Jehova i No Bin Lusim Mipela
EM STORI BILONG NASHO DORI
Mbrestan em i wanpela liklik ples long maunten long Albenia long hap bilong saut, klostu liklik long kantri Grik. Mama i bin karim mi long dispela ples long yia 1907. Taim mi gat 5-pela krismas mi kirap i go long wanpela skul Grik, tasol bihain ol ami bilong Itali i kam pait long Albenia long taim bilong Namba Wan Pait na mi no inap skul. Taim pait i pinis, mi kirap skul gen, tasol nau mi skul long tok ples Albenia.
PAPAMAMA i no save tingim tumas lotu, tasol ol i save bihainim ol pasin na tok bilong lotu Otodoks bilong Albenia. Wanpela smolpapa bilong mi em i wanpela pris long Mbrestan, olsem na mi save mekim wok long haus lotu na mi kisim save long ol samting i kamap insait long dispela lotu. Mi lukim ol bilaspasin bilong lotu i olsem i no gat as bilong en, na ol pris samting ol i man bilong tupela maus. Mi tingting planti long dispela samting.
Papamama i bihainim pasin bilong ples na ol i makim wanpela yangpela meri bilong mi. Argjiro em i bilong ples Grabova, em wanpela ples klostu long mipela, na mitupela i marit long 1928, taim em i gat 18 krismas.
Mi Lain Long Tok Bilong Baibel
Long dispela taim wanpela kasen-brata long Amerika em i kam long ples, na mi toktok planti long em long dispela lotu Otodoks. Em i tok, “Long Amerika, klostu long haus bilong mi, i gat wanpela liklik lain ol i no gat haus lotu, tasol ol i save bung na stadi long Baibel.” Mi tingim dispela pasin bilong stadi long Baibel na i no gat haus lotu, na mi laikim dispela pasin. Olsem na mi tokim em long salim sampela buk samting bilong Baibel long mi taim em i go bek.
Mi lusim tingting olgeta long dispela samting, na bihain, olsem wanpela yia samting, mi kisim wanpela karamap i kam long Milwoki, long Wiskonsin. Insait long karamap i gat wanpela buk long tok ples Albenia, nem bilong en The Harp of God, na wanpela Wastaua long tok Grik. Mi lukluk nating long ol tok bilong buk na mi lukim wanpela tok long lotu i tru. Tasol mi no amamas long dispela tok. Mi tingting, ‘Mi no laik insait long wanpela lotu.’ Olsem na mi no kaunim gut dispela buk.
Long 1929 mi go insait long ami na ol i salim mi i go long taun Tirana, em nambawan biktaun bilong Albenia. Long dispela hap mi bungim Stathi Muçi, em i wok long kaunim Baibel Grik. Mi askim em, “Yu save go long lotu?” Em i tok, “Nogat. Mi lusim pinis lotu na mi insait long lain Intenesenel Sumatin Bilong Baibel.” Mi wantaim narapela soldia i go wantaim Stathi long wanpela miting long Sande. Long dispela miting mi kisim save olsem lotu i tru em i no wanpela haus o wanpela lotu. Em i wanpela lain God i bin makim ol na ol i wokman bilong Krais. Nau mi pilim pinis tok bilong dispela buk The Harp of God.
Nasho Idrizi na Spiro Vruho i bin lusim Amerika na ol i kam long Albenia long 1925 samting na ol i autim tok i tru bilong Baibel ol i bin kisim save long en long Amerika. Mi kirap i go long ol miting long Tirana wantaim liklik lain Sumatin Bilong Baibel. I no longtaim na mi save, mi painim pinis oganaisesen bilong Jehova. Olsem na long Ogas 4, 1930, mi kisim baptais long wanpela wara i stap klostu.
Bihain mi go bek long ples na mi mekim wok bilong mi long wokim ol su. Tasol bikpela samting moa, em mi kirap autim ol tok i tru bilong Baibel mi bin kisim save long en. Mi save tokim ol man: “Krais Jisas i no olsem ol dispela imis i stap insait long ol haus lotu. Em i stap laip!”
Mi Autim Tok, Maski Birua
Ahmed Bey Zogu i kamap bos bilong Albenia long 1925, na long 1928 em i makim em yet olsem King Zog Namba 1, na em i bosim kantri inap long 1939. Wanpela minista bilong em i givim tok orait long mipela i ken mekim wok Kristen bilong mipela. Tasol sampela hevi i painim mipela, long wanem, narapela minista bilong gavman, em Musa Juka, em i pren bilong pop long Rom. Juka i putim tok olsem i gat 3-pela lotu tasol em gavman i orait long en—em lotu Muslim na Otodoks na Katolik. Ol polis i wok strong long kisim ol buk bilong mipela na pasim wok bilong mipela long autim tok, tasol ol i no inap.
Long 1935 samting, planti taim mi bin i go long Berat, em wanpela bikpela taun long Albenia, na Mihal Sveci i stap long dispela hap na em i bosim wok bilong mipela long autim tok. Mipela i stretim rot bilong mekim ol bikpela raun bilong autim tok long planti hap bilong Albenia. Wanpela taim ol i salim mi i go long taun Skoda na mi stap inap tupela wik na mi tilim planti buk na nius. Long 1935 mi wantaim sampela moa i baim wanpela bas na i go autim tok long taun Kilkri. Bihain mipela i stretim rot bilong mekim bikpela raun moa long Albenia bilong autim tok long ol taun olsem Parmet, Leskovik, Erseki, Kosa, Pokradek, Elbasan. Raun bilong mipela i pinis long Tirana, stret long taim bilong mekim Memorial bilong tingim i dai bilong Krais.
Mipela i gat sampela kaikai bilong spirit i stap, na dispela i helpim mipela long i stap strong long spirit, olsem na mipela i no pilim olsem Jehova i lusim mipela, nogat. Kirap long 1930 i go inap 1939, mi kisim Wastaua long tok Grik long olgeta taim. Na mi makim taim bilong kaunim Baibel inap wanpela aua samting long olgeta de, na mi mekim olsem inap 60 yia, tasol bihain ai bilong mi i go nogut. Long nau tasol ol i wokim Baibel olgeta long tok ples Albenia, olsem na mi amamas tru long mi bin lainim tok Grik taim mi liklik yet. Sampela Witnes moa bilong Albenia long dispela taim bipo ol i bin lainim tok Grik bambai ol tu inap kaunim Baibel olgeta.
Long 1938, Argjiro i kisim baptais. I kam inap long 1939, 7-pela bilong ol 10-pela pikinini bilong mipela ol i kamap pinis. Tasol sori tru, 3-pela bilong ol i dai taim ol i yangpela yet.
Hevi Long Taim Bilong Namba Tu Pait
Long Epril 1939, klostu long taim Namba 2 Pait i kirap, ol ami bilong gavman Fasis bilong Itali ol i kam pait long Albenia. I no longtaim na ol i tambuim wok bilong ol Witnes Bilong Jehova, tasol liklik lain bilong mipela, inap olsem 50 manmeri bilong autim tok bilong Kingdom, ol i wok yet long autim tok. Long taim bilong Namba 2 Pait, ol polis i kisim olsem 15,000 buk na buklet bilong mipela na bagarapim olgeta.
Jani Komino i gat wanpela bikpela rum long haus bilong em bilong putim ol buk samting. Taim ol ami bilong Itali i save olsem ol i bin wokim ol dispela buk long Amerika, ol i kros. Ol i tok: “Yupela i save grisim ol man long bihainim gavman bilong Amerika! Tasol Amerika i birua long Itali!” Ol polis i holim tupela yangpela brata i save wok strong long autim tok, em Thomai na Vasili Cama, na taim ol i kisim save olsem ol buk tupela i tilim ol i kam long Komino, ol polis i holim em tu. I no longtaim na ol polis i kisim mi tu bilong sutim planti askim long mi.
Ol i askim mi, “Yu save long ol dispela man?”
Mi tok, “Mi save long ol.”
“Yu save wok wantaim ol?”
Mi tok, “Em nau. Mipela i Witnes Bilong Jehova. Mipela i no birua long ol gavman. Mipela i no insait long ol wok politik bilong dispela graun.”
“Yu bin tilim ol dispela buk samting long ol man?”
Taim mi tok yes, ol i pasim hankap long han bilong mi, na mi go kalabus long Julai 6, 1940. Long dispela haus kalabus mi bung wantaim 5-pela narapela wanples bilong mi, em Josef Kaci, Llukan Barko, Jani Komino, na dispela tupela brata, em Thomai na Vasili Cama. Taim mipela i stap long kalabus, mipela i bungim 3-pela narapela Witnes, em Gori Naçi na Nikodhim Shyti na Leonidas Pope. Mipela olgeta i pas pas insait long wanpela liklik rum tru, longpela bilong en, em 1.8 mita, na braitpela bilong en, em 3.7 mita!
Tripela de samting bihain, ol i pasim mipela wantaim long sen na kisim mipela i go long taun Parmet. Tripela mun bihain ol i kisim mipela i go long haus kalabus long Tirana na mipela i kalabus inap 8-pela mun moa na ol i no skelim mipela long kot.
Bihain mipela i kamap long kot bilong ami. Kot i makim mi wantaim Brata Shyti long kalabus inap 27 mun, na Brata Komino i kisim kalabus inap 24 mun, na ol narapela i kalabus inap 10-pela mun na bihain ol i lusim kalabus. Ol i salim mipela i go long haus kalabus long taun Girakasta, na Brata Gole Flloko i helpim mipela na ol i larim mipela i lusim kalabus long 1943. Bihain mi wantaim famili bilong mi i go sindaun long taun Parmet, na mi kamap wasman bilong liklik kongrigesen i stap long dispela taun.
Tasol maski ol i tambuim wok bilong mipela na Namba 2 Pait i stap long ol kantri klostu long mipela, mipela i wok yet long mekim wok bilong mipela long autim tok bilong Kingdom. (Matyu 24:14) Long 1944 inap 15 Witnes ol i stap long kalabus. Tasol long dispela taim bilong bikpela hevi, mipela i no pilim olsem Jehova i bin lusim mipela.
Traim i Painim Mipela
Pait i pinis long 1945, tasol ol hevi bilong mipela i stap yet na i go bikpela moa. Long taim bilong eleksen long Disemba 2, 1946, ol i putim lo olsem olgeta man i mas vot. Sapos man i no vot, ol i ting em i wanpela birua bilong gavman. Ol brata sista insait long kongrigesen bilong mipela ol i kirap na askim olsem, “Mipela i mas mekim wanem?”
Mi tokim ol: “Sapos yupela i bilip long Jehova, yupela no ken askim mi long ol samting yupela i mas mekim. Yupela i save pinis, lain bilong Jehova i no insait long ol samting bilong dispela graun. Ol i no bilong dispela graun.”—Jon 17:16.
Orait, de bilong eleksen i kamap, na ol lain bilong gavman i kam long haus bilong mipela. Ol i kirap na tok isi olsem: “Yumi dring kopi na toktok liklik. Nau em wanem de? Yu save?”
Mi tok: “Mi save. Nau em de bilong eleksen.”
Wanpela ofisa i tokim mi: “Yu mas hariap, nogut yu kamap bihaintaim.”
Mi tokim em: “Mi no ken i go. Mipela i vot long Jehova.”
Em i tok: “Orait, kam na vot long oposisen.”
Mi tokim em, ol Witnes Bilong Jehova i no save insait liklik long ol wok politik bilong dispela graun. Orait, taim planti man bilong gavman i save long dispela pasin bilong mipela, ol i strong moa long pasim mipela. Gavman i tok, mipela i no ken mekim moa ol miting bilong mipela. Olsem na mipela i kirap na mekim hait.
Mipela i Go Bek Long Ples
Long 1947 mi wantaim famili bilong mi i go bek long Mbrestan. Bihain liklik, long wanpela apinun long Disemba, em taim bilong bikpela kol tru, ol i singautim mi i go long ofis bilong Sigurimi (olsem lain polis i save wok hait). Ofisa i askim mi: “Yu save i gat wanem as na mi singautim yu i kam?”
Mi tokim em: “Mi ting olsem yu bin harim sampela tok ol i sutim long mi. Tasol Baibel i tok, ol manmeri bilong dispela graun bai i birua long mipela, olsem na mi no kirap nogut long ol i sutim tok long mi.”—Jon 15:18, 19.
Em i kros na tok: “Yu no ken kamapim tok bilong Baibel long mi. Bai mi paitim yu nogut tru.”
Ofisa wantaim lain bilong em ol i lusim ofis na i go, tasol ol i tok mi mas sanap ausait long bikpela kol. Bihain em i singautim mi i go bek long ofis bilong em na em i tok mi no ken mekim moa ol miting long haus bilong mi. Em i askim mi: “Hamas manmeri i stap long ples bilong yu?”
Mi tok: “Wan handet twenti.”
“Ol i bilong wanem lotu?”
“Lotu Otodoks bilong Albenia.”
“Na yu?”
“Mi wanpela Witnes Bilong Jehova.”
Em i tok: “Wan handet twenti man i bihainim wanpela rot tasol na yu bihainim narapela rot?” Orait nau em i tok mi mas laitim ol kandel long haus lotu. Taim mi tok mi no inap mekim olsem, em i kirap paitim mi nogut long wanpela bikpela stik. Bihain, olsem long wan klok moningtaim, em i larim mi i go.
Pasim Rot Bilong Kisim Buk Samting
Taim Namba 2 Pait i pinis, mipela i kirap long kisim gen ol Wastaua long rot bilong posofis, tasol bihain mipela i no kisim moa. Orait, wanpela taim long 10 klok long nait, ol lain polis i save wok hait ol i singautim mi i go long ofis bilong ol. Ol i tokim mi: “Wanpela nius long tok Grik i kamap, na mipela i laik bai yu tokim mipela gut long dispela nius, em i bilong mekim wanem.”
Mi tokim ol: “Mi no save tumas long tok Grik. Man i sindaun klostu long mi em i save gut. Ating em inap helpim yu.”
Tasol wanpela ofisa i tok: “Nogat. Mipela laik bai yu yet yu tokim mipela.” Taim em i tok olsem, em i kamautim sampela Wastaua long tok Grik.
Mi kirap nogut na mi tok: “Ol dispela nius i bilong mi! Mi inap tokim yupela long dispela nius. Mipela i save kisim long Bruklin, Nu Yok. Nambawan ofis bilong ol Witnes Bilong Jehova i stap long dispela hap. Mi wanpela Witnes Bilong Jehova. Tasol mi ting ol i bin popaia long raitim atres. Ol i mas salim ol dispela nius i kam long mi. Ol i no ken salim long yupela.”
Ol i no laik givim ol dispela nius long mi, na kirap long dispela taim na i kam inap long 1991—winim 40 yia—mipela i no kisim sampela buk na nius moa bilong Baibel. Insait long ol dispela yia, mipela i wok yet long autim tok, na mipela i mekim wok long Baibel tasol. Long 1949 i gat olsem 20 Witnes i stap long kalabus; sampela i bin kisim 5-pela yia long kalabus.
Ol Hevi i Go Bikpela
Long 1950 samting, gavman i tok ol man i mas karim sampela pepa i makim olsem ol i save helpim wok bilong ami. Tasol ol Witnes Bilong Jehova i no laik karim ol kain pepa olsem. Olsem na mi wantaim Brata Komino i go kalabus gen inap tupela mun.
Inap sampela yia gavman i larim sampela lotu i stap, na long dispela taim mipela i stap fri liklik long mekim wok bilong mipela. Tasol long 1967 gavman i tambuim olgeta lotu, na Albenia i kamap wanpela kantri i no bilip long God. Ol Witnes i wok strong yet long mekim miting bilong ol, tasol i hatwok tru. Mipela sampela i samapim wanpela poket insait long kolsiot bilong mipela bambai mipela i ken haitim wanpela liklik Baibel long en. Orait bihain mipela olgeta wantaim i go long hap bilong bus na kaunim.
Ol i holim sampela Witnes long Tirana, na ol i salim 3-pela i go kalabus inap 5-pela yia long ol banis kalabus i stap longwe. Olsem na bikpela hevi i painim famili bilong ol. Gavman i no tingting tumas long mipela ol Witnes bilong ol liklik ples nabaut, olsem na ol i no salim mipela i go kalabus long ol narapela hap. Tasol mipela i no laik helpim ami samting, olsem na ol i rausim nem bilong mipela long lista bilong ol man em gavman i orait long ol i ken kisim kaikai. Olsem na mipela i gat bikpela hevi tru long sindaun bilong mipela. Na tupela pikinini moa bilong mipela ol i dai. Tasol mipela i no pilim olsem Jehova i lusim mipela.
Long dispela taim long Albenia ol man i save pret pret. Ol polis i save hait na was long olgeta man, na ol i raitim ripot bilong olgeta man i save kamapim wanpela tingting i narapela kain long tingting bilong gavman. Olsem na mipela i tingting gut taim mipela i raitim ripot bilong ol wok bilong mipela. Tupela o 3-pela tasol inap bung bilong kisim strong long ol samting bilong spirit. Tasol mipela i no lusim wok bilong autim tok.
Lain polis bilong wok hait, ol i laik mekim na bai ol brata i longlong nabaut. Olsem na ol i kamapim wanpela tok win olsem wanpela Witnes bilong Tirana i gat nem em i helpim gavman na em i man bilong lukstil long wok bilong mipela. Dispela tok win i mekim na sampela i no strong moa, na dispela i laik bagarapim pasin wanbel bilong mipela. Mipela i no gat ol nupela nius samting bilong Baibel, na oganaisesen bilong Jehova i no inap salim tok long mipela, olsem na wan wan brata ol i pret na surik.
Na tu, ol lain bilong gavman i kamapim tok win olsem Spiro Vruho, em wanpela elda Kristen long Albenia i gat gutpela nem tru, em i bin kilim i dai skin bilong em yet. Ol i tok, “Em nau, Vruho tu i les na lusim dispela wok.” Tasol bihain mipela i kisim save olsem ol i bin kilim i dai Brata Vruho.
Long 1975, mi wantaim Argjiro i go i stap wantaim pikinini man bilong mipela long Tirana inap sampela mun. Long taim bilong eleksen, ol bikman bilong taun i strong long mipela i mas vot, na ol i tok: “Sapos yupela i no vot, bai mipela i rausim pikinini bilong yupela long wok bilong em.”
Mi tokim ol: “Pikinini bilong mi i bin holim dispela wok inap 25 yia pinis. Yupela i gat stori bilong em wantaim famili bilong em long buk bilong yupela. Mi no bin vot inap 40 yia pinis. Sapos stori bilong em i no stap, orait yupela i no bin mekim stret wok bilong yupela long raitim stori bilong ol man bilong dispela ples. Na sapos stori bilong em i stap long yupela, orait yupela i no bin i stap gut long gavman bilong yupela, long wanem, yupela i bin larim em i holim dispela wok inap planti yia pinis.” Taim ol i harim dispela tok, ol i tok sapos mipela i go bek long Mbrestan, ol bai mekim dai dispela tok.
Ol Bikpela Senis i Kamap
Long 1983 mipela i lusim Mbrestan na mipela i go sindaun long Lak. Bihain liklik, long 1985, gavman dikteta i dai. Em i bin kirap bosim kantri taim ol i bin wokim lo bilong vot long taim bilong eleksen long 1946. Bihain ol i rausim piksa bilong em ol i bin wokim long ston na i bin sanap long ples bung bilong ol man long Tirana, na ol i rausim piksa bilong Stalin tu.
Insait long ol dispela yia ol i bin tambuim wok bilong mipela, ol i mekim nogut tru long planti Witnes, na ol i kilim i dai sampela. Wanpela man i bin bungim sampela Witnes long rot na em i tokim ol: “Long taim bilong ol Komyunis, mipela olgeta i lusim God. Ol Witnes Bilong Jehova tasol i stap gut long em, maski ol i kisim bikpela hevi tru.”
Ol i rausim sampela tambu moa, na long Jun 1991 i gat 9-pela i putim ripot bilong wok autim tok. Long Jun 1992, em wanpela mun bihain long taim ol i rausim tambu olgeta, i gat 56 ol i autim tok. Sampela mun paslain long en, mipela i amamas tru long 325 manmeri ol i kam bung long Memorial bilong tingim i dai bilong Krais. Bihain long dispela taim, lain bilong autim tok i wok long i go bikpela na ol i winim 600, na long Memorial i bin kamap long Epril 14, 1995, i gat 3,491 ol i bung! Nau long dispela taim, mi amamas tru long lukim planti yangpela ol i kam long ol kongrigesen bilong mipela.
Argjiro i bin stap gut long Jehova na long mi tu insait long ol dispela planti yia. Taim mi stap kalabus, na taim mi raun bilong mekim wok autim tok, em i bin lukautim gut famili bilong mipela na em i no les o toktok planti long dispela. Wanpela pikinini man bilong mipela wantaim meri bilong em ol i bin kisim baptais long 1993. Mitupela i amamas tru long dispela samting.
Mi Givim Bel Long Kingdom Tasol
Mi amamas long lukim pasin wanbel tru i stap insait long oganaisesen bilong Jehova long Albenia na ol i stap gutpela tru long ol samting bilong spirit. Mi olsem lapun Simeon long Jerusalem, klostu long taim em i dai Jehova i larim em i lukim dispela Mesaia ol i bin wet longtaim tru long em. (Luk 2:30, 31) Nau, taim ol i askim mi, wanem kain gavman mi laikim, mi save tok: “Mi no tingim gavman Komyunis i win o gavman kapitalis i win. Maski graun i bilong ol man yet o bilong gavman, dispela i no bikpela samting. Ol gavman i save wokim ol rot, na bringim paua i kam long ol liklik ples nabaut, na ol i save putim ol lo samting na bai ol man i sindaun gut wantaim. Tasol gavman bilong Jehova, em Kingdom bilong em long heven, dispela tasol inap stretim ol bikpela hevi tru i stap long Albenia na long ol narapela hap bilong graun.”
Dispela wok ol wokman bilong God i mekim long olgeta hap bilong graun long autim tok bilong Kingdom bilong God, em i no wok bilong wanpela man, nogat. Em i wok bilong God. Mipela i wokboi tasol bilong em. Tru, planti hevi i bin painim mipela long Albenia, na inap planti yia tru oganaisesen bilong Jehova i no inap salim tok o ol buk samting long mipela, tasol Jehova i no bin lusim mipela. Oltaim spirit bilong em i stap wantaim mipela. Em i bin soim rot long mipela long olgeta taim. Kirap long bipo yet na i kam inap long nau, mi bin lukim dispela samting.