Yu Tingim Yet?

Olsem wanem? Yu pilim ol tok bilong ol nupela Wastaua i bin helpim gut yu? Sapos olsem, orait yu ken traim ol save yu bin kisim long en, yu tingim yet o nogat:

◻ Ol Amon i pundaun na dispela inap skulim yumi long wanem samting? (Sefanaia 2:​9, 10)

Jehova i no ting em i samting nating sapos ol lain i mekim pasin birua long em, olsem bekim bilong gutpela pasin em i bin mekim long ol. Na long wanpela taim em i makim pinis, em bai kirap na mekim save long ol, olsem em i bin mekim long bipo. (Skelim wantaim Song 2:​6-12.)​—⁠12/15, pes 10.

◻ Ol Kristen i stap bel isi long wanem samting?

Namba wan, em “Jisas Krais i mekim [ol] i kamap wanbel wantaim God.” (Rom 5:⁠1) Namba 2, em ol i stap bel isi wantaim ol narapela long lain bilong ol, long wanem, ol i wok long kisim “gutpela tingting na save i kam long God,” em “ol i save bihainim klinpela tingting. Na . . . ol i save stap wanbel wantaim ol arapela.” (Jems 3:17)​—⁠1/1, pes 11.

◻ Wanem sampela samting Baibel i tok piksa long Tok Bilong God, na olsem wanem dispela i helpim yumi?

Baibel i tok piksa long Tok Bilong God i olsem gutpela susu, na strongpela kaikai, na gutpela klinpela wara, na wanpela glas, na bainat i sap. Sapos wokman bilong God i save gut long insait bilong ol dispela tok piksa, dispela bai helpim em na em bai save gut long mekim wok long Baibel.​—⁠1/1, pes 29.

◻ Gutpela skul inap helpim yumi long mekim wanem?

Bai yumi inap kaunim gut ol tok, raitim klia ol tok, kisim gutpela tingting na pasin, kisim save long mekim ol wok bilong helpim sindaun bilong yumi long olgeta wan wan de, na mekim gutpela wok bilong God.​—⁠2/1, pes 10.

◻ Jisas i lainim yumi long wanem bikpela samting bilong skul?

Skul yumi kisim, em yumi mas mekim wok long en bilong litimapim nem bilong nambawan bikpela Tisa, God Jehova, na i no bilong litimapim nem bilong yumi yet. (Jon 7:18)​—⁠2/1, pes 10.

◻ Kingdom bilong God em wanem samting?

Kingdom em i wanpela gavman God yet i kamapim long heven bilong kamapim laik bilong em long pinisim ol hevi em sin na dai i kamapim long ol man, na kamapim bek stretpela pasin long graun. (Daniel 2:44; KTH 11:15; 12:10)​—⁠2/1, pes 16.

◻ Baibel i skulim ol man olsem wanem, na pait bai pinis olgeta?

Long rot bilong Baibel Jehova i skulim ol man long laikim pasin bilong i stap isi na laikim stretpela pasin. (Aisaia 48:​17, 18) Tok Bilong God i gat strong na em inap go insait tru long bel bilong man na senisim tingting na pasin bilong em. (Hibru 4:12)​—⁠2/15, pes 6.

◻ Olsem wanem yumi ken tok, tok profet bilong Aisaia sapta 35 i gat 3-pela truim bilong en?

Namba wan truim bilong tok profet bilong Aisaia em long taim ol Juda i kam bek long kalabus long Babilon long yia 537 paslain long Krais. Na long nau i gat truim bilong en long ol samting bilong spirit, kirap long taim ol Israel bilong spirit i bin lusim kalabus bilong Bikpela Babilon. Na em bai gat namba 3 truim bilong en. Baibel i tok promis long bihain graun bai kamap gen olsem wanpela paradais tru. (Song 37:​10, 11; KTH 21:​4, 5)​—⁠2/15, pes 17.

◻ God i save tingim olgeta wan wan man, olsem wanem dispela i kamap klia long ol mirakel Pikinini bilong em, Jisas, i bin wokim?

Jisas “i no inap mekim wanpela samting long tingting bilong em yet. Nogat. Em i mekim tasol ol samting em i lukim Papa i mekim.” Olsem na sori bilong Jisas i kamapim klia tru pasin bilong Jehova long tingim olgeta wan wan wokman bilong em. (Jon 5:19)​—⁠3/1, pes 5.

◻ Long Jon 5:​28, 29 Jisas i toktok long “matmat,” wanem insait bilong dispela tok?

Dispela tok Grik mne·mei’on (olsem matmat bilong ol man God i save tingim ol) i makim olsem God i tingim olgeta pasin samting bilong man i dai pinis; olgeta liklik liklik pasin em i bin kisim long papamama, na olgeta tingting bilong em tu. Dispela i kamapim klia olsem God i tingim ol wan wan man!​—⁠3/1, pes 6.

◻ Wanem toksave long tok profet bilong Sefanaia i helpim yumi long nau?

Nau em i no taim bilong kisim tupela bel olsem man i no bilip tru, na long tingting o bel yumi no ken ting olsem De bilong Jehova i stap longwe yet. Na yumi mas was gut, planti man i save les long harim tok bilong God, nogut dispela i mekim yumi bel hevi na yumi lusim strong. (Sefanaia 1:​12, 13; 3:⁠8)​—⁠3/1, pes 17.

◻ Bilong wanem i hatwok long i stap gut long God?

Long wanem, dispela pasin i pait wantaim pasin yumi bin kisim long papamama, olsem yumi save tingim ol laik bilong yumi yet tasol. (Stat 8:21; Rom 7:19) Na bikpela samting moa, Satan wantaim ol spirit nogut, ol i strong long daunim yumi na bai yumi no stap gut long God. (Efesus 6:12; 1 Pita 5:⁠8)​—⁠3/15, pes 10.

◻ Yumi mas i stap gut long God na long ol narapela long wanem 4-pela samting? Na wanem samting bai helpim yumi long mekim olsem?

Olsem: Yumi mas i stap gut long Jehova, na long oganaisesen bilong em, na long kongrigesen, na long poroman marit bilong yumi. Na wanpela samting bai helpim yumi long mekim olsem em yumi mas save, sapos yumi stap gut long God bai yumi insait long wok bilong kamapim klia olsem i stret Jehova i stap King bilong heven na graun.​—⁠3/15, pes 20.

◻ Samting i painim Devit taim em i laik bringim bokis kontrak i go bek long Jerusalem i ken lainim yumi long wanem samting? (2 Samuel 6:​2-7)

Devit i bin sakim ol lo Jehova i givim bilong karim Bokis, na samting nogut i kamap. Dispela i mas lainim yumi olsem: Taim yumi sakim ol lo bilong Jehova na hevi i kamap, yumi no ken tok em asua bilong Jehova. (Sindaun 19:⁠3)​—⁠4/1, pes 28, 29.