Wanem Samting i Painim Man i Dai Pinis?
PLANTI man i bilip olsem man i dai pinis em i gat tewel o spirit i no save dai, na dispela bilip tasol i as na ol man i save pret long ol man i dai pinis. Sapos Baibel i makim klia olsem dispela bilip i giaman, yumi ken save ol man i dai pinis i no inap mekim nogut long yumi. Orait, Baibel i tok wanem?
Baibel i stori long ol man i dai pinis olsem: “Ol man i gat laip . . . i save bai ol i dai. Tasol ol man i dai pinis, ol i no inap save long wanpela samting. Bai ol i no kisim gutpela samting moa. Ol man i lusim tingting pinis long ol. Taim ol manmeri i dai, laik na kros na mangal bilong ol i pinis olgeta, na ol . . . i no inap mekim wanpela samting moa long graun.”—Saveman 9:5, 6.
Olsem na yu ting ol man i dai pinis inap helpim yu o mekim nogut long yu? Baibel i tok, ol i no inap mekim. Ol i no save long wanpela samting na ol i no inap toktok. Ol i no inap toktok long ol man i stap yet—ol i no inap laikim ol o bel nogut long ol—ol i no inap mekim wanpela samting. Yu no ken pret long ol.
Tasol ating sampela bai tok, ‘Tru, taim man i dai bodi i no inap mekim wanpela samting, tasol spirit i stap laip yet na i lusim bodi, em dispela spirit inap helpim o nogutim ol man i stap yet.’ Planti milion manmeri long olgeta hap i bilip olsem.
Ol Madagaska i ting, i dai i olsem senis tasol bilong ples man i stap long en. Olsem na ol i tingim taim bilong planim man o rausim bodi gen long matmat em bikpela samting, winim taim bilong marit. Ol i ting man i bin i stap wantaim ol tumbuna na em i kam long graun, na taim em i dai em i go bek long ol. Olsem na ol man i wokim haus bilong ol yet long samting em bai bagarap, olsem diwai o graun malumalum, tasol ol i wokim ol gutpela strongpela “haus” bilong ol man i dai pinis, em matmat bilong ol. Taim ol i rausim bodi gen long matmat, ol famili na pren i ting bai ol i kisim blesing, na ol meri i ting sapos ol i holim bun bilong wanpela long famili i dai pinis, dispela bai mekim na bai ol inap karim pikinini. Tasol Baibel i tok wanem?
Ol Man i No Bilong i Dai
Yumi mas save, God Jehova i wokim man bilong i stap laip; em i tok, sapos man i sakim tok, dispela tasol inap mekim na bai em i dai. (Stat 2:17) Sori tumas, namba wan man na meri i mekim rong, na long dispela rot sin i kamap long ol man na ol i dai. (Rom 5:12) Kirap long taim namba wan man na meri i sakim tok, dai i bin painim ol man. Em wanpela samting nogut i save painim yumi olgeta. God i no wokim yumi bilong i dai, na dispela em i wanpela as bilong tingting bilong ol man olsem taim ol i dai ol i no i dai olgeta.
Baibel i stori olsem Satan i giamanim namba wan man na meri long i dai. God i tok, sapos tupela i sakim tok bai ol i dai; Satan i tok, ol i no ken i dai. (Stat 3:4) Ol samting i kamap bihain i makim klia olsem God i tok stret—ol man i dai, olsem God i tok ol bai mekim. Olsem na Satan i wok long kamapim narapela tok giaman, olsem: Taim man i dai, em i no i dai tru; em i gat tewel o spirit i stap yet taim bodi i dai. Satan em i man bilong giaman. Jisas i kolim em “papa tru bilong pasin bilong tok giaman.” (Jon 8:44) Tasol bilong stretim i dai, God i mekim wanpela gutpela promis.
Wanem Promis?
Em i tok promis olsem ol man i dai pinis, planti tru bai ol i kirap bek. Insait bilong hap tok Grik (a·naʹsta·sis) ol i tanim olsem “kirap bek” i olsem “kirap sanap gen,” na i makim man i kirap bek long matmat. Tru tumas, taim man i dai em i slip long matmat, tasol God inap kirapim em bek long strong bilong em. Laip bilong man i lus, tasol God inap givim laip long em gen. Pikinini bilong God, em Krais Jisas, em i tok: “Taim i laik kamap na olgeta manmeri i stap long matmat ol bai i harim maus bilong Pikinini, na ol bai i lusim matmat na i kam ausait.” (Jon 5:28, 29) Na aposel Pol i tok: “Mi bilip na mi wet long God bai i kirapim bek ol man i dai pinis, em ol stretpela man na ol man nogut wantaim.” (Aposel 24:15) Jop, em wanpela gutpela wokboi bilong God taim lotu Kristen i no kamap yet, na em i tokaut long em i bilip olsem ol man i dai pinis bai kirap bek. Em i tok: “God, i gutpela sapos yu haitim mi long ples bilong ol man i dai pinis, inap belhat bilong yu i slek olgeta. Na yu ken makim wanpela taim bilong tingim mi gen. . . . Bai yu singautim mi na bai mi lusim dispela ples na kam long yu.”—Jop 14:14, 15.
Tok promis bilong kirap bek i makim olsem yumi no gat tewel i stap laip yet taim yumi dai; dispela bilip i giaman. Ol man i dai pinis, sapos ol i stap laip yet long narapela hap, olsem long heven o long wanpela ples spirit, i no gat as na ol i mas kirap bek, a? Ol i kisim pinis pe o samting ol i mas kisim. Sapos yu skul gut long ol tok bilong Baibel bai yu save, ol man i dai ol i dai tru; ol i no inap save long wanpela samting. Ol i slip na wetim gutpela Papa bilong yumi, Jehova, i kirapim ol long nupela taim—long Paradais—olsem em i tok promis pinis. Tasol sapos yumi no gat tewel i lusim bodi taim yumi dai, olsem wanem na sampela man i tok ol i bin toktok wantaim ol spirit?
Toktok Wantaim Ol Spirit
Planti man i save stori olsem ol i bin toktok wantaim ol spirit. Orait, ol i toktok wantaim husat tru? Baibel i toksave olsem: “Satan yet i save senisim pasin bilong en na kamap olsem ensel bilong lait. Olsem na sapos ol wokman bilong Satan tu i senisim pasin bilong ol na i mekim olsem ol wokman bilong stretpela pasin, yumi no ken kirap nogut long dispela.” (2 Korin 11:14, 15) Bilong giamanim ol man, ol spirit nogut (ol ensel i bikhet) i save toktok wantaim ol, na sampela taim ol i giaman olsem ol i laik helpim ol man.
Aposel Pol tu i toksave long dispela pasin bilong giamanim ol man: “Sampela man bai i lusim bilip bilong ol, long wanem, ol bai i putim yau long tok bilong ol spirit bilong giaman na ol spirit nogut na bihainim tok bilong ol.” (1 Timoti 4:1) Ol spirit nogut i giamanim ol man bai ol i ting ol man i dai pinis i toktok wantaim ol; bilong helpim dispela bilip giaman ol i giaman olsem ol i “wokman bilong stretpela pasin.” Long dispela rot ol bilip giaman i bin kalabusim ol man na ol i lusim tok i tru bilong Baibel.
Ol man i dai pinis i no inap toktok, o mekim wanpela samting, o pilim wanpela samting, olsem Song 146:3, 4 i makim: “Ol king na ol man bilong graun i no inap kisim bek yu. Olsem na nogut yu bilip long ol. Taim ol i dai ol i tanim i kamap graun gen. Na long dispela taim ol i no inap mekim olgeta samting ol i bin tok long mekim.” Taim ol i dai, spirit o strong bilong ol long i stap laip, em i lusim bodi; em i pinis long skin. Man i mas pulim win bambai dispela strong i ken i stap long skin bilong em. Olsem na taim man i no pulim win moa, tingting bilong em i pinis na em i no inap pilim o lukim o harim o smelim wanpela samting. Em i dai olgeta. Olsem na em i no gat rot long bosim ol man i stap yet.
Olsem na Baibel i tok, i dai bilong man na animal i wankain. Taim ol i dai, ol i no save long wanpela samting na ol i tanim i kamap graun gen. Saveman 3:19, 20 i tok: “Pinis bilong yumi man i wankain olsem ol abus. Ol abus i save dai, na yumi man tu i save dai. Man na abus i save pulim win, na dispela i as bilong laip bilong tupela wantaim. Olsem na laip bilong man i no winim laip bilong abus. Nogat. Laip bilong tupela wantaim i olsem samting nating. God i bin kisim graun na wokim tupela, olsem na taim tupela i dai bai tupela i kamap olsem graun gen.”
God Jehova i save ol spirit nogut i wok long giamanim ol man bambai ol i ting ol inap toktok wantaim ol man i dai pinis, o ol man i dai pinis inap mekim sampela samting long ol. Olsem na em i toksave long lain bilong em, ol Israel bilong bipo, olsem: “Yupela i no ken larim ol manmeri bilong yupela i mekim olkain pasin bilong glasman, na pasin tambaran na pasin sanguma na wokim posin na mekim marila. Na yupela i no ken toktok wantaim tewel bilong ol man i dai pinis. God, Bikpela bilong yumi, i no laikim tru ol manmeri i save mekim ol dispela kain pasin nogut.”—Lo 18:10-12.
God i no as bilong dispela tingting olsem ol man i dai pinis inap mekim nogut long yumi. Em i God bilong mekim ol pasin na tok i tru. (Song 31:5; Jon 17:17) Em i redim gutpela taim bihain bilong ol manmeri i laikim tumas tok i tru na ol i lotuim em ‘long spirit na long pasin i tru.’—Jon 4:23, 24.
Jehova, Em God Bilong Mekim Tok i Tru na Pasin Sori
Gutpela Papa bilong yumi long heven “i no save giaman,” na em i tok promis pinis olsem ol milion milion manmeri i dai pinis na i stap long matmat bai ol i kirap bek, na bai ol inap i stap oltaim long nupela stretpela taim! (Taitus 1:1, 2; Jon 5:28) Dispela gutpela promis i kamapim klia olsem Jehova i laik tru long helpim ol man long i stap gutpela, na em i laik pinisim i dai na krai na pen. Olsem na yumi no ken pret long ol man i dai pinis o wari long ol i stap olsem wanem na wanem samting bai painim ol. (Aisaia 25:8, 9; KTH 21:3, 4) God bilong yumi, Jehova, em i save mekim pasin sori na stretpela pasin. Em inap pinisim hevi bilong i dai na kirapim bek ol man i dai pinis, na em bai mekim olsem.
Baibel, em Tok Bilong God, i gat planti stori long ol gutpela samting bai kamap long graun long nupela stretpela taim God i tok promis long en. (Song 37:29; 2 Pita 3:13) Bai olgeta man i stap wanbel na amamas na laikim tru ol narapela. (Song 72:7; Aisaia 9:7; 11:6-9; Maika 4:3, 4) Olgeta bai i stap long gutpela haus na i no ken pret, na bai ol i amamas long mekim wok. (Aisaia 65:21-23) Bai olgeta i gat planti gutpela kaikai. (Song 67:6; 72:16) Na bai ol i no gat sik. (Aisaia 33:24; 35:5, 6) Ol aposel wantaim sampela moa, inap liklik lain tasol, bai i stap king wantaim Jisas long heven, tasol Baibel i no stori olsem tewel bilong ol narapela bai stap gutpela tru long heven. (KTH 5:9, 10; 20:6) Orait, bilong wanem Baibel i no stori olsem sapos tru ol narapela bilion bilion manmeri i dai pinis ol i gat tewel i stap laip yet?
Long wanem, Baibel i tokaut klia olsem: Ol man i dai pinis ol i dai tru na i no i stap moa. Ol i no inap mekim nogut long yu. Ol i no save long wanpela samting; ol man God i tingim ol, ol i slip long matmat na wetim taim God i makim bilong kirapim bek ol. (Saveman 9:10; Jon 11:11-14, 38-44) Yumi mas bilip long God; em tasol inap helpim yumi. “Yumi amamas moa yet, long wanem, em i kisim bek yumi pinis.”—Aisaia 25:9.
[Piksa long pes 7]
Baibel i tok klia, ol man i dai pinis i stap nating i go inap long ol i kirap bek