Pasin Bilong Bel Nogut Klostu i Bagarapim Sindaun Bilong Mi

PASIN bilong bel nogut i kirap long bagarapim sindaun bilong mi taim mi marit long namba 2 man bilong mi, Mak.a Em i gat sampela pikinini, na mi tu mi gat sampela, na mitupela i mas lukautim ol na mipela i gat sampela wok long ol poroman marit bilong mipela bilong pastaim. Sampela taim hevi bilong mi i bikpela tru. Taim kros i kamap insait long famili, i olsem Mak i no laik helpim mi. Olsem na mi kirap long ting em i save laikim yet namba wan meri bilong em, na mi bel nogut long dispela meri. Tasol mi no daunim dispela bel nogut. Mi larim i go bikpela na bosim mi. Taim meri bilong Mak i stap, bel bilong mi i nogut tru.

Long olgeta taim mi save was gut long Mak, na mi lukluk long ai bilong em na bai mi ken save em i lukluk i go we, na mi tingting nogut long em, tasol i no gat as bilong en. Sampela taim mi save sutim tok long em na tok, em i save laikim yet namba wan meri. Wanpela taim em i bel hevi nogut tru long dispela tok bilong mi, na em i kirap lusim kibung Kristen mipela i stap long en. Mi save mi gat asua long ai bilong Jehova. Mi givim bikpela hevi long famili bilong mi na ol i no stap amamas, long wanem, dispela pasin bilong mi i bagarapim bel bilong ol pikinini tu. Mi nolaik tru long dispela pasin bilong mi, tasol maski mi wok strong long daunim, mi no inap bosim bel bilong mi.

Mak i no helpim mi long daunim dispela pasin bilong mi. Em i kirap na bekim long mi. Taim mi sutim tok long em, em i save bikmaus na tok, ‘Yu bel nogut long dispela meri, mi save.’ Na i olsem em i mekim ol samting bilong kirapim bel bilong mi na mi ken tingting nogut long em. Ating em i ting dispela bai helpim mi long daunim pasin bilong bel nogut long man, tasol nogat; dispela hevi i go bikpela moa. Orait nau em i kirap lukluk long ol narapela meri, na em i save tok, skin bilong ol i gutpela tru. Dispela i bagarapim moa yet bel bilong mi na mi ting mi samting nating tasol na em i no laikim mi. Nau narapela samting i kamap​—⁠bel bilong mi i nolaik tru long em. Tingting bilong mi i paul tru na mi laik lusim em wantaim ol pikinini bilong em na mi no ken lukim ol moa.

Baibel i tok, “sapos man i . . . bel nogut oltaim long ol arapela man, dispela pasin i olsem sik nogut i wok long bagarapim ol bun bilong en.” (Sindaun 14:30) Dispela tok i stret tru! Nau sik i wok long kisim mi. Ol sua i kamap long bel na i no orait hariap​—⁠ol i stap longtaim. Mi wok yet long tingting nogut long olgeta samting Mak i mekim. Mi save lukim gut olgeta poket long klos bilong em, na sapos mi painim wanpela namba bilong telefon, mi save ring bambai mi ken save, em namba bilong meri o man. Long bel bilong mi, mi sem tru long pasin bilong mi, na mi save krai, long wanem, mi gat sem long ai bilong Jehova. Tasol mi no inap daunim dispela pasin bilong mi. Mi mekim nogut long mi yet.

Dispela i nogutim mi long ol samting bilong spirit na mi no inap beten moa. Mi laikim tru Jehova na mi laik tru long mekim ol samting i stret. Mi save long ol tok bilong Baibel long man na meri marit, tasol mi no inap bihainim. Nau mi no laik i stap laip moa, maski mi gat ol gutpela pikinini tru.

Ol elda long kongrigesen Kristen i wok long strongim bel bilong mi, na ol i wok strong long helpim mi. Tasol taim ol i toktok long pasin bilong mi long bel nogut long man, mi sem na mi tok, mi no mekim olsem. Mi no laik tokaut olsem mi gat dispela hevi.

Bihain sik bilong mi i go bikpela na mi mas i go long haus sik na dokta i katim mi. Taim mi stap long haus sik, mi pilim olsem i stap bilong mi i nogut tru na mi no inap i stap olsem moa. Mitupela Mak i pasim tok olsem mipela bai bruk inap tripela mun na bai mipela yet i ken i stap na skelim dispela hevi bilong mipela. Insait long dispela taim wanpela gutpela samting tru i kamap. Long nius Kirap! i gat wanpela stori, “Samting Bilong Helpim Ol Yangpela, Em Papa o Mama i Save Dring Oltaim.”b

Mama bilong mi i save dring oltaim. Papamama i no bin paitim mi oltaim, tasol ol i no mekim pasin sori liklik long mi. Mi no inap tingim wanpela taim em mama i bin holimpas mi o tok em i laikim mi tru, nogat. Olsem na mi no save long pasin bilong laikim tru narapela man, na mi no save mi ken mekim wanem na bai ol narapela i ken laikim mi.

Planti taim mama i tokim mi olsem papa i prenim ol meri, na em i no save bilip liklik long papa. Olsem na ating mi bin kisim dispela tingting na taim mi bikpela mi no save bilip long ol man. I stap bilong mi taim mi pikinini, dispela i mekim na mi ting mi no gutpela olsem ol narapela meri. Orait taim mi kaunim dispela Kirap! nau mi save long as bilong dispela tingting bilong mi. Mi save, as bilong dispela hevi, em mi save bel nogut long narapela man.

Mi soim dispela Kirap! long man bilong mi, Mak, na dispela i helpim em tu long pilim tingting bilong mi. I no longtaim na mitupela inap bihainim ol tok Baibel i givim long ol marit ol i tingting long brukim marit, na mitupela i kamap wanbel gen. (1 Korin 7:​10, 11) Nau marit bilong mitupela i gutpela tru. Klostu olgeta samting mitupela i mekim, em mipela i mekim wantaim, na wok Kristen tu. Nau Mak i save mekim pasin sori long mi. Klostu olgeta de em i save tokim mi, em i laikim mi tru, na nau mi bilipim tok bilong em.

Taim mi save mipela bai bungim namba wan meri bilong Mak, mi save beten askim Jehova long strongim mi na helpim mi long mekim pasin olsem strongpela Kristen. Na em i save helpim mi olsem. Pasin bilong mi long bel nogut long dispela meri, dispela tu i wok long pinis. Mi no save tingting nogut oltaim long narapela man o tingting nabaut long ol samting.

Tru, sampela taim pasin bilong bel nogut i save kamap long bel bilong mi. Long nupela taim God bai kamapim, long dispela taim tasol mi inap pinisim tru dispela pasin bilong mi. Tasol nau long dispela taim, mi lain pinis long bosim bel bilong mi, na mi no larim pasin bilong bel nogut i bosim mi. Tru tumas, pasin bilong bel nogut long narapela man, klostu dispela i bagarapim tru sindaun bilong mi, tasol Jehova na oganaisesen bilong em i bin helpim mi gut, olsem na nau mi stap amamas na skin bilong mi i orait gen. Na nau mi pas gut gen wantaim God bilong yumi, Jehova.​—⁠Wanpela meri i salim dispela stori i kam.

[Ol Futnot]