Bel Isi Tru—I Hatwok Long Painim
ARNOLD em i wanpela liklik pikinini na em i save laikim tumas wanpela samting bilong em bilong pilai, i olsem wanpela taiga. Maski em i go we—long pilai, o long kaikai, o long bet bilong em—em i save pulim dispela samting i go wantaim em. Taim em i holim dispela taiga, dispela i mekim gut bel bilong em na em i stap bel isi. Tasol wanpela taim hevi i kamap. Taiga i lus!
Arnold i krai krai na mama, papa, na 3-pela bikbrata bilong em ol i wok long painim taiga insait long bikpela haus bilong ol. Ol i mekim mekim na bihain ol i painim insait long wanpela kabot. Ating Arnold i bin putim taiga insait long en na wantu em i lusim tingting long ples em i bin putim. Ol i bekim taiga long Arnold na em i klinim aiwara bilong em. Em i amamas na i stap bel isi gen.
I gutpela tru sapos yumi inap stretim hariap olgeta hevi olsem dispela hevi bilong Arnold—ol i painim pinis taiga insait long kabot na hevi bilong em i pinis! Tasol hevi bilong planti man i bikpela tru na i hatwok long ol i stretim na i stap bel isi. Long olgeta hap ol man i tingting, ‘Wanpela raskol bai bagarapim mi o nogat? Bos bai rausim mi long wok? Kaikai bai inap long famili bilong mi? Ol man bai bel nogut long lotu bilong mi o kantri bilong mi na ol bai abrusim mi?’
Planti man moa yet ol i no stap bel isi. Wanpela ripot bilong Yunaitet Nesen i tok, klostu 3 bilion manmeri i no inap go long dokta o klinik samting bilong oraitim ol sik bilong ol, na ol i no gat rot bilong kisim marasin tu. Winim wan bilion ol i stap rabis nogut tru. Klostu wan bilion ol inap wok, tasol wok i sot na ol i mas kisim ol liklik wok nating tasol. Na ol lain ranaweman, olsem refyuji, i go bikpela tru. I kam inap long pinis bilong 1994, wanpela long olgeta 115 manmeri long graun ol i mas ranawe lusim ples bilong ol. Na bikpela wok bisnis bilong ol drak nogut, em ol i save kisim olsem 500 bilion dola long en long olgeta yia, dispela i bagarapim tru sindaun bilong planti milion man, na em i save kirapim planti long mekim pasin raskol olsem stil na bagarapim man. Ol bikpela pait tu i save bagarapim tru sindaun bilong planti milion man. Long 1993, i gat 42 kantri ol i insait long ol bikpela pait, na long 37 narapela kantri ol i mekim ol pait bilong daunim gavman samting.
Pait, pasin bilong i stap rabis, pasin raskol, na ol narapela samting i save bagarapim bel isi bilong ol man, ol dispela kain pasin i wok long go bikpela moa. Yumi no inap stretim kwik ol dispela hevi olsem dispela pikinini i bin painim taiga bilong em insait long kabot. Na i no gat wanpela man bilong graun bai stretim ol dispela hevi, nogat tru.
Baibel i toksave olsem: “Ol king na ol man bilong graun i no inap kisim bek yu. Olsem na nogut yu bilip long ol.” Orait, yumi ken bilip long husat? Baibel i tok moa olsem: “Sapos wanpela man i bilip long God bilong Jekop bai em i helpim em, na sapos dispela man i pas wantaim God, Bikpela bilong em, orait em i ken amamas. God i bin mekim kamap heven na graun na solwara na olgeta samting i stap long en. Na oltaim God i save bihainim olgeta promis bilong em.”—Song 146:3-6.
I gat wanem as na yumi inap bilip olsem Jehova bai kamapim bel isi long dispela graun? Inap yumi ken i stap bel isi na amamas long nau? God bai mekim wanem bilong rausim ol samting i pasim rot bilong ol man long i stap bel isi?