“Ol Man Bilong Autim Tok Long Bel Isi God i Save Givim” 1996 Kibung Distrik
LONG bipo lain bilong Jehova i save mekim tripela bikpela bung long olgeta yia. Olsem tasol, nau long taim bilong yumi lain i holim nem bilong Jehova, ol i save mekim tripela bikpela bung insait long wanpela yia. Ol i amamas long bung wantaim long bikpela de kibung inap wanpela de, na long kibung sekit inap tupela de, na long kibung distrik inap tripela o fopela de. As tok bilong kibung distrik bilong 1996 em “Ol Man Bilong Autim Tok Long Bel Isi God i Save Givim.”
Dispela as tok em i stret tru! God bilong yumi, Jehova, em i ‘God bilong bel isi,’ na, ‘God bilong givim bel isi.’ Man i go pas long yumi, Krais Jisas, em i “King bilong kamapim gutpela sindaun na bel isi,” na ol tok ol wokman bilong Jehova i autim em tok bilong bel isi God i save givim. (Filipai 4:9; Rom 15:33; Aisaia 9:6; Nahum 1:15) Ol i wokim wanpela gutpela program tru bilong kibung bilong helpim yumi olgeta man long pilim tru olsem wanem bel isi God i save givim em i bikpela samting.
Long dispela yia bai i gat 7-pela kibung long Papua Niugini. Ating bai i gat wanpela kibung klostu long hap bilong yu. Gutpela sapos yu askim wanpela Witnes Bilong Jehova i stap klostu long yu long taim na ples stret ol bai mekim dispela kibung na bai yu ken redim ol samting bilong i go long kibung. Olgeta man i laikim bel isi tru bilong i stap oltaim, mipela i amamas long ol i ken kam.