Wanpela Kaikai i Mekim Gutpela Wok
BIKPELA guria i bin kamap long Kobe, long hap bilong Japan, long mun Janueri i go pinis, na bihain long en ol manmeri bilong dispela hap ol i hatwok long painim kaikai. Tasol ol Witnes Bilong Jehova i no sot long kaikai, long wanem, ol pren bilong ol i mekim gutpela pasin na helpim ol. Tupela o tripela de bihain long dispela guria, ol kongrigesen i stap klostu ol i salim rais ol i bin kukim na wokim olsem ol liklik bal. Bihain ol pren bilong ol i pulimapim sampela kaikai long ol liklik bokis na salim i go long ol. Na planti pren ol i raitim pas na pasim long ol dispela liklik bokis, na pas i tok ol i tingting planti long ol dispela lain i bin kisim hevi long guria. Ol Witnes i kisim ol dispela kaikai ol i tok, taim ol i kaunim pas, aiwara bilong ol i go daun.
Ol Witnes Bilong Jehova i bin givim sampela kaikai long ol manmeri i sot long kaikai. Wanpela Witnes i stap insait long ka wantaim wanpela wanwok i no Witnes, na em i holim liklik bokis i gat kaikai long en ol Witnes i bin salim i kam, na em i kaikai. Olsem na em i givim wanpela liklik bokis long wanpela wanwok.
Wanwok i askim em: “Yu baim we dispela kaikai?” Brata i stori olsem ol Witnes i bin salim kaikai i kam long taim dispela hevi i kamap. Man i amamas na em i tok, “Mi no bin kaikai ol samting bilong gaden inap planti de. Bai mi karim hap i go bek long haus na famili bilong mi bai kaikai.”
Orait, taim dispela wanwok i kisim kaikai long namba 3 taim, em i givim mani inap 3,000 yen (olsem K35) long Witnes na em i tok: “Mi save long ol wok yupela i save mekim, olsem na mi laik givim dispela mani bilong helpim wok bilong yupela. Mi tenkyu tru long kaikai yu bin givim long mi. Olgeta pren bilong yu ol i gat gutpela pasin.”