Samting Yu No Laik Lusim!
NO KEN lusim wanem samting? Em dispela Kibung Distrik bilong ol Witnes Bilong Jehova klostu nau bai kamap, nem bilong en “Ol Man Bilong Autim Tok Long Bel Isi God i Save Givim.” Long planti hap, kibung bai kirap wantaim musik long Fraide long 9:30 long moningtaim. Long tok “Sampela Stori Bilong Ol Man i Wok Strong Long Autim Tok Bilong Bel Isi,” bai yu harim stori bilong sampela manmeri na dispela bai strongim tru bilip bilong yu. Bihain bai yu amamas long harim tok “God i Laik Yumi Mas Mekim Wanem?”
Bikpela tok long Fraide long belo bek em as tok “Wok Bilong Yumi Ol Man Bilong Autim Tok Long Bel Isi God i Save Givim.” Bihain long en i gat wanpela tok, nem bilong en “Helpim Ol Narapela Long Lain Long Ol Samting God i Laik Ol i Mas Mekim,” na em bai kamapim sampela gutpela tok bilong helpim yumi long skulim ol nupela man. Orait nau i gat wanpela tok i gat 2-pela hap bilong en, nem bilong en “Lukaut Long Ol Samting Bilong Ol Amamas i Stap Hait Bilong Bagarapim Yu.” Na bilong pinisim program bilong Fraide i gat 2-pela tok “Sakim Satan—No Ken Orait Long Lotuim Narapela God” na “Stap Gut Long Tok Bilong God.”
Long Sarere long moningtaim wanpela tok i gat 3-pela hap bilong en, em “Ol Man Bilong Bringim Gutpela Tok Bilong Bel Isi i Kam,” bai kamapim long ples klia olsem em i bikpela samting long mekim gut wok bilong kamapim disaipel. Bilong pinisim dispela hap bilong program, bai i gat 2-pela tok, “Amamas Long Givim Samting Insait Long Oganaisesen Bilong Jehova,” na “Kisim Laip na Bel Isi Long Rot Bilong Dediket na Baptais.” Bihain long en ol nupela disaipel i ken kisim baptais.
Tok bilong Sarere long belo bek, em “Skelim Tingting Bilong Jehova Long Ol Samting,” bai bekim sampela askim olsem: ‘Olsem Wanem? Ol Kristen i insait long wok bilong tilim ol man long nau?’ na ‘Baibel i givim wanem tingting long yumi long ol man i mekim bikpela rong tru i mas kisim bikpela strafe, olsem ol i mas kilim em i dai?’ Na bai yu amamas tu long harim gutpela tok i gat 2-pela hap bilong en, em “God Bilong Givim Bel Isi i Save Lukautim Yu,” na tok “Wok Strong Long Kisim Bel Isi Bilong God Insait Long Famili.”
Long Sande long moningtaim wanpela tok i gat 3-pela hap bilong en bai kamap, nem bilong en: “Husat Ol i Man Bilong Autim Tok Tru?” na narapela tok “Harim na Bihainim Tok Bilong God.” Bilong pinisim program bilong moningtaim bai i gat wanpela gutpela pilai i kamapim sampela gutpela tok long stori bilong Hetman Gideon long Baibel.
Laspela hap bilong program bilong kibung long Sande long belo bek em pablik-tok, nem bilong en, “Gutaim Tru i Kamap!—Husat Bai Kamapim?” Na bilong pinisim kibung wanpela gutpela tok bilong strongim ol manmeri bai kamap, nem bilong en “Wok i Go Moa Olsem Man Bilong Autim Tok Long Bel Isi God i Save Givim.”
Stretim rot nau bambai yu inap i go long kibung. Bilong save long kibung i kamap klostu long hap yu stap long en, yu ken i go long Haus Kingdom bilong ol Witnes Bilong Jehova long hap bilong yu, o raitim pas long ol man bilong wokim dispela nius, na bai ol i tokim yu. Nius Kirap! bilong Julai 8, 1996, em i kolim ples na taim bilong ol kibung bai kamap long Papua Niugini, ol ailan Solomon, Ostrelia, na ol narapela hap bilong Saut Pasifik.