“Amamas Long Litimapim Nem Bilong God” Kibung Distrik Bilong Ol Witnes Bilong Jehova
Inap 3-pela de bai yu kisim save long Baibel. Long Papua Niugini ol bai mekim 9-pela kibung, olsem na ating wanpela bai kamap klostu long hap bilong yu. Gutpela yu ken stap long kibung taim program i kirap wantaim musik long Fraide 9:40 long moningtaim.
Long Fraide long moningtaim bai i gat sampela tok amamas long ol man i kam long kibung na as tok bilong kibung “Ol Man i Amamas Long Litimapim Nem Bilong God i Stap Narapela Kain.” Program bilong apinun bai stori long ol yangpela, ol papamama, na skul. Ol yangpela bai amamas long harim tok, “Mi Redi Long Marit o Nogat?” Ol papamama i mas putim gut yau long tok, “Ol Papamama i Amamas Long Pikinini Bilong Ol.” Program bilong apinun bai pinis long tok, “Skul—Mekim Wok Long En Bilong Litimapim Nem Bilong Jehova.” Dispela tok bai stori long ol samting i helpim ol yangpela long stap gut long skul.
Long Sarere long moningtaim tok bilong baptais bai kamap, na ol man i inapim mak bilong kisim baptais i ken kisim baptais. Wanpela tok long apinun bai stori long olsem wanem long bipo yet i kam inap nau Satan i bin mekim wok long strongpela laik bilong mekim maritpasin bilong pulim ol man. Na wanpela strongpela tok bai kamap, nem bilong en, “No Ken Larim Satan i Pulim Yu.” Nem bilong laspela tok long dispela de em: “Bilong Wanem Ol Man i Mas Kisim Save Long God.”
Long Sande long moningtaim wanpela tok i gat 3-pela hap bilong en bai kamap. Nem bilong en: “Amamas Long Litimapim Nem Bilong God Long Taim Bilong Pinis.” Dispela tok bai stori long ol bikpela samting klostu nau bai kamap, na yumi no ken lusim nating taim bilong ranawe i go long ples hait paslain long “bikpela hevi tru,” em Krais Jisas i stori long en long Matyu 24:21.
Laspela samting long program bilong Sande long moningtaim em wanpela gutpela pilai bilong Baibel, nem bilong en, “Givim Biknem Long Ol Gutpela Lapun.” Na wanpela bikpela samting bilong kibung bai kamap long belo bek em pablik-tok, nem bilong en, “Litimapim Nem Bilong King Bilong Oltaim!”
Stretim rot nau bambai yu inap i go long kibung. Bilong save long kibung i kamap klostu long hap yu stap long en, yu ken i go long Haus Kingdom bilong ol Witnes Bilong Jehova long hap bilong yu, o raitim pas long ol man bilong wokim dispela nius, na bai ol i tokim yu. O yu ken lukim Kirap! bilong Novemba 8, 1995; em i kolim ples na taim bilong ol kibung bai kamap long Papua Niugini, Nu Silan, Ostrelia, na ol ailan Solomon.