Go Long “Pret Long God” Kibung Distrik!
Yu tingting pinis long i go long “Pret Long God” Kibung Distrik bilong ol Witnes Bilong Jehova long 1994? Sapos yu stap long olgeta 3-pela de bilong kibung, dispela bai helpim yu! Ol bai mekim 15 kibung long Papua Niugini, na bai yu inap i go long wanpela.
Sampela kain pasin pret inap bagarapim bel na bagarapim bilip. Tasol as tok bilong kibung long moningtaim long Fraide bai stori long pasin bilong pret long God na olsem wanem dispela pasin inap helpim yumi. Olgeta tok bilong kibung bai stori olsem.
Long belo bek long Fraide bai yu harim tok long olsem wanem pasin bilong pret long God inap strongim marit na famili, na helpim ol yangpela long i stap gut long God. Laspela tok em “Bilong Mekim Gut Bel Bilong Man Em Wanpela Long Famili i Dai,” na em bilong strongim bel bilong ol man em sampela long famili bilong ol i dai pinis. Yu bai pilim tru ol dispela tok bilong helpim kain man olsem.
Ol tok bilong Sarere bai helpim yumi long save, sapos yumi pret long God, dispela inap strongim yumi long bihainim ol tok bilong Jehova i stiaim kongrigesen na wok autim tok bilong yumi. Wanpela tok, nem bilong en: “Kaunim Tok Bilong God, Em Baibel, Long Olgeta De,” na em bai soim gutpela rot long yumi bilong kaunim na stadi long Baibel. Nem bilong laspela tok long Sarere i kirapim tru tingting bilong yumi, em olsem: “De Nogut Bilong Jehova Em i Klostu.”
Wanpela bikpela tok long Sande, em olsem: “Ol Stretpela Man Bai Kirap Bek.” Tok i kamap bihain long dispela, nem bilong en “Winim Taim Bilong Bikpela Hevi Tru,” em bai stori gut long tok promis bilong Jisas olsem sampela man bai ol i no i dai.—Jon 11:26.
Long pinis bilong moningtaim long Sande, i gat wanpela pilai bilong 40 minit em bai helpim yumi long tingting gut, nem bilong en Wanem Rot Bai Yu Makim na Bihainim? Pilai bai stori long taim bilong Josua na strongpela tingting bilong em long lotuim Jehova. Na pilai bai stori tu long Elaija i resis wantaim ol profet bilong god Bal long mekim ofa. Ol tok bilong pilai bai helpim yumi long i stap aninit long God long nau. Long belo bek i gat gutpela pablik-tok, “Bilong Wanem Yumi Mas Pret Long God Tru Long Nau?”
Stretim rot nau bambai yu inap i go long kibung. Yu ken i go long Haus Kingdom bilong ol Witnes Bilong Jehova long hap bilong yu, o raitim pas long ol man bilong wokim dispela nius, na bai ol i tokim yu long kibung em bai kamap klostu long hap yu stap long en. O yu ken lukim Kirap! bilong Ogas 8, 1994; em i kolim ples na taim bilong ol kibung bai kamap long Papua Niugini, Ostrelia, Nu Silan, na ol ailan Solomon.
[Piksa Kredit Lain long pes 32]
T. Rosenthal/SUPERSTOCK