God i Bin Kisim Bek Yu?

JOHNNY i gat 10-pela krismas taim wanpela man i bungim em long so na i askim em: “Yangpela, yu kisim Krais Jisas olsem Bikpela bilong yu na Man bilong kisim bek yu?” Dispela askim i narapela kain long yau bilong Johnny, long wanem, long olgeta taim em i bin bilip long Jisas. Olsem na em i bekim tok long man olsem: “Mi kisim em pinis.” Man ya i singaut bikmaus na i tok, “Litimapim nem bilong Bikpela!” Na em i tok: “Em wanpela man moa God i kisim bek pinis bilong Krais!”

Tasol olsem wanem? Em dispela samting tasol yumi mas mekim na bai God i ken kisim bek yumi? Taim Johnny i mekim dispela tok, yu ting kirap long dispela taim stret God i kisim em bek pinis, maski em bai mekim wanem kain pasin bihain? Planti man i gat gutpela bel ol bai tok yes. Sampela liklik nius bilong ol misin i tok long raitim de God i bin “kisim bek” yu na bai yu no ken lusim tingting long en.

Wanpela pasto i tok, “taim man i kirap tasol na bilip long Krais . . . long dispela taim stret God i makim pinis samting bai painim em bihain.” Pasto i tok, Baibel i tok olsem: God i save kisim bek yumi long namba wan taim yumi mekim wanpela “pasin bilong bilip, na i no long taim yumi wok long holim bilip.” Na man bilong raitim tok bilong lotu em i tok: “Dispela namba wan taim yu bin bilip, em inap pinis. God i kisim bek yu pinis . . . ‘Pait bilong yu i pinis.’ ‘Sin bilong yu i tekewe pinis.’ ” Tasol sampela man, maski ol i bilip strong olsem dispela tok i tru, ating ol bai pilim olsem wanpela samting long en i no stret tumas. Yumi save pinis, planti man ol pasto samting i bin tokim ol olsem God i kisim bek ol pinis, ol i no save bihainim ol pasin em Baibel i tok ol i mas bihainim. Tasol planti ol i save tok, ating ol dispela man i no bin “kisim” tru Krais.

Olsem na man i mas mekim wanem samting tru bilong “kisim” Jisas? Em i mas mekim wanpela pasin bilong bilip na em tasol? O em i mas bihainim dispela pasin bilong bilip long olgeta taim bihain? Bilip bilong yumi i mas i gat strong inap long kirapim yumi long mekim ol wok i kamapim dispela bilip? Yumi inap kisim ol gutpela samting long ofa bilong Krais sapos yumi no laik kisim wok bilong bihainim em olsem disaipel bilong em?

Planti man ol i laik kisim ol blesing, tasol ol i no laik kisim wok bilong i stap disaipel bilong Jisas na bihainim tok bilong em. Na planti ol i no laikim dispela tok olsem “bihainim tok.” Tasol Jisas i bin tok: “Yu kam bihainim mi.” (Luk 18:​18-​23) Na Baibel i tok: “Ol man i no laik save long God na i no bihainim gutnius bilong Jisas, . . . ol dispela man bai i kisim pe nogut olsem. Ol bai i . . . bagarap i stap oltaim oltaim.”​—⁠2 Tesalonaika 1:​8, 9; Matyu 10:38; 16:⁠24.

Planti tok Baibel i mekim i narapela kain long tok bilong sampela lotu long God i kisim bek yumi. Sapos yu laik save gut long tok bilong Baibel long dispela samting, bai yu amamas long kaunim stori i kamap bihain long dispela. Opim Baibel bilong yu, na kaunim ol skripsa ol i kamapim insait long dispela stori, na bai yu ken save Jisas na ol disaipel bilong em i bin skulim ol man olsem wanem long dispela bikpela samting.