Ol Man i Pret Long God Ol i Bung Wantaim

“LONG olgeta hap ol man i gat bikpela laik long i stap fri long ol samting i save mekim ol i pret—olsem pret long ol raskol i bagarapim ol, o ol bai no gat wok mani, o bikpela sik bai painim ol. Yumi tu i gat dispela laik, a? . . . Orait, bilong wanem nau yumi toktok long olsem wanem yumi ken kisim pasin bilong pret?” Long olgeta “Pret Long God” Kibung Distrik, man i mekim as tok bilong kibung em i kamapim dispela askim i pulim tru tingting bilong ol man i kam bung.

Namba wan bilong ol dispela kibung i bin kamap long Jun 1994 long Not Amerika. Bihain long dispela, ol narapela kibung i kamap long hap bilong Yurop, na Sentral na Saut Amerika, na Afrika, na Esia, na ol ailan bilong solwara. Bilong wanem planti milion manmeri i go long ol dispela kibung ol i redi long kisim save long dispela pasin bilong pret? Em olsem: Sapos yumi laik kisim ol blesing Jehova i laik givim long lain bilong em, yumi mas pret long God. Olsem na ol i kam bung bilong kisim save long pasin bilong pret long God, na inap 3-pela de ol i kisim planti save long dispela pasin ol Kristen i mas kisim.

‘Pret Long God na Bihainim Ol Lo Bilong Em’

Dispela em i as tok bilong namba wan de bilong kibung na i kamapim tok bilong Saveman 12:13. Pasin bilong pret long God em i wanem samting? Long namba wan tok, siaman bilong kibung i tok: Pasin bilong pret long God i makim olsem yumi tingim bikpela strong bilong Jehova na yumi daun olgeta long em, na tu, yumi pret long mekim ol samting em i no save laikim. Dispela pasin bilong pret long God em i no nogutim yumi, nogat. I stret yumi mas pret long God, na dispela i helpim skin bilong yumi.

Olsem wanem dispela gutpela pasin bilong pret inap helpim yumi? Narapela tok, “No Ken Les na Lusim Wok Bilong Jehova,” i stori long pasin bilong pret long God bai kirapim yumi long stap amamas taim yumi bihainim ol lo bilong God. Na sapos yumi laikim tru Jehova na ol narapela man, dispela pasin bilong pret bai givim strong long yumi long ol samting bilong spirit. Tru tumas, pasin bilong pret long God inap helpim yumi na bai yumi no les long ran strong long resis bilong kisim laip oltaim.

Bihain long dispela tok, wanpela brata i toktok wantaim sampela brata sista, na stori bilong ol i kamapim klia olsem pasin bilong pret long God inap helpim na strongim yumi. Ol i stori long olsem wanem pasin bilong pret long God na daun long em i bin helpim ol long autim tok i go yet, maski ol man i les long harim tok o ol i mekim nogut long ol. Na tu, dispela pasin i bin helpim ol long sanap strong, maski sampela hevi i bin painim ol na i hatwok long stretim.

Tasol olsem wanem na sampela man i save pret long God na sampela nogat? Man i mekim as tok bilong kibung, “Kisim Pasin Bilong Pret Long God na Dispela Bai Helpim Yu,” em i tok, long Jeremaia 32:​37-39 Jehova i tok promis long em bai putim pasin bilong pret long God i go long bel bilong lain bilong em. Em i mekim long rot bilong spirit holi bilong em na long Baibel. Olsem na yumi mas wok strong long stadi long Baibel na mekim wok long olgeta samting bilong spirit God i save givim long yumi, olsem ol kibung na ol miting bilong kongrigesen​—⁠ol dispela samting bai helpim yumi long kisim save long pasin bilong pret long God.

Namba wan tok long belo bek i kirapim yumi long bilip strong long Jehova na long Tok bilong em. Tok i stori long olsem wanem Kingdom inap helpim i stap bilong ol Kristen.

Orait, nau ol i mekim namba wan bilong ol tok i gat 3-pela hap long en. Nem bilong en, “Pasin Bilong Pret Long God i Kirapim Yumi Long Bihainim Lo Bilong God” na i stori long famili. Sampela tok bilong Baibel bilong helpim famili, em tok i kamapim, em olsem:

□ Bilong ol man marit: Pasin bilong pret long God i mas kirapim man long laikim meri bilong em olsem em i save laikim bodi bilong em yet. (Efesus 5:​28, 29) Man i no laik mekim nogut long bodi bilong em yet, na taim em i stap wantaim ol pren bilong em, em i no daunim em yet o kamapim ol pasin kranki bilong em yet. Olsem na man i mas tingim meri na mekim gutpela pasin long em olsem em i mekim long em yet.

□ Bilong ol meri marit: Pasin bilong pret long God i kirapim Jisas long ‘oltaim mekim ol samting God i laikim.’ (Jon 8:29) Ol meri i mas mekim wankain gutpela pasin long man bilong ol.

□ Bilong ol papamama: Ol papamama Kristen i pret long God taim ol i mekim gutpela wok papamama na tingim ol pikinini i olsem presen Jehova i bin givim long ol. (Song 127:⁠3) Ol i mas helpim ol pikinini long kamap strongpela Kristen​—⁠dispela i mas i stap olsem namba wan mak papamama i laik winim.

□ Bilong ol pikinini: God i skulim ol pikinini long bihainim tok bilong papamama. “Yupela olgeta i pas wantaim Bikpela.” (Efesus 6:⁠1) Olsem na taim ol i bihainim tok bilong papamama i olsem ol i bihainim tok bilong God.

Yumi pilim tru laspela tok bilong apinun, long wanem, tok i stori long bel hevi yumi olgeta i kisim taim wanpela long famili i dai. Tasol namel long tok, wanpela gutpela samting i kamap. Ol brata sista i amamas tru taim brata i tokaut long nupela buklet Taim Wanpela Long Famili i Dai. Dispela buklet i gat 32 pes na ol piksa i gat kala kala, na i bilong helpim man i krai sori long wanpela long famili bilong em i bin i dai na bai em inap karim dispela hevi. Tasol olsem wanem? Wanpela taim i bin kamap bipo na yu no save wanem tok yu bai mekim long man em wanpela long famili bilong em i dai pinis? Wanpela hap long buklet i stori long ol samting yumi ken mekim bilong helpim ol man i krai sori. Taim brata i mekim yet tok, planti brata sista i wok long tingim sampela man em nupela buklet inap helpim ol.

‘Mekim Wok Holi Long Pasin Bilong Pret Long God na Daun Long Em’

Em as tok bilong namba 2 de na i kamapim tok bilong Hibru 12:28. Long moningtaim ol i mekim namba 2 tok i gat 3-pela hap long en, “Ol Kongrigesen i Wokabaut Stret na Pret Long Jehova.” Namba wan hap i stori long pasin bilong i kam long ol miting. Taim yumi bung long ol miting, dispela i makim olsem yumi daun long God na yumi tingim ol kaikai bilong spirit em i bin givim long yumi. Na i makim olsem yumi pret long nem bilong em na yumi redi long bihainim laik bilong em. (Hibru 10:​24, 25) Namba 2 hap i stori olsem: Bilong kongrigesen olgeta i ken pret long Jehova, olgeta wan wan long kongrigesen i mas wokabaut stret. Laspela hap i stori long olgeta Kristen i gat wok long autim gutnius oltaim. Bai yumi wok long autim tok i go inap wanem taim? Inap long taim God i tok, em inap.​—⁠Aisaia 6:⁠11.

Narapela tok em “Yupela i Mas Amamas Long Jehova na Dispela Bai Strongim Yupela,” na ol stori bilong stadi long dispela nius i kamapim dispela tok. (Nehemia 8:10) Bilong wanem lain bilong Jehova i amamas? Brata i mekim tok i kamapim sampela as. Wanpela bikpela samting i olsem: Yumi pas gut wantaim Jehova na dispela i mekim yumi amamas, winim amamas bilong ol narapela man. Na tu, em gutpela samting tru yumi insait long dispela lain Jehova i bin bringim i kam long Krais Jisas. (Jon 6:44) Dispela em i wanpela strongpela as na yumi stap amamas!

Wanpela bikpela samting long olgeta kibung, na long dispela “Pret Long God” Kibung tu, em ol man i kisim baptais. Brata i mekim tok “Yumi Pret Long Jehova na Yumi Dediket na Baptais” em i stori long 4-pela samting man i baptais pinis em i mas mekim: (1) Yumi mas stadi long Baibel, na long ol buk i helpim yumi long kisim gut ol tok bilong Baibel na bai yumi ken bihainim; (2) yumi mas beten; (3) yumi mas bung wantaim ol wanbilip bilong yumi long ol miting long kongrigesen; na (4) yumi mas autim tok long nem na Kingdom bilong Jehova.

Namba wan tok long Sarere long belo bek em “Wanpela Lain Jehova i No Lusim.” Inap 3,500 yia bipo, taim lain Israel i gat hevi, Jehova i tok promis long ol long rot bilong Moses olsem: “God, Bikpela bilong yumi, . . . em bai i no inap lusim tingting long yupela o larim yupela i stap nating.” (Lo 31:⁠6) Jehova i truim dispela tok na em i lukautim ol Israel taim ol i go insait na kisim Graun Bilong Promis. Long nau, taim hevi i painim yumi, yumi tu i ken bilip olsem, sapos yumi pas gut wantaim Jehova na bihainim ol tok bilong Baibel, bai Jehova i no lusim yumi.

Olsem wanem yu inap kisim amamas long kaunim Baibel? Man i mekim tok, “Kaunim Tok Bilong God, Em Baibel Holi, Long Olgeta De,” em i tok, taim yumi kaunim Baibel, gutpela sapos yumi tingim sampela askim olsem: Dispela tok i lainim mi olsem wanem long pasin bilong Jehova? Olsem wanem mi ken bihainim moa yet pasin bilong Jehova long ol dispela samting? Sapos yumi mekim olsem, bai yumi kisim bikpela amamas long kaunim Baibel.

Orait, nau namba 3 tok i gat 3-pela hap long en i kamap, “Ol Samting Bilong Helpim Ol Man i Pret Long Jehova.” Long nau, ating Jehova i no wokim ol mirakel bilong helpim ol wokboi bilong em, tasol em i helpim ol man ol i pret long em. (2 Pita 2:⁠9) Dispela tok i stori long 4-pela gutpela samting Jehova i givim long yumi bilong helpim yumi long dispela taim nogut yumi stap long en, olsem: (1) Long rot bilong spirit bilong em, Jehova i givim strong long yumi long mekim ol wok yumi no inap mekim long strong bilong yumi yet. (2) Long rot bilong Baibel, em i givim gutpela tok long yumi na stiaim wokabaut bilong yumi. (3) Long rot bilong ofa bilong Krais, yumi gat klinpela bel long ai bilong em. (4) Long rot bilong oganaisesen bilong em, olsem ol elda, em i soim rot long yumi na lukautim yumi. (Luk 11:13; Efesus 1:7; 2 Timoti 3:16; Hibru 13:17) Sapos yumi larim ol dispela samting i helpim yumi, bai yumi inap sanap strong na Jehova bai orait long yumi.

Laspela tok long Sarere long belo bek, “Bikpela De Bilong Jehova i Klostu Pinis,” i kamapim tok profet bilong Malakai. Tru, i gat ol taim nogut bilong pret i bin kamap bipo, olsem taim Jerusalem i kisim strafe long yia 70. Tasol bikpela de bilong Jehova bai em i taim bilong pret moa yet; long dispela taim Jehova “bai i mekim save long ol man i no laik save long God na i no bihainim gutnius bilong Jisas.” (2 Tesalonaika 1:​6-8) Dispela taim i klostu tru o olsem wanem? Man i mekim tok, em i tok: “Pinis i klostu! Jehova i save long dispela de na aua. Em i no ken senisim taim. Olsem na yumi no ken les.”

Tupela de bilong kibung i pinis, na olsem wanem long laspela de?

‘Pret Long God na Litimapim Nem Bilong Em’

As tok bilong namba 3 de i kamapim tok bilong Kamapim Tok Hait 14:⁠7. Ol tok i kamap long moningtaim i kamapim klia olsem wanem ol bilip bilong ol Witnes Bilong Jehova i narapela kain long ol bilip bilong ol narapela lotu.

Man i mekim tok, “Ol Stretpela Man Bai Kirap Bek,” i kamapim askim olsem: “Ol man i bin stap gut long God na ol i bin dai long taim bilong pinis bilong dispela graun bilong Satan, ol bai i kirap bek long wanem taim bilong dispela De Bilong Kot bilong 1,000 yia?” Bekim i olsem: “Baibel i no tokaut long dispela samting. Tasol yumi ken ting ol man i dai long taim bilong yumi bai i kirap bek pastaim na bai ol i ken wok wantaim ol planti manmeri i bin abrusim bagarap long taim bilong Armagedon long skulim ol man long taim bilong De Bilong Kot.” Bai sampela man i abrusim bagarap? Tru tumas, bai i gat. Narapela tok “Abrusim Bagarap Long Bikpela Hevi Tru na i Stap Laip” i kamapim klia dispela samting.

Inap longtaim pinis ol Witnes Bilong Jehova i bilip olsem: I gat tupela ples ol man bai kisim laip long en​—⁠planti milion manmeri bai kisim laip oltaim long Paradais long graun, na liklik lain tasol bai kisim laip long heven na mekim wok king wantaim Krais long Kingdom bilong em. Narapela tok, “Yupela Liklik Lain Sipsip, Yupela i No Ken Pret,” i stori long dispela lain i go long heven. (Luk 12:32) Long nau ol hevi bilong graun i go bikpela tru, olsem na dispela liklik lain i no ken pret; olgeta wan wan i mas sanap strong i go inap long pinis tru. (Luk 21:19) Man i mekim tok, em i tok: “Pasin bilong ol long strongim bel na no ken pret, em i save kirapim bikpela lain long strongim bel. Long wanem, ol tu i mas kisim pasin bilong strongim bel na no ken pret, na bai ol i ken wetim God i kisim bek ol long taim bilong bikpela hevi tru, i winim olgeta narapela hevi i bin kamap long graun.”

Bilong pinisim program bilong moningtaim, ol brata sista i amamas long lukim wanpela pilai bilong Baibel, Wanem Rot Bai Yu Makim na Bihainim? Long taim bilong Josua, na profet Elaija tu, ol Israel i mas tingim na makim wanem rot bai ol i bihainim. Elaija i tok: “Yupela manmeri bilong tupela tingting, wanem taim bai yupela i gat wanpela tingting tasol? Sapos Bikpela em i God tru, orait yupela i mas lotu long em wanpela tasol. Na sapos Bal i God tru, orait yupela i mas lotu long em wanpela tasol.” (1 King 18:21) Long nau tu, ol man i mas tingim wanem rot bai ol i bihainim. Yumi no ken holim tupela tingting. Wanem rot i stret long yumi bihainim? Yumi mas makim wankain rot Josua i bin makim, olsem: “Mi wantaim famili bilong mi, mipela bai i lotu long [Jehova, NW] tasol.”​—⁠Josua 24:⁠15.

I olsem wantu tasol, taim bilong pablik-tok long Sande belo bek i kamap. Nem bilong tok em “Bilong Wanem Nau Yumi Mas Pret Long God Tru.” Kamapim Tok Hait 14:​6, 7 i tokim ol man long ol i mas “pret long [God] na litimapim nem bilong em.” Bilong wanem nau yumi mas hariap na pret long God? Long wanem, “taim i kamap pinis bilong God i skelim pasin bilong olgeta man long kot.” Long rot bilong Pikinini bilong Em, nau em i stap King long Kingdom bilong God, Jehova bai pinisim olgeta man bilong dispela graun i save mekim pasin nogut na pasin bikhet. Man i mekim tok, em i tok, long dispela rot tasol ol man i pret long God ol inap i stap gutpela, na long dispela rot tasol God inap lukautim dispela gutpela graun bilong yumi na i no ken bagarap. Yumi stap long taim bilong pinis, olsem na nau yumi mas pret long God tru!

Ol i kamapim stori bilong Wastaua, na nau brata i mekim laspela tok em i kam long pletfom. Em i tok, ol tok bilong kibung i bin helpim ol man long save gut long pasin bilong pret long God. Em i stori gut long olsem wanem pasin bilong pret long God inap helpim ol. Na em i tokaut long wanpela nupela video-kaset​—⁠United by Divine Teaching. Dispela video i kamapim ol gutpela samting i bin kamap long ol “God i Skulim Yumi” Kibung Intenesenel bilong 1993-1994. Taim tok i laik pinis, ating planti i laik save, ‘Wanem samting bai kamap long yia bihain?’ Yumi ken wetim ol kibung distrik i gat 3-pela de long en i kamap long planti hap.

Na bilong pinisim tok, brata i kolim tok bilong Malakai 3:​16: “Bihain ol manmeri i save stap aninit long Bikpela na i harim tok bilong en, ol i toktok long ol yet, na Bikpela i harim toktok bilong ol. Na Bikpela i tok, na long heven ol i raitim wanpela buk i gat nem bilong ol manmeri i save stap aninit long Bikpela na i tingting long em oltaim.” Ol man i kam bung ol i lusim ples kibung, na ol i tingting strong long ol i mas tingting long nem bilong Jehova na bihainim pasin bilong pret long God taim ol i mekim wok bilong em.

[Piksa long pes 24]

Ol man i laik baptais ol i mas bihainim yet pasin bilong pret long God

[Piksa long pes 25]

Pilai “Wanem Rot Bai Yu Makim na Bihainim?” i kirapim ol man long ol i mas lotuim Jehova

[Piksa long pes 26]

Ol man i kam bung ol i amamas long kisim nupela buklet, “Taim Wanpela Long Famili i Dai”