Ol Ensel i Stap Wantaim Yumi?

Samting i kamap wantu tasol. Marilynn i tingting strong i stap na em i no save em i wokabaut i go long rot bilong tren. Orait wantu em i harim bikpela pairap. Em i lukluk i go antap na nau em i save, em i sanap long rot bilong tren na wanpela tren i spit i kam! Marilynn i pret nogut tru na em i sanap tasol. Tren i kam klostu tru na em inap lukim blupela ai bilong draiva na pes bilong em, em i kirap nogut tru na i pret. Marilynn i no inap lusim tingting long samting nau i kamap. Em i tok: “I olsem wanpela traipela man i kam baksait long mi na i subim mi strong. Mi sut i go pundaun long arere bilong rot.” Marilynn i kisim liklik bagarap tasol long skin, na em i kirap sanap bilong tok tenkyu long man i bin helpim em na em i no bagarap​—⁠tasol i no gat wanpela man i stap! Orait, em i ting olsem wanem long dispela? Em i tok: “Wasangelo bilong mi i helpim mi na mi no bagarap. Sapos nogat, orait husat i bin helpim mi?”

OL MAN i no save bilip tumas long God na ol ensel samting, tasol long nau ol i kirap wantu tasol na ol i tingting strong long ol ensel. Nau long dispela taim, stori bilong ol ensel i save kamap long televisen na ol piksa wokabaut samting. Ol buk i stori long ol ensel, ol i stap namba wan long lista bilong ol buk bilong lotu ol man i save laikim tru. I gat ol klap na skul na nius i stori long ol ensel. Na long nau i gat sampela lain i gat wok long helpim yu long kisim helpim long “wasangelo bilong yu,” olsem wanpela nius i tok.

Dispela tingting i mekim na ol man bilong bisnis i kirap na wokim ol kain kain samting bilong ol man i ken baim. Papa bilong wanpela stua long Amerika i tok: “Olgeta samting i gat ensel long en, ol man i save baim wantu tasol.” Em i tok, i gat planti buk na piksa bilong ol ensel, ol pin olsem bilas, ol doli, siot, kat bilong salim long man olsem pas, ol i gat ensel long en, na ol i save kisim bikpela winmani tru long en​—⁠em wanpela man bilong raitim nius i kolim olsem “winmani i kam long heven.”

Tasol ol dispela lain i bilip long ol wasangelo ol i tok, dispela i no wanpela tingting nating ol i kisim. Bilong helpim tok bilong ol, ol i save kolim stori bilong planti man em ol i bin bungim ol ensel, na ol i tok em “stori tru tru.” Sampela i tok ol i bin lukim wanpela ensel i gat skin olsem bilong man. Sampela ol i lukim lait, o harim nek, o pilim olsem wanpela man i stap klostu long ol, o wanpela samting i laik kirapim ol, na ol i bilip olsem em i wanpela ensel. Planti ol i mekim wankain stori olsem Marilynn​—⁠ol i tok wanpela ensel i bin helpim ol long abrusim bagarap.

Joan Wester Anderson i raitim tupela buk i stori long ol man i bin bungim ol ensel, na em i tok, “Mi ting ol man i kirap gen long tingim ol samting bilong spirit.” Alma Daniel, em i bin raitim wanpela buk, em i tok, ol ensel i bin “kisim tok long ol i mas kamapim ol yet long ol man na bai planti man moa inap save long ol. Long nau yumi lukim planti stori samting long ol ensel, long wanem, ol ensel yet i laikim olsem.”

Tasol yu ting dispela tok i tru, o i gat narapela as na ol man bilong nau i tingting strong long ol ensel? Bilong save gut long dispela samting, yumi mas lukim Baibel. Baibel i gat stori tru bilong ol ensel, na yumi inap lukim long stori i kamap bihain long dispela.

[Piksa Kredit Lain long pes 2]

Pages 3 and 4: The New Testament: A Pictorial Archive from Nineteenth-Century Sources, by Don Rice/Dover Publications, Inc.