Nambawan Gutpela Samting Mi Mekim Long Laip Bilong Mi
EM STORI BILONG BOB ANDERSON
Inap 10-pela yia i go pinis, sampela pren i askim mi: “Bob, olsem wanem na yu mekim wok painia inap longtaim olsem?” Mi lap liklik na mi tok: “Olsem wanem? Yu inap tingim narapela wok i winim wok painia?”
TAIM mi kirap mekim wok painia long 1931, mi gat 23 krismas. Long nau mi gat 87 krismas na mi mekim yet dispela wok. Mi no inap mekim narapela gutpela samting long laip bilong mi. Bilong wanem mi tok olsem?
Long 1914 sampela man i lusim wanpela liklik nius long haus bilong mipela. Ol Intenesenel Sumatin Bilong Baibel i bin wokim, em nem bilong ol Witnes Bilong Jehova long bipo. Taim dispela Witnes i kam bek, mama bilong mi i bin givim planti askim long em long bikpaia. Kirap long taim mama i yangpela yet em i strong long lotu Weslian Metodis, tasol em i hatwok long bilip olsem wanpela God bilong pasin sori inap givim pen oltaim long man. Taim em i kirap lainim tok i tru long dispela samting, em i bin tok: “Mi amamas tru, winim olgeta taim bipo long laip bilong mi!”
Wantu mama bilong mi i lusim wok tisa long Sande-skul bilong lotu Metodis na em i bung wantaim liklik lain bilong ol Sumatin Bilong Baibel. Em i kirap autim tok long taun bilong mipela long Bekenhet, em klostu long taun Livapul long hapsait bilong wara Mesi, na liklik taim bihain em i raun long wilwil long go long planti taun i stap klostu. Inap long em i dai em i autim tok long dispela bikpela teritori na ol man i bin save gut long em. Long dispela rot em i kamap olsem gutpela piksa bilong ol pikinini bilong em. Em i autim tok olsem wanpela Witnes inap long em i dai long 1971 taim em i gat 97 krismas.
Mama i kisim susa bilong mi, Kathleen, na mi long Sande-skul bilong lotu Metodis na mipela i bihainim em long ol miting bilong ol Sumatin Bilong Baibel. Bihain, taim papa bilong mi tu i kam wantaim mipela, papamama i stretim rot bilong mekim famili-stadi long olgeta taim long buk The Harp of God. Long dispela taim famili-stadi i nupela samting, tasol mipela i kisim planti blesing tru long kisim save long ol bikpela tok bilong Baibel, na bihain mitupela susa i kirap mekim wok painia.
Mama i tingting strong olsem, long 1920 taim mipela pikinini i lukim piksa bilong ol samting bilong Baibel (Photo-Drama of Creation) long Livapul, dispela i senisim tru i stap bilong mipela long ol samting bilong spirit, na tingting bilong Mama i stret. Mi yangpela tru, tasol dispela piksa i kirapim tru tingting bilong mi. Mi tingim yet wanpela hap bilong piksa i soim ol samting long i stap bilong Jisas, na taim em i wokabaut i go long i dai. Mi lukim dispela piksa na em i helpim mi long tingim nambawan bikpela wok—em wok bilong autim tok!
Long 1921 samting, mi kirap tilim ol liklik nius wantaim mama bilong mi long Sande apinun. Pastaim ol i tokim mipela long lusim nius long ol haus; bihain ol i tokim mipela long givim nius long ol man bilong haus na taim man i amamas long harim tok mipela i mas go lukim em gen. Mi save ting olsem, dispela wok mipela i mekim long bipo em i as bilong wok nau yumi mekim, olsem gobek na Baibel-stadi, em wanpela wok i kamapim ol gutpela samting long nau.
Mekim Wok Painia!
Mitupela Kathleen i kisim baptais long 1927. Long 1931, mi wok long Livapul olsem man bilong skelim ol samting i stap insait long ol marasin, na long dispela taim mi harim toksave olsem mipela i kisim nem ol Witnes Bilong Jehova. Planti taim mi bin lukim ol kolpota bilong Sosaiti (nau ol i kolim painia) i wok autim tok long hap bilong ol bisnis long Livapul, na mi pilim tru samting ol i mekim. Mi gat bikpela laik tru long lusim ol man bilong dispela graun mi save wok wantaim ol, na mekim wok bilong Jehova long olgeta taim!
Long Julai 1931 samting, pren bilong mi Gerry Garrard i tokim mi, namba tu presiden bilong Sosaiti Was Taua, Joseph F. Rutherford, i makim em long go autim tok long India, na em i orait long go. Paslain liklik long em i go, em i kam lukim mi na stori long dispela gutpela wok painia. Taim em i tok gutbai, em i strongim mi moa na em i tok: “Ating i no longtaim na bai yu kamap wanpela painia, Bob.” Na tru tumas, mi kirap mekim wok painia long Oktoba. Mi amamas tru, nau mi stap fri na mi raun long wilwil long hap bilong bus na autim tok long ol man i stap long ol longwe ples! Long dispela taim mi save pinis mi kirap mekim nambawan bikpela wok mi inap mekim!
Namba wan ples mi mekim wok painia, em long hap bilong Saut Wels, na mi poromanim Cyril Stentiford. Bihain Cyril i maritim Kathleen, na tupela i mekim wok painia wantaim inap sampela yia. Bihain pikinini bilong ol, Ruth, em tu i mekim wok painia. Long 1937, mi mekim wok painia long Flitwut, long Lankesia, na poroman bilong mi em Eric Cooke. Inap long dispela taim, long Briten ol painia i autim tok long ol longwe ples tasol, long ol hap i no gat kongrigesen. Tasol Albert D. Schroeder, em i lukautim wok bilong Sosaiti long brens-ofis long Landon long dispela taim, em i salim mipela i go long taun Bratfot, long Yoksia. Em i namba wan taim ol i bin makim sampela painia long Briten i go helpim wanpela kongrigesen.
Long 1946 Eric i go long Wastaua Baibel Skul Bilong Gileat, na ol i makim em long i go long Sauten Rodisia, nau ol i kolim Simbabwe. Em i mekim yet wok misineri wantaim meri bilong em long Deban, long Saut Afrika.
Long 1938 mi mekim wok olsem wasman son (nau ol i kolim wasman sekit) long not-wes Lankesia na long naispela hap bilong Lek Distrik. Long dispela hap mi bungim Olive Duckett, na taim mipela i marit, wantu em i raun wantaim mi long mekim wok sekit.
Long Aialan Long Taim Bilong Pait
Long Septemba 1939, Briten i tokaut olsem ol bai pait long Jemani. Bihain liklik Sosaiti i salim mi i go long Aialan. Long Briten gavman i kirap makim ol man long insait long ami, tasol ol i no mekim olsem long ol man long Ripablik Bilong Aialan long hap saut; dispela kantri i no insait long pait. Sosaiti i laik mekim Ripablik Bilong Aialan na Noten Aialan i kamap wanpela sekit. Tasol i gat sampela tambu, olsem na mipela i mas kisim ol pepa bilong raun bilong lusim Briten na i go long wanpela hap long Aialan. Gavman i tok mi inap go, tasol mi mas tok orait long kam bek kwiktaim long Inglan sapos gavman i singautim ol man i gat wankain krismas olsem mi long go insait long ami. Mi tok orait long dispela, tasol mi kirap nogut, taim mi kisim pepa, i no gat sampela tambu long en!
Long dispela taim i gat 100 Witnes tasol long Aialan olgeta. Taim mipela i kamap long Dablin long Novemba 1939, Jack Corr, em i bin mekim wok painia inap planti yia pinis, em i bungim mipela. Em i tokim mipela olsem i gat tupela narapela painia long wanpela taun i stap klostu, na sampela man long Dablin i amamas long harim tok—olgeta wantaim i olsem 20 man. Jack i baim wanpela rum long Dablin bilong mipela i ken bung wantaim na wokim miting. Mipela olgeta i tok orait olsem mipela bai bung long olgeta Sande. Mipela i mekim olsem inap long wanpela kongrigesen i kamap long 1940.
Noten Aialan, em hap bilong Yunaitet Kingdom, olsem na ol i pait long ol Jemani. Dispela i mekim na taim mipela i go sindaun long hap not long Belfas, mipela i gat buk bilong kisim skel bilong kaikai na long nait ol haus i stap olsem tudak. Maski ol balus bilong ol Natsi i mas raun inap olsem 1,600 kilomita long kam long Belfas na i go bek long ol ples bilong ol long Yurop, ol inap tromoi ol bom na bagarapim tru taun. Long namba wan taim ol balus i tromoi ol bom, ol i bagarapim Haus Kingdom na bagarapim tru haus bilong mipela taim mipela i stap wantaim sampela brata long narapela hap long taun, olsem na mipela i abrusim bagarap. Long dispela nait, wanpela famili Witnes i ranawe i go long wanpela ples hait bilong ol man. Taim ol i kamap long dispela ples em i pulap, olsem na ol i go bek long haus bilong ol. Wanpela bom i bagarapim dispela ples hait na olgeta man i stap long en i dai, tasol ol brata bilong yumi i kisim liklik bagarap tasol. Long ol dispela yia bilong pait i no gat wanpela brata i bagarap olgeta, na mipela tok tenkyu long Jehova long dispela.
Kaikai Bilong Spirit
Taim pait i go bikpela ol i putim sampela tambu moa, na bihain ol i skelim ol pas samting i kam long posofis. Olsem na ol i tambuim nius Wastaua i kam insait long kantri. Mipela i tingting planti, bai mipela i mekim wanem samting? Tasol Jehova i helpim gut mipela. Wanpela moningtaim mi kisim wanpela pas bilong wanpela “kasen” long Kanada, na em i rait long ol samting bilong famili. Mi no save long em, tasol long pinis bilong dispela pas em i tok, em bai putim “wanpela gutpela tok bilong Baibel” wantaim pas na mi ken kaunim. Em wanpela Wastaua, tasol skin bilong en i no gat rait long en, olsem na ol man bilong gavman i skelim ol buk na nius ol i no bin rausim.
Wantu mitupela meri bilong mi, na sampela Witnes bilong dispela hap, na Maggie Cooper, em i bin stap insait long wok bilong piksa Photo-Drama, mipela i kirap na wokim ol kopi bilong dispela Wastaua. Mipela i stretim rot na salim 120 kopi bilong Wastaua long ol narapela hap bilong kantri. Na long olgeta taim mipela i kisim ol Wastaua i no gat rait long skin bilong en i kam long ol planti nupela pren long Kanada, Ostrelia, na Amerika. Ol i wok strong tru na ol i mekim gutpela pasin long mipela, olsem na long taim bilong pait mipela i no lusim wanpela Wastaua.
Na mipela inap mekim sampela kibung tu. Long 1941 wanpela gutpela kibung i kamap na ol i kamapim wanpela nupela buk (Children). Ating man bilong gavman i skelim ol buk na nius i orait long wanpela buk em i ting em i stori long ol pikinini, olsem na mipela i no gat hevi long kisim sampela i kam insait long kantri! Long narapela taim, wanpela kampani long hap mipela i bin stap long en i prinim buklet Peace—Can It Last?, long wanem, mipela i no inap kisim ol i kam long Landon. Maski ol i putim planti tambu long mipela, Jehova i lukautim gut mipela long ol samting bilong spirit.
Winim Ol Hevi
Wanpela pris i bin stap long wanpela haus pasindia bilong ol lapun long Belfas, em bilong wanpela Witnes Bilong Jehova, na em i salim buk Riches i go long meri bilong em long Inglan. Meri i birua long tok i tru na em i kamapim dispela long pas em i rait i go bek long man bilong em. Em i tokaut tu olsem mipela i “wanpela oganaisesen i no save laikim kantri bilong ol yet.” Ol man bilong gavman i bin kaunim dispela pas na ol i toksave long wanpela lain bilong polis (Criminal Investigation Department). Olsem na ol i singautim mi i go long polis bilong stori long dispela samting na bringim wanpela buk Riches i kam. Taim ol i bekim buk, mi lukim ol i makim ol hap bilong buk i stori long Misin Katolik. Mi pilim olsem dispela em i bikpela samting, long wanem, mi save polis i bin was gut long wok bilong ol lain IRA (Irish Republican Army).
Polis i hatwok long save long as na mipela i no insait long pait, olsem na ol i givim planti askim long mi. Tasol ol i no mekim wanpela samting long mipela. Bihain, taim mi askim ol long kisim orait long mipela i ken wokim wanpela kibung, ol i strong long salim tupela niusman polis. Mi tokim ol: “Mipela amamas long ol i kam!” Olsem na ol i kam na harim program bilong apinun na raitim sampela tok. Long pinis bilong program ol i askim mipela: “Bilong wanem ol i salim mipela i kam long hia? Mipela i amamas long harim ol tok!” Long de bihain ol i kam gen na ol i amamas long kisim buklet Peace—Can It Last?, no gat pe bilong en. I no gat narapela hevi moa i kamap long kibung.
Taim pait i pinis na ol i lusim sampela tambu long raun, Pryce Hughes bilong haus Betel long Landon i kam long Belfas. Harold King i kam wantaim em. Bihain ol i makim em i go mekim wok misineri long Saina. Inap 6-pela yia mipela i no harim sampela tok bilong ol brata long brens-ofis long Landon, olsem na ol tok bilong tupela brata i strongim tru mipela. Liklik taim bihain, Harold Duerden, wanpela gutpela painia, i kam long Inglan bilong helpim wok bilong Kingdom long Belfas.
Go Bek Long Inglan
Mipela i bin laikim tru ol brata bilong Aialan, na mipela i sori long lusim ol na go bek long Inglan. Tasol ol i makim mitupela meri bilong mi long go bek long Mansesta na bihain go long Nuton-le-Wilos, em narapela taun long hap bilong Lankesia, em ol taun i sot long ol Witnes. Long 1953 meri bilong mi i karim pikinini meri, Lois, na mipela i amamas long em i kirap mekim wok painia taim em i gat 16 krismas. Bihain long em i maritim wanpela painia, David Parkinson, tupela i mekim yet wok painia long Noten Aialan, i olsem ol i bihainim lek bilong mitupela Olive. Nau, ol i stap gen long Inglan wantaim ol pikinini bilong ol na mipela olgeta i stap long wanpela kongrigesen.
Maski sindaun bilong mipela i senis, mi no lusim wok painia—Olive i no laik mi lusim, na mi tu mi no laik lusim. Long olgeta taim mi pilim olsem, sapos meri bilong mi i no helpim mi, mi no inap mekim wok painia inap long dispela taim. Nau skin bilong mitupela i save les kwiktaim, tasol mipela i amamas yet long mekim wok autim tok, na mipela i amamas moa yet long mekim ol Baibel-stadi wantaim ol man i stap klostu long mipela. Long ol dispela yia mipela i bin amamas long helpim 100 man samting long dediketim laip bilong ol long Jehova na kisim baptais. Mipela amamas tru long dispela! Na ating long nau dispela namba i kamap bikpela moa yet, long wanem, ol pikinini bilong ol dispela man na ol bubu tu i kamap Witnes.
Planti taim mitupela Olive i stori long ol gutpela samting i painim mipela na ol ekspiriens mipela i bin mekim long ol dispela yia. Mipela i amamas tru long ol dispela samting na ol yia i pinis kwiktaim! Mi save, long i stap bilong mi long lotuim God bilong mi, Jehova, mi no inap mekim narapela wok i winim wok painia mi bin mekim inap planti yia. Sapos mipela tingim ol samting mipela i bin mekim bipo, mipela i amamas, o sapos mipela tingim ol samting bai kamap bihain, mipela i amamas na pilim tru tok bilong Jeremaia olsem: “Oltaim Bikpela i save sori long yumi na givim bel bilong en moa yet long yumi, na dispela pasin bilong en i no inap pinis. Olsem na yumi no bagarap olgeta. I olsem marimari bilong en i kamap nupela long olgeta de. . . . Olsem na mi wet strong long em i helpim mi.”—Krai 3:22-24.
[Piksa long pes 26]
Bob na Olive Anderson