Ripot Long Wok Bilong Kingdom

“Olgeta Lo Bilong Yu i Tru Tasol”

KLOSTU long taim em i laik i dai, Moses i kirapim ol Israel long bihainim olgeta wan wan lo bilong Jehova. Em i tok: “Yupela i mas lukaut gut na bihainim olgeta dispela lo nau mi givim yupela. Na yupela i mas toksave long ol pikinini bilong yupela, olsem bai ol tu i ken bihainim olgeta tok bilong God oltaim. Dispela tok bilong God i no toktok nating. Nogat. Em i as tru bilong yupela i ken i stap gut.”​—Lo 32:46, 47.

Sampela handet yia bihain, man bilong raitim Song i kamapim klia, olgeta tok God i skulim yumi long en i bikpela samting. Em i tok: “Bikpela, yu stap klostu long mi, na olgeta lo bilong yu i tru tasol.” (Song 119:151) Long taim bilong ol aposel, Jisas yet i bin tokaut long gutpela samting i bin kamap taim man i bihainim “olgeta tok bilong God.” (Matyu 4:4) Na God i givim tingting long aposel Pol na em i raitim olsem “Spirit bilong God yet i bin kamapim olgeta tok i stap long buk bilong God. Na dispela tok em i gutpela samting tru.”​—2 Timoti 3:​16.

Tru tumas, God Jehova i laik ol man i save lotu long em ol i mas tingim na skelim gut tru olgeta tok i stap long Baibel. Olgeta hap bilong Baibel i gat strong. Ol Witnes Bilong Jehova i gat dispela kain tingting long Tok Bilong God, na dispela ekspiriens long Marisas i stap daunbilo i kamapim tingting bilong ol long dispela samting.

Mista D​—— i stap long wanpela ples i longwe long taun na em i wok olsem wanpela wasman long nait. Inap longtaim pinis em i wok long painim stretpela pasin bilong lotuim God. Long nait taim em i wok long was i stap, em i kirap long kaunim Baibel. I no longtaim na em i kaunim Baibel olgeta. Na em i lain olsem nem bilong God em Jehova​—⁠em dispela nem i kamap planti taim long Baibel Hindi bilong em. Em i kisim save olsem Buk Kamapim Tok Hait em i gutpela tru.

Bihain em i laik save, i gat wanpela lotu i save bihainim olgeta tok bilong Baibel o nogat? Em i luksave olsem ol lotu em i save long en, ol i save bihainim tasol sampela tok bilong Baibel. Sampela lotu i bihainim tok bilong Ol Skripsa Hibru na ol i sakim Ol Skripsa Grik. Sampela narapela lotu ol i no mekim wok long Ol Skripsa Hibru, ol i litimapim ol tok bilong Ol Skripsa Grik tasol.

Wanpela taim Mista D​—— i lukim ren i wasim tupela marit, olsem na em i singautim ol i kam long haus bilong em bilong hait long ren. Ol i Witnes Bilong Jehova. Meri bilong Witnes i holim buk Kamapim Tok Hait​—⁠Bikpela Samting Bilong En i Laik Kamap!a Hariap tru Mista D​—— i askim ol long dispela buk. Tasol tupela Witnes i pilim olsem dispela buk i gat ol strongpela tok profet bilong Buk Kamapim Tok Hait long en na i hatwok tumas long em, olsem na ol i laik tilim narapela buk long em. Tasol Mista D​—— i strong long kisim buk Kamapim Tok Hait!

Taim em i kisim dispela buk, kwiktaim tru em i kaunim buk. Na bihain em i orait long stadi long Baibel wantaim ol Witnes Bilong Jehova. I no longtaim na em i save olsem ol Witnes Bilong Jehova i save tingim tru olgeta hap bilong Baibel. Em i kirap long i go oltaim long ol miting long Haus Kingdom bilong ol Witnes Bilong Jehova, em ples ol i save stadi gut tru long Ol Skripsa Hibru na Ol Skripsa Grik. Nau em i wanpela man bilong autim tok bilong Kingdom na em i wanpela brata i baptais pinis insait long kongrigesen Kristen.

[Futnot]