As Bilong Bilip Olsem i No Gat God

LONG nau ol hevi i pulap tru long graun; ol het-tok i kamap long ol nius i truim dispela samting. Planti man i lukim ol dispela hevi i kamap long graun na nau ol i gat tupela tingting​—⁠God i stap tru o nogat? Sampela i tok ol i no bilip long God, na ol i tok i no gat God. Olsem wanem long yu? Yu tu yu gat dispela tingting?

Sapos yumi bilip long God o yumi no bilip, dispela bai stiaim tingting bilong yu long ol samting yu ting bai kamap bihain. Sapos i no gat God, orait em i samting bilong ol man yet long lukautim i stap bilong ol na bai olgeta man i no ken bagarap. Taim yu tingim dispela samting ating yu pret, long wanem, yu lukim pinis olsem ol man inap tru long bagarapim graun. Na sapos yu bilip olsem God i stap, orait bai yu bilip olsem i stap bilong yumi long graun i gat as bilong en​—⁠na ating yu inap lukim laik bilong God long ol man i kamap tru bihain.

Long bipo tru i gat wan wan man tasol i tok i no gat God. Tasol bipo liklik na i kam inap nau, planti man i wok long kisim dispela tingting. Wanem as bilong dispela? Yu save?

Save Long As Bilong En

Taim yumi lukim wanpela bikpela diwai i go antap tru, yumi save kirap nogut long en, a? Tasol ai bilong yumi i save lukim ol lip na han na as bilong diwai tasol. Ol rop​—⁠em samting bilong helpim diwai long i stap laip​—⁠ol i hait i stap insait long graun.

Orait, i wankain tu long dispela bilip olsem i no gat God. Olsem diwai i mekim, dispela bilip tu i wok long i go bikpela, na i kam inap wan handet yia samting bipo em i go bikpela tru. Olsem wanem? Ol samting i gat laip, na dispela graun, na ol samting i stap antap, ol inap i stap sapos i no gat wanpela Man i bin kamapim long pastaim tru? Yumi lotu nating long kain Man olsem, em Man bilong wokim olgeta samting? Ol saveman bilong graun long dispela taim bipo ol i bekim ol dispela askim na ol i tokaut strong na klia tru. Friedrich Nietzsche i tok: “Mipela i no gat wok moa long bihainim ol lo i makim pasin mipela i mas bihainim, na olsem tasol mipela i no gat wok long lotu.” Ludwig Feuerbach i tok: “Lotu i olsem wanpela driman tasol i kamap long tingting bilong ol man.” Na Karl Marx, em ol buk bilong em i stiaim tru tingting bilong planti man inap sampela yia bihain, em i tokaut strong olsem: “Mi laik mekim tingting bilong ol man i kamap fri tru na bai lotu i no ken kalabusim moa tingting bilong ol.”

Planti man i kirap nogut long dispela tok na ol i laikim. Tasol ol i lukim tasol ol lip na han na as bilong dispela bilip. Ol rop i stap pinis na ol i putim kru inap planti handet yia paslain long dispela taim. Ating bai yu kirap nogut long save, ol misin bilong graun i bin helpim dispela bilip long i go bikpela. As bilong en, em ol i giaman na mekim ol pasin i no stret, na dispela i kirapim planti man na ol i kros na i no bilip moa long lotu.

Ol i Planim Pikinini Bilong Diwai

Long bipo tru, Misin Katolik i bosim strong lain bilong en. Wanpela buk (The Encyclopedia Americana) i tok: “I olsem ol bikman bilong misin i no inap lukautim gut ol man long ol samting bilong spirit. Ol pris i gat bikpela namba, olsem ol bisop samting, misin i kisim ol namel long ol lain i gat biknem, na ol i tingim dispela wok ol i holim em i rot bilong kisim biknem na strong bilong bosim ol man.”

Sampela, olsem Jon Kalvin na Martin Luter, ol i laik stretim ol samting long misin. Tasol sampela pasin ol i mekim i no wankain olsem pasin bilong Krais. Taim ol i bruk long Misin Katolik, ol i no orait liklik long ol man i gat narapela bilip, na planti man i kisim bagarap. (Skelim wantaim Matyu 26:52.) Sampela pait ol i mekim i nogut tru, olsem na 300 yia bihain, namba 3 presiden bilong Yunaitet Stets, em Thomas Jefferson, i tok: ‘Sapos man i tok i no gat God, em i no gat bikpela asua olsem man i bagarapim nem bilong God na i mekim ol pasin nogut tru olsem Kalvin i mekim.’a

Tru, ol nupela lotu Talatala i no kamapim bek lotu i tru, tasol ol i pinisim hap strong bilong Misin Katolik. Misin i no inap bosim strong lotu bilong man olsem ol i mekim pastaim. Planti man i go insait long ol nupela lain Talatala. Na sampela i lukim pasin bilong ol lotu na ol i les long lotu, na nau tingting bilong man yet i kamap olsem god bilong em. Ol man i bihainim tingting ol yet i laikim, olsem na ol i gat ol narapela narapela tingting long God.

Ol i Kisim Tupela Tingting

Orait, long yia 1700 samting ol man i tok, ol inap skelim ol samting long tingting bilong ol yet na long dispela rot ol inap stretim ol hevi bilong graun. Wanpela saveman bilong Jemani, em Imanuel Kant, i tok, save bilong ol man i no inap kamap gutpela sapos ol i larim wok politik na lotu i stiaim tingting bilong ol. Em i tok: “Strongim bel na wok long kisim save!” Na em i tok: “Strongim bel na mekim wok long save bilong yu yet!”

Dispela tingting i kamap strong long wanpela taim ol i kolim Taim Bilong Save na i stap yet bihain long yia 1700 samting, na ol man i strong tumas long kisim save. Wanpela buk (Milestones of History) i tok: “Pastaim ol i bihainim nating wanpela bilip, tasol nau ol i gat tupela tingting. Ol i skelim skelim ol bilip na pasin bilong bipo.”

Wanpela samting bilong bipo ol i wok long skelim, em lotu. Wanpela buk (The Universal History of the World) i tok: “Ol man i senisim tingting bilong ol long lotu. Ol i no amamas moa long tok promis long gutpela pe ol bai kisim long heven; ol i laik kisim gutpela sindaun hia long graun. Olsem na ol i no bilip moa long ol samting bilong heven.” Planti saveman bilong dispela Taim Bilong Save i ting, lotu em i samting nogut. Ol i tok, ol bikman bilong Misin Katolik i pasim rot bilong ol man na ol i no gat save.

Planti saveman i les long lotu na ol i kamap deist, olsem ol i bilip long God, tasol ol i tok em i no save tingim ol man.b Wan wan ol i tokaut olsem i no gat God, olsem saveman Pol Henri Tiri Holbak, em i tok, lotu em i samting bilong ‘brukim ol man na longlongim ol, na i kamapim pait samting.’ Bihain, planti man moa i les long ol misin na ol i wanbel long tok bilong Holbak.

Em nau, ol misin yet i helpim dispela bilip olsem i no gat God! Em i narapela kain tru, a? Wanpela profesa bilong lotu (Michael J. Buckley) i tok, ‘Ol misin i olsem graun i kamapim kaikai​—⁠em dispela tingting olsem i no gat God.’ Na em i tok, ‘Ol man long Yurop na Amerika i bel nogut tru long pasin bilong ol misin i gat wankain bilip. Ol misin na ol lain i bruk long ol i bin kamapim bikpela hevi tru long Yurop; ol i wokim rot bilong bagarapim planti manmeri bilong ol narapela lotu, na ol i kirapim ol pait, na ol i wok strong long rausim sampela king long lotu o rausim ol long wok king.’

Planti i Bilip Olsem i No Gat God

I kam inap long yia 1800 samting, planti man i tok ol i no bilip long God. Ol saveman bilong graun na ol man bilong saiens i tokaut strong long dispela tingting bilong ol. Wanpela man i tok: “God em i birua bilong yumi. Sapos yu laik kisim gutpela tingting, yu mas nolaik tru long God. Bilong kamap gutpela tru, ol man i mas bilip olsem i no gat God.”

Tasol long taim bilong yumi, dispela bilip i kamap narapela kain liklik na planti man i bihainim, na sampela i tok ol i bilip long God ol tu i bihainim.

[Ol Futnot]

[Piksa long pes 3]

Karl Marx

[Piksa long pes 3]

Ludwig Feuerbach

[Piksa long pes 3]

Friedrich Nietzsche

[Piksa Kredit Lain long pes 2]

COVER: Earth: By permission of the British Library; Nietzsche: Copyright British Museum (see also page 3); Calvin: Musée Historique de la Réformation, Genève (Photo F. Martin); Marx: U.S. National Archives photo (see also page 3); Planets, instruments, crusaders, locomotive: The Complete Encyclopedia of Illustration/J. G. Heck; Feuerbach: The Bettmann Archive (see also page 3)