Ol Man Bilong Nau i No Bilip Long God

“Ol man i ting i no gat God, olsem na ol yet i laik bosim sindaun bilong ol, maski dispela i helpim ol o nogutim ol, na ol i no tingim God liklik.”—⁠One Hundred Years of Debate Over God​—⁠The Sources of Modern Atheism.

PASTAIM yumi save kirap nogut taim yumi lukim wanpela traipela diwai. Tasol taim yumi lukim lukim planti taim, nau yumi no kirap nogut long en​—⁠yumi ting em i diwai nating tasol.

Na i wankain tu long dispela bilip olsem i no gat God. Bipo ol man i mekim planti tok long en na ol i wok long tok pait i go i kam na skelim skelim. Tasol nau ol man i no mekim olsem. Ol i orait long ol man i holim dispela bilip, wankain olsem ol man i bilip long God.

Tru, i no planti man i tokaut olsem i no gat God. Sampela i bin skelim dispela tingting long 11-pela kantri long Yurop na Esia na ol hap em Amerika i bosim, na ol i tok, inap olsem 2 pesen tasol, olsem wan wan, i tok i no gat God. Tasol planti ol i gat hap tingting olsem, maski ol i bilip olsem God i stap. Olsem wanem ol inap holim dispela tingting?

Ol i Tok God i No Bos Bilong Yumi

Wanpela buk (The Encyclopedia Americana) i tok, ‘Dispela bilip olsem i no gat God, sampela taim i olsem man i sakim God o givim baksait long em.’ Olsem na wanpela buk dikseneri i tok, dispela tok ‘i no bilip long God,’ sampela taim i olsem man i sakim ol lo bilong God; em i givim baksait long God.​—⁠The New Shorter Oxford English Dictionary.

Em nau, sampela man i no bilip long God ol i tok i no gat God, na sampela i sakim wok bos bilong God, na sampela i holim tupela tingting wantaim. Baibel i makim ol kain man olsem, long Taitus 1:16: “Maus bilong ol i save tok olsem, ‘Mi save long God.’ Tasol pasin bilong ol i soim olsem, ol i givim baksait pinis long em.”​—⁠Skelim wantaim Song 14:⁠1.

Dispela pasin bilong sakim wok bos bilong God, em namba wan man na meri i bin mekim pastaim. Iv i bilip olsem God i stap, tasol em i laik kamap wankain olsem God na bai em i save, wanem samting i gutpela na wanem samting i nogut. I olsem em i laik bosim em yet, na em yet i ken makim wanem pasin i gutpela na wanem pasin i nogut. Bihain Adam tu i sakim wok bos bilong God.​—⁠Stat 3:​5, 6.

Yu ting long nau sampela man i gat dispela kain tingting? Ol i gat. Ol i laik bosim ol yet. Wanpela buk i tok: “Ol man long nau i les long i stap long ai bilong God long olgeta taim. Ol . . . i laik i stap fri.” (One Hundred Years of Debate Over God​—⁠The Sources of Modern Atheism) Ol i sakim ol lo bilong Baibel na ol i tok, em i no inap helpim yumi, na yumi man i no inap bihainim. Planti man i gat wankain tingting olsem bilong king bilong Isip bipo, em i bikhet na i tok: “Bikpela [Jehova, NW] em i husat? Bilong wanem mi mas harim tok bilong em . . . Mi no save long Bikpela [Jehova, NW].” Em i sakim wok bos bilong Jehova.​—⁠Kisim Bek 5:⁠2.

Ol Misin i Sakim God

Tasol ol pris pasto bilong ol misin i sakim moa yet wok bos bilong God​—⁠ol i save autim tok bilong ol man tasol, olsem senis bilong ol tok i tru bilong Baibel. (Skelim wantaim Matyu 15:⁠9.) Na ol i bin helpim ol bikpela pait nogut tru i bin kamap long taim bilong yumi, olsem na ol i sakim lo bilong Baibel i tok, yumi mas laikim tru ol man.​—⁠Jon 13:⁠35.

Na ol pris pasto i givim baksait long ol lo bilong God long stretpela pasin​—⁠dispela i kamap ples klia long ol kot i kamap long ol pris i bin mekim pasin sem long ol pikinini. Samting i painim ol misin i wankain olsem samting i kamap long Israel na Juda bipo. God i bin tokim profet Esekiel: “Ol i save ting mi lusim kantri bilong ol pinis, na mi no moa tingting long ol na mi no save lukim ol. Olsem na ol i bin mekim planti pasin nogut na kilim planti manmeri.” (Esekiel 9:9; skelim wantaim Aisaia 29:15.) Em nau, yumi no kirap nogut long planti man i lusim pinis ol misin! Tasol yu ting nau ol i no ken bilip moa long God?

I Gat As Bilong En o Nogat?

Maski ol man i lukim pasin giaman bilong ol lotu o nogat, planti man i lukim bikpela pen na hevi i painim ol man na ol i no bilip long God. Simone de Beauvoir i bin tok, ‘I no hatwok long mi long ting i no gat wanpela man i bin wokim olgeta samting, long wanem, ol hevi i kamap long graun i makim olsem.’

Pasin bilong mekim nogut long ol man​—⁠em ol man bilong lotu tu i bin kirapim ol man long mekim olsem​—⁠yu ting dispela i makim olsem i no gat God? Tingim dispela: Sapos man i mekim wok long naip bilong pretim o bagarapim skin o kilim i dai wanpela man i no gat asua, yu ting dispela i makim olsem i no gat man i bin wokim dispela naip? Nogat, a? Dispela i makim olsem man i bin mekim wok nogut long naip. Na i olsem tu long planti hevi bilong ol man​—⁠em i makim olsem ol man i mekim wok nogut long save God i bin givim long ol, na ol i mekim wok nogut long dispela graun yet.

Na sampela i ting yumi no ken bilip long God, long wanem, yumi no inap lukim em. Tasol yumi no inap lukim win, na strong i karim ol tok samting i kam long redio, na smel bilong ol samting, tasol yumi save ol i stap. Wetlewa na yau na nus i toksave olsem long yumi. Olsem na yumi save bilip long samting yumi no inap lukim sapos mak bilong en i stap, a?

Wanpela man bilong saiens, em Irving William Knobloch, em i tingim ol samting i stap​—⁠olsem ol elektron, proton, atom, amino asit, ol wok kru bilong het inap mekim, na em i tok: ‘Mi save bilip long God, long wanem, i no gat narapela as na ol dispela samting i stap.’ (Skelim wantaim Song 104:⁠24.) Na wanpela saveman bilong ol samting bilong graun, em Marlin Books Kreider, em tu i tok: ‘Mi bilip tru olsem God i stap​—⁠mi no gat tupela tingting long en.’

Na i no ol dispela man tasol i bilip olsem God i stap. Wanpela profesa bilong saiens, em Henry Margenau, i tok, “Wan wan saveman bilong saiens tasol i bilip olsem i no gat God.” Tasol maski ol saientis i kisim bikpela save, o ol lotu i pundaun long wok bilong ol, yumi no ken lusim bilip na ting i no gat wanpela Man i bin wokim olgeta samting. Nau yumi ken skelim as bilong dispela.

Trupela Lotu i Narapela Kain

Long yia 1803, presiden bilong Yunaitet Stets, em Thomas Jefferson, i tok: ‘Mi nolaik tru long lotu Kristen ol i paulim pinis; tasol mi no ting olsem long ol lo tru bilong Jisas yet.’ Tru tumas, lotu Kristen tru i narapela kain long ol lotu bilong dispela graun i gat nem Kristen, em tok bilong ol man yet i as bilong planti bilip bilong ol. Tasol as bilong olgeta bilip bilong lotu Kristen tru, em Baibel. Olsem na Pol i tokim ol Kolosi, ol i mas kisim “gutpela save na tingting.”​—⁠Kolosi 1:​9, 10.

I stret ol Kristen tru i mas mekim olsem, long wanem, Jisas i tokim lain bilong em: “Yupela i mas i go mekim olgeta lain manmeri i kamap disaipel bilong mi. Na yupela baptaisim ol . . . na yupela lainim ol long bihainim olgeta tok mi bin givim long yupela.”​—⁠Matyu 28:​19, 20.

Long nau ol Witnes Bilong Jehova i bihainim tok bilong Jisas na mekim dispela wok long 231 kantri. Ol i bin tanim tok bilong Baibel i go long 12-pela tok ples na ol i prinim olsem 74,000,000 Baibel. Na ol i save go long haus bilong ol man na stadi wantaim ol long Baibel, na long dispela rot ol i wok long helpim 4,500,000 manmeri long ‘bihainim olgeta tok Jisas i givim’ long ol.

Dispela wok bilong skulim ol man em i helpim planti man long olgeta hap. Em i givim stretpela save long ol, long wanem, tok bilong ol man i no as bilong en; gutpela save na tingting bilong God i as bilong en. (Sindaun 4:18) Na dispela wok i helpim ol manmeri bilong olgeta lain na skin long mekim wanpela samting dispela “Taim Bilong Save” bilong ol man i no inap mekim​—⁠em i helpim ol long “kamap nupela man,” na nau ol inap kisim pasin bilong laikim tru ol narapela.​—⁠Kolosi 3:​9, 10.

Lotu i tru i win long dispela taim bilong yumi. Em i no sakim God​—⁠em i no tok, i no gat God o God i no bos bilong yumi. Mipela laik singautim yu i go lukim ol Witnes Bilong Jehova long wanpela Haus Kingdom bilong ol na bai yu yet yu ken skelim dispela samting.

[Blok long pes 6]

OL I STRONGIM AS BILONG DISPELA BILIP

Long yia 1750 samting, saveman Denis Diderot i kisim wok long tanim wanpela buk dikseneri long tok Frans; dispela buk i gat wanpela volyum tasol. Tasol em i mekim bikpela wok moa, winim wok em bos i makim bilong em. Em i wok inap 30 yia samting na em i wokim buk dikseneri bilong em (Encyclopédie) i gat 28 volyum, na i pulim tru tingting bilong ol man bilong dispela taim.

Tru, planti tok bilong dispela buk inap givim save long man, tasol planti tok bilong en i kamapim save bilong ol man tasol. Sampela buk ol i bungim wantaim, ol i kolim Great Ages of Man, i tok, dispela buk ‘i kamapim tingting bilong dispela man yet, em i ting sapos ol man i lusim bilip na ol i larim save bilong ol yet i stiaim ol, dispela inap helpim ol long kisim gutpela sindaun.’ Buk i no mekim wanpela tok long God. Wanpela buk (The Modern Heritage) i tok, ‘taim yumi skelim ol tok bilong dispela buk yumi save, ol man bilong raitim ol i kamapim klia olsem lotu i no wanpela samting ol man i mas kisim save long en.’ Olsem na misin i laik pasim dispela buk. Nambawan ofisa bilong lo i tok, dispela buk i laik daunim wok politik na stretpela pasin na lotu.

Tasol planti man​—⁠olsem 4,000 samting​—⁠ol i laik kisim dispela buk, maski em i gat bikpela pe tru. Olsem na i no longtaim na planti man moa i bilip olsem i no gat God.