Welkam Long “Ol Tisa Bilong Tok Bilong God” Kibung Distrik!
PLANTI MILION MANMERI BAI I GO long planti handet kibung long olgeta hap bilong graun. Long Papua Niugini ol i makim 9-pela kibung bai kamap. Namba wan kibung bai kamap long Novemba 30 i go Disemba 2, na laspela kibung bai kamap long Disemba 29-30. Wanpela bilong ol dispela kibung i gat 3-pela de—Fraide i go Sande—ating em bai kamap long taun i no longwe tumas long hap yu stap long en.
Bilong kirapim program long olgeta de bai i gat musik long 9 klok moningtaim. Long Fraide, bihain long tok bilong amamas long ol man i kam long kibung bai i gat ol narapela tok nem bilong ol, “Pasin Bilong Skulim Ol Man Long Kingdom i Karim Gutpela Kaikai,” “ ‘Ol Strongpela Wok Bilong God’ i Kirapim Yumi,” na “Amamas Long Stretpela Pasin Bilong Jehova.” Bilong pinisim program bilong moningtaim bai ol i mekim as tok bilong kibung, “Yumi Inap Tru Long Stap Olsem Ol Tisa Bilong Tok Bilong God.”
Namba wan tok long program bilong apinun, em “Stap Klin Olsem Ol Man Bilong Mekim Ol Gutpela Wok,” na bihain long en ol bai mekim tok i gat tripela hap, “Skulim Yumi Yet Taim Yumi Skulim Ol Narapela.” Dispela tok bai kamapim olsem em i bikpela samting long skulim yumi yet taim yumi skulim ol narapela, na bihainim stretpela pasin, mekim stadi bilong yumi yet, na sakim ol samting Satan i mekim bilong paulim yumi. Bihain long en ol bai mekim narapela tok, “Yumi Mas Nolaik Tru Long Lukim Ol Piksa Nogut Bilong Pasin Sem.” Na bilong pinisim program bilong dispela de ol bai mekim wanpela tok i stori long Aisaia sapta 60, nem bilong en “Jehova i Givim Lait Long Lain Bilong Em na Ol i Kamap Nambawan Tru.”
Ol tok bilong Sarere, olsem “Kisim Nupela Strong Aninit Long Plang Bilong Krais,” “Bihainim Pasin Bilong Bikpela Tisa,” na “Yu Gat Laik Long Helpim Ol Narapela?” ol dispela tok bai helpim ol man long bihainim pasin bilong Krais. Tupela tok i gat tripela hap ol bai mekim long Sarere, nem bilong ol “Long Rot Bilong Ol Wokman Bilong God Ol Man i Kamap Bilipman,” na “Larim Skul i Kam Long God i Helpim Yumi Moa Yet,” na ol inap olsem wanpela aua. Tok i gat tripela hap i kamap long moningtaim em bai kamapim sampela tok bilong helpim yumi long kamapim disaipel. Na tok i kamap long apinun bai stori long olsem wanem pasin bilong stadi long Baibel na go long ol miting Kristen i save helpim yumi. Bilong pinisim program bilong moningtaim bai i gat tok bilong baptais na bihain ol man i winim mak ol bai kisim baptais. Planti bai laik tru long harim laspela tok long apinun, nem bilong en “Ol Nupela Samting Bilong Helpim Yumi Kamap Strong Long Samting Bilong Spirit.”
Long Sande, long program bilong moningtaim bai i gat tok i gat tripela hap na em bai stori long Buk Malakai na i kamapim ol tok bilong dispela buk i stret long taim bilong yumi. Bihain long dispela, bai i gat wanpela pilai i stori long Kora, Datan, na Abiram i bikhet long Moses, em man God i makim bilong bosim ol. Bihain wanpela tok bai i kamap i stori long bikpela samting bilong dispela pilai. Long apinun bai i gat pablik-tok nem bilong en “Husat Ol i Wok Long Skulim Olgeta Lain Long Tok i Tru?”
Tru tumas, yu bai kisim planti gutpela samting bilong spirit taim yu go long tripela de olgeta bilong kibung. Sapos yu laik save long ples em kibung bai kamap long en klostu long yu, orait yu ken i go long Haus Kingdom bilong ol Witnes Bilong Jehova na askim ol, o yu ken rait i go long ol man bilong wokim dispela nius. Ol det bilong ol kibung bilong Pasifik mipela i putim long Wastaua bilong Februeri 15, 2001.