Laip Stori

Pasin Bilong i No Les Kwik i Kamapim Amamas

STORI BILONG MÁRIO ROCHA DE SOUZA

“Mi ting Mista Rocha i no inap winim operesen.” Wanpela dokta i bin tok olsem, tasol nau, olsem 20 yia bihain, mi stap laip yet na mekim wok bilong autim tok fultaim olsem wanpela Witnes Bilong Jehova. Wanem samting i bin helpim mi na mi no bin les insait long ol dispela yia?

TAIM mi pikinini yet, mipela i sindaun long wanpela fam klostu long Santo Estêvão, em wanpela ples long provins Bahia, long not-is bilong Brasil. Taim mi gat 7-pela krismas, mi kirap helpim Papa long mekim ol wok bilong fam. Long olgeta de taim skul i pinis, em i givim wanpela wok long mi. Bihain, taim Papa i go mekim sampela wok bisnis long Salvador, em biktaun bilong provins, mi save lukautim fam.

Mipela no gat pawa, wara saplai, na ol samting nau yumi gat bilong helpim sindaun bilong yumi, tasol mipela i stap amamas. Mi save pilai wantaim hap pepa i pas long rop na i flai antap o wantaim ol liklik toi ka mi na ol pren bilong mi i bin wokim long diwai. Na long ol bikpela de bilong lotu mi save pilaim klarinet na wokabaut wantaim bikpela lain long rot. Long haus lotu bilong mipela, mi insait long lain mangi i save mekim singsing lotu, na long dispela hap mi bin lukim buk História Sagrada (Ol Samting Holi i Bin Kamap Bipo) na dispela i kirapim laik bilong mi long save long Baibel.

Long 1932, taim mi gat 20 krismas, taim nogut tru bilong bikpela san i kamap long hap not-is bilong Brasil. Olgeta bulmakau bilong mipela i dai na gaden i no karim kaikai, olsem na mi lusim fam na go long Salvador, na mi kisim wok olsem draiva bilong tren. Bihain, mi rentim wanpela haus na mi kisim famili bilong mi i kam i stap wantaim mi. Long 1944, Papa i dai na mi mas lukautim Mama wantaim 8-pela susa na 3-pela brata.

Lusim Wok Draiva na Kirap Autim Tok

Taim mi kamap long Salvador, kwiktaim mi baim wanpela Baibel. Inap sampela yia mi lotu wantaim ol Baptis, na bihain mi kamap pren bilong Durval, wanpela wanwok draiva. Planti taim mi na Durval i toktok wantaim long ol samting bilong Baibel. Wanpela taim em i givim buklet Where Are the Dead?a long mi. Mi bilip olsem yumi man i gat wanpela spirit i no save dai, tasol mi laik skelim ol ves bilong Baibel dispela buklet i kamapim. Mi kirap nogut long lukim olsem Baibel i tok olsem man i mekim sin em bai i dai, em i no tok yumi gat wanpela spirit i no save dai.​—Esekiel 18:4.

Durval i lukim olsem mi laik save long tok bilong Baibel, olsem na em i askim Antônio Andrade, em wanpela Witnes Bilong Jehova i save autim tok fultaim, long kam lukim mi long haus. Antônio i kam 3-pela taim pinis na nau em i singautim mi i go wantaim em long autim tok bilong Baibel long ol narapela man. Taim em i autim tok pinis long namba wan na namba tu haus, em i tokim mi, “Orait nau em taim bilong yu.” Man! Mi pret nogut tru, tasol wanpela famili i putim gut yau na i kisim tupela buk long mi, na mi amamas tru long dispela. Long nau tu, bel bilong mi i save amamas tru taim mi bungim wanpela man i laik harim tok i tru bilong Baibel.

Long Epril 19, 1943, em de bilong tingim indai bilong Krais long dispela yia, mi kisim baptais long solwara Atlantik long nambis bilong Salvador. Long dispela taim i no gat planti man Kristen i save gut long lukautim wok, olsem na ol i makim mi bilong helpim liklik lain Witnes i save bung long haus bilong Brata Andrade i stap long wanpela liklik rot i bungim hap antap wantaim hap daunbilo bilong taun Salvador.

Ol i Birua Long Mipela

Long taim bilong Wol Woa 2 (1939-45) ol man i no laikim wok Kristen bilong mipela. Sampela bikman i ting mipela i lukstil bilong helpim Not Amerika, long wanem, planti buk na nius bilong mipela i kam long Amerika. Olsem na planti taim ol polis i holim mipela na sutim ol askim long mipela. Taim wanpela Witnes i no kam bek long haus long wok autim tok, mipela i ting ol polis i bin holim em, olsem na mipela i go long polis stesin bilong askim ol long larim em i go.

Long Ogas 1943, wanpela Witnes bilong Jemani, Adolphe Messmer, em i kam long Salvador bilong helpim mipela long stretim wok bilong mekim namba wan kibung bilong mipela. Mipela i kisim tok orait long ol bikman long mekim kibung, na nau mipela i putim toksave long ol niuspepa na windo bilong ol stua na long ol tren, long pablik tok bai kamap long kibung, nem bilong en “Freedom in the New World.” Tasol long namba tu de bilong kibung, wanpela plisman i kam toksave olsem ol i pinisim laisens bilong mipela long mekim kibung. Asbisop bilong Salvador i strong long bikman bilong ol polis i mas pasim kibung bilong mipela. Tasol long Epril, mipela i kisim tok orait long mekim dispela pablik tok mipela i bin putim ol toksave long en.

Wanpela Mak Bilong Winim

Long 1946, ol i singautim mi long go long bikpela kibung (“Glad Nations Theocratic Assembly”) i kamap long biktaun São Paulo. Kepten bilong wanpela kago sip i larim mipela sampela long i go long sip bilong em sapos mipela i slip long dek. Bikpela win na ren i painim mipela long solwara, na bel bilong mipela i tanim na mipela i sik, tasol mipela ron inap 4-pela de na sua gut long Rio de Janeiro. Ol Witnes long Rio i mekim gut long mipela na kisim mipela i go stap long haus bilong ol bilong malolo inap tupela de samting, na bihain mipela i kisim tren. Taim tren bilong mipela i kamap long São Paulo, i gat wanpela liklik lain i wetim mipela na ol i holim wanpela bikpela toksave i gat rait olsem “Welkam Ol Witnes Bilong Jehova.”

Taim mi kam bek long Salvador, mi toktok wantaim Harry Black, em wanpela misineri bilong Yunaitet Stets, long laik bilong mi long kamap painia, em nem bilong ol Witnes Bilong Jehova i save autim tok bilong Baibel fultaim. Harry i tokim mi olsem mi gat wok bilong lukautim famili, olsem na mi mas stap isi na no ken les kwik. Orait bihain, long Jun 1952, ol brata na susa bilong mi ol inap lukautim ol yet long ol samting bilong skin. Ol i makim mi long mekim wok painia long wanpela liklik kongrigesen long taun Ilhéus, em i stap longwe long Salvador inap 210 kilomita long hap saut.

Ol i Helpim Mi Gut

Long yia antap ol i salim mi i go mekim wok painia long Jequié, em wanpela bikpela taun i stap insait tru long kantri we i no gat ol Witnes. Namba wan man mi bungim, em pris bilong dispela hap. Em i tok dispela taun i bilong em na em i tambuim mi long autim tok long taun. Em i toksave long lain bilong em olsem wanpela “profet giaman” i kamap long taun, na em i putim sampela man nabaut long taun bilong lukluk long ol samting mi mekim. Tasol long dispela de mi tilim 90 nius na buk samting, na kirapim 4-pela Baibel stadi. Tupela yia bihain i gat wanpela Haus Kingdom long Jequié, na 36 Witnes! Long nau i gat 8-pela kongrigesen na 700 Witnes long Jequié.

Pastaim mi bin rentim wanpela liklik rum ausait liklik long taun na mi stap long en inap sampela mun. Bihain mi bungim Miguel Vaz de Oliveira, em papa bilong Hotel Sudoeste, em wanpela gutpela hotel tru long Jequié. Miguel i orait long stadi long Baibel na em i strong long mi mas kisim wanpela rum long hotel bilong em. Bihain Miguel wantaim meri bilong em i kamap Witnes.

Mi tingim narapela gutpela amamas mi bin kisim long Jequié, em mi bin stadi long Baibel wantaim wanpela tisa bilong haiskul, em Luiz Cotrim. Luiz i tok em i laik helpim mi long lain gut long tok ples Potugal na matematiks. Mi bin go long komiuniti skul tasol, olsem na mi amamas long em i helpim mi olsem. Long olgeta wik, taim mitupela Luiz i mekim pinis Baibel stadi, em i save skulim mi, na save mi kisim i helpim mi long mekim ol narapela wok mi kisim bihain liklik long oganaisesen bilong Jehova.

Wanpela Bikpela Wok

Long 1956, mi kisim pas i singautim mi i go long brens ofis i stap long Rio de Janeiro long dispela taim, na bai mi ken kisim skul long mekim wok wasman sekit, em nem bilong ol Witnes Bilong Jehova i save raun na lukim ol kongrigesen. I gat 8-pela moa i stap long dispela skul, na mipela i skul inap wanpela mun. Klostu long taim skul i pinis, ol i makim mi long wok long São Paulo, na mi tingting planti long dispela. Mi tingting olsem: ‘Mi wanpela blakskin, bai mi mekim wanem namel long ol dispela lain Itali? Bai ol i orait long mi o nogat?’b

Long namba wan kongrigesen mi bin go lukim long provins Santo Amaro, mi lukim ol wanbilip Witnes na ol nupela man i pulap tru long Haus Kingdom, na dispela i strongim bel bilong mi. Olgeta 97 bilong kongrigesen i kam autim tok wantaim mi long dispela wiken, na dispela i kamapim klia olsem mi bin pret nating. Mi tingting, ‘Ol i brata tru bilong mi.’ Ol dispela gutpela bratasista i mekim gut tru long mi na dispela i strongim mi na mi no les long mekim wok bilong raun.

Ol Donki, Hos, na Animal i Save Kaikai Anis

Wanpela bikpela hatwok bilong ol wasman raun long bipo, em ol i mas raun longwe tru bilong kamap long ol kongrigesen na ol liklik grup bilong ol Witnes i stap long hap bilong bus. Long ol dispela hap, ol PMV bas i no gutpela na planti taim i no gat bas, na klostu olgeta rot em ol liklik rot bilong lek tasol.

Bilong stretim dispela hevi, sampela sekit i baim wanpela donki o hos bilong wasman sekit i ken raun long en. Long planti Mande mi pasim sadel na ol samting bilong mi long donki, na mi ron inap 12-pela aua bilong kamap long narapela kongrigesen. Long Santa Fé do Sul, ol Witnes i gat wanpela donki, nem bilong em Dourado, em yet inap painim rot i go long ol stadi grup long hap bilong bus. Taim mipela kamap long dua bilong banis long ol fam, Dourado i save sanap isi na wetim mi i opim dua. Taim mi wok pinis wantaim dispela grup, mitupela Dourado i save go long narapela grup.

I no gat gutpela rot bilong salim ol toksave, dispela em i narapela hatwok bilong mekim wok sekit. Wanpela taim mi mas i go lukim wanpela liklik grup bilong ol Witnes i save bung long wanpela fam long provins Mato Grosso. Bilong mekim olsem, mi mas kisim bot na brukim wara Araguaia, na bihain raun long donki inap 25 kilomita long bikbus. Wanpela taim mi salim pas bilong toksave long dispela grup olsem mi bai kam lukim ol, tasol i luk olsem dispela pas i lus, long wanem, taim mi brukim wara i no gat wanpela i wetim mi. Em apinun tru, olsem na mi askim papa bilong wanpela liklik haus kaikai long lukautim ol kago bilong mi, na mi holim paus tasol na wokabaut i go.

I no longtaim na ples i tudak. Mi wokabaut long tudak na animal i save kaikai anis i mekim pairap long nus. Mi bin harim olsem dispela animal inap sanap na kilim man i dai long strongpela han bilong en. Olsem na taim mi harim wanpela pairap long bus, mi wokabaut isi na holim paus long fran long skin bilong mi bilong lukautim mi. Mi wokabaut inap sampela aua na mi kamap long wanpela liklik wara. Tasol ples i tudak na mi no inap lukim wanpela banis waia i stap long hapsait bilong wara. Mi kalapim gut dispela liklik wara, tasol mi pundaun antap long banis waia na em i katim nabaut skin bilong mi!

Bihain mi kamap pinis long fam na ol dok i wok long singaut. Long dispela taim bipo i gat ol lain bilong stilim sipsip long nait, olsem na taim mi lukim dua i op, kwiktaim mi kolim nem bilong mi. Ating ol brata i kirap nogut long lukim klos bilong mi i bruk na i gat blut long en, tasol ol i amamas long lukim mi.

Tru, i gat planti hatwok long dispela taim, tasol em i taim bilong amamas tu. Mi amamas long sindaun long hos o wokabaut i go longwe, na sampela taim mi kisim malolo aninit long ol diwai na harim ol pisin i singsing, na lukim wanpela kain dok bilong bus i brukim rot klostu long mi. Mi kisim amamas tu long save olsem taim mi go lukim ol grup, dispela i helpim ol tru. Planti ol i bin raitim pas na tok tenkyu long mi. Na sampela i tok tenkyu long taim mi bungim ol long kibung. Mi kisim bikpela amamas tru taim mi lukim ol man i winim ol hevi bilong ol na i wok long kamap strong long lotu i tru!

Mi Kisim Wanpela Helpim

Long ol dispela yia mi bin raun long wok sekit, planti taim mi stap wanpis, na dispela i skulim mi long bilip na wetim Jehova, em i olsem ‘strongpela banis bilong mi na i olsem ston i haitim mi.’ (Song 18:2) Na tu, mi stap singel na dispela i mekim na mi inap putim tingting bilong mi olgeta i go long mekim wok bilong Kingdom.

Tasol long 1978 mi bungim wanpela sista, nem bilong em Júlia Takahashi. Em i bin lusim wanpela gutpela wok skin olsem nes long bikpela haus sik long São Paulo na bai em i ken wok long hap i sot long ol man bilong autim tok bilong Kingdom. Ol elda Kristen i save long em, ol i litimapim nem bilong em olsem meri bilong tingim ol samting bilong lotu na i mekim gut wok painia. Mi bin stap singel inap planti yia pinis, olsem na taim mi marit, sampela ol i kirap nogut long dispela. Wanpela gutpela pren bilong mi i no inap bilip olsem mi bai marit, na em i tok promis olsem sapos mi marit, em bai givim mi wanpela bulmakau, hevi bilong en inap 270 kilogram. Orait mipela i kukim dispela bulmakau long weding bilong mipela long Julai 1, 1978.

Mi No Les, Maski Mi Gat Sik

Júlia i raun wantaim mi long wok sekit, na mitupela i go lukim ol kongrigesen i stap long hap saut na saut-is bilong Brasil i go inap 8-pela yia. Long dispela taim mi kisim sik bilong klok. Tupela taim mi airaun na pundaun taim mi autim tok long ol man bilong haus. Olsem na mipela i kisim wok olsem painia salim long Birigüi, long provins São Paulo.

Long dispela taim, ol Witnes long Birigüi i kisim mi long ka bilong lukim wanpela dokta long Goiânia, em longwe inap olsem 500 kilomita. Taim mi orait liklik, ol dokta i katim mi na putim wanpela liklik samting insait long klok bilong mi bilong helpim klok long wok gut. Dispela samting i kamap inap 20 yia i go pinis. Mi kisim pinis tupela operesen moa, tasol mi save mekim yet wok bilong kamapim ol disaipel. Olsem planti gutpela meri marit bilong lain Kristen, oltaim Júlia i save givim strong long mi na strongim bel bilong mi.

Sik bilong mi i mekim na mi no inap mekim bikpela wok, na sampela taim mi save bel hevi long dispela, tasol mi inap mekim yet wok painia. Mi save tokim mi yet olsem Jehova i no bin promis long ol gutpela samting tasol bai painim yumi long dispela taim nau yumi stap long en. Aposel Pol na ol narapela Kristen bilong bipo i bin stap gut long God, ol tu i mas karim hevi na no ken les, olsem na yumi no ken ting bai yumi narapela kain long ol.​—Aposel 14:22.

I no longtaim i go pinis na mi painim namba wan Baibel mi bin kisim long 1935 samting. Long karamap bilong en long insait, mi bin raitim namba 350​—em namba bilong ol man bilong autim tok bilong Kingdom long Brasil taim mi bin kirap long i go long ol miting Kristen long 1943. Tasol long nau i gat olsem 600,000 Witnes long Brasil. Mi amamas tru long mi bin insait liklik long wok bilong mekim dispela lain i go bikpela olsem! Tru tumas, Jehova i bin mekim gut tru long mi long mi bin karim ol hevi na no ken les. Olsem man bilong raitim song, mi ken tok: “Tru tumas, Bikpela i bin mekim bikpela wok tru bilong helpim mipela. Olsem na mipela i belgut tru.”​—Song 126:3.

[Ol Futnot]

[Piksa long pes 9]

Ol Witnes i toksave long pablik tok long namba wan kibung i kamap long biktaun Salvador, 1943

[Piksa long pes 10]

Ol Witnes i kam long São Paulo bilong mekim Glad Nations Kibung, 1946

[Ol Piksa long pes 10, 11]

Mekim wok sekit long 1958 samting

[Piksa long pes 12]

Mi wantaim meri bilong mi, Júlia