Ol Man i Dai Pinis Inap Lukim Yumi?

WANPELA meri i kilim i dai man bilong em. Sevenpela yia bihain em i kisim driman na em i pret tru long en​—⁠em i ting driman i makim olsem man bilong em i belhat long em. Bilong mekim gut bel bilong dispela tewel bilong man, em i salim pikinini meri bilong em i go long ples matmat na kapsaitim dring olsem ofa long matmat bilong man.

Pikinini meri i no save wanem tok em bai givim long tewel bilong papa, long wanem, dispela ofa em i bilong mama yet, em i bin kilim i dai papa. Liklik brata i hait long wanpela hap na lukluk i stap. Nau em i kamap ples klia na em wantaim susa bilong em i beten long papa bambai em i ken helpim tupela long bekim dispela birua i bin painim papa.

Dispela stori em i wanpela pilai (The Libation Bearers) ol Grik i bin raitim olsem 2,400 yia i go pinis. Long nau tu, long sampela hap ol i save wokim ol ofa long ples matmat, na ol i mekim moa yet long Afrika.

Tingim stori bilong Ibe, em i stap long Naijiria. Tripela pikinini bilong em i dai, olsem na em i go lukim glasman. Glasman i tokim Ibe, i gat as na ol pikinini i dai​—⁠papa bilong Ibe i dai pinis, em i kros, long wanem, Ibe i no mekim stret ol wok bilong planim papa.

Orait, Ibe i bihainim tok bilong glasman na em i kilim wanpela meme olsem ofa na em i kapsaitim strongpela dring na wain olsem ofa long matmat bilong papa. Em i singaut long tewel bilong papa long lusim tingting long rong bilong em, na em i tokaut olsem em i laikim tumas em, na em i askim papa long givim blesing long em.

Ibe i bilip tru olsem papa inap lukim em na harim tok bilong em. Em i no ting papa i no gat laip moa; em i ting taim papa i dai em i bin lusim dispela graun na em i go long ples bilong ol spirit, long hap ol tumbuna i stap long en.

Tingting bilong Ibe i olsem: ‘Tru Papa i no stap moa long graun, tasol em i tingting yet long mi na em i laik bai mi stap gutpela. Na nau em i spirit na em i gat strong, olsem na em inap tru long helpim mi, winim taim em i bin i stap man long graun. Na tu, em inap toktok stret long God na askim em long helpim mi, long wanem, God tu em i spirit. Ating nau Papa i kros, tasol sapos mi daun long em, bai em i lusim rong bilong mi na bai em i mekim gut long mi.’

Long Afrika planti man i bihainim lotu bilong ol tumbuna ol i bilip olsem ol man i dai pinis inap lukim ol na mekim sampela samting long ol. Na dispela bilip i stap tu namel long ol lain i tok ol i Kristen. Olsem: Taim meri i marit long haus lotu, bihain em i save go long haus bilong papamama na ol i mekim pasin tumbuna na givim blesing long em. Ol i singaut long ol tumbuna na kapsaitim dring olsem ofa. Planti ol i ting, sapos ol i no mekim olsem, marit bilong ol bai bagarap.

Ol i ting, ol tumbuna o tewel bilong ol i save lukautim famili bilong ol i stap laip yet long graun na bai ol i gat planti samting bilong skin, na ol dispela tumbuna i dai pinis ol i strongpela lain bilong helpim ol man, na ol inap mekim na gaden bilong ol bai kamapim planti kaikai, na ol bai stap gutpela, na bagarap i no ken painim ol. Ol i stap olsem namelman bilong askim God long helpim ol man. Tasol sapos ol man i givim baksait long ol o mekim ol samting ol i no laikim, bai ol i mekim nogut long ol dispela man​—⁠olsem givim sik long ol, o ol bai kamap rabis, o dai bai painim ol. Olsem na ol man i strong long mekim ofa na ol pasin tumbuna bambai ol man i dai pinis i ken amamas long ol.

Yu bilip olsem ol man i dai pinis i save mekim sampela samting long ol man i stap yet? Sampela taim yu bin sanap klostu long matmat bilong wanpela long famili na yu mekim liklik tok, long wanem yu ting em inap lukim yu o harim tok bilong yu? Bilong save tru olsem man i dai pinis inap mekim olsem o nogat, yumi mas save, wanem samting i painim man taim em i dai. Orait, yumi ken skelim ol tok bilong Baibel long dispela bikpela samting.