Mipela i No Les na Gutpela Samting i Kamap
EM STORI BILONG JOSÉ MAGLOVSKY
Taim plisman i holim han bilong mi, mi wok long painim papa bilong mi, tasol nogat. Mi no bin save ol i kisim em pinis i go long polis-tesin. Taim mi kamap long polis-tesin, ol plisman i kisim olgeta buk samting bilong mipela, ol Baibel tu, na ol i putim long plua. Taim papa i lukim dispela, em i askim ol: “Yupela i putim ol Baibel tu i go long plua?” Nambawan plisman i tok sori, na em i kisim ol Baibel na putim long tebol.
MIPELA i mekim wanem samting na mipela i stap long polis-tesin? Olsem wanem? Mipela i stap long wanpela kantri ol polis i bosim na ol man i no bilip long God, olsem na ol i kisim Baibel bilong mipela? Bilong bekim ol dispela askim yumi mas tingim yia 1925; long dispela yia mama i no karim mi yet.
Long dispela yia papa bilong mi, Estefano Maglovsky, na mama bilong mi, Juliana, ol i bin lusim kantri bipo ol i kolim Yugoslavia na ol i go long Brasil na sindaun long Sau Paulo. Maski Papa i bilong lotu Talatala na Mama i wanpela Katolik, lotu i no bin brukim tupela. Tasol 10-pela yia bihain wanpela samting i kamap na tupela i wanbel long samting bilong lotu. Tambu bilong Papa i bringim em wanpela liklik buk long tok ples Hangari. Buk i gat kala kala na i stori long ol samting i painim man i dai pinis. Em i bringim dispela liklik buk olsem presen, na em i askim Papa long kaunim na tokim em long tingting bilong em long ol tok i stap insait, olsem dispela hap i stori long “bikpaia.” Nait olgeta Papa i kaunim liklik buk planti taim, na long de bihain, taim tambu bilong papa i kam na askim em long tingting bilong em, Papa i bin tok: “Dispela em i tok i tru!”
Liklik Lain
Liklik buk i bilong ol Witnes Bilong Jehova, olsem na tupela i go painim ol, long wanem, ol i laik lain moa long ol bilip na tok bilong ol Witnes. Taim tupela i painim ol Witnes, sampela moa long famili bilong mipela i kirap toktok wantaim ol Witnes long Baibel. Long dispela yia yet, em 1935, ol i kirapim wanpela Baibel-stadi long tok ples Hangari, na 8-pela man samting i bung. Kirap long dispela taim inap long nau, olgeta taim mipela i gat ol Baibel-stadi long haus bilong mipela.
Papa i stadi tupela yia long Baibel, na bihain em i kisim baptais long 1937. Em i kamap wanpela strongpela Witnes Bilong Jehova, na em i autim tok long ol haus na ol i makim em olsem elda na em i lukautim Buk-Stadi. Em i helpim ol brata long kamapim namba wan kongrigesen long Sau Paulo, long hap bilong Vila Mariana. Bihain ol i senisim ples bilong kongrigesen i go long hap namel stret bilong biktaun na givim nem Sentral long en. Tenpela yia bihain ol i kamapim namba tu kongrigesen, long hap bilong Ipiranga, na ol i makim Papa bilong lukautim dispela kongrigesen. Long 1954 ol i kamapim namba tri kongrigesen, long hap bilong Moinyo Velyo, na em i lukautim dispela kongrigesen tu.
Taim dispela kongrigesen i kamap strong, Papa i kirap helpim wanpela grup i stap klostu, em Sau Benado do Kampo. Mipela i amamas tru, long wanem, Jehova i blesim wok ol dispela liklik kongrigesen bilong ol Witnes i bin mekim long ol dispela yia, olsem na lain i kamap bikpela tru. Long 1994 i gat 70,000 pablisa samting long ol 760 kongrigesen long hap bilong Sau Paulo. Sori tru, Papa i no bin lukim dispela samting. Em i dai long 1958 taim em i gat 57 krismas.
Mi Wok Long Bihainim Pasin Bilong Papa
Wanpela gutpela pasin Papa na ol narapela strongpela Kristen i save mekim, em pasin bilong mekim gut long ol man na singautim ol i kam long haus bilong em. (Lukim 3 Jon 1, 5-8.) Olsem na mipela i amamas long Brata Antonio Andrade wantaim meri na pikinini man bilong em i kam na stap wantaim mipela. Ol i bin lusim Amerika wantaim Brata na Sista Yuille na kam long Brasil long 1936. Na tupela brata i winim Wastaua Baibel Skul Bilong Gileat, em Harry Black na Dillard Leathco, ol tu i bin stap wantaim mipela. Ol i namba wan misineri i kam long Brasil long 1945. Bihain planti narapela brata moa i kam na stap wantaim mipela. Long olgeta taim ol dispela brata na sista i bin strongim tru ol wan wan long famili bilong mipela. Mi pilim tru dispela samting na mi laik helpim famili bilong mi, olsem na mi bin wok strong long bihainim dispela gutpela pasin Kristen bilong Papa bilong mi long mekim gut long narapela man.
Mi gat 9-pela krismas tasol taim Papa i kisim save long tok i tru long 1935, tasol mi namba wan pikinini man, olsem na mi kirap bihainim em long ol wok bilong God em i mekim. Mipela olgeta i go wantaim Papa long ol miting long Haus Kingdom i stap long hetkota bilong ol Witnes long Sau Paulo long rot Esa de Kairos Strit, Namba 141. Papa i skulim mi gut, olsem na mi kisim strongpela laik bilong mekim wok bilong Jehova, na long 1940 mi dediket long Jehova na kisim baptais long wara Tiete i save ran long namel stret bilong Sau Paulo. Nau wara bilong en i bagarap.
I no longtaim na mi lain long autim gutnius long olgeta taim, long planim tok i tru i go long bel bilong ol man na givim wara long en na mekim ol Baibel-stadi wantaim ol. Long nau, taim mi lukim planti tausen Witnes long Brasil i givim bel tru long Jehova, mi pilim bikpela amamas long save olsem Jehova i bin mekim wok long mi long helpim planti bilong ol long kisim save long tok i tru o long strongim ol long pilim tru tok i tru.
Wanpela bilong ol man mi bin helpim em Joaquim Melo. Mi bungim em taim mi autim tok long ol haus. Mi bin toktok long tripela narapela man, tasol ol i no bin givim bel tumas long tok mi autim long ol. Bihain mi lukim wanpela yangpela man i kam i stap wantaim mipela na em i putim gut yau. Mi lukim olsem em i gat laik long harim tok, olsem na mi kirap toktok wantaim em, na bihain long autim gut tok long em, mi singautim em long kam long Buk-Stadi Bilong Kongrigesen. Em i no kam long Buk-Stadi, tasol em i kam long Skul Bilong Wok Autim Tok na bihain em i kam long ol miting long olgeta taim. Em i kamap strong long tok i tru, kisim baptais, na inap sampela yia em i mekim wok sekit wantaim meri bilong em.
Na long ples wok mi bin bungim Arnaldo Orsi. Planti taim mi autim tok long wanpela wanwok, tasol olgeta taim mi lukim wanpela yangpela man i gat mausgras i bin putim yau, olsem na mi kirap toktok wantaim em. Em i bilong wanpela famili ol i strong long lotu Katolik, tasol em i gat planti askim long samting bilong smok, na lukim ol piksa wokabaut nogut bilong pasin sem, na long pasin bilong lukautim skin long rot bilong judo. Mi soim em tok bilong Baibel long dispela samting, na mi amamas na kirap nogut, long wanem, long de bihain em i singautim mi long go lukim em taim em i brukim paip bilong smok na samting bilong laitim smok, na kruse, na em i bagarapim ol piksa wokabaut nogut bilong pasin sem, na em i rausim mausgras bilong em. Insait long sampela minit tasol em i kamap nupela man! Em i lusim tu pasin judo na em i askim mi long stadi wantaim em long Baibel long olgeta de. Maski meri bilong em na papa bilong em i birua long em, em i kamap strong long ol samting bilong spirit, long wanem, ol brata i stap klostu long em i bin helpim em. Liklik taim bihain, em i kisim baptais na long nau em i wanpela elda long kongrigesen. Meri bilong em na ol pikinini tu i kam insait long tok i tru.
Mekim Wok Bilong Kingdom
Taim mi gat 14 krismas samting, mi kirap wok long wanpela kampani i wokim ol toksave bilong grisim ol man long baim ol samting bilong ol kampani, na mi lain long raitim ol toksave. Dispela i gutpela, long wanem, inap planti yia mi wanpela tasol long Sau Paulo i bin raitim ol pepa na ol bikpela sain bilong toksave long ol pablik-tok na ol kibung bilong ol Witnes Bilong Jehova. Sampela sain bilong toksave mipela i hangamapim antap long ol rot. Klostu 30 yia mi lukautim Dipatmen Bilong Ol Sain long ol kibung. Long taim bilong ol kibung mi kisim lip bilong mi, olsem na mi inap wok long ol. Sampela taim mi slip long ples bilong kibung inap long mi ken pinisim ol sain bilong kibung long taim stret.
Na mi mekim wok long ka bilong Sosaiti i gat masin bikmaus, em wanpela nupela samting tru long dispela taim. Mipela i bin putim ol buk bilong Baibel long wanpela liklik tebol, na taim ol tok i kamap long masin bikmaus ol man i lusim haus bilong ol na kam lukluk long wanem samting i kamap, nau mipela i toktok long ol. Narapela samting mipela i bin mekim wok long en bilong autim gutnius bilong Kingdom em masin pikap, na mi holim yet ol dispela plet mipela i bin mekim wok long en bilong helpim ol man long save long ol buk bilong Sosaiti. Long dispela rot mipela i bin tilim planti buk bilong Baibel.
Long dispela taim Misin Katolik i wokim ol mats bilong lotu, em planti man i insait long en. Ol i wokabaut long ol rot bilong Sau Paulo, na planti taim sampela man i go pas bilong rausim ol man i pasim rot. Long wanpela Sande, mitupela Papa i tilim nius Wastaua na Kirap! long rot taim wanpela lain olsem i kam. Papa i pasim hat olsem em i save mekim long olgeta taim. Wanpela man i go pas long dispela mats i bin singaut: “Rausim hat! Olsem wanem? Yu no lukim mipela i kam?” Taim Papa i no rausim hat, sampela man moa i kam, na ol i subim mipela i go long windo bilong stua na tok pait long mipela. Wanpela plisman i lukim dispela, olsem na em i kam bilong save long wanem samting i kamap. Wanpela man i holim han bilong plisman bambai em i ken toktok long em. Tasol plisman i paitim han bilong dispela man, na em i tok: “Maski long putim han long yunifom bilong mi!” Nau em i askim ol man long wanem samting i kamap. Man i tokim plisman long Papa i no laik rausim hat bilong em taim ol i mats, na em i tok moa: “Mi wanpela Roman Katolik.” Mipela i kirap nogut long bekim bilong plisman taim em i tok: “Yu tok yu man bilong Rom? Mobeta yu go bek long Rom! Mipela i stap long Brasil.” Bihain em i askim mipela: “Husat i stap pastaim?” Taim Papa i tokim em olsem mipela i stap pastaim, plisman i tokim ol man long klia na em i tokim mipela long mekim yet wok bilong mipela. Plisman i sanap klostu long mipela inap long dispela lain i wokabaut i go pinis—na Papa i no bin rausim hat long het bilong em!
Kain samting olsem i no bin kamap planti taim. Tasol taim em i kamap, em i strongim mipela long save olsem i gat sampela man i laikim stretpela pasin na i helpim ol lain i no gat nem, na ol i no pret long Misin Katolik.
Long narapela taim, mi bungim wanpela yangpela i bin amamas long harim tok na em i tokim mi long kam bek lukim em gen long wik bihain. Taim mi kam bek em i mekim gutpela pasin long mi na tokim mi long kam insait long haus. Mi kirap nogut taim wanpela lain bikhetmanki i banisim mi na tok bilas long mi na ol i laik skrapim bel bilong mi! Ol samting i go nogut, na mi pilim olsem klostu ol bai paitim mi. Olsem na mi tokim yangpela i bin singautim mi, sapos wanpela hevi i painim mi em asua bilong em na famili bilong mi i save mi stap we. Mi askim ol long larim mi i go, na ol i mekim. Tasol, paslain long mi lusim ol, mi tokim ol sapos wanpela i laik toktok wantaim mi, bai mi toktok wantaim em. Bihain mi kisim save olsem ol i wanpela lain i strong tumas long bihainim lotu bilong ol, na ol i pren bilong pris bilong dispela ples, na pris i bin kirapim ol long mekim dispela bung. Mi amamas ol i no bin holimpas mi.
Pastaim ol Witnes i no kamap planti long Brasil, wan wan tasol i kam insait long tok i tru. Mipela i bin kirap tasol long “planim” kaikai na i no gat bikpela hap taim bilong “givim wara” na “kamautim” kaikai mipela i planim. Long olgeta taim mipela i tingim tok bilong aposel Pol: “Mi bin planim pikinini bilong kaikai. Apolos em i bin givim wara long en. Tasol God i bin mekim kaikai i kamap. Olsem na man i planim pikinini kaikai, em i no gat nem. Na man i givim wara, em tu i no gat nem. Nogat. God i save mekim kaikai i kamap, em wanpela tasol i gat nem.” (1 Korin 3:6, 7) Taim tupela brata i winim Skul Gileat i kam long 1945, mipela i pilim olsem nau em i taim bilong lain Witnes i kamap bikpela.
Autim Strong Tok, Maski Pasin Birua
Lain Witnes i go bikpela, tasol ol i mas karim planti hevi, na bihain long taim Namba 2 Pait i kirap long Yurop ol i karim planti hevi moa. Ol man i mekim nogut long ol, long wanem, planti man na sampela man bilong gavman i no bin save i gat wanem as na ol Witnes i no insait long pait. Wanpela taim long 1940, mipela wokabaut namel stret long biktaun Sau Paulo long ai bilong ol man. Taim mipela i autim tok long rot mipela pasim ol bikpela toksave long bros. Nau wanpela plisman i kam baksait long mi na rausim ol toksave, na holim mi long han na bringim mi i go long polis-tesin. Mi painim papa bilong mi, tasol mi no lukim em. Mi no bin save, em na sampela narapela brata na sista, na Brata Yuille, em brata i bin lukautim wok bilong mipela long Brasil, polis i kisim ol pinis i go long polis-tesin. Olsem mi tok pinis long kirap bilong dispela stori, long polis-tesin mi bungim Papa gen.
Mi pikinini yet, olsem na polis i no inap holimpas mi. Liklik taim bihain wanpela plisman i bringim mi i go long haus long mama bilong mi. Long dispela apinun yet ol sista tu i lusim polis-tesin. Bihain polis i laik lusim olgeta brata, olsem 10-pela olgeta, tasol Brata Yuille, nogat. Tasol ol brata i tok strong: “Mipela olgeta bai go, o mipela olgeta bai stap.” Ol plisman i no laik larim Brata Yuille i go, olsem na olgeta i slip long plua simen long wanpela rum i kol. Long de bihain ol i lusim olgeta i go na ol i no givim sampela tambu long ol. Planti taim polis i bin holim ol brata, long wanem, ol i bin autim tok long rot wantaim ol bikpela pepa bilong toksave. Pepa i toksave long wanpela pablik-tok na wanpela liklik buk (Fascism or Freedom), na sampela man bilong gavman i ting mipela i laikim gavman Fasis, na dispela i kamapim sampela hevi.
Lo bilong gavman i tok olgeta man i mas insait long ami na dispela tu i bin givim hevi long ol yangpela brata. Long 1948, mi namba wan brata i kalabus long Brasil, long wanem, mi no bihainim dispela lo. Gavman i no save ol bai mekim wanem long mi. Ol i putim mi long kem bilong ami long Kasapava na mi mas wok long planim kaikai long gaden na lukautim. Na tu mi mas klinim rum em ol bikman bilong ami i save pilai spot long bainat long en. Planti taim mi autim tok long ol dispela man na mi bin tilim sampela buk na nius long ol. Nambawan bikman bilong ami em i namba wan man bilong ol long kisim buk Children, em Sosaiti i bin wokim. Bihain, ol i makim mi long skulim 30 o 40 soldia long samting bilong lotu. Ol i no inap mekim eksasais na ol i mas stap long wanpela rum. Bihain long 10-pela mun long kalabus, ol i putim mi long kot na ol i lusim mi i go. Mi amamas Jehova i bin strongim mi long sanap strong taim ol man i mekim ol tok bilong pretim mi, na ol i bin daunim mi, na tok bilas long mi.
Wanpela Gutpela Helpim
Long Jun 2, 1951, mi maritim Barbara, na kirap long dispela taim i kam inap nau, em i wanpela gutpela helpim bilong mekim bikpela long ol pikinini bilong mipela, na ‘stretim gut ol pikinini na skulim ol long tok bilong Bikpela.’ (Efesus 6:4) Fopela bilong ol 5-pela pikinini bilong mipela i amamas long mekim wok bilong Jehova. Mipela i laik ol bai sanap strong long tok i tru na helpim wok bilong oganaisesen i kamap gutpela, olsem mipela yet i laik mekim. Ol famili long piksa hia ol i wokman i dediket long Jehova, liklik pikinini em wanpela i holim, em tasol i no dediket. Fopela bilong ol i mekim wok elda na tupela i mekim wok painia oltaim tu. Dispela i soim olsem tok bilong Sindaun 17:6 em i tru: “Sapos man i kamap lapun na i gat ol tumbuna pikinini, orait em i save amamas, long wanem, dispela i mekim ol manmeri i givim biknem long em. Na ol pikinini i save amamas long papamama bilong ol.”
Nau mi gat 68 krismas, na skin bilong mi i no strong tumas. Long 1991, dokta i katim mi na stretim 3-pela rop blut bilong mi na bihain ol i mas mekim wok long wanpela tul bilong stretim wanpela rop blut bilong mi. Tasol mi amamas mi ken mekim yet wok wasman siaman long wanpela kongrigesen long Sau Benado do Kampo, na bihainim lek bilong papa bilong mi, em i wanpela bilong ol namba wan brata i kirapim wok long dispela hap. Lain bilong yumi long nau i narapela kain, yumi ken insait long wanpela wok i no inap kamap gen, em wok bilong tokaut long Kingdom bilong Jehova i kamap pinis long han bilong Krais. Olsem na yumi no ken tru lusim tingting long tok Pol i givim long Timoti olsem: “Tasol yu . . . mas mekim wok bilong autim gutnius long ol manmeri. Yu gat wok bilong helpim ol manmeri, na yu mas mekim tru dispela wok.”—2 Timoti 4:5.
[Piksa long pes 23]
Papamama bilong mi, Estefano na Juliana Maglovsky
[Piksa long pes 26]
José na Barbara wantaim famili bilong ol i dediket long Jehova