Amamas Long “Pret Long God” Kibung Distrik!

KLOSTU nau bai ol Witnes Bilong Jehova i kirap mekim ol kibung distrik bilong ol bilong yia 1994. Kirap long Jun 1994 i go inap long Janueri 1995, bai i gat ol kibung bilong 3-pela de long planti handet biktaun long Not Amerika, na bihain long en ol bai kamap long ol hap bilong Is na Wes long Yurop, na Esia, na Sentral na Saut Amerika, na Afrika, na Ostrelia, na ol ailan bilong solwara.

Nem bilong kibung​—⁠“Pret Long God”​—⁠i kirapim tru tingting! Dispela kain pret i no pret nogut bilong man i laik bagarap. Pasin bilong pret long God i helpim man long i stap bel isi na amamas. Baibel i tok: “Sapos yu daunim yu yet na yu stap aninit long Bikpela, bai yu gat planti mani samting na biknem, na bai yu stap gut.” (Sindaun 22:⁠4) Sapos yu pret long God, olsem wanem dispela inap helpim yu long i stap gutpela olsem? Ol tok na soim na wanpela pilai bilong kibung bai helpim yu long save long dispela samting.

Aposel Pol i tok, yumi no ken “lusim pasin bilong bung wantaim.” (Hibru 10:⁠25) Ol Witnes Bilong Jehova i tingim gut dispela samting, na ol i save bung 3-pela taim long wik long kongrigesen bilong stadi na lotu. Tasol kibung distrik em i bikpela taim bilong bung. Ol Witnes i save amamas na wetim dispela taim bilong bung, na inap planti mun bihain ol i toktok long ol tok ol i bin harim. Maski yu bilong wanem lotu, mipela i laik singautim yu i kam long kibung bilong bung wantaim ol Kristen na kisim save long ol bikpela tok bilong God. Yu ken askim wanpela Witnes long hap bilong yu na em bai amamas long tokim yu long taim na ples bilong kibung.