Planti Milion Manmeri Bai Go Long En—Olsem Wanem Long Yu?
WINIM 8 milion manmeri long olgeta hap bilong graun ol i save go long ol kibung distrik bilong ol Witnes Bilong Jehova long olgeta yia. Long dispela yia, 8-pela “Tok Profet Bilong God” Kibung Distrik bai kamap long Papua Niugini. Ating wanpela bai kamap klostu long hap yu stap long en. Mipela i laik kirapim yu long stap long wanpela kibung taim program i kirap long 9:00 a.m. long Fraide long rot bilong musik.
Long moningtaim, bai yumi harim wanpela tok bilong tok amamas long ol manmeri i kam, na tu, bai yumi harim as tok bilong kibung, em “Putim Yau Long Ol Tok Profet Bilong God.” Long apinun wanpela tok i gat tripela hap bilong en, “Amamas Long Kaunim Tok Bilong God,” em bai helpim yumi long sampela gutpela rot bilong kaunim Baibel na bai ol tok bilong en i ken helpim gut yumi, na tu, long olsem wanem yumi ken amamas long kaunim Baibel. Laspela tok bilong dispela de, em “Ol Man i Birua Long God Ol i No Inap Win.” Dispela tok bai stori long ol samting ol man i save mekim long nau bilong pasim yumi long autim tok bilong Kingdom bilong God.
Long program long Sarere moningtaim, i gat tok bilong baptais, na rot i op bilong ol lain i winim mak ol i ken kisim baptais. Long apinun bai i gat ol gutpela ripot bilong ol kantri em ol man i amamas long harim tok bilong Baibel. Olsem: Sampela kantri long Latin-Amerika, Afrika, na Isten Yurop, na tu, bilong Kasakstan, em wanpela bikpela kantri long hap bilong Esia. Nem bilong dispela tok em “ ‘Ol Gutpela Samting’ i Kam Insait Long Haus Bilong Jehova.” Bilong pinisim program long Sarere, bai yumi harim tupela tok, em “Ol Tok Profet Bilong Baibel i Kirapim Yumi Long Was i Stap” na “Ol Tok Profet Long Taim Bilong Las De.” Laspela tok bai stori long ol tok bilong Buk Daniel long Baibel na em bai kamapim ol as na yumi mas putim gut yau long ol tok profet bilong en.
Long moningtaim long Sande, bai yumi harim wanpela tok i gat tripela hap bilong en na ol bai mekim insait long wanpela aua, nem bilong en “Ol Tok Profet Bilong Kamap Tru Long Taim God i Makim.” Ol dispela tok bai stori long tok profet bilong Habakuk. Dispela sotpela buk bilong Baibel em inap tru long strongim bel bilong ol Kristen long nau. Bihain long dispela, bai yumi lukim wanpela pilai, nem bilong en, “Amamas Long Ol Gutpela Samting Bilong Spirit Yumi Bin Kisim.” Pilai i kamapim stori bilong Jekop na Iso long Baibel. Bilong pinisim program bilong moningtaim long Sande, bai yumi harim wanpela gutpela tok, nem bilong en “Yu Ting Olsem Wanem Long Ol Gutpela Samting Yumi Kisim?” Na long apinun, bai yumi amamas long harim pablik-tok, nem bilong en “Olgeta Samting Bai Kamap Nupela—Olsem God i Tok Profet Long En.”
Nau yu ken redi bilong i go long dispela kibung. Bilong kisim save long wanpela kibung bai kamap klostu long hap bilong yu, go long Haus Kingdom bilong ol Witnes Bilong Jehova long hap bilong yu, o raitim pas i kam long ol lain bilong wokim dispela nius. Wastaua bilong Februeri 15, 1999, em i gat lista bilong ol ples ol kibung bai kamap long en.