“Bihainim Stret Ol Gutpela Pasin” Bilong Stretim Ol Samting
1 Bilong kibung distrik i ken kamap gutpela, ol man i mas mekim planti kain kain wok. Komiti bilong kibung i painim na stretim gutpela ples bilong mekim kibung na ol ples slip. Ol wan wan brata na famili, ol yet bai stretim rot bilong go long kibung na painim ples slip. Na ol kongrigesen i stretim rot bambai ol volantia bilong ol i ken helpim planti dipatmen bilong kibung. Ol i laik bai olgeta samting i wok gut na i “bihainim stret ol gutpela pasin.”—1 Ko. 14:40.
2 Taim yu stretim ol samting bilong yu bambai yu ken insait long wok bilong redim kibung, tingim olsem wok bilong stretim ol samting bilong kibung i save kisim planti mun. Planti brata i lusim bikpela hap taim bilong stretim ol samting bilong kibung. Olsem: Rentim hap bilong mekim kibung, bungim ol masin samting, na kisim ol volantia. Ol dispela wok i mekim na olgeta bai kisim ol gutpela samting bilong spirit. Yumi ken mekim wanem bilong helpim dispela wok?
3 Bihainim Gutpela Pasin Long Ples Slip: Long olgeta yia planti brata sista i save go longwe tru bilong i go long kibung. Ol brata sista i laik bai Dipatmen Bilong Rum Slip i ken painim ples slip bilong ol, ol i mas toksave hariap long dispela dipatmen. Dispela dipatmen bai salim wanpela pepa long olgeta wan wan kongrigesen na grup i stap longwe em ol bai kam long kibung, na bai ol i ken raitim nem bilong ol. Kuskus bilong kongrigesen o brata i lukautim grup bai skelim gut husat ol pablisa i sot long rum slip. Em i mas skelim ol samting ol pablisa i mas kisim, na raitim nem bilong ol pablisa na ol Baibel-stadi i wok long kamap strong. Taim ol brata i laik kisim wanpela haus slip bilong skul o ol narapela haus bilong putim ol brata sista long en, ol i save toktok gut wantaim lain i lukautim haus bambai pe bilong rum slip i liklik na dispela bai helpim ol pablisa. Dispela ples slip i no bilong helpim ol wanblut ausait i gat laik long kisim rum slip i no gat bikpela pe. Taim ol pablisa i givim nem bilong ol long kuskus bilong kongrigesen, ol i mas tingim olsem ol i mas baim rum slip inap stret olsem pe ol i bin makim.
4 Yumi mas strong tru long wok gut wantaim ol bosman bilong ol ples slip na bihainim ol lo ol i putim bilong kukim kaikai, yusim rum waswas, na toilet. Yumi no laik mekim ol samting i nogutim nem bilong lain bilong Jehova. Yumi no ken kisim ol sitbet samting o narapela samting bilong dispela haus slip, dispela em pasin stil. Na taim yumi askim long kisim ples slip, yumi no ken giaman, yumi mas tokaut stret long hamas man o meri bai slip long dispela rum. Yumi Kristen, olsem na yumi mas mekim stretpela pasin long olgeta taim. Sapos yumi slip long haus bilong ol brata yumi mas mekim wankain pasin, yumi no ken ting em haus bilong brata na yumi mekim nabaut. Yumi amamas long gutpela pasin ol i mekim, na dispela i mas kirapim yumi long helpim ol long baim kaikai na ol narapela samting ol i givim long yumi.
5 Tingim Gutpela Samting i Kamap: Bihain long kibung long wanpela kantri, maneja bilong ples bilong putim ol trela samting i tok: “Mi lukim olsem ol Witnes Bilong Jehova i save bihainim stretpela pasin long olgeta samting ol i mekim. Long las wik, mi gat 40 Witnes i stap long hap bilong mi, na ol i no bin kamapim wanpela hevi. Ol tasol i save kam na tokim mi sapos sampela moa i kam i stap wantaim ol long trela o haus sel bilong ol. Mi save tru, ol i gutpela lain tru.” Em bai gutpela tru sapos wankain samting i painim olgeta lain em yumi rentim haus slip bilong ol! Dispela bai litimapim tru nem bilong Jehova!
6 Ol Rot Bilong Wok Gut Wantaim: I gat ol samting yumi ken mekim bilong wok gut wantaim Dipatmen Bilong Rum Slip. (1) Toksave long kuskus bilong kongrigesen na em bai toksave long Dipatmen Bilong Rum Slip long yu laik kisim ples slip. No ken putim nem bilong kisim planti rum slip, raitim stret hamas rum yu mas kisim. (2) Taim yu putim nem pinis bilong kisim rum slip, yu no ken putim nem bilong kisim rum slip long narapela hap tu. Sapos planti bilong yumi i senisim tingting, dispela inap mekim na ol narapela brata i mas givim sampela mani moa bilong inapim pe bilong ol rum slip. Taim yumi ‘tok Yes, yumi mas truim dispela tok Yes’! (Mt. 5:37, NW ) (3) Taim yumi lusim rum slip, rum i mas klin na ol samting i mas stap stret.
7 Yumi ol wokman bilong God Jehova, olsem na yumi gat rot bilong kamapim pasin bilong em long ol samting yumi mekim. Yumi mas mekim olsem tu long taim yumi stretim rot bilong go long ol kibung em nem bilong God i stap long en. Tingim, God “i save mekim stret olgeta wok bilong en. Em i no save mekim ol samting i paul nabaut.” (1 Ko. 14:33) Olsem na yumi mas i gat bikpela laik long olgeta man i ken luksave long dispela pasin bilong Jehova taim ol i lukim ol samting yumi mekim long “Ol Tisa Bilong Tok Bilong God” Kibung Distrik. Gutpela sapos ol man i gat gutpela bel ol inap lukim olsem lain bilong Jehova i “bihainim stret ol gutpela pasin bilong lotu.”—Sng. 68:26.