Husat Ol i Autim Tru Tok Bilong Bel Isi?
LONG Me 31, 1996, ol nius na televisen samting i tokaut long wanpela tok i olsem tok bilong bel isi. Long de paslain long dispela, ol i tokaut long wanpela tok bilong gavman olsem Benjamin Netanyahu, em man i laik kamap praim-minista bilong Israel, em i “givim bel tru long wok bilong toktok yet long rot bilong kamapim bel isi, em bel isi wantaim gutpela sindaun, namel long kantri Israel na olgeta narapela lain klostu—ol Palestain tu.”
Taim Netanyahu i winim eleksen—em bikpela tok bilong en i kamap long ol nius samting—planti man i ting nau i olsem ol bai kamapim tru bel isi long hap bilong Midel-Is. Sapos olsem, inap ol narapela kantri i ken bihainim pasin bilong Israel na lusim tingting long kros i stap namel long ol o olsem wanem?
Tru, i no hatwok long tok promis long kamapim bel isi, tasol i hatwok long kamapim tru. Planti man i save long dispela samting, olsem na ol i no bilip tumas long dispela tok promis. Wanpela niusman, em Hemi Shalev, em i tok, “wanpela hap lain long Israel i pilim olsem bel isi i laik kamap nau, tasol narapela hap lain i bilip olsem Israel i no gat rot tru long lusim ol bikpela hevi na bikpela pen i wok long kamap insait long en.” Na dispela niusman i tok: “Sampela i amamas; sampela i krai.”
Em nau, kain samting olsem i save kamap taim ol man i laik kamapim bel isi. Wanpela lain politik i win, na narapela lain politik i lus. Taim ol man i lukim olsem gutpela samting i no kamap, ol i bel hevi, na dispela i mekim na planti taim pait i save kamap. Long olgeta hap—long Midel-Is, Latin-Amerika, Isten Yurop, o we we—wok bilong ol man long kamapim bel isi i lus nating.
Bel Isi Tru Klostu Bai Kamap!
Taim ol i wok long mekim bikpela toktok tru long bel isi bai kamap long Midel-Is, i gat narapela tok bilong bel isi i kamap. Tasol dispela em i no tok bilong wanpela lain politik em ol nius na televisen samting i wok long kamapim, nogat; na em i no wanpela tok ol kantri i pasim bilong kamapim bel isi namel long ol. Dispela tok i tokaut long bel isi bai kamap long rot bilong Kingdom bilong God tasol. Ol man i bin harim we dispela tok? Ol i harim long 1,900 samting kibung distrik, nem bilong en “Ol Man Bilong Autim Tok Long Bel Isi God i Save Givim,” em ol Witnes Bilong Jehova i bin mekim long olgeta hap bilong graun long 1996-1997.
Long ol dispela kibung ol i tokaut klia olsem i no gat wanpela gavman bilong ol man inap kamapim bel isi na gutpela sindaun tru. Bilong wanem ol i no inap? Long wanem, bilong mekim olsem ol i mas pinisim ol hevi i save kamap long olgeta de na i pasim rot bilong yumi long i stap bel isi. Bel isi tru tru i olsem yumi inap kirap long olgeta moningtaim na yumi no pret long pait bai kamap o sampela bai bagarapim yumi. Bel isi tru tru i olsem i no gat pasin raskol moa, na i no gat lok moa long ol dua bilong yumi, na yumi no pret moa long wokabaut long rot, na i no gat ol famili i bruk. Orait, wanem gavman long graun inap kamapim ol dispela samting? Wanem gavman long graun i laik mekim tok promis long kamapim ol dispela samting? I no gat wanpela, a?
Tasol Kingdom bilong God em inap kamapim ol dispela samting, na em bai mekim tru. Baibel i tok promis olsem: “Harim. Nau haus bilong God i stap wantaim ol manmeri. Em bai i stap namel long ol, na ol bai i stap ol lain manmeri bilong em. Yes, God yet bai i stap wantaim ol, na em bai i stap God bilong ol. Em bai i mekim drai wara i stap long ai bilong olgeta bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.” (KTH 21:3, 4) Dispela bai mekim gut tru bel bilong ol manmeri em pen na hevi i wok long painim ol!
Dispela tok promis bilong God Jehova em i no wanpela tok nating. Baibel i tokim yumi: “God i no save giaman olsem yumi man. Em i no save senisim tingting bilong en olsem yumi. Nogat tru. Sapos em i promis long mekim wanpela samting, orait em i save mekim. Em i save tok tasol na dispela samting i kamap.” (Namba 23:19) Tru tumas, samting God i tok promis long en bai kamap tru, na olgeta manmeri i givim bel long God long nau na stap aninit long em, ol bai kisim ol gutpela blesing long en.
Ol Man God i Salim Bilong Autim Tok Bilong Bel Isi
Planti man i save long ol Witnes Bilong Jehova, long wanem, ol i save wok strong long autim tok bilong Kingdom bilong God. Long olgeta wan wan yia, olgeta wantaim i save lusim wan bilion aua samting long autim tok bilong Baibel long ol man, em inap mekim gut bel bilong ol. Dispela i truim tok bilong Jisas, olsem: “Bai ol i autim dispela gutnius bilong kingdom bilong God long olgeta hap bilong graun, bai olgeta lain manmeri i ken harim, na bihain tasol bai las de i kamap.” (Matyu 24:14) Dispela tok ol Witnes i save autim long ol man, em i “gutnius” tru, long wanem, em i tokaut olsem Kingdom bilong God tasol inap stretim tru hevi bilong ol man. Ol inap bilip tru na wetim dispela samting Kingdom bai mekim bihain!
Long nau tu, Kingdom bilong God i wok long kamapim bel isi tru insait long lain bilong en na narapela i laikim tru narapela olsem brata brata. Jisas i tok: “Sapos yupela wan wan i laikim tru ol arapela man bilong lain bilong mi, orait dispela bai i soim olgeta man olsem, yupela i disaipel bilong mi.” (Jon 13:35) Ol Witnes Bilong Jehova i wok strong long bihainim dispela lo bilong lotu Kristen tru. Olsem na dispela gutpela pasin bilong ol long i stap olsem brata brata, em i save kamapim pasin wanbel namel long ol Juda na Arap, ol Kroesia na Serbia, ol Hutu na Tutsi. Dispela kain bel isi em klostu olgeta manmeri bilong graun i ting i no inap kamap tru, nau em i stap long planti milion Witnes Bilong Jehova long olgeta hap.
Long program i kamap long “Ol Man Bilong Autim Tok Long Bel Isi God i Save Givim” Kibung Distrik, ol i mekim bikpela tok bilong strongim yumi long bihainim yet ol lo bilong Baibel na wok yet long autim gutnius bilong Kingdom bilong God. Mipela i laik bai yu kaunim tok i kamap bihain long dispela i stori long dispela gutpela kibung bilong 3-pela de em planti milion manmeri ol i kisim amamas long en.