Planti Man i Pret Long Ol Man i Dai Pinis
San i go daun longtaim pinis. Yu wokabaut i go bek long haus bihaintaim liklik. Long rot yu abrusim ples matmat. Yu pret na bel i guria. Em tudak tru na i no gat pairap. Tasol wantu yu harim samting i pairap strong longwe liklik. Lewa bilong yu i sut na yu siksti stret bambai yu inap kamap kwik long haus na i stap gut.
YU SAVE pret olsem taim yu stap long ples matmat o klostu long en? Sapos olsem ating wanpela bilip bilong planti man i as bilong pret bilong yu, em ol i bilip olsem tewel bilong ol man i dai pinis inap helpim o mekim nogut long ol man i stap yet.
Dispela bilip i kirapim ol man long mekim kain kain pasin, long wanem, ol i ting ol i mas helpim ol man i dai pinis, na sapos ol i no amamasim ol bai tewel bilong ol i mekim nogut long ol. Pasin bilong planti man long sampela kantri long Latin-Amerika, taim birua i painim man na em i dai, ol i save wokim liklik haus long ples em i dai na putim kruse long en. Sampela i putim ol kandel na plaua bilong makim olsem ol i tingim o i laik helpim tewel bilong man i dai pinis. Sampela taim i gat stori olsem wanpela “mirakel” i bin kamap bilong bekim beten man i mekim long dispela hap, olsem na planti man i wok long i go long dispela animita, em liklik haus ol i tok tewel bilong man i stap long en. Na ol i mekim mandas o tok promis olsem: Sapos man i dai pinis i helpim ol long mekim wanpela samting o kisim wanpela samting—ating wokim mirakel na oraitim sik bilong ol—bai ol i mekim bikpela samting bilong tenkyu long em. O i gat stori olsem: Long taim bilong tudak tewel bilong man i dai pinis i save kamap long ples na ol man i pret nogut tru. Planti man i tok ol dispela tewel i penando, olsem ol i kam bilong bekim nogut long ol man long samting i bin kamap bipo.
Long planti kantri ol man i mekim planti samting bilong amamasim “tewel” bilong man i dai pinis. Ol i wokim ol bikpela kaikai, na mekim ol ofa, na mekim ol gutpela tok—ol i mekim olsem bambai dispela “tewel” i no ken bekim nogut long ol. Ol i ting dispela bai kirapim “tewel” long mekim gut long ol.
Wanpela ripot i kam long Afrika i tok: “Planti ol i bilip olsem, i no gat wanpela samting i kamap nating. Wanem wanem samting i kamap long ol—maski em sik, o bagarap, o ol i no inap kamapim pikinini, o ol i sot long mani, o i gat bikpela ren o bikpela san, o birua, o famili i no stap wanbel, o wanpela i dai—ol i ting olsem ol spirit i stap hait ol i as bilong dispela olgeta samting, em ol i gat bikpela strong winim ol man.” Narapela ripot i tok: “Ol manmeri i bilip olsem tewel bilong ol tumbuna ol i stap long heven na ol i save was oltaim long ol famili bilong ol i stap yet long graun. Ol i ting ol dispela tumbuna i gat ol narapela kain strong, em ol inap mekim wok long en bilong helpim na lukautim ol famili bilong ol long graun sapos ol famili i amamasim ol, o bilong givim strafe long ol famili sapos ol i no mekim olsem.”
Tasol yu ting dispela i stret long tok bilong Baibel? Yu ting olsem wanem?
[Piksa long pes 4]
Wanpela “Animita” long Sili