Sekem—Taun i Stap Long Ples Daun

TAUN Sekem i stap insait tru long kantri God i bin makim bilong lain bilong em, na i stap namel long maunten Ebal na maunten Gerisim. Long dispela hap yet​—⁠klostu olsem 4 tausen yia i go pinis​—⁠Jehova i tok promis long Abraham: “Bai mi givim dispela graun long ol lain pikinini bilong yu.”​—⁠Stat 12:​6, 7.

Stret wantaim dispela tok promis, tumbuna pikinini bilong Abraham, em Jekop, i wokim kem long Sekem na em i wokim alta na kolim olsem “God em i God bilong Israel.” Long dispela hap Jekop i bin wokim wanpela hul wara bilong famili bilong em na ol lain sipsip samting bilong em. Planti handet yia bihain ol i kolim dispela hul wara olsem hul wara bilong Jekop.​—⁠Stat 33:​18-​20, NW; Jon 4:​5, 6, 12.

Tasol i no olgeta long famili bilong Jekop ol i givim bel long lotu tru long God. Pikinini meri bilong em, Daina, em i laik painim ol poroman namel long ol yangpela meri Kenan bilong Sekem. Daina i yangpela yet, na em i kirap i go raun long taun i stap klostu, na em i kisim ol poroman long dispela ples.

Ol yangpela man bilong dispela taun bai ting olsem wanem long dispela yangpela nupela meri em i save kam oltaim long taun bilong ol, na i olsem i no gat wanpela i kam wantaim em? Pikinini man bilong wanpela hetman “i lukim Daina, na em i pulim em na mekim pasin nogut long em.” Olsem wanem na Daina i poroman wantaim ol lain bilong Kenan i save mekim pasin pamuk na em i no ting wanpela samting nogut inap painim em? Ating em i laik poroman wantaim ol wankrismas olsem em? O ating em i laik bihainim tingting bilong em yet olsem ol brata bilong em i mekim? Kaunim dispela stori long Buk Stat, na traim pilim bikpela hevi na sem Jekop wantaim Lea i kisim long ol samting nogut i bin kamap taim pasin pamuk i painim Daina long Sekem.​—⁠Stat 34:​1-​31; 49:​5-7; lukim tu Wastaua (tok Inglis), Jun 15, 1985, pes 31.

Klostu 300 yia bihain, ol samting nogut i save kamap long pasin bilong sakim ol lo bilong God, em i kamap ples klia gen. Long Sekem, Josua i stretim wok bilong mekim wanpela kibung em i wanpela bikpela samting tru i bin kamap long lain Israel. Tingim samting i bin kamap. Winim wan milion man, meri, pikinini​—⁠ol i bilong 6-pela lain bilong Israel​—⁠ol i sanap klostu long maunten Gerisim. Long hap i go long dispela ples daun, narapela 6-pela lain bilong Israel i sanap klostu long maunten Ebal.a Daunbilo, klostu long bokis kontrak na namel long tupela bikpela lain manmeri bilong Israel, ol pris na Josua ol i sanap. Man! Bai yumi kirap nogut long lukim dispela samting!​—⁠Josua 8:​30-​33.

Yumi inap lukim het bilong dispela tupela maunten, em narapela i gutpela tru long lukim, na narapela nogat. Antap liklik long arere bilong maunten Gerisim i gat gutpela grinpela gras na graun i gat gris, tasol maunten Ebal i olsem ston tasol na i no gat gras samting long en. Ating nau bel bilong lain Israel i kirap tru na ol i wetim Josua i kirap mekim tok. Long dispela ples daun, taim man i toktok o i gat wanpela pairap, krai bilong en i save kam bek na ol inap harim gen.

Insait long dispela 4-pela o 6-pela aua samting em Josua i kaunim “olgeta tok bilong lo bilong Moses,” ol manmeri i mekim sampela tok. (Josua 8:​34, 35) Taim Josua i kaunim olgeta wan wan blesing, ating ol manmeri i sanap klostu long maunten Gerisim ol i tok, “Tru tumas, God i ken mekim olsem.” Na ol manmeri i sanap klostu long maunten Ebal, ol i mekim wankain tok taim ol i harim olgeta wan wan tok long God i ken bagarapim ol sapos ol i bikhet. Ating taim ol manmeri i lukim dispela maunten Ebal i olsem ston nating i no gat wanpela samting long en, dispela inap kirapim ol long tingim samting nogut bai painim ol sapos ol i no bihainim tok bilong God.

Josua i mekim tok lukaut olsem: “Sapos wanpela man i bagarapim nem bilong papamama bilong en, orait God i ken bagarapim dispela man.” Em nau, winim wan milion manmeri i bungim nek wantaim na tok: “Tru tumas, God i ken mekim olsem”! Orait Josua i wetim bikpela pairap bilong nek bilong ol i dai pastaim na nau em i tok moa olsem: “Sapos wanpela man i surikim mak bilong graun bilong wantok bilong en, orait God i ken bagarapim dispela man.” Em nau, 6-pela lain wantaim planti manmeri bilong ol narapela lain i stap wantaim ol, ol i singaut gen olsem: “Tru tumas, God i ken mekim olsem”! (Lo 27:​16, 17) Sapos yu bin i stap long dispela taim, ating yu no inap lusim tingting long dispela bung ol i bin mekim namel long tupela maunten, a? Ating bel bilong yu bai pilim tru olsem yu mas bihainim tok bilong God, na ating dispela samting bai pas strong long tingting bilong yu.

Klostu long taim em i dai, Josua i bungim gen lain Israel long Sekem bambai ol i ken strongim tok promis ol i bin mekim. Em i tokim ol long mekim wanpela samting em olgeta man i mas mekim, olsem ol i mas makim wanem rot ol i laik bihainim. Em i tok: “Yupela i tingting gut nau. Bai yupela i lotu long husat?” Na em i tok moa: “Tasol mi wantaim famili bilong mi, mipela bai i lotu long Bikpela tasol.” (Josua 24:​1, 15) Ol dispela bikpela kibung i bin kamap long Sekem na i strongim bilip bilong ol, ating ol i pas tru long tingting na bel bilong ol Israel. Inap planti yia bihain long taim Josua i dai, ol Israel i bihainim pasin bilong em long i stap gut long God.​—⁠Josua 24:⁠31.

Orait, inap olsem 1,500 yia bihain, taim Jisas i malolo long ples kol klostu long maunten Gerisim, sampela gutpela toktok i kamap. Jisas i bin wokabaut longwe na skin bilong em i les, na em i sindaun long arere bilong hul wara bilong Jekop. Orait nau wanpela meri Samaria i kam, na em i karim botol wara. Jisas i tokim em long givim wara long em na bai em i ken dring. Meri hia i kirap nogut long tok bilong Jisas, long wanem, ol Juda i no save toktok wantaim ol Samaria, na ol i no inap tru long dring wara long ol botol wara bilong ol. (Jon 4:​5-9) Orait nau Jisas i mekim sampela tok moa na meri i kirap nogut moa yet long en.

Jisas i tok: “Olgeta man i dring long dispela wara hia, nek bilong ol bai i drai gen. Tasol sapos wanpela man i dring long dispela wara mi laik givim em, i no gat wanpela taim nek bilong en bai i drai gen. Nogat. Dispela wara mi laik givim em, em bai i kamap olsem hul wara insait long em. Na dispela wara bai i kamap kamap oltaim na givim em laip i stap gut oltaim oltaim.” (Jon 4:​13, 14) Yumi save, meri i laikim tru dispela tok promis, long wanem, i hatwok tru long kisim wara long dispela hul wara i daun moa. Na Jisas i tok, tru ol bikpela samting i bin kamap long Jerusalem na maunten Gerisim long bipo, tasol i no olsem ol man i mas i go long dispela tupela ples bilong lotuim God. God i tingim bel bilong man na pasin bilong em​—⁠em i no tingim ples man i stap long en na lotuim Em. Jisas i tokim meri: “Olgeta man i laik lotu tru bai ol i lotu long Papa long [spirit] na long pasin i tru. Na Papa i laikim tumas bai ol kain man olsem i mas lotu long em.” (Jon 4:​23) Ating dispela tok i mekim gut tru bel bilong meri! Em nau, dispela ples daun i kamap gen olsem ples bilong kirapim ol man long lotuim Jehova.

Long nau taun Nablus i stap klostu long ol pipia bilong taun Sekem bilong bipo. Maunten Gerisim na maunten Ebal i stap yet na i olsem bikpela mak bilong dispela ples daun, na ol i stap olsem tupela witnes bilong samting i bin kamap bipo. Hul wara bilong Jekop i stap long as bilong dispela tupela maunten, na long nau ol man inap i go lukim. Taim yumi tingim ol samting i bin kamap long dispela hap long bipo, dispela i kirapim gen tingting bilong yumi, olsem em i bikpela samting tru long holimpas pasin bilong lotu tru long God, olsem Josua na Jisas i skulim yumi long mekim.​—⁠Skelim wantaim Aisaia 2:⁠2, 3.

[Futnot]

[Piksa Kredit Lain long pes 31]

Pictorial Archive (Near Eastern History) Est.