Taim Bilong Yumi i Narapela Kain

OL ISRAEL bilong bipo ol i bin i stap gutpela tru aninit long gutpela King Solomon! Ol i stap bel isi na ol i gat planti samting bilong skin na ol i stap amamas. Taim Solomon i strong long helpim lotu i tru, Jehova i mekim gut tru long lain Israel. God i givim planti mani kago long King Solomon, na em i givim “planti gutpela tingting na save” tu long Solomon bambai em inap bosim ol Israel long stretpela pasin na pasin sori. (1 King 3:12) Baibel i tok: “Ol king bilong olgeta kantri i save kam lukim Solomon, bilong harim dispela gutpela tingting na save God i bin givim em.”​—⁠2 Stori 9:⁠23.

Na Jehova i givim gutpela sindaun na bel isi na planti gutpela samting long ol Israel. Baibel i tok: “Ol manmeri bilong Juda na Israel ol i bikpela lain tumas, inap olsem wesan bilong nambis. Ol i sindaun gut na ol i gat kaikai na dring na ol i amamas.” Tru tumas, “taim Solomon i stap king, olgeta manmeri . . . ol i sindaun gut klostu long gaden wain na diwai fik bilong ol, na i no gat wanpela samting nogut i kamap long ol.”​—⁠1 King 4:​20, 25.

Tasol long nau i stap bilong ol man i senis; em i narapela kain tru long dispela taim bipo em i taim bilong ol man i stap amamas. Long nau planti lain long graun ol i stap rabis. Na long ol kantri i gat planti wok bisnis long en, planti man i stap rabis. Wanpela lain bilong Yunaitet Nesen i tok, long Yunaitet Stets na sampela kantri bilong Yurop em ol i bung long mekim wok bisnis, inap 15 pesen bilong ol manmeri ol i stap rabis.

Olsem ripot bilong wanpela lain bilong Yunaitet Nesen (United Nations Children’s Fund) i tok, sapos yumi brukim olgeta manmeri bilong graun i go 5-pela lain, orait wanpela lain em i stap rabis olgeta; na ripot i tok, i stap bilong ol dispela lain rabisman “i wok long i go nogut moa yet.”​—⁠Nem bilong ripot, The State of the World’s Children 1994.

Long sampela kantri, pe bilong olgeta samting i go antap tru, na dispela i givim bikpela hevi moa yet long ol lain i stap rabis. Wanpela meri bilong wanpela kantri long Afrika i tok: “Mi save lukim wanpela samting long maket na mi tingting, ‘Bai mi go bek long haus na kisim mani bilong baim.’ Orait mi kam bek olsem wanpela aua bihain na ol i save tok, ol i apim pinis pe bilong en na mi no inap baim. Nau bai mipela i mekim wanem? Dispela em i wanpela bikpela hevi tru.”

Narapela meri bilong dispela hap i tok: “Bilong i stap laip, mipela i tingting tasol long painim rot bilong kisim sampela kaikai. Mipela i no tingim moa ol narapela samting mipela i mas kisim.”

Olsem Yunaitet Nesen i tok, i olsem dispela hevi bai go bikpela tru long bihain. Wanpela lain bilong en (UNICEF) i ting, sapos ol man i wok long kamap planti olsem nau ol i mekim, orait, “insait long taim bilong wanpela lain tasol,” ol rabisman bai kamap planti moa yet, winim bilong nau inap 4-pela taim.

Tasol maski hevi bilong mani i go bikpela tru na i gat planti hevi moa long sindaun bilong ol man, i gat as na ol wokman bilong God i ken ting ol dispela hevi bai pinis bihain. Tru, ol i mas i stap namel long ol man i ting ol samting bai go nogut moa yet long bihain, tasol ol wokman bilong God i amamas long tingim i stap bilong ol long bihain, na ol i no pret long en. Narapela stori i kamap bihain long dispela em bai kamapim as bilong dispela tingting bilong ol.

[Piksa Kredit Lain long pes 3]

De Grunne/Sipa Press