Mi Painim Pinis Samting i Gutpela Tru
STORI BILONG FLORENCE WIDDOWSON
Tudak i laik kamap, na mitupela i ting long slip hia arere long liklik raunwara. I no gutpela tumas long tupela meri i mekim olsem, tasol em i bilong wanpela nait tasol. Mi wok long sanapim haus sel, na Marjorie i redim kaikai.
MI STRETIM pinis haus sel, na mi lukim samting i meknais long as bilong wanpela diwai. Mi askim Marjorie: “Yu bin lukim as bilong diwai i meknais?”
Em i kirap nogut na i tok: “Nogat.”
Mi tok: “Mi lukim. Kisim ketel i kam.”
Mi kisim ketel wantaim akis na mi go bilong kisim wara, na mi kamap long as bilong dispela diwai na wanpela man i kirap sanap. Em i bin hait i stap!
Mi guria, tasol mi askim em: “Dispela wara i gutpela bilong dring?”
Em i tok: “Nogat, tasol mi ken kisim sampela wara bilong yu.”
Kwiktaim mi tok: “Maski.” Em i tanim na i go pinis, na mi amamas. Mi guria na kwiktaim mi go toksave long Marjorie. Mipela brukim haus sel na lusim dispela hap. Bihain ol i tokim mipela, nau tasol dispela man i lusim kalabus.
Long 1937 ol man bilong painim gol i bin kam long dispela hap bilong Ostrelia, tasol mipela kam bilong painim ol man i gutpela samting long ai bilong God.
Famili Bilong Mi
Wan handet yia bipo papa i bin mekim wok bilong wokim ol samting long ain long liklik ples Porepanka long provins Viktoria. Mama i karim mi long 1895, na mi wantaim 4-pela susa i go bikpela klostu long wara Avens aninit long maunten Bafalo. Papamama i bilong lotu Yunion Sios, na mi bin go long Sande-skul em papa i bosim.
Wanpela taim long 1909 i gat bikpela ren na win na klaut i pairap, na sik bilong klok i kisim mama, na papa i holim em, tasol em i dai. Na long 1914 wanpela susa bilong mi i lusim haus, na bihain inap sampela aua ol i karim skin bilong em i kam bek. Em i bin kilim i dai skin bilong em. Mipela i bel hevi tru, na misin i tok em bai go long bikpaia, long wanem, God i no inap lusim dispela rong em i bin mekim. Dispela tingting i mekim na bel hevi bilong mipela i go bikpela moa.
Namba Wan Pait i bin kirap long dispela yia, na tupela susa bilong mi i go long en. Nius i toktok long ol man i dai long pait, na long ol hevi na pen i kamap, na papa wantaim mipela 6-pela yangpela meri i kirap na stadi long hap bilong Jon long Baibel.
Painim Gutpela Samting
Ellen Hudson i kisim wanpela buk (The Time Is at Hand) bilong Charles Taze Russell, na amamas bilong Ellen i kirapim mipela. Buk i tok i gat 5-pela buk moa, na biknem bilong ol em Studies in the Scriptures (Ol Stadi Long Baibel), olsem na Ellen i salim pas long Intenesenel Baibel Stiudens Asosiesen long Melbon na askim ol long salim ol narapela i kam. Mipela i pasim tok long mekim stadi long namba wan buk (The Divine Plan of the Ages) long olgeta wik.
Buk i tok i no gat bikpaia, na nau mitupela papa i amamas tru. Nau mipela i save susa bilong mi i no stap long bikpaia, na ol man i dai pinis ol i olsem man i slip i dai na no gat tingting moa, na ol i no stap long wanpela hap na karim bikpela pen. (Saveman 9:5, 10; Jon 11:11-14) Mipela lainim ol dispela tok i tru bilong Baibel na mipela sampela i ting long i go tokim ol narapela man long en. Mipela wokabaut long lek i go long ol haus klostu, na mipela i go long ol longwe hap long wilwil o long wilka em hos i pulim.
Mi kirap autim tok long ol haus long Novemba 11, 1918, em de dispela Namba Wan Pait i pinis. Mipela 3-pela i go 80 kilomita na kamap long taun Wangarata na tilim nius (Peoples Pulpit) long ol man. Sampela yia bihain mi bin stap long hap i no gat taun na mi bungim dispela man kalabus mi stori pinis long em.
Long 1919 mi go long kibung bilong ol Sumatin Bilong Baibel long Melbon. Long dispela kibung long Epril 22, 1919, mi kisim baptais long wara bilong makim olsem mi dediket pinis long Jehova. Ol gutpela tok i kamap long kibung i kirapim mi long laikim moa yet Kingdom bilong heven na oganaisesen bilong Jehova long graun.—Matyu 13:44.
Mi no go bek long ples. Jane Nicholson i wok painia na mi poroman wantaim em inap wanpela mun. Mitupela i autim tok long ol fam i gat bulmakau, long hap bilong wara King. Ol i bin wokim wanpela piksa wokabaut (The Man From Snowy River) long dispela hap.
Long 1921 mipela kisim wanpela gutpela buk (The Harp of God) bilong helpim man long stadi long Baibel. Papa i kamapim tok bilong en long ol yangpela long Sande-skul, tasol ol papamama i kros na tokim em long pinis, na em i pinis. Na mipela kisim wanpela buklet (Hell) i gat askim olsem: “Hel em i wanem samting? Husat i stap long en? Ol inap lusim o nogat?” Em i kamapim klia tok bilong Baibel, na papa i amamas, na em i kirap long tilim i go long ol haus. Em i tilim planti handet long ples bilong mipela na long ol hap nabaut.
Autim Tok Wantaim Papa
Papa i baim ka na bai em i ken bringim tok bilong Kingdom i go long ol narapela hap. Em i save gut long ol hos, olsem na mi draivim ka. Mipela slip long ol hotel, tasol em bikpela pe tumas, na bihain mipela i slip ausait.
Papa i stretim sia long ka na bai mi ken slip long en, na mipela i sanapim haus sel bilong papa i ken slip long en. Mipela mekim olsem inap sampela wik, na nau mipela i go bek long Porepanka, na papa i mekim gen wok bilong em. Pe em i kisim long dispela wok i helpim mipela long raun gen na autim tok.
Planti man i gat gutpela bel ol i harim tok na i laik bai mipela i stadi wantaim ol. Nau i gat 7-pela kongrigesen long ol dispela hap em liklik lain bilong Porepanka i bin autim tok long en, na ol i gat ol Haus Kingdom bilong ol. Wok bilong Jehova i go bikpela.—Aisaia 60:22.
Long 1931 mitupela papa i draivim ka 300 kilomita long ol rot nogut na mipela i go long miting na kisim nupela nem, em “Ol Witnes Bilong Jehova.” Baibel i as bilong dispela nem na mitupela i amamas. (Aisaia 43:10-12) Em i winim olpela nem “Intenesenel Baibel Stiudens.”
Taim mi autim tok long taun Betanga mi bungim pasto bilong misin Angliken na em i kros. Em i go long ol haus mipela bin tilim buk long en na em i kisim ol buk na kukim long ai bilong ol man, tasol dispela pasin nogut i no helpim em.
Mi toksave long brens-ofis bilong Sosaiti, na ol i raitim pas na kamapim dispela pasin nogut pasto i mekim, na planti Witnes i tilim pas i go long ol man bilong dispela hap. Bihain mitupela papa i tilim planti buk moa long dispela taun, na ol man i laik save long tok bilong ol dispela buk em pasto i bin tambuim.
Milton Gibb em namba wan man long not-is Viktoria bilong kisim tok i tru. Mipela i go lukim em na givim ol buk long em na em i kaunim na stadi gut long en. Wanpela taim mipela i go, na em i tok: “Nau mi wanpela disaipel bilong yu.”
Em i amamas, tasol mi tokim em: “Milton, yu no inap i stap disaipel bilong mi.”
Nau em i tok: “Orait, mi disaipel bilong Rutherford [em presiden bilong Sosaiti Was Taua long dispela taim bipo].
Mi tok gen olsem: “Nogat. Yu no disaipel bilong Rutherford tu. Mi ting yu disaipel bilong Krais.”
Inap planti yia mi bin painim ol gutpela samting, na mi painim pinis wanpela, em Milton Gibb. Em wantaim tupela pikinini man bilong em i kamap elda, na sampela moa bilong famili bilong em ol i mekim wok bilong kongrigesen.
Winim Ol Traim
Long 1941 gavman i tambuim wok bilong ol Witnes Bilong Jehova long Ostrelia, tasol mipela mekim wok long Baibel tasol na mipela wok yet long autim tok. Bikpela sik i kisim papa, na mi mas lusim wok painia na bai mi ken lukautim em. Bihain sik i kisim mi tu na dokta i mas katim mi. Bihain mi orait gen, na mi pilim olsem God i truim tok promis bilong em olsem: “Bai mi no lusim yu. Bai mi no larim yu i stap nating. Nogat tru.” (Hibru 13:5) Wanpela sista i tokim mi: “Florence, yu no stap wanpis. Jehova i stap wantaim yu.”
Tasol bihain moa laspela sik i kisim papa, na em i karim sik i go inap 13 wik, na long Julai 26, 1946, em i pasim ai na nau em i dai pinis. Em i bin kisim planti amamas, na nau em i kisim pe bilong em long heven. (Filipai 3:14) Mitupela papa i bin stap wantaim inap longpela taim, tasol nau nogat, na nau mi gat 51 krismas. Orait, nau mi bungim wanpela man, na mitupela i marit long 1947, na mipela i amamas long mekim wok painia wantaim inap sotpela taim, na nau sik strok i bagarapim skin bilong em long 1953.
Em i no inap toktok gut, na mitupela no inap toktok gut wantaim, olsem na mi hatwok long lukautim em. Em i hatwok long toktok wantaim mi, na mi hatwok long save em i laik tok wanem, na dispela i putim bikpela hevi long mitupela wantaim. I no gat sampela brata o kongrigesen i stap klostu na bai ol i ken helpim mipela, tasol Jehova i no bin lusim mipela. Mi kaunim ol tok i kam long oganaisesen, na ol magasin Wastaua na Kirap!, na dispela i olsem kaikai bilong mi. Na sori tumas, long Disemba 29, 1957, gutpela man bilong mi i dai pinis.
Autim Tok Long Adelet
Nau mi stap wanpis gen. Bai mi mekim wanem? Mi bin lusim wok painia klostu 5-pela yia. Sosaiti bai orait long mi mekim gen wok painia, o nogat? Mi kamapim laik bilong mi long ol, na ol i orait, olsem na mi baim haus bilong mi i go long ol man, na mi kirap gen long mekim wok painia long Adelet, em wanpela biktaun long Saut Ostrelia. Ol i sot long ol painia long dispela hap, na ol i makim mi bilong wok wantaim Kongrigesen Prospek.
Mi pret long draivim ka long taun. I gat planti tumas ka. Olsem na mi baim ka bilong mi i go long ol man, na mi raun gen long wilwil olsem long bipo. Mi mekim olsem inap long taim mi gat 86 krismas. Ol i kolim mi olsem: “Liklik lapun meri long blupela wilwil.” Tasol bihain moa mi save pret long ol ka long rot, na wil long poret bilong wilwil tu em i save guria. Wanpela apinun mi pundaun i go long ol purpur, na nau mi tok, ‘Mi no ken raun moa long wilwil. Mi les pinis.’ Bihain nau mi wokabaut long lek tasol.
Sampela yia bipo mi bin go long wanpela kibung distrik, na long dispela taim tupela lek bilong mi i bagarap. Ol dokta i katim mi bilong stretim bun antap long lek bilong mi. Bihain mi wokabaut orait, tasol wanpela bikpela dok i bamim mi na tromoi mi i go daun. Olsem na ol dokta i mas mekim sampela samting moa long mi, na nau mi mas mekim wok long wanpela samting olsem stik wokabaut na bai mi ken raun. Tasol tingting bilong mi i wok gut. Wanpela pren i tokim mi olsem: “Skin bilong yu i olsem bilong lapun, tasol tingting bilong yu i olsem bilong yangpela.”
Mi lukim ol kongrigesen long Adelet i kamap bikpela na i bruk gen na i kamap tupela. Long 1983 mi gat 88 krismas na mi lusim Adelet na mi go i stap wantaim wanpela famili long Kaiabram long Viktoria, na mi stap amamas inap 10-pela yia. Mi save raun yet na autim tok; ol pren long kongrigesen i kisim mi long ka na mi tilim nius long sampela man i save kisim long olgeta taim, na ol i kam long ka na mi toktok wantaim ol.
Nau mi gat 98 krismas, na mi amamas long tingim planti gutpela manmeri i bin stap gut long Jehova na litimapim nem bilong em. Gutpela papa bilong mi em wanpela. Sampela i bin poroman wantaim mi long mekim wok painia, tasol ol i dai pinis. Mi amamas long wetim taim bai mi bung gen wantaim sampela long Kingdom bilong God long heven, em wanpela samting i gutpela tru, winim olgeta narapela samting!
[Piksa long pes 28]
Mi kisim baptais long Epril 22, 1919
[Piksa long pes 31]
Klostu bai mi gat 100 krismas na mi amamas yet long mekim wok bilong Jehova