Yu No Laik Lusim Dispela Samting!
LUSIM wanem samting? Em kibung distrik bilong ol Witnes Bilong Jehova, nem bilong en “Ol Man Bilong Bihainim Tok Bilong God.” Ol dispela kibung i kirap pinis long Amerika long mun Me, na inap sampela mun bihain ol bai mekim long planti handet biktaun long olgeta hap bilong graun. Long planti hap, program bai kirap long 9:30 long Fraide long moningtaim, na pastaim bai i gat sampela musik bilong kirapim program.
Ol bai kirapim program long wanpela tok bilong strongim yumi long bihainim Tok Bilong God, na bihain ol bai mekim ol tok, nem bilong en “Amamas Tru Long Gutpela Pasin Bilong Jehova” na “Sanap Strong Olsem Man i Lukim God.” Bilong pinisim program bilong moningtaim, ol bai kamapim as tok bilong kibung, em “Litimapim Nem Bilong Jehova—Em Man Bilong Mekim Ol Gutpela Wok.”
Namba wan tok long program bilong apinun em “No Ken Les Long Mekim Ol Gutpela Pasin,” na bihain long en wanpela tok i gat 3-pela hap bai stori long ol samting man o meri i mas tingim taim em i laik painim poroman marit, na kamapim wanpela famili i strong long samting bilong spirit, na skulim ol pikinini long laikim Jehova. Laspela tok bilong dispela de, nem bilong en “Wokabaut Gut Wantaim Oganaisesen Bilong Jehova,” bai stori long ol nupela save yumi wok long kisim long ol laik bilong God long nau.
Long program bilong Sarere long moningtaim bai i gat narapela tok i gat 3-pela hap, nem bilong en “Ol Wokman Bilong Tok Bilong God.” Dispela tok bai kamapim sampela tok bilong helpim yumi long mekim gut wok bilong yumi long kamapim ol disaipel. Bihain long en i gat wanpela tok bilong mekim gut bel bilong yumi, nem bilong en “No Ken Mekim Wanpela Samting Bilong Semim God.” Na bihain long dispela, bai i gat tok bilong baptais, na rot i op long ol manmeri i winim mak bilong baptais ol i ken kisim baptais.
Long apinun i gat narapela tok i gat 3-pela hap bilong en na ol bai stori gut olsem yumi mas “Wok Strong Long Kisim Pasin Bilong Tingim Ol Samting Bilong Spirit.” Ol bai kamapim ol tok bilong helpim yumi long tingim moa yet ol samting bilong spirit. Bilong pinisim program bilong dispela apinun ol bai mekim wanpela tok i givim gutpela save long yumi, nem bilong en “Wokabaut Long Lait Bilong Tok Bilong God i Wok Long Kamap Strong.” Em bai stori long ol tok bilong Aisaia sapta 25 na 26 na i kamapim olsem wanem yumi ken save moa long dispela gutpela buk bilong Baibel.
Long Sande moning i gat narapela tok i gat 3-pela hap, nem bilong en “Bikpela Tok Profet Bilong Sefanaia, Em Bilong Ol Man i Mekim Laik Bilong God.” Em bai kamapim klia olsem wanem dispela tok profet i stret long lain Juda bilong bipo na olsem wanem em i stret long taim bilong yumi long ol lotu bilong dispela graun. Bihain long dispela bai yu amamas long lukim wanpela pilai, nem bilong en “Ol i Stap Olsem Piksa Bilong Givim Tok Lukaut Long Yumi Long Nau.” Pilai bai stori long ol pasin nogut bilong ol man Israel paslain long ol i go insait long Graun Bilong Promis. Wanpela tok long laspela hap bilong program long Sande apinun em pablik-tok “Bilong Wanem Yumi Mas Tingim Ol Gutpela Wok Bilong God.”
Nau yu ken stretim ol samting bambai yu inap i stap long olgeta 3-pela de long dispela kibung. Bilong save long ples kibung bai kamap long en, yu ken go long Haus Kingdom bilong ol Witnes Bilong Jehova na askim ol o raitim pas long ol man bilong wokim dispela nius. Long Wastaua bilong Februeri 15, em poroman bilong dispela nius, i gat lista bilong ol ples dispela kibung bai kamap long en long Papua Niugini, Fiji, Nu Kaledonia, Nu Silan, ol ailan Solomon, Ostrelia, Vanuatu na sampela hap moa.