Bilong Wanem Yu Mas i Go?
INAP 4-pela de bai yu kisim ol save bilong spirit long “God i Skulim Yumi” Kibung Distrik, em bai kamap long ol biktaun long ol narapela narapela hap bilong graun. Long Yunaitet Stets (Amerika) i gat olsem 150 kibung bai kamap long Jun, Julai, Ogas. Long planti kibung, program bai kirap long Fonde long 1:20 belo bek na em bai pinis long Sande long 4:15 long apinun. Wanpela gutpela hap program long sampela kibung, em ol misineri bai kamapim sampela stori long wok bilong ol long autim tok; Sosaiti i helpim ol long baim rot na kam bek long kantri bilong ol na lukim dispela gutpela kibung.
Maski yu lapun o yangpela, o yu man marit o meri marit, o yu papa o mama, o yu pikinini—bai yu kisim gutpela save em ol bai kamapim klia na bai yu inap kisim gut, na dispela save bai helpim yu. Long nau planti manmeri i laik save: Wanem as bilong i stap bilong yumi? Orait, long Fraide long moningtaim bai yu harim sampela tok bilong dispela samting na bai yu amamas long ol dispela tok, na yu ken helpim ol narapela tu long kisim dispela save.
Long Fraide belo bek bai i gat 3-pela tok, “Bilong Helpim Marit Long i Stap Strong,” na “Wok Strong Bambai Famili Bilong Yu Inap Kisim Laip,” na “Yupela Papamama—Helpim Gut Ol Pikinini Bilong Yupela.” Bihain long en bai ol i toktok long sampela hevi i save painim ol yangpela, na olsem wanem ol inap stretim ol dispela hevi. Bilong helpim na strongim ol, bai i gat wanpela pilai i kamap, nem bilong en, Ol Yangpela Ol i Save Tingim Man Bilong Wokim Ol.
Long Sarere bai ol i kamapim sampela tok profet bilong Jisas long taim bilong las de na long wanpela tok bilong Jisas em i tok: “Taim bilong ol dispela bikpela hevi i pinis, orait kwiktaim san bai i kamap tudak.” (Matyu 24:29) Mipela save, bai yu laik harim dispela tok long wanem taim dispela “bikpela hevi” bai kamap. Na program bilong Sarere bai stori long wok bilong ol Witnes Bilong Jehova long taim bilong yumi na ol gutpela wok ol i bin kamapim.
Long Sande bai i gat narapela pilai, Nogut Ol i Giamanim Yu o Yu Laik Trikim God. Dispela pilai bai kamapim klia olsem ol video na musik em planti man bilong nau i save laikim, ol inap pulim ol Kristen na ol i no stap gut moa long God. Pablik-tok long belo bek, nem bilong en, “God i Skulim Yumi Bilong Helpim Yumi Nau Long Dispela Taim Nogut.” Laspela tok bilong kibung, em “Holim Strong Ol Tok God i Skulim Yumi Long En.”
Sapos yu kam long 4-pela de olgeta, ol dispela tok bai helpim yu tru! Mipela laik singautim yu long i kam long dispela kibung. Bilong save wanem kibung bai kamap klostu long hap yu stap long en, askim ol Witnes Bilong Jehova long hap bilong yu, o raitim pas long I.B.S.A., Box 636, Boroko, N.C.D., Papua New Guinea, o lukim nius Awake! tok Inglis, bilong Jun 8, i gat lista bilong ol kibung long Yunaitet Stets, Kanada, Inglan, Aialan.