Wanpela Rot i Gutpela Moa

OL WITNES BILONG JEHOVA i tingting planti long ol man i wok long lusim ol samting bilong spirit, na ol i mekim pasin pamuk, na ol i no klia long ol i mas bilip long wanem samting. Long dispela as, sampela taim ol man i tok ol Witnes i bilong lain fandamental. Tasol olsem wanem? Dispela tok i stret? Nogat, em i no stret. Tru, ol i holim ol strongpela bilip, tasol ol i no bihainim ‘bilip fandamental’ olsem ol man long nau i save tingim dispela tok. Ol i no save subim ol bikman politik long bihainim tingting bilong ol, na ol i no save mats na kros pait wantaim ol man i no wanbel wantaim ol. Ol i painim pinis wanpela rot i gutpela moa. Ol i bihainim pasin bilong Gopas bilong ol, em Krais Jisas.

Ol Witnes Bilong Jehova i bilip strong olsem tok i tru i stap, na yumi inap painim long Baibel. (Jon 8:32; 17:17) Tasol Baibel i skulim ol Kristen long ol i mas mekim gut long ol man, na bihainim gutpela pasin, na pasin isi, na isi long ol man​—⁠em ol pasin i pasim ol long strong tumas long subim ol narapela man long bihainim tingting bilong ol. (Galesia 5:​22, 23; Filipai 4:⁠5) Long Buk Jems long Baibel, Jems i kirapim ol Kristen long kisim “kain gutpela tingting na save i kam long God,” em pasin bilong ‘bihainim klinpela tingting, na stap wanbel wantaim ol arapela, na isi long ol, na harim tok bilong ol arapela man, na sori tru long ol arapela na mekim gutpela pasin long ol.’ Na Jems i tok moa: “Sapos yumi stap wanbel, dispela em i olsem yumi planim ol pikinini kaikai. Na long dispela pasin bilong wanbel, ol stretpela pasin i kamap long laip bilong yumi olsem gutpela kaikai i kamap long gaden.”​—⁠Jems 3:​17, 18.

Ol Witnes Bilong Jehova i tingim olsem Jisas i bin i gat bikpela tingting long tok i tru. Em i tokim Pontius Pailat: “Mama i karim mi na mi kam long dispela graun bilong mekim wanpela wok tasol, em bilong autim tok tru, bai olgeta manmeri i ken harim.” (Jon 18:37) Jisas i strong long autim tok i tru, tasol em i no save subim ol narapela long bihainim ol bilip bilong em. Nogat. Em i mekim ol tok bilong kirapim tingting na bel bilong ol. Em i save, Papa bilong em long heven, em God i “gutpela na i stretpela olgeta,” em bai skelim olsem wanem na long wanem taim em bai pinisim ol pasin giaman na pasin i no stret long graun. (Song 25:⁠8) Olsem na Jisas i no bin wok long daunim ol man i no wanbel wantaim em. Tasol ol bikman bilong lotu Juda i bin wok strong long daunim Jisas.​—⁠Jon 19:​5, 6.

Ol Witnes Bilong Jehova i holimpas strong ol bilip bilong lotu na ol lo bilong stretpela pasin. Olsem aposel Pol, ol i bilip strong olsem i gat “wanpela Bikpela tasol, na wanpela pasin bilong bilip, na wanpela baptais tasol.” (Efesus 4:⁠5) Na tu ol i tingim tok bilong Jisas olsem: “Dua i go long ples bilong kisim laip, em i liklik tru, na rot i go long dispela ples em i hat tru long bihainim. Na wanpela wanpela manmeri tasol i save lukim na bihainim dispela rot.” (Matyu 7:​13, 14) Tasol ol i no wok long subim ol narapela long bihainim ol bilip bilong ol. Nogat. Ol i bihainim pasin bilong Pol na “singaut” long olgeta man i laik, long “kamap wanbel wantaim God.” (2 Korin 5:20) Dispela rot i gutpela moa. Em rot God i laik yumi mas bihainim.

Tasol bilip fandamental em ol lotu i bihainim long nau, em i narapela kain olgeta. Ol lain fandamental i mekim wok long kain kain rot​—⁠na pasin bilong kros pait tu​—⁠bambai ol i ken subim ol man long bihainim ol lo bilong ol. Taim ol i mekim olsem, ol i insait tru long ol wok politik. Tasol Jisas i tok, ol disaipel bilong em ol “i no man bilong dispela graun.” (Jon 15:19; 17:16; Jems 4:⁠4) Bilong bihainim dispela tok, ol Witnes Bilong Jehova i save klia olgeta long ol kros bilong wok politik. Na tu, olsem wanpela nius bilong Itali (Fuoripagina) i tok, ol “i no save subim wanpela man long mekim wanpela samting; em laik bilong wan wan long kisim o sakim tok bilong ol.” Wanem samting i kamap long dispela pasin ol i mekim? Dispela gutpela tok bilong Baibel ol Witnes i autim long bel isi em i pulim kain kain man, na sampela em bipo ol i bihainim bilip fandamental.​—⁠Aisaia 2:​2, 3.

Taim Ol Man i Bihainim Ol Stretpela Lo Tasol

Ol Witnes i save, yumi manmeri i no inap stretim ol hevi em ol lain fandamental i tingting planti long en. Yu no inap subim wanpela man long bilip long God o long bihainim ol bilip bilong yu yet. Bipo ol man i bin ting ol inap mekim olsem, na dispela i kirapim ol long mekim ol pasin nogut tru i winim olgeta taim bipo, olsem ol Pait Holi, na ol Kot Bilong Misin, na ol pait ol i mekim bilong subim ol Indian bilong Amerika long “tanim bel.” Tasol sapos yu bilip strong long God, bai yu amamas long lusim olgeta samting long han bilong em.

Baibel i tok, God i bin larim hap taim long ol manmeri long ol i ken brukim ol lo bilong em na kamapim pen na hevi. Tasol dispela hap taim klostu nau bai pinis. Jisas i stap King pinis long Kingdom bilong God long heven, na klostu nau dispela Kingdom bai kirap na rausim ol gavman bilong ol man na em bai bosim ol manmeri. (Matyu 24:​3-14; KTH 11:​15, 18) Bihain Paradais bai kamap long olgeta hap bilong graun, na bel isi na stretpela pasin bai pulap long en. Long dispela taim bai ol man i save tru long olsem wanem ol i mas lotu long God tru. “Ol stretpela man bai i kisim graun God i givim ol, na bai ol i stap oltaim long en.” (Song 37:29) Ol kain pasin olsem pasin sori, stretpela pasin, na gutpela pasin bai stap oltaim na win tru, na dispela bai helpim ol manmeri i bihainim tok.

Man bilong raitim Song em i tingim dispela taim bihain na i stori long en olsem: “Long dispela taim bai ol manmeri i laikim tru ol arapela na mekim gutpela pasin long ol. Na bai ol i stap stret na bel isi na sindaun gut wantaim. Long graun bai ol manmeri i bihainim tru Bikpela, na God long heven bai i mekim ol i kamap stretpela. Bikpela bai i helpim mipela long sindaun gut na ol samting mipela i mekim bai i kamap gutpela. Na graun bilong mipela bai i karim planti kaikai. Bikpela bai i mekim ol manmeri i bihainim stretpela pasin na dispela bai i redim rot bilong em i kam.”​—⁠Song 85:​10-13.

Tru yumi no inap senisim ol pasin i kamap nau long graun, tasol yumi wan wan i ken wok nau long kisim ol pasin em God i laikim. Long dispela rot bai yumi wok long kamap kain man na meri em God bai orait long ol i ken stap long dispela nupela graun na lotu long em. Olsem bai yumi insait long dispela lain em man bilong raitim Song i toktok long en: “Tasol ol manmeri i daunim nem bilong ol yet, bai God i givim olgeta graun long ol. Bai ol i sindaun gutpela tumas na amamas i stap.” (Song 37:11) God i save helpim na mekim gut long ol manmeri i bihainim laik bilong em, na em i promis long ol gutpela samting tru bai painim ol long bihain. Aposel Jon i tok: “Dispela graun bai i pinis, na olgeta pasin bilong dispela graun, . . . ol tu bai i pinis wantaim. Tasol man i bihainim tok bilong God, em bai i stap oltaim.”​—⁠1 Jon 2:⁠17.

[Piksa long pes 7]

Ol Witnes Bilong Jehova i singautim olgeta man long kisim save long gutnius bilong Kingdom bilong God

[Piksa Kredit Lain long pes 6]

Lam long pes 3, 4, 5, na 6: Printer’s Ornaments/by Carol Belanger Grafton/Dover Publications, Inc.