Askim

Yu ting i gutpela sapos Kristen i go lukim dokta i gat wok bilong stretim sik bilong tingting?

Sampela kantri i ripot olsem, nau long dispela “taim bilong las de,” i gat planti man i gat sik long tingting. (2 Timoti 3:⁠1) Ol Kristen i save bel sori long ol wanbilip i gat kain sik olsem, tasol ol i save, olgeta wan wan yet i mas tingim olsem ol bai go lukim dokta o nogat, na sapos olsem, ol bai kisim wanem kain helpim bilong stretim sik bilong ol.a “Olgeta man wan wan bai i karim hevi bilong pasin ol yet i mekim.” (Galesia 6:⁠5) Sampela man i gat bikpela sik bilong tingting ol i kolim skitsofrenia, sik longlong, sik bilong bel hevi, sik bilong mekim wanpela samting olgeta taim, katim hap skin bilong ol yet, na sampela narapela sik i save givim bikpela hevi long ol, tasol sampela bilong ol dispela man i bin kisim helpim long dokta i gat save long stretim ol dispela kain sik, na nau ol i stap gutpela liklik.

Long sampela hap, planti man i save go lukim dokta i gat wok bilong stretim tingting. Planti man olsem, ol i no gat bikpela sik long tingting, tasol ol i hatwok long karim wanpela hevi i bin painim ol. Tasol Baibel yet em i nambawan samting tru bilong helpim ol man long mekim ol samting bilong stretim ol bikpela hevi bilong ol. (Song 119:​28, 143) Long rot bilong Baibel, Jehova i save givim gutpela tingting na save long yumi, na pasin bilong wokim gut tingting, na stretpela save​—⁠ol dispela samting i bilong strongim bel na tingting bilong yumi. (Sindaun 2:​1-​11; Hibru 13:⁠6) Sampela taim bel bilong ol gutpela wokboi bilong Jehova i bagarap na ol i mekim planti toktok nabaut. (Jop 6:​2, 3) Jems 5:​13-​16 i kirapim kain man olsem long singautim ol elda i kam helpim em na givim gutpela tok long em. Ating Kristen em i sik long spirit, o em i bel hevi long wanpela samting em i no inap senisim, o i gat sampela samting i daunim em, o em i pilim olsem narapela i bin mekim nogut long em. (Saveman 7:7; Aisaia 32:2; 2 Korin 12:​7-​10) Ol elda inap helpim kain man olsem; ol bai “putim wel long bodi bilong em”​—⁠olsem ol bai givim sampela gutpela tok bilong Baibel long em​—⁠na tu ol bai “prea long God i ken mekim em i kamap orait gen.” Na wanem samting bai kamap? “Sapos ol i bilip long God na ol i prea, orait Bikpela bai i mekim orait dispela sikman na kirapim em gen” [na bai em i no bel hevi moa o pilim olsem God i bin lusim em].”

Tasol olsem wanem sapos bel bilong man i bagarap yet, maski ol wasman bilong kongrigesen i bin helpim gut em? Sampela i bin tingting long go lukim dokta bambai em i ken glasim gut skin bilong ol. (Skelim wantaim Sindaun 14:30; 16:24; 1 Korin 12:26.) Sapos man i gat wanpela sik bilong skin, ating dispela inap mekim na bel na tingting bilong em i bagarap. Taim dokta i stretim sik bilong skin, sampela taim dispela i save helpim man i gat sik long tingting.b Sapos dokta i no painim wanpela sik bilong skin, orait sapos yu askim em, ating em bai tokim yu long wanpela dokta bilong stretim tingting yu ken go lukim. Orait, nau bai yu mekim wanem? Olsem mipela i tok pinis, em samting yu yet i mas skelim na tingim. Ol narapela i no gat wok long sutim tok long yu o skelim samting yu tingting pinis long mekim.​—⁠Rom 14:⁠4.

Tasol maski yu mekim wanem, yu mas bihainim gutpela save na tingting, na yu mas was gut​—⁠nogut yu lusim tingting long ol lo bilong Baibel bilong stiaim tingting. (Sindaun 3:​21; Saveman 12:13) Sapos man i gat sik bilong skin, i gat kain kain samting ol i save mekim bilong stretim sik​—⁠i gat marasin ol dokta i save mekim wok long en, na i gat kain kain ol narapela samting tu, olsem naturopati, akapanksa, na homiopati. Na tu, i gat kain kain dokta bilong stretim sik bilong tingting. Sampela kain dokta olsem ol i laik save long ol samting bipo i bin painim sikman na bai ol inap save long as na man i gat sik long tingting o bel bilong em i bagarap. Na sampela i laik helpim sikman long lain long bihainim sampela nupela pasin. Na sampela i bilip olsem ol marasin tasol em i rot bilong stretim planti kain sik bilong tingting.c Na sampela narapela ol i save tokim sikman long kisim sampela kain kaikai na vaitamin.

Taim sikman wantaim famili bilong em ol i tingim ol dispela helpim, ol i mas was gut. (Sindaun 14:15) Profesa Paul McHugh, em bos bilong dipatmen bilong ol sik bilong tingting long Yunivesiti Jons Hopkins, em i tok, wok bilong stretim sik bilong tingting, ‘em samting mipela i no gat planti save long en. I hatwok tru long skelim olsem man i gat wanem kain sik na wanem samting i gutpela bilong stretim dispela sik​—⁠tingting na pasin bilong man em i bikpela samting na i hatwok tru long save long as bilong en.’ Dispela samting i opim rot na ol man i kamapim ol samting i narapela kain, na ol samting i giaman na pulim mani, na ol samting i olsem gutpela helpim, tasol i mekim nogut long ol sikman​—⁠i no helpim ol.

Na mipela laik toksave tu olsem: Tru, ol dokta i gat wok long stretim tingting ol i bin winim skul na ol i gat save inap tru long mekim dispela wok, tasol planti narapela ol i no bin go long skul na kisim save, na taim ol i mekim wok, i no gat wanpela man i bosim wok ol i mekim. Sampela man i bin tromoi planti mani long go lukim kain man olsem i no gat save bilong mekim dispela wok.

Tasol maski dokta bilong stretim tingting i bin winim skul na em i gat save inap tru long mekim dispela wok, i gat sampela samting yumi mas tingim. Taim yumi tingim wanem dokta o dokta bilong katim skin bai yumi go lukim, yumi mas save em bai daun long tingting bilong yumi em Baibel i as bilong en o nogat. Na olsem tasol, sapos dokta bilong stretim tingting em i no daun long tingting bilong yumi long ol samting bilong lotu na stretpela pasin bilong marit samting, orait, nogut yumi go lukim em. Planti Kristen maski ol i gat sik bilong tingting na bel bilong ol i bagarap, ol i save wok strong bambai ol i ken “bihainim tru [tingting] bilong Krais Jisas.” (Rom 15:⁠5) I stret ol i laik save long tingting bilong ol dokta o ol narapela man em ol inap bagarapim tingting o pasin bilong ol. Sampela dokta i laik sakim ol lo bilong Baibel i pasim ol long mekim sampela wok bilong ol​—⁠ol i ting kain lo olsem i no gat wok long en, o em inap bagarapim tingting bilong sikman. Ating ol i orait long sampela pasin em Baibel i tambuim, olsem pasin bilong sodom o pasin bilong bagarapim marit, na sampela i save tokim ol sikman, gutpela sapos ol i mekim ol dispela pasin.

Ol dispela tingting i insait long ol kain tok em aposel Pol i tok, ‘ol man i ting em i gutpela save,’ tasol “i pait long tingting bilong God.” (1 Timoti 6:​20) Ol dispela tok i pait long ol tok i tru bilong Krais na i insait long “olkain giaman save na toktok nating” bilong dispela graun. (Kolosi 2:⁠8) Baibel i tok klia olsem: “Maski yu gat gutpela tingting na gutpela save na yu save long gutpela pasin bilong mekim ol samting, dispela i no inap helpim yu liklik, sapos yu birua long Bikpela.” (Sindaun 21:30) Ol dokta bilong stretim sik bilong tingting ol i “poroman” nogut sapos ol i tok “pasin nogut em i gutpela na gutpela pasin em i nogut.” Bai ol i “bagarapim gutpela pasin” bilong man​—⁠ol i no inap stretim sik bilong tingting.​—⁠Aisaia 5:​20; 1 Korin 15:⁠33.

Olsem na sapos Kristen i pilim olsem em i mas go lukim dokta bilong stretim sik bilong tingting, gutpela sapos Kristen i skelim gut ol dispela samting: dokta inap tru long mekim wok bilong em o nogat, na em i gat gutpela nem long mekim wok dokta o nogat, na tingting bilong em, na marasin samting dokta i laik givim long em​—⁠nogut marasin i givim ol narapela sik long em. Kristen i gat bikpela bel hevi, sapos em yet i no inap skelim ol dispela samting, ating wanpela wanblut o wanpela gutpela pren i gat save em i ken helpim em. Sapos Kristen i no klia gut long wanem kain helpim i gutpela, em i ken askim ol elda long kongrigesen na ating bai ol inap helpim em. Tasol wanem kain helpim Kristen i kisim, em samting bilong em yet (o bilong papamama bilong em o bilong man na meri marit wantaim long tingim).d

Saiens inap mekim planti samting bilong helpim ol sikman, winim olgeta taim bipo. Tasol i gat planti sik​—⁠bilong skin na bilong tingting​—⁠ol i no inap stretim long nau na ol man i mas karim tasol i go inap long pinis bilong dispela taim nau. (Jems 5:​11) Tasol insait long dispela taim yumi stap long en, “wokboi i gat gutpela tingting,” na ol elda, na ol narapela insait long kongrigesen, ol i save bel sori long ol sikman na helpim ol. Na Jehova yet i save strongim ol man long karim ol hevi i go inap long gutpela taim yumi wetim i kamap na i no gat sik moa.​—⁠Matyu 24:45; Song 41:​1-3; Aisaia 33:⁠24.

[Ol Futnot]