; Aisaia 2⁠:⁠3)​—⁠6/1, pes 13.

▫ Bilong wanem em i bikpela samting long stadi long Baibel?

Bilong i stap strong na amamas long wok bilong God, olgeta wokboi bilong God i mas stadi na wok long kisim nupela save na kisim save long ol strongpela tok bilong Baibel. Long dispela rot bai ol inap i stap strong long spirit.​—⁠6/15, pes 8.

▫ Wanem insait bilong tok “sin” olsem i stap long Baibel?

Baibel i save kolim tok Hibru na tok Grik bilong makim “sin” olsem “i no winim mak,” o i no inapim mak, o i no kisim mak. God i wokim namba wan man na meri bilong i stap olsem piksa i soim biknem bilong em, tasol ol i no inapim dispela mak. Ol i mekim sin. (Stat 2⁠:​17; 3⁠:⁠6)​—⁠6/15, pes 12.

▫ Bilong wanem em i no gutpela yumi kaunim buk bilong ol man i givim baksait long Jehova?

Sampela buk bilong ol i kamapim tok giaman long rot bilong “switpela tok” na “planti tok giaman.” (Rom 16⁠:​17, 18; 2 Pita 2⁠:⁠3) Olgeta buk bilong ol i sutim tok tasol na bagarapim bilip. No gat liklik tok bilong strongim bilip.​—⁠7/1, pes 12.

▫ Olsem wanem? Kantri Grik i as bilong gavman demokratik?

Long kantri Grik long bipo, long wan wan taun tasol ol i votim gavman, na ol man tasol i vot. Bikpela hap lain (80 pesen samting) ol i no inap vot. Dispela gavman i no kamap long laik bilong planti manmeri o em i no gavman demokratik, a?​—⁠7/1, pes 16.

▫ Wanem samting i mekim na marit bilong ol Kristen i save kamap strong?

Tupela marit i mas daun long tingting bilong God long marit na tupela i mas wok strong long bihainim ol lo bilong God long Baibel. (Efesus 5⁠:​21-33)​—⁠7/15, pes 10.

▫ Olsem wanem famili bilong yu i ken kisim amamas long famili-stadi?

Wok long kirapim ol pikinini long mekim sampela tok insait long stadi. Givim gutpela tok long ol bilong strongim bel bilong ol. Tokim ol yu amamas long ol gutpela tok ol i bin mekim insait long stadi. No ken tingting tasol long pinisim ol paragraf bilong stadi. Yu mas wok long putim ol dispela tok i go long bel bilong ol pikinini bilong yu.​—⁠7/15, pes 18.

▫ Wanem insait bilong dispela tok: “Ol manmeri bai i tok olsem, ‘Nau em i gutpela taim tru. Yumi stap gut.’ ” (1 Tesalonaika 5⁠:⁠3)

Baibel i no tok ol lain man bai kamapim tru “gutpela taim,” tasol ol bai toktok long en long narapela kain pasin, olsem ol i bilip tru em bai kamap. Bai i olsem rot i op moa yet na klostu bai gutpela taim i kamap.​—⁠8/1, pes 6.

▫ Kolim 3-pela samting i makim olsem Jehova i save isi long ol man.

Jehova i kamapim klia olsem em i redi long lusim sin. (Song 86⁠:⁠5) Maski em i tingim pinis rot bilong mekim wanpela samting, em i orait long senisim dispela rot sapos wanpela samting i kamap. (Lukim Jona, sapta 3.) Na Jehova i olsem gutpela piksa long mekim wok bos long gutpela pasin. (1 King 22⁠:​19-22)​—⁠8/1, pes 12-14.