Kam Long “Bilip Long Tok Bilong God” Kibung Distrik!
PLANTI milion manmeri bai bung long planti handet hap long olgeta hap bilong graun. Long Saut Pasifik yet, bai i gat 54 kibung i kamap. Namba wan kibung bai kamap long Julai 18-20 na laspela kibung bai kamap long Disemba 26-28. Ating bai wanpela bilong ol dispela tripela de kibung—Fraide i go inap Sande—bai kamap long wanpela taun i no longwe long hap yu stap long en.
Planti gutpela tok bilong Baibel bai kamap na ol dispela tok bai helpim yu tru. Long planti hap, bilong kirapim program long moningtaim bai i gat musik long 9.30. Long Fraide long moningtaim, insait long 25 minit bai ol i askim sampela manmeri long stori long taim ol i bilip long Tok Bilong God, olsem wanem dispela i bin kamapim sampela bikpela senis long i stap bilong ol. Bilong pinisim program long moningtaim, ol bai mekim as tok bilong kibung “Bilip na Wokabaut, No Ken Tingim Tasol Ol Samting Yu Lukim Long Ai.”
Namba wan tok long Fraide apinun bai stori long ol yangpela i gat bikpela wok insait long kongrigesen Kristen. Narapela tok i gat tripela hap bilong en i stori long ol lo bilong Baibel long pasin Kristen yumi bihainim long toktok bilong yumi, pasin bilong yumi, na bilas bilong yumi. Na bihain narapela tupela tok em “Lukaut—Nogut Bilip Bilong Yu i No Strong” na “Tok Bilong God Em i Gat Laip” ol bai stori long ol gutpela tok i stap long Hibru sapta 3 na 4. Bilong pinisim program bilong Fraide, bai i gat tok “Wanpela Buk Bilong Helpim Olgeta Man.”
Namba wan tok long Sarere moningtaim em “Bilip i No Kamapim Gutpela Wok Em i Dai Pinis.” Narapela bikpela tok long dispela moningtaim em “Kamap Strong na Holimpas Tok i Tru,” em i stori long olsem wanem yumi inap kamap strong long ol samting bilong spirit. Bilong pinisim program bilong moningtaim bai i gat wanpela tok i save kamap long olgeta kibung, “Bilip Long Tok Bilong God Em i Bringim Man Long Baptais,” na bihain long dispela tok bai ol nupela disaipel i kisim baptais.
Namba wan tok long Sarere apinun, em “Wok Strong Tru Long Holimpas Bilip Bilong Yu,” i stori long tok bilong Buk Jut long Baibel. Tok bai kamap insait long wanpela aua na i gat tripela hap bilong en, nem bilong en “Yumi Go Long Haus Bilong Jehova,” na dispela tok bai i stori long ol miting Kristen i save helpim yumi. Bilong pinisim program bilong dispela de bai i gat wanpela tok, em “Nau God i Traim Bilip Bilong Yu.”
Program bilong Sande long moningtaim bai i gat wanpela tok i gat tripela hap bilong en na em bai stori long Buk Joel long Baibel, na ol truim bilong en i kamap long taim bilong yumi. Na bihain long dispela bai i gat wanpela pilai bilong Baibel, nem bilong en “Ai Bilong Yu i Mas Gutpela.” Na bikpela tok long apinun em pablik-tok, “Bilip na i Stap Bilong Yu Long Bihain.”
Bai yu kisim planti gutpela samting bilong spirit sapos yu kam long dispela kibung. Ol bai amamas sapos yu kam long olgeta moning na apinun long dispela kibung. Nau yu ken kirap stretim rot bilong kam long dispela kibung. Sapos yu laik save long ples kibung bai kamap long en klostu long yu, orait yu ken i go long Haus Kingdom bilong ol Witnes Bilong Jehova na askim ol o yu ken rait i go long ol man bilong wokim dispela nius. Yu ken lukim tu ples na det bilong ol kibung bai kamap long Papua Niugini, Ostrelia, Nu Silan, na ol ailan Solomon long Kirap! bilong Ogas 8.