Ol Witnes Bilong Jehova Long Olgeta Hap—Brasil
BRASIL em i traipela kantri. Long mak bilong graun na lain bilong en, em i namba 5 bikpela kantri long graun. Graun bilong en i kisim bikpela hap tru long Saut Amerika, na lain bilong en i bikpela tru, winim olgeta narapela kantri wantaim long Saut Amerika. Na Brasil i gat traipela bikbus, winim olgeta narapela kantri. Na traipela wara, em wara Amason, i brukim dispela bikpela bus; no gat narapela wara i traipela olsem.
I gat narapela samting tu long Brasil i traipela, em lain bilong autim gutpela tok bilong Kingdom bilong God. Dispela lain i kamap bikpela na i laik kisim 400,000 nau, na long yia i go pinis winim 1,000,000 manmeri i bin bung long Memorial, em taim bilong tingim i dai bilong Krais. Long dispela kantri ol i mekim bikpela wok tru bilong autim tok bilong Kingdom. Sampela stori bilong nau i makim olsem.
Autim Tok Long Ples i No Gat Planti Witnes
Antonio wantaim meri bilong em i pasim tok long mekim samting i hatwok long ol i mekim—tupela i laik lusim ol famili bilong ol na gutpela wok mani long taun Sau Paulo na go long provins Minas Jeras, long ples i no gat planti Witnes. Long hap ol i autim tok long en, i gat ol haus bilong wanpela lain ol i wok long faktori bilong suga. Namba wan taim ol i autim tok long ol, ol i kirapim 9-pela Baibel-stadi. Insait long 18 mun ol i kirapim planti stadi moa na ol i mekim 40 samting!
Pastaim ol i mekim ol miting long dispela haus faktori. Tasol ol dispela nupela pablisa i laik lukim wanpela Haus Kingdom tru. Olsem na ol i baim wanpela bas na inap 75 manmeri i go long wanpela kongrigesen i stap longwe long ol—no gat narapela i stap klostu. Bihain, taim bilong kibung i kamap; 45 nupela Baibel-stadi i go long kibung na ol brata i toktok wantaim ol long pletfom. Inap 15 ol i kisim baptais long kibung. Olgeta i amamas tru na aiwara i kamap!
Ol i save baim bas long wanpela kampani tasol bilong raun olsem na ol bikman bilong kampani i daunim pe bilong bas. Bilong tenkyu long ol, Antonio i givim wanpela buk i kamapim tok bilong Baibel long papa bilong kampani. Long dispela apinun stret em i orait long Antonio i lainim em long Baibel na em i stadi gut inap sampela mun na kisim baptais. Pastaim meri bilong em i nolaik tru long em i stadi olsem, tasol bihain meri i no birua moa, na nau em tu i baptais pinis na kamap wanpela Witnes Bilong Jehova.
Long Februeri 1992, nupela kongrigesen i kamap na i gat 22 ol i autim tok. Dispela lain i go bikpela na long 1994 i gat 42 ol i autim tok, na 4-pela painia, em ol i save autim tok long olgeta de. Olsem na Antonio i tok: “Mi wantaim meri bilong mi i lukim olsem sapos yumi ‘traim Jehova,’ olsem Malakai 3:10 i tok, bai em i ‘givim planti gutpela samting long yumi na yumi no ken sot.’ ”
Tilim Ol Buk na Nius Bilong Baibel
Narapela samting i mekim na wok bilong autim tok long Brasil i kamap bikpela em olsem: Long olgeta taim ol Witnes i wok long tilim ol buk na nius bilong Baibel long ol man. Wanpela kongrigesen i raitim pas long brens-ofis bilong Sosaiti Was Taua long Brasil na ol i tok ol i laik kisim 250 buk Sampela Askim Bilong Ol Yangpela—Ol Gutpela Bekim. Bilong wanem ol i laik kisim planti olsem?
Pas i tok: ‘Wanpela skul long dispela taun i laik mekim wok long dispela buk bilong skulim ol yangpela long wanpela klas. As bilong dispela i olsem, papamama bilong ol pikinini Witnes long dispela skul na wanpela tisa ol i bin autim tok long ol bikman bilong skul long kain kain taim. Jehova i mas mekim gut yet long ol wokboi bilong em taim ol i skulim gut ol man long rot bilong dispela buk.’ Tru ya, na Jehova i mas blesim yet gutpela wok bilong autim tok bilong Kingdom ol i mekim long traipela kantri Brasil.
[Blok long pes 8]
OL SAMTING BILONG KANTRI
Yia Bilong Wok Bilong 1994
HAMAS OL I AUTIM TOK: 385,099
SKELIM OLSEM: 1 Witnes insait long 404 man
HAMAS I BUNG LONG MEMORIAL: 1,018,210
HAMAS PAINIA, AVERES: 38,348
HAMAS BAIBEL-STADI, AVERES: 461,343
HAMAS I BAPTAIS: 24,634
HAMAS KONGRIGESEN: 5,928
BRENS-OFIS: SESAREO LANSE
[Piksa long pes 9]
Ol i mekim wok long ka i gat bikmaus na ol i autim tok long Sau Paulo long yia 1940
[Piksa long pes 9]
Ol i autim tok long Gaden Botanik long Rio de Janero
[Piksa long pes 9]
Brens-ofis long Sesareo Lanse