Mi Stap Wanpis, Tasol Mi No Lus Tru

EM STORI BILONG ADA LEWIS

Oltaim mi laik i stap wanpis long ol samting mi mekim. Taim mi tingim wanpela samting mi laik mekim, mi save strong tru long mekim​—⁠sampela man i ting dispela em pasin bikhet. Na tu mi meri bilong tokaut stret, na kirap long bipo i kam inap nau, dispela pasin i bin givim hevi long mi.

TASOL mi tenkyu tru olsem God Jehova i no bin tingim ol pasin kranki bilong mi na sakim mi. Mi stadi long Tok Bilong God na long dispela rot mi bin stretim sampela pasin bilong mi na mekim wok bilong Kingdom inap 60 yia pinis. Kirap long taim mi liklik yet mi save laikim tru ol hos, olsem na taim God i helpim mi long bosim gut skin na daunim pasin bikhet, dispela i kirapim mi long tingim olsem wanem hap ain long maus bilong hos inap bosim hos na mekim hos i bihainim laik bilong yumi.

Mama i karim mi long 1908, klostu long wanpela naispela raunwara long hap bilong maunten Gambia long Saut Ostrelia. Papamama bilong mi i gat wanpela fam bilong lukautim ol bulmakau na kisim susu, na mi namba wan pikinini meri bilong 8-pela pikinini. Taim mipela i yangpela yet, papa bilong mipela i dai. Orait nau mi mas kirap mekim bikpela wok long fam, long wanem, tupela bikbrata bilong mi i mas wok mani long narapela hap bambai ol inap helpim famili long baim ol samting. Dispela wok long fam em i bikpela wok tru!

Namba Wan Taim Mi Harim Tok i Tru Bilong Baibel

Famili bilong mipela i bilong lotu Presbitirian, na mipela save go oltaim long lotu. Mi kamap wanpela tisa bilong Sande-skul, na mi givim bel long lainim ol pikinini long ol samting mi bilip em i stret long tok bilong Baibel na long pasin mi ting em i stret.

Long 1931 bubu man bilong mi i dai, na namel long ol kago bilong em i gat sampela buk J. F. Rutherford i bin raitim, em presiden bilong Sosaiti Was Taua long dispela taim. Mi kirap long kaunim buk The Harp of God na buk Creation, na taim mi kaunim i go mi kirap nogut​—⁠mi kisim save olsem planti samting mi bilip na lainim ol pikinini long en, i no tok bilong Baibel.

Mi kirap nogut tru taim mi kisim save olsem yumi no gat tewel, na taim man i dai, wan wan tasol bai i go long heven, na i no gat bikpaia bilong givim pen oltaim long ol man nogut. Na mi tingting planti taim mi kisim save olsem ol Kristen i no gat wok long holim Sande olsem wanpela de sabat. Olsem na nau mi mas tingting gut: bai mi bihainim yet tok bilong ol misin i holim nating nem Kristen o bai mi kirap lainim ol man long ol tok i tru bilong Baibel. I no longtaim na mi lusim lotu Presbitirian.

Nau Mi Stap Wanpis Tru

Famili bilong mi, na ol pren, na ol wanlotu bilong mi long bipo, ol i no amamas taim mi tokaut olsem mi laik lusim lotu Presbitirian na mi no ken wok tisa moa long Sande-skul. Na taim ol i save mi bin bung wantaim dispela lain ol man i save kolim lain bilong Jas Rutherford, dispela i kirapim ol long toktok planti moa yet long mi. Tru, ol i no givim baksait olgeta long mi, tasol klostu olgeta long famili bilong mi, na ol pren bilong mi long bipo, ol i no pren gut moa wantaim mi.

Taim mi kaunim ol buk na skelim ol skripsa wantaim ol tok bilong Baibel, mi kisim save olsem mi mas autim tok. Mi kisim save olsem ol Witnes Bilong Jehova ol i save go long ol haus na autim tok. Tasol long dispela taim i no gat wanpela Witnes i stap long provins bilong mipela. Olsem na i no gat man bilong strongim mi o soim mi long pasin bilong autim gutnius bilong Kingdom bilong God. (Matyu 24:14) Mi pilim olsem mi stap wanpis tru.

Tasol mi wok long tingim dispela lo bilong Baibel olsem yumi mas autim tok, na mi pasim tok long bel olsem mi mas painim rot na bai mi inap autim tok. Mi beten planti taim, na nau mi tingting long go long haus bilong ol man i stap klostu na tokim ol long ol samting mi lainim pinis na kirapim ol long opim Baibel bilong ol yet bambai ol i ken save long ol dispela samting. Namba wan haus mi go long en, em bilong man i bosim dispela Sande-skul bipo mi bin go long en. Em i pes drai na em i tok mi bin mekim bikpela rong taim mi lusim lotu Presbitirian​—⁠dispela i mekim na mi bel hevi liklik. Tasol taim mi lusim haus bilong em na wok long autim tok long ol narapela haus, mi amamas na mi pilim olsem mi kisim wanpela kain strong mi no bin pilim bipo.

Ol man i no birua o kros tumas long mi, tasol taim mi bungim ol wanlotu bilong mi long bipo na ol i les long harim tok, mi kirap nogut. Tasol taim bikbrata bilong mi i birua long mi, olaman! Mi kirap nogut tru na bel hevi liklik. Mi tingim tok bilong Jisas, em i tok: “Ol papamama na ol brata na ol wanblut na ol pren, ol tu bai i givim yupela long han bilong ol birua. . . . Na olgeta man bai i bel nogut tru long yupela, long wanem, nem bilong mi em i stap long yupela.”​—⁠Luk 21:​16, 17.

Taim mi liklik yet mi save raun long hos, olsem na mi tingting long raun gen long hos bilong helpim mi long kamap kwik long ol haus. Long rot bilong hos mi inap go long ol hap bilong bus i stap klostu. Tasol long wanpela apinun rot i wel na hos i pundaun, na bun bilong het bilong mi i bruk. Ol man i ting bai mi dai, tasol nogat. Bihain long dispela, sapos ren i bin wasim rot o rot i wel, mi save raun long wanpela salki em hos i pulim​—⁠mi no sindaun long hos.a

Mi Bungim Ol Witnes

Bihain long taim dispela birua i painim mi, wanpela liklik grup i save autim tok long olgeta de, nau yumi kolim wok painia, ol i kam long maunten Gambia. Em namba wan taim mi bin lukim ol wanbilip bilong mi na toktok wantaim ol. Taim ol i laik go, ol i kirapim mi long raitim pas long brens-ofis bilong Sosaiti Was Taua na bai mi ken save long rot bilong mekim stret dispela wok bilong autim tok.

Mi raitim pas long Sosaiti, na ol i salim sampela buk na buklet long mi, na wanpela kat bilong helpim mi long autim tok long ol haus. Brens-ofis i save salim pas long mi, na long dispela rot mi pilim olsem mi stap klostu long ol brata sista spirit bilong mi. Tasol taim grup i lusim dispela hap na i go long narapela taun, mi pilim olsem mi stap wanpis tru.

Olgeta de mi save raun autim tok​—⁠planti taim mi raun long hos na salki​—⁠olsem na planti man long dispela hap ol i save gut long mi. Mi autim tok na mekim tu ol wok mi mas mekim long fam. Long dispela taim, famili bilong mi i no birua moa long mi na ol i no wok moa long pasim mi long autim tok. Inap 4-pela yia mi wanpela i save autim gutnius olsem, tasol mi no baptais yet.

Kibung, na Nau Mi Baptais

Long Epril 1938, Brata Rutherford i kam long Ostrelia. Ol pris pasto i birua nogut tru long mipela i laik wokim wanpela miting, na dispela i kirapim ol man long brukim kontrak mipela i bin wokim wantaim ol bilong kisim Haus Kaunsil Bilong Sidni. Tasol klostu long taim miting bilong mipela i laik kamap, ol i tok orait long mipela i ken kisim Spot Graun. Dispela senis i gutpela, long wanem, dispela Spot Graun em i bikpela na inap long planti tausen manmeri, winim Haus Kaunsil. Inap 12,000 i kam bung​—⁠ating dispela pasin birua ol pris pasto i bin mekim em i kirapim tingting bilong planti man.

Taim Brata Rutherford i stap yet, mipela mekim wanpela kibung long Sidni inap sampela de. Long dispela kibung mi kisim baptais long wara bilong makim olsem mi dediket pinis long God Jehova. Mi kisim bikpela amamas tru long bung wantaim planti handet brata sista ol i kam long olgeta hap bilong Ostrelia.

Mi Go Bek Long Maunten Gambia

Taim mi go bek long ples mi pilim olsem mi stap wanpis tru, tasol mi strong moa yet long mekim wok bilong Kingdom inap long skel bilong mi. I no longtaim na mi bungim wanpela famili, nem bilong ol, Agnew​—⁠em Hugh, na meri bilong em, na 4-pela pikinini bilong ol. Ol i stap long taun Milisint, em 50 kilomita longwe long maunten Gambia. Bilong mekim Baibel-stadi wantaim ol, mi raun long hos na salki​—⁠50 kilomita bilong i go na 50 kilomita bilong i kam bek. Taim ol i kirap bihainim tok i tru, mi pilim olsem mi no stap wanpis moa.

I no longtaim na mipela i kamap olsem wanpela grup bilong autim tok. Nau mama bilong mi i kirap long laikim tok i tru na mi amamas tru. Taim mi mekim dispela raun bilong 100 kilomita bilong go stadi wantaim dispela nupela grup, Mama i save go wantaim mi. Kirap long dispela taim na i go, Mama i save strongim mi na helpim mi, maski sampela yia i lus pastaim na bihain em i kisim baptais. Em nau, mi no stap wanpis moa!

Liklik grup bilong mipela i kamapim 4-pela painia, em mi na 3-pela pikinini meri long famili Agnew​—⁠Crystal na Estelle na Betty. Bihain long yia 1950, dispela tripela meri ol i go long Wastaua Baibel Skul Bilong Gileat. Ol i kisim wok misineri long India na Sri Lanka na ol i wok yet long dispela hap.

Long Janueri 1941 ol i tambuim wok bilong ol Witnes Bilong Jehova long Ostrelia. Olsem na kwiktaim mipela i kisim olgeta samting mipela i mekim wok long en long autim tok​—⁠ol buk na buklet samting, na ol pikap, na ol plet i gat ol tok bilong Baibel long en, na sampela samting moa, na mipela i putim i go insait long wanpela bikpela bokis tin. Orait nau mipela i putim bokis insait long wanpela liklik haus na kisim planti gras i drai pinis na karamapim gut dispela bokis.

Maski i gat dispela tambu, mipela i autim tok yet long ol haus, tasol mipela i bihainim savepasin na mekim. Taim mipela i toktok wantaim ol man bilong haus, mipela i mekim wok long Baibel tasol. Mi save haitim ol nius na buklet aninit long satel bilong hos bilong mi na larim i stap, tasol taim mi bungim wanpela man i laik tru long harim tok bilong Kingdom, orait nau mi kisim wanpela nius samting i kam. Long Jun 1943 ol i tekewe dispela tambu na nau mipela inap tilim ol samting long ples klia.

Nupela Ples Wok

Long 1943, mi kirap mekim wok painia, na long yia bihain mi lusim maunten Gambia na go long narapela ples wok. Pastaim ol i singautim mi i go mekim wok inap sotpela taim long brens-ofis bilong Sosaiti long Stratfil. Bihain long dispela mi go mekim wok long sampela liklik taun long hap saut bilong Nu Saut Wels na hap wes bilong Viktoria. Tasol taim mi go mekim wok wantaim wanpela bikpela kongrigesen long biktaun Melbon, dispela i helpim mi tru long ol samting bilong spirit. Mi bin go bikpela long wanpela liklik taun, olsem na taim mi kam wok long dispela biktaun, mi kisim save long planti samting.

Taim mi wantaim poroman painia bilong mi, em Helen Crawford, i mekim wok long hap bilong Jipslan, em wanpela distrik bilong Viktoria, mipela i mekim planti Baibel-stadi. I no longtaim na mipela lukim wanpela kongrigesen i kamap. Dispela distrik i gat bikpela hap bilong bus long en na mipela raun long wanpela olpela ka em planti taim em i no ran gut. Planti taim mipela i mas subim ka i go. Mi save ting, gutpela sapos mi gat hos! Sampela taim, mi laik tok: “Bai mi givim olgeta samting bilong mi (tasol Kingdom, nogat) bilong kisim wanpela hos!” Long nau long planti taun long dispela distrik i gat ol strongpela kongrigesen na ol gutpela Haus Kingdom.

Long 1969 mi go wok long Kanbera, em nambawan biktaun bilong Ostrelia. I gat planti haus embasi i stap na i gat kain kain man i wok long ol dispela haus, olsem na mipela i mas wokim gut tingting na bai mipela inap autim tok long ol. Mi stap yet long dispela biktaun na mekim wok, tasol inap sampela yia nau mi bin mekim bikpela wok autim tok long ol hap ol faktori i stap long en.

Long 1973 mi amamas long go long ol bikpela kibung long Amerika. Narapela gutpela samting i kamap long i stap bilong mi, em long 1979, taim mi go long wanpela kibung na raun long hap bilong Israel na Jordan. Mi amamas tru long i go lukim ol dispela hap em Baibel i stori long en, na mi tingim ol samting i bin kamap bipo long ol dispela hap. Na mi amamas long drip antap long raunwara Detsi i gat planti sol long en, na taim mi raun long Petra long Jordan, mi gat rot long raun gen long hos. Dispela i kirapim mi long tingim dispela taim bipo ol hos i bin helpim mi long autim tok bilong Kingdom long ol hap bilong bus.

Mi Mekim Yet Wok Painia

Ol gutpela samting, olsem Skul Bilong Wok Painia, na painia miting long taim bilong kibung sekit, na ol gutpela tok ol wasman bilong raun i kamapim bilong strongim mi, ol dispela samting i kirapim mi long mekim yet dispela wok painia, maski mi lapun. Mi ken tok tru olsem, Jehova i bin mekim gutpela pasin sori long mi na mi no stap wanpis moa.

Nau mi gat 87 krismas na mi bin mekim wok bilong Jehova inap 60 yia pinis, olsem na mi laik givim wanpela gutpela tok long ol narapela i save tokaut stret tumas na strong long bihainim tingting bilong ol yet. Dispela tok i olsem: Long olgeta taim, stap aninit long Jehova na larim em i soim rot long yu. Mi laik bai Jehova i ken helpim yumi long bosim dispela pasin bilong tokaut stret, na oltaim em i mas helpim yumi long save, maski yumi pilim olsem yumi stap wanpis na no gat poroman, em i no inap lusim yumi.

[Ol Futnot]