2007 “Bihainim Krais!” Kibung Distrik Bilong Ol Witnes Bilong Jehova
1 Moses i tokim olgeta lain Israel na ol manmeri bilong ol narapela ples, long bung wantaim long olgeta 7-pela yia bilong harim ol man i ritim tok bilong Lo long ol. Bilong wanem ol i mas bung? Ol i mas mekim olsem na ‘bai olgeta i ken harim na bihainim gut olgeta dispela tok.’ (Lo 31:10-12) Jehova i luksave olsem lain bilong em i mas bung wantaim olsem ol bikpela lain. Long pinis bilong yia bai yumi bung gen bilong mekim ol tripela de “Bihainim Krais!” Kibung Distrik.
2 Nau em taim bilong kirap mekim ol samting, olsem bungim mani bilong baim rot, kaikai, na ples slip long taim bilong kibung. Olsem wanem? Yu mas askim bos long kisim malolo long wok? Olsem wanem yu ken helpim ol Baibel sumatin o famili i no bilip long kam long kibung wantaim yu? I gat sampela long kongrigesen husat i mas kisim helpim bilong i go long kibung? Ol tok hia bai helpim yu long redim ol samting.
3 Kam Long Olgeta Tripela De: Jehova i givim planti kaikai bilong spirit long lain bilong em. (Ais. 25:6) Wanpela samting olsem em bikpela kaikai bilong spirit yumi kisim long ol kibung bilong yumi long olgeta yia. Mipela i lukim olsem lain i kam long Fraide i no planti tumas olsem long narapela tupela de. Putim mak olsem yu bai kam long olgeta tripela de long dispela gutpela kibung em oganaisesen bilong Jehova i bin redim bilong yumi! Sapos yu mas askim bos long kisim malolo long wok, beten long dispela samting. Na taim yu kisim save pinis long det bilong kibung distrik bilong yu, orait “strongim bel” na toktok wantaim bos bilong yu. (1 Te. 2:2; Neh. 2:4, 5) Ating i gutpela sapos yu tokim em olsem kibung distrik i save kamap long olgeta yia em i hap bilong wok lotu bilong yu. Sapos yu mekim olsem hariap, dispela inap helpim bos long stretim ol wok na bai em i ken orait long yu i go long kibung.
4 Toksave Long Ol Baibel Sumatin na Famili: Em bai gutpela samting tru sapos ol Baibel sumatin bilong yu i kam wantaim yu long kibung, na pilim gutpela pasin bilong lain brata Kristen bilong yumi “long bikpela bung bilong lotu”! (Sng. 22:25) Toksave hariap long ol bambai ol i ken makim taim bilong kam long kibung. Tokim ol long as na yu yet i amamas long go long ol kibung. Yu ken redim ol sumatin na bai ol i ken save ol kibung i wanem kain na soim ol vidio bilong yumi i stori long ol kibung i bin kamap bipo, kain olsem vidio United by Divine Teaching. Toksave long famili i no bilip long wanem taim yu bai go long kibung. Ating ol i ken stretim rot bilong kam lukim drama o stap wanpela de long kibung wantaim yu.
5 Helpim Ol Brata na Sista: Aposel Pol i tokim ol Kristen husat i gat planti mani long “mekim planti gutpela pasin bilong helpim ol arapela manmeri. Oltaim ol i mas givim planti samting long ol manmeri i sot.” (1 Ti. 6:17, 18) Yumi ken kamapim dispela gutpela pasin helpim em Pol i strongim, sapos yumi tingim i stap bilong ol lapun na ol lain i gat bikpela sik, ol lain i mekim fultaim sevis, ol famili i gat papa o mama tasol, na ol narapela insait long kongrigesen husat i mas kisim helpim bilong i go long kibung. Ol wanblut i insait long tok i tru i go pas long helpim ol dispela lain, tasol ol elda na ol narapela inap bihainim gutpela tingting na helpim ol lain i mas kisim helpim.—Ga. 6:10; 1 Ti. 5:4.
6 Ol Pablisa Bai Tilim Gen Pepa Bilong Singautim Ol Man Long Kibung: Long las yia long olgeta hap bilong graun, yumi bin tilim pepa i toksave long “De Bilong Kisim Bek Yumi i Klostu!” Kibung Distrik, na dispela i bin kirapim tru ol man i laik harim tok. Ol man i bin kisim dispela pepa na i kam long kibung, em namba wan taim ol i luksave long gutpela kaikai bilong spirit ol Witnes Bilong Jehova i save kisim. (Ais. 65:13) Ol i bung wantaim gutpela lain brata Kristen bilong yumi i stap wanbel wantaim. (Sng. 133:1) Bilong helpim planti man long kam long “Bihainim Krais!” Kibung Distrik, long olgeta hap bilong graun bai yumi tilim gen pepa bilong singautim ol man i kam long kibung. Long Wok Kingdom i kamap sampela mun bihain, mipela bai kamapim sampela tok moa long pasin bilong mekim dispela wok long kantri bilong yumi, taim yumi wok long i go klostu long taim bilong ol kibung.
7 Taim yumi lukim “De bilong Krais em i kam klostu,” ol bung bilong lain bilong God i bikpela samting moa. (Hi. 10:25) Long ol kibung Kristen bilong yumi, wokboi i gat gutpela tingting i givim yumi ol tok i helpim yumi long “bihainim gut olgeta tok” Jehova i laik bai yumi mas bihainim. (Lo 31:12) Kirap nau long stretim rot bilong go long olgeta tripela de bilong “Bihainim Krais!” Kibung Distrik, na long dispela rot bai yu kisim helpim long ol tok bilong Baibel na long pasin bilong bung wantaim ol brata!
[Askim Bilong Stadi]
1, 2. (a) Olsem wanem Moses i kirapim lain Israel long kisim helpim long pasin bilong bung wantaim? (b) Yumi mas kirap mekim wanem ol samting long nau?
3. (a) Olsem wanem tok bilong Aisaia 25:6 i wok long kamap tru long nau? (b) Olsem wanem long namba bilong lain i save kam long Fraide long kibung? Yumi wan wan i mas mekim wanem?
4. Yu ken mekim wanem bilong helpim ol Baibel sumatin na famili i no bilip long kam long kibung?
5. Olsem wanem yumi ken kamapim pasin helpim em 1 Timoti 6:18 i tok long en?
6. Bihain long sampela mun, bai yumi mekim wanem spesel wok?
7. (a) Bilong wanem ol bung bilong lain bilong Jehova i bikpela samting tru long taim bilong yumi? (b) Yumi olgeta wan wan i ken mekim wanem long nau?
[Blok long pes 3]
Ol Det na Ples Bilong Kibung
Novemba 23-25, 2007
Port Moresby (Inglis)
Novemba 30– Disemba 2, 2007
Agi (Hiri Motu)
Banz (Tok Pisin)
Wewak (Tok Pisin)
Disemba 7-9, 2007
Port Moresby (Tok Pisin, tok ples Sain)
Kiunga (Tok Pisin)
Disemba 14-16, 2007
Port Moresby (Hiri Motu)
Kokopo (Tok Pisin)
Lae (Tok Pisin)