Ripot Long Wok Bilong Kingdom
“Lait Bilong Yupela i Mas Lait Long Ai Bilong Ol Manmeri”
LONG tok bilong em antap long maunten, Jisas i tokim ol disaipel: “Yupela i olsem lait bilong graun.” Na em i tok moa olsem: “Lait bilong yupela i mas lait long ai bilong ol manmeri, bai ol i lukim ol gutpela pasin yupela i mekim, na bai ol i litimapim nem bilong Papa bilong yupela i stap long heven.”—Matyu 5:14-16.
Long Itali ol man i luksave long ol gutpela pasin bilong ol Witnes Bilong Jehova. Olsem: Taim ol i go long ol kibung distrik, gutpela pasin bilong ol i givim biknem long God, olsem ol ripot i stap daunbilo i kamapim:
▪ Inap planti yia wanpela meri long Terni, long Itali, i helpim pikinini meri bilong em long lukautim wanpela haus kaikai i stap klostu long stediam long dispela taun. Em i tok: “Mi lukim pasin bilong ol lain i kam long ol kibung bilong ol Witnes Bilong Jehova long dispela stediam i narakain tru long pasin bilong ol man i kam lukim ol pilai soka. Ol Witnes i pasim klos i stret na ol i bihainim stretpela pasin na ol i tingim gut ol narapela. Planti taim mi save askim mi yet: Olsem wanem ol i ken pas gut wantaim maski ol i bilong ol narapela narapela lain.
“Wanpela de wanpela Witnes i pasim mi long rot na i askim mi sapos mi save long nem bilong God. Mi no bin save, tasol mi save ol Witnes Bilong Jehova i gutpela lain, olsem na mi orait long em i ken kam lukim mi. Mi gat askim olsem: Ol man i dai pinis, wanem samting i painim ol? Na em i bekim dispela askim long Baibel. Mi no wet, mi orait long stadi long Baibel, na tupela wik bihain mi kirap i go long ol miting.
“Pastaim pikinini meri bilong mi i birua long mi, tasol mi sanap strong na mekim gutpela pasin na dispela i senisim tingting bilong em. Nainpela mun i go pinis mi bin kirap long stadi. Nau pikinini bilong mi na man bilong em i save mekim ol gutpela tok long ol Witnes i save kam kaikai long haus kaikai bilong ol. Na mi baptais pinis long wanpela kibung long dispela stediam.”
▪ Bihain long wanpela kibung long Roseto delyi Abrutsi, wanpela maneja bilong wanpela ples bilong sanapim ol haus sel samting i tok: “Mi lukim olsem ol Witnes Bilong Jehova i save bihainim stretpela pasin long olgeta samting ol i mekim. Long wik i go pinis, mi gat 40 Witnes i stap long hap bilong mi, na ol i no bin kamapim wanpela hevi. Nogat tru. Ol save kam na tokim mi sapos sampela moa i kam stap wantaim ol long trela o haus sel bilong ol. Ol narapela i no save mekim olsem. Mi save tru, ol i gutpela lain.”
▪ Bihain long dispela kibung yet, wanpela maneja bilong hotel i tok: “Ol Witnes Bilong Jehova i save stap bel isi tru. Ol i no save mekim nabaut, na ol i save go slip kwik. Ol i save mekim gut long ol man, na ol i bihainim gutpela na stretpela pasin. Em bai gutpela tru sapos olgeta man i kain olsem ol. Ol narapela i save stilim olgeta samting—ol pot plaua, ol plet bilong putim pipia bilong smok, na toilet pepa na suga tu! Yupela i no bin mekim kain samting olsem. Long apinun taim ol pikinini bilong yupela i kisim ol aiskrim long bokis ais, mi no save tingting long i go sekim bilong save ol i bin kisim wanem samting. Ol i save kaunim hamas samting ol i kisim na ol i save kam baim hariap. Mi bilip tru long ol. Em bai gutpela tru sapos ol narapela i kain olsem ol! Sapos olgeta man i kam slip long hotel bilong mi em ol Witnes Bilong Jehova mi bai amamas tru.”
Long Itali ol man i save gut long ol Witnes Bilong Jehova, wankain olsem long ol narapela hap bilong graun. Ol i “wokabaut stret namel long ol haiden,” olsem na dispela i givim biknem long trupela God, em nem bilong em i stap long ol.—1 Pita 2:12.