Wanpela Hetman i Tingim Samting Inap Painim Em Long Bihain
OL MAN bilong ples i laikim tru dispela hetman bilong Wes Afrika, na ol i litimapim nem bilong em. Taim em i kisim 78 krismas na wokim pati bilong betde, ol pren na famili na sampela man moa i kam bungim em bilong tok amamas long em. Dispela hetman i mekim wanpela tok, tasol samting em i stori long en i narapela kain bilong dispela kain de—em i kamapim tingting bilong em long i stap laip yet bihain long taim em i dai.
Em i stori olsem, bihain long indai, ‘i gat wanpela nupela ples na long dispela ples pasin giaman, na bel nogut long narapela, na pasin mangal i no stap.’ Em i tok, yumi no save gut long dispela ples, i olsem samting i stap ‘hait,’ na ol stretpela man tasol bai stap long en na ol bai wok wantaim God.
Planti man long Afrika i gat wankain tingting. Lotu bilong ol i tok, taim man i dai i no olsem em i dai tru, nogat; em i senis tasol—lusim graun na go long wanpela ples spirit. Taim em i kamap long ples spirit, nau em i stap wantaim ol tumbuna spirit bilong em.
Planti man long hap bilong Wes Afrika i bilip olsem ol tumbuna bilong ol, em ol tumbuna spirit, ol inap lukautim ol na famili bilong ol hia long graun. Wanpela buk (West African Traditional Religion) i tok: ‘Ol man long wanpela ples spirit ol inap mekim sampela samting bilong helpim o lukautim lain bilong ol long graun. Taim ol tumbuna i stap laip yet long graun, ol i bin stap hetman bilong famili bilong ol. Maski yumi no inap lukim ol moa, ol i stap hetman yet long ples spirit. Na ol i no save lusim tingting long famili bilong ol o long lukautim ol.’
Olsem na dispela lapun hetman yumi stori pinis long em, em i tingting long bungim ol tumbuna bilong em bihain long taim em i dai na wok wantaim ol long wanpela ples spirit. Em i tok: ‘Mi bilip tru mi bai stap laip yet bihain long taim mi dai na ating mi inap mekim yet wok bilong mi olsem nau mi mekim.’
Tasol narapela tok dispela hetman i kamapim i mekim na wanpela nius (Sunday Times) i tok, ating em ‘i no save tru’ olsem man inap stap laip bihain long taim em i dai o nogat. Em i tokim ol man i kam bung em i bin harim tok long wanpela buk, na dispela buk i save stori long i stap bilong man bihain long taim em i dai. Inap 5-pela yia hetman i bin painim painim dispela buk. Em i gat bikpela laik tru long kaunim dispela buk, olsem na em i tok, em bai givim K1,500 long husat man inap bringim wanpela bilong dispela buk i kam long em.
Sapos dispela hetman i bin skelim wanpela buk i no hatwok long painim, bai em i no gat wok long painim dispela narapela buk. Planti bilong dispela buk i stap, na em i no buk bilong wanpela man, nogat; em buk bilong Man i bin wokim yumi olgeta. (1 Tesalonaika 2:13) Dispela buk em Baibel. Baibel i tok wanem long i stap laip yet bihain long taim ol man i dai pinis?