Painim Trupela Save

EM Disemba 18, 1810. Tudak i laik kamap. Long solwara long hap saut-is bilong Skotlan em taim nogut bilong biksi na wanpela sip bilong Nevi Bilong Briten, em HMS Pallas, i paul long rot. Tudak i wok long kamap na bikpela ren ais i pundaun, na boskru i hatwok tru long lukim lait bilong laithaus na bai em i stiaim sip i go insait long gutpela pasis. Bihain bel bilong ol i gutpela tru taim ol i lukim lait na ol i stiaim sip i go long dispela lait. Tasol sori tru! Em i no lait bilong stiaim ol sip! Em lait bilong paia ol wokman i bin wokim long hap bilong nambis. Sip Pallas i ran i go na i pas long rip na i bagarap olgeta. Inap 11-pela boskru i dai. Em samting nogut tru i bin kamap!

Wanpela popaia i mekim na sip Pallas i kisim bagarap. Tasol sampela taim ol boskru i mas was gut long samting i nogut moa yet​—em ol lait giaman. Wanpela buk i tok, sampela lain i save putim ol dispela lait bilong giamanim ol sip na pulim ol i go pas long rip na bagarap, na nau ol dispela lain i save go na stilim olgeta kago samting bilong sip.​—Buk Wrecks, Wreckers and Rescuers.

Ol Tok Bilong God Inap Stiaim Yu “na Bai God i Kisim Bek Yu”

Taim yu wok long painim save tru, i gat sampela samting yu mas was gut long en na i wankain olsem ol samting i bin painim ol dispela boskru. Ating bai yu bihainim sampela tok kranki, o yu bihainim wanpela tok giaman. Tupela rot wantaim inap bringim yu i go long bagarap. Yu inap mekim wanem bilong lukautim yu yet? Yu mas save gut olsem as bilong dispela save tru yu laik bihainim em i stret na yu inap bilip tru long en. Inap 125 yia pinis, dispela nius i bin litimapim Tok Bilong God, em Baibel, olsem nambawan as bilong save tru em yumi inap bilip tru long en, long wanem, em i gat ‘tok bilong God em inap long givim gutpela tingting long yu na bai God i kisim bek yu.’​—2 Timoti 3:​15-17.

Tasol bilong yu ken bilip tru olsem Baibel em i wanpela lait bilong stiaim yu gut, em i pasin bilong gutpela tingting sapos yu skelim gut olsem Baibel em i tok tru bilong God o olsem wanem. (Song 119:105; Sindaun 14:15) Yu ken raitim pas long ol lain bilong wokim dispela nius bilong kisim sampela tok i bin helpim planti milion manmeri long bilip tru olsem spirit bilong God yet i bin kamapim ol tok bilong Baibel. Yu ken ritim buklet A Book For All People.a Em i kamapim planti tok i soim olsem ol tok bilong Baibel i stret, na em i tok bilong God, na spirit bilong God i bin kirapim ol man long raitim.

Ol Bikpela As Tok i Tru

Orait wanem sampela as tok i tru i stap long “buk bilong God”? Tingim ol dispela tok:

I gat wanpela God tasol, em God i Gat Olgeta Strong na Man Bilong Wokim olgeta samting. (Stat 1:1) Yumi stap, “long wanem, [God i] bin wokim olgeta samting” na em i bin givim laip long yumi. (KTH 4:11) Olsem na em inap tru long yumi mas lotuim em wanpela tasol. Man Bilong Wokim olgeta samting em i As tru bilong olgeta save tru. (Song 36:9; Aisaia 30:​20, 21; 48:​17, 18) Em i gat wanpela nem bilong em yet na em i laik bai yumi kamapim dispela nem. (Kisim Bek 3:​15, sta) Dispela nem ol i bin raitim long ol leta bilong tok ples Hibru, ol i raitim olsem YHWH, na dispela nem i kamap inap olsem 7,000 taim long Baibel. Inap planti handet yia pinis ol i bin raitim dispela nem long tok Inglis olsem “Jehovah,” na long Tok Pisin ol i raitim olsem “Jehova.”​—Song 83:​18, NW.

Jehova i bin wokim ol man na meri bilong i stap oltaim oltaim long gutpela ples Paradais hia long graun. Em i bin givim ol gutpela pasin long ol man na meri i wankain olsem ol pasin bilong em yet. Em i givim save long ol bilong mekim ol kain kain wok samting na bai ol i ken i stap amamas tru inap oltaim oltaim long graun. (Stat 1:​26-28) Jehova i no bin wokim graun bilong i stap olsem ples bilong redim ol man na meri bilong kisim laip olsem spirit long heven, nogat​—i no long heven tasol ol inap pas gut wantaim God.

Taim God i wokim man, i no gat pasin nogut i stap long bel bilong man. Pasin nogut i kamap taim sampela em God i bin wokim​—man na ensel​—​ol i bin mekim wok nogut long pasin bilong i stap fri long makim wanem rot ol i laik bihainim, na ol i bikhet long God. (Lo 32:5) Tupela tumbuna bilong pastaim ol yet i laik makim wanem samting i gutpela na wanem samting i nogut. (Stat 2:17; 3:​1-5) Dispela pasin i mekim na dai i kisim olgeta manmeri bilong graun. (Stat 3:19; Rom 5:12) Bilong stretim ol bikpela tok dispela pasin bikhet i bin kamapim, Jehova i larim pasin nogut i stap inap sampela haptaim tasol. Tasol laik bilong God long dispela graun na ol man, em i no bin senis​—em i stap olsem yet. (Aisaia 45:18) Ol man na meri bai stap oltaim oltaim long gutpela ples Paradais hia long graun, i no gat pasin nogut moa i stap long en.​—Matyu 6:10; KTH 21:​1-5.

Jisas Krais i no God i Gat Olgeta Strong, em i Pikinini Bilong God. Jisas Krais yet i bin skulim ol disaipel bilong em long beten olsem: “Papa bilong mipela, yu stap long heven, nem bilong yu i mas i stap holi.” (Matyu 6:9) Em i no bin tok em i bikpela olsem God, nogat. Em i tok: “Papa i stap namba wan tru na i winim mi.”​—Jon 14:28.

Jisas i gat bikpela wok tru insait long ol samting God i tingting pinis long mekim. God i bin salim em i kam “olsem lait, bilong olgeta man i bilip long [em] ol i no ken i stap long tudak.” (Jon 12:46) Aposel Pita i tok: “I no gat narapela man i inap kisim bek yumi.” (Aposel 4:12) Dispela tok i stret, long wanem, gutpela blut bilong Krais tasol em i rot bilong God i ken kisim bek yumi. (1 Pita 1:​18, 19) Jisas Krais i bin givim laip bilong em olsem ofa bilong baim bek ol man long sin em tupela tumbuna bilong pastaim, Adam na Iv, i bin givim long ol man bilong graun. (Matyu 20:28; 1 Timoti 2:6) Na tu, long rot bilong Jisas God i bin kamapim klia laik bilong Em na ol samting em i tingting pinis long mekim.​—Jon 8:​12, 32, 46, 47; 14:6; Aposel 26:23.

God i bin kamapim wanpela Kingdom, olsem gavman, long heven, na Jisas Krais na ol man God i bin makim namel long ol manmeri bilong graun ol i insait long dispela Kingdom. Tok bilong Kingdom i kamap planti taim insait long Baibel. God i bin givim wok long dispela gavman long kamapim laik bilong em long graun olsem i stap long heven. (Matyu 6:10) Long pastaim tru God i no bin tingting long sampela man bilong graun bai i go antap long heven. Ples bilong ol man, em dispela graun. Tasol taim Adam na Iv i mekim sin, God i tingting pinis long kamapim wanpela nupela samting. Em i stretim rot bilong makim sampela manmeri “bilong olgeta lain man, na bilong olgeta tok ples, na bilong olgeta kain skin, na bilong olgeta kantri . . . na bai ol i stap king” wantaim Krais long wanpela gavman bilong heven. (KTH 5:​9, 10) Liklik taim nau na dispela Kingdom, o gavman, bai ‘daunim na bagarapim’ olgeta kain wok gavman bilong ol man, em ol i bin kamapim ol bikpela hevi na pen nogut tru long ol manmeri bilong graun.​—Daniel 2:44.

Taim man i dai, i no gat wanpela hap bilong em i save stap oltaim. Dispela as tok i tru bilong Baibel i kamapim klia tru ol samting bilong ol man na i stap bilong ol long bihain. Na tu, dispela tok bilong Baibel i rausim ol tingting kranki na ol tok kranki i bin paulim tingting bilong ol man na ol i no klia liklik long ol man i dai pinis ol i stap olsem wanem.

Buk Saveman 9:​4, 5, 10 long Baibel i tokim yumi: “Ol [man] i save bai ol i dai. Tasol ol man i dai pinis, ol i no inap save long wanpela samting. . . . Bai yu no inap mekim wok o tingting o kisim gutpela tingting na save long ples bilong ol man i dai pinis, dispela ples bai yu go long en.” Yu kisim gut dispela tok? Taim man i dai, i no gat wanpela hap bilong em i save stap oltaim. Taim man i dai, em bai “go bek gen long graun.”​—Stat 3:19.

Ol man i dai pinis ol inap kisim bek laip long rot bilong kirap bek. Long pinis bilong dispela haptaim God i bin larim pasin nogut i stap, “olgeta manmeri i stap long matmat ol bai i harim maus bilong Pikinini [Jisas], na ol bai i lusim matmat na i kam ausait. Ol manmeri i bin mekim gutpela pasin, ol bai i kirap bek na i stap laip. Na ol manmeri i bin mekim pasin nogut, ol bai i kirap bek na i kamap long kot.” (Jon 5:​28, 29; Aposel 24:15) Em nau, ol man i dai pinis ol bai kirap bek na kisim laip gen long Paradais long graun, na ol bai i kisim kain sindaun olsem God i tingting pinis long givim long ol manmeri bilong graun long pastaim tru.

Skelim Gut Baibel Long Olgeta De

Ating yu lukim pinis olsem, taim yu save long ol dispela bikpela as tok bilong Baibel, dispela inap helpim yu tru. Long dispela taim nogut bilong yumi, dispela kain save inap lukautim yu na bai yu no inap paul nabaut long “kain kain toktok i pait long tingting bilong God,” em Satan yet i kamapim. Em i mekim olsem em i “ensel bilong lait,” na ol wokman bilong em ol i mekim olsem ol i “wokman bilong stretpela pasin.” (1 Timoti 6:20; 2 Korin 11:​13-15) Stretpela save bilong Baibel inap lukautim yu na bai yu no ken paul long ol save ol man i tok em i save tru. As bilong kain save olsem em ol man husat “i gat gutpela tingting na save” bilong dispela graun na ol ‘i bin givim baksait long tok bilong Bikpela,’ Jehova.​—Matyu 11:25; Jeremaia 8:9.

Long taim bilong aposel Jon i gat planti tok bilong lotu na tingting bilong dispela graun em ol inap paulim ol man, olsem na em i bin givim tok lukaut long ol Kristen olsem: “Yupela i no ken bilip long olgeta man i kam long yupela na i tok, ‘Spirit bilong God i givim tok long mi.’ Nogat. Yupela i mas traim olgeta spirit, bai yupela i ken save, ol i kam long God, o nogat.” (1 Jon 4:1) Tingim dispela samting: Sapos yu kisim wanpela tok em inap mekim sampela bikpela samting tru long i stap bilong yu, yu ting bai yu bihainim kwik dispela tok, long wanem, i luk olsem em i kam long wanpela gutpela man? Nogat, a? Pastaim bai yu skelim gut olsem husat tru i as bilong dispela tok, na bai yu glasim gut na skelim skelim ol dispela tok.

God i bin givim wanpela buk long ol man i gat ol as tok i tru long en, na long dispela rot em i helpim yu long “skelim gut” olsem ol lait yu bihainim ol i lait tru tru bilong soim rot long yu o nogat. (1 Tesalonaika 5:21) Ol manmeri i gat stretpela tingting long taim bilong ol aposel, “long olgeta de ol i save ritim na skelim tok i stap long buk bilong God,” bilong ol i ken save, tok Pol i lainim ol long en em i tru, o nogat. (Aposel 17:11) Yu tu inap mekim olsem. Baibel em i olsem “lam i lait i stap long ples tudak,” na yu mas larim Baibel i soim rot long yu na bai yu kamap long ples bilong i stap gut. (2 Pita 1:​19-21) Sapos yu mekim olsem, “bai yu save gut long God,” na dispela bai givim trupela save long yu.​—Sindaun 2:5.

[Futnot]

[Piksa long pes 4]

Tok Bilong God i olsem lam

[Piksa long pes 5]

Wanem nem bilong God?

[Piksa long pes 5]

Olsem wanem long i stap bilong ol man long bihain?

[Piksa long pes 6]

Yu ting Jisas em God i Gat Olgeta Strong?

[Piksa long pes 6]

Ol man i dai pinis ol i stap we?

[Piksa long pes 7]

Tok bilong kirap bek long matmat em wanpela as tok i tru bilong Baibel